Disyembre 13–19

Ang Pamilya: Usa ka Pamahayag ngadto sa Kalibutan

“Ang Pamilya Mahinungdanon ngadto sa Plano sa Tiglalang”

Samtang magtuon ka sa “Ang Pamilya: Usa ka Pamahayag ngadto sa Kalibutan” niini nga semana, ikonsiderar ang mga kamatuoran nga makasuporta sa mga sakop sa klase sa ilang mga paningkamot sa paglig-on sa ilang mga panimalay ug mga pamilya.

Irekord ang Imong mga Impresyon

Dapita ang Pagpaambit

Aron sa pag-awhag sa mga sakop sa klase sa pagpaambit sa unsay ilang nakat-unan niini nga semana gikan sa ilang pagtuon sa pamahayag mahitungod sa pamilya, mahimo nimo silang hangyuon sa pagpili og bisan hain nga parapo ug i-summarize sa usa ka kapahayag kon unsa ang gitudlo niana nga parapo.

Itudlo ang Doktrina

“Ang pamilya mahinungdanon ngadto sa plano sa Tiglalang.”

• Ang Simbahan nailhan sa paghatag niini og gibug-aton sa mga pamilya, ug ang pamahayag mahitungod sa pamilya mipadayag sa doktrinal nga mga rason niana nga paghatag og gibug-aton. Aron sa pag-awhag og diskusyon mahitungod niini, mahimo nimong dapiton ang mga sakop sa klase sa paghunahuna nga adunay nangutana nila nganong gipanghimug-atan pag-ayo sa Simbahan ang mga pamilya. Unsa nga mga kamatuoran gikan sa pamahayag ang mahimo natong ipaambit aron sa pagtubag sa pangutana sa tawo?

• Usa ka rason nga ang pamahayag mahitungod sa pamilya importante kaayo mao nga gipanghimatud-an niini pag-usab ang mga kamatuoran nga giataki sa atong panahon. Unsa nga mga kamatuoran diha sa pamahayag ang nagtabang kanato nga dili malingla sa sayop nga mga ideya mahitungod sa mga pamilya sa kalibutan karon? Sa unsang paagi kini nga mga kamatuoran makaapekto sa mga pagpili nga atong himoon? Ang pamahayag ni Presidente Dallin H. Oaks diha sa “Dugang nga mga Kapanguhaan” mahimong makatabang sa pagtubag niini nga pangutana.

  

  Ang mga ginikanan kinahanglang mopadako sa ilang mga anak diha sa gugma ug pagkamatarung.

“Ang kalipay sa kinabuhi diha sa pamilya labaw nga makab-ot kon gipasikad diha sa mga pagtulun-an ni Ginoong Jesukristo.”

• Ang paghisgot sa mga baruganan sa parapo sayis ug siyete sa pamahayag mahitungod sa pamilya mahimong makatabang sa mga sakop sa imong klase nga makakaplag og mas dakong kalipay diha sa ilang mga relasyon sa pamilya. Ikonsiderar ang paglista sa mga baruganan diha sa pisara ug ang pagdapit sa mga sakop sa klase sa pagpili og usa ka barunganan nga hisgutan nga magparis. Mahimo silang mogamit og mga pangutana nga sama niini aron makagiya sa ilang mga diskusyon: Unsa nga mga ehemplo niini nga baruganan ang atong nakita diha sa kinabuhi sa pamilya? Sa unsang paagi ang pagsunod niini nga baruganan mosangput sa kalipay diha sa atong mga pamilya? Sa unsang paagi ang pagsunod niini nga baruganan makatabang sa paghimo sa Manluluwas nga mao ang pundasyon sa atong kinabuhi sa pamilya? Unsa nga mga kasulatan ang tingali makatabang sa atong mga pamilya nga mas maayong makasabut niini nga baruganan? (Ang mga sakop sa klase mahimong mangita og mga kasulatan gamit ang Giya ngadto sa mga Kasulatan [scriptures.ChurchofJesusChrist.org].) Ang matag paris mahimo dayong mopaambit sa unsay ilang nakat-unan diha sa klase.

  Hatagig gibug-aton nga bisan unsa pa ang kasamtangang kahimtang sa pamilya, mahimo kitang maningkamot sa pagtukod og mahangturong pamilya diha sa pundasyon sa Manluluwas ug sa Iyang ebanghelyo.

“Kami nagtawag sa may kapangakohan nga mga lumulupyo … sa pag-awhag sa mga tawo sa paghimo niadtong mga butang nga gihimo sa pagpadayon ug sa paglig-on sa pamilya.”

• Unsaon nimo sa pagtabang ang mga sakop sa imong klase nga makasabut sa ilang responsibilidad sa pagsuporta sa mga kamatuoran diha sa pamahayag mahitungod sa pamilya? Aron sa pagsugod sa diskusyon, mahimo nimong hisgutan kon unsa ang nakat-unan sa mga sakop sa klase gikan sa ulohan sa pamahayag. Unsa man ang usa ka pamahayag? Unsay nakapahimong kwalipikado sa Unang Kapangulohan ug Konseho sa Napulog Duha ka mga Apostoles sa pag-isyu og usa ka pamahayag ngadto sa kalibutan kalabut sa mga pamilya? Ang mga sakop sa klase mahimong molista sa unsay ilang gikonsiderar nga maoy nag-unang mga mensahe sa pamahayag (awhaga sila sa paghisgot sa piho nga mga tudling). Dayon mahimo silang maghisgot og mga paagi sa pagtuboy niini nga mga mensahe diha sa ilang komunidad o nasud. Ang mensahe ni Sister Bonnie L. Oscarson nga “Mga Tigpanalipod sa Pamahayag bahin sa Pamilya” naglangkob og mga ehemplo nga mahimo ninyong maribyu og dungan isip klase (Liahona, Mayo 2015, 14–17).

Dugang nga mga Kapanguhaan

Mga pamilya diha sa plano sa Dios.

Si Presidente Dallin H. Oaks mitudlo:

“Ang mga Santos sa Ulahing mga Adlaw kinsa nakasabot sa plano sa Dios sa kaluwasan adunay talagsaong panglantaw sa kalibutan nga makatabang kanila sa pagkakita sa katuyoan sa mga sugo sa Dios, ang dili mausab nga kinaiyahan sa Iyang gikinahanglang mga ordinansa, ug ang importanting papel sa atong Manluluwas, si Jesukristo. Ang Pag-ula sa atong Manluluwas nagbawi kanato gikan sa kamatayon ug, depende sa atong paghinulsol, magluwas kanato sa mga sala. Uban nianang panglantaw sa kalibutan, ang mga Santos sa Ulahing mga Adlaw adunay talagsaon nga mga prayoridad ug mga buluhaton ug napanalanginan og kalig-on aron sa paglahutay sa mga kasagmuyo ug kasakit sa mortal nga kinabuhi. …

“Ang plano sa ebanghelyo nga pagasundon sa matag pamilya aron maandam sa kinabuhing dayon ug kahimayaan gilatid sa 1995 nga pamahayag sa Simbahan, ‘Ang Pamilya: Usa ka Pamahayag ngadto sa Kalibutan.’ Ang mga pamahayag niini, sa tinuod, klaro kaayo nga lahi gikan sa kasamtangan nga mga balaod, binuhatan, ug adbokasiya sa kalibutan diin kita nagpuyo. Sa atong panahon, ang kalainan nga labing makita mao ang pagpakig-ipon nga walay kaminyoon, kaminyoon sa sama og sekso, ug pagpadako sa mga bata nga nalambigit sa maong mga relasyon. Kadtong kinsa wala motuo o mangandoy sa kahimayaan ug labing nadani sa mga pamaagi sa kalibutan nagkonsiderar niining pamahayag sa pamilya nga usa lamang ka pamahayag sa lagda nga kinahanglang usbon. Sa pagtandi, ang mga Santos sa Ulahing mga Adlaw nagmatuod nga ang pamahayag bahin sa pamilya naghulagway sa matang sa relasyon sa pamilya diin ang labing importante nga bahin sa atong mahangturong kalamboan mahitabo” (“Ang Plano ug ang Pamahayag,” Liahona, Nob. 2017, 29–30).

Pagpalambo sa Atong Pagtudlo

Sunda ang ebanghelyo sa tibuok nimong kasingkasing. “Ang gahum moabut kon ang usa ka magtutudlo mibuhat sa tanan niyang mahimo aron sa pagpangandam, dili lamang sa indibidwal nga leksyon, apan sa pagpabilin sa iyang kinabuhi nga napahiuyon sa Espiritu” (Boyd K. Packer, Teach Ye Diligently [1975], 306).