Nativity in Copper and Umber, ni J. Kirk Richards

Disyembre 20–26

Pasko

Ang Dili Katupngan nga Gasa sa Balaang Anak sa Dios

Hinumdumi nga ang labing importante ug epektibo nga pagkat-on sa ebanghelyo sa mga sakop sa klase mahitabo diha sa ilang mga panimalay. Sa imong pagpangandam sa pagtudlo, ikonsiderar kon sa unsang paagi ang imong klase sa Sunday School makapalig-on sa ilang personal ug uban sa pamilya nga pagtuon.

Irekord ang Imong mga Impresyon

Dapita ang Pagpaambit

Sa unsang paagi ang pagtuon sa “Ang Buhi nga Kristo” (ChurchofJesusChrist.org) niini nga semana nakapanalangin sa mga sakop sa imong klase? Mahimo nimong ipaambit kini nga mga pulong gikan ni Presidente Jean B. Bingham, Kinatibuk-ang Presidente sa Relief Society, ug dayon dapita ang mga sakop sa klase sa paghisgot og bisan unsang susama nga mga kasinatian nga aduna sila: “Samtang akong natun-an ang kinabuhi ug mga pagtulun-an ni Jesukristo nga mas may tumong ug misag-ulo sa ‘Ang Buhi nga Kristo,’ ang akong pasalamat ug gugma alang sa atong Manluluwas mitubo. Ang matag sentence nianang dinasig nga dokumento naglangkob og wali ug nakapadugang sa akong pagsabut sa Iyang balaang mga tahas ug yutan-ong misyon. Unsay akong nakat-unan ug gibati sulod niining panahon sa pagtuon ug paghunahuna naghimatuod nga si Jesus sa tinuoray ‘mao ang kahayag, ang kinabuhi, ug ang paglaum sa kalibutan’” (“Nga ang Imong Hingpit nga Kalipay Mapuno,” Liahona, Nob. 2017, 86).

Itudlo ang Doktrina

“Walay lain nga adunay labaw ka mahinungdanon nga impluwensya.”

• Ang mga sakop sa klase mahimong mobasa sa unang parapo sa “Ang Buhi nga Kristo” ug mopaambit sa ilang mga hunahuna kon nganong ang impluwensya ni Jesukristo mas mahinungdanon kay ni bisan kinsa nga tawo. Unsa pa nga mga pamahayag diha sa “Ang Buhi nga Kristo” ang nagsuporta niini nga pangangkon? Dapita ang mga sakop sa klase sa pagpaambit kon sa unsang paagi Siya nakaimpluwensya kanila sa personal nga paagi.

• Nakasulay ba ang mga sakop sa klase sa pagpasabut ngadto sa usa ka tawo sa laing kultura nganong magsaulog sila sa Pasko? Tingali mahimo silang mopaambit sa ilang mga kasinatian. O mahimo nimong dapiton ang mga sakop sa klase sa paghunahuna nga gipangutana sila niini sa usa ka tawo kinsa dili pamilyar sa Kristiyanismo. Unsaon kaha nato sa pagtubag niini nga pangutana? Awhaga ang mga sakop sa klase sa pagribyu sa “Ang Buhi nga Kristo” nga maghunahuna niini nga pangutana, ug dapita ang pipila sa pagpaambit sa ilang mga hunahuna. Isip tibuok klase, mahimo usab ninyong basahon ang Lucas 2:10–14 o manganta og usa ka himno nga nagpahayag sa kalipay sa Pasko (sama sa “Kalipay sa Kalibutan,” Mga Himno, nu. 120) ug maghisgot nganong ang pagkatawo ni Kristo nagdala og “dakong kalipay.” Unsay atong mahimo aron sa pagdawat sa atong “Hari”?

  

  Kahayag sa Kalibutan, ni Howard Lyon

“Salamat ngadto sa Dios sa [Iyang] dili katupngan nga gasa.”

• Diha sa “Ang Buhi nga Kristo,” ang mga Apostoles mitawag sa Manluluwas nga usa ka “gasa” gikan sa atong Langitnong Amahan. Aron matabangan ang mga sakop sa klase nga makat-on pa kalabut niini nga gasa, mahimo nimong isulat sa pisara ang Pinaagi ni Jesukristo, ang Dios mihatag kanato sa gasa sa … ug dapita ang mga sakop sa klase sa pagsugyot og mga paagi sa pagkompleto niini nga kapahayag, base sa unsay ilang gibasa diha sa “Ang Buhi nga Kristo” ug sa pamahayag ni Presidente Russell M. Nelson diha sa “Dugang nga mga Kapanguhaan.” Unsaon nato sa pagdawat niini nga mga gasa? Mahimo nimong dapiton ang mga sakop sa klase sa pagpili og usa niini nga mga gasa ug maningkamot nga mas hingpit nga madawat kana nga gasa.

Dugang nga mga Kapanguhaan

Mga gasa nga gitanyag sa Manluluwas.

Namulong panahon sa Pasko, si Presidente Russell M. Nelson milista og upat ka gasa nga ihatag sa Manluluwas ngadto sa tanan kinsa andam nga modawat niini:

“Una, Siya mihatag kaninyo ug kanako sa walay kinutuban nga kapasidad sa paghigugma. Kana naglakip sa kapasidad sa paghigugma sa dili angay higugmaon ug niadtong kinsa dili lamang nga wala mahigugma kaninyo apan sa karon nagalutos kaninyo.

“Uban sa tabang sa Manluluwas, kita makakat-on sa paghigugma sama sa Iyang paghigugma. …

“Ang ikaduha nga gasa sa Manluluwas nga gitanyag kaninyo mao ang abilidad sa pagpasaylo. Pinaagi sa Iyang walay kinutuban nga Pag-ula, kamo makapasaylo niadtong kinsa nakapasakit kaninyo ug kinsa dili gayud modawat sa responsibilidad sa ilang pagkabangis nganha kaninyo. …

“Ang ikatulo nga gasa gikan sa Manluluwas mao ang paghinulsol. Kini nga gasa sa kanunay wala masabti pag-ayo. … Ang paghinulsol usa ka talagsaong gasa. Usa kini ka proseso nga dili angay nga kahadlokan. Usa kini ka gasa nga atong dawaton uban ang kalipay ug ang paggamit—gani sagupon—matag adlaw samtang kita magtinguha nga mahimong mas sama sa atong Manluluwas. …

“Ang ikaupat nga gasa gikan sa atong Manluluwas mao ang usa ka saad—usa ka saad sa kinabuhi nga walay katapusan. … Ang kinabuhing dayon mao ang matang ug kalidad sa kinabuhi nga gipuy-an sa Langitnong Amahan ug sa Iyang Hinigugma nga Anak. Sa dihang ang Amahan mitanyag kanato og walay katapusan nga kinabuhi, Siya nagpasabut, ‘Kon kamo mopili sa pagsunod sa akong Anak—kon ang inyong tinguha mao gayud aron mahimong mas sama Kaniya—nan sa katapusan kamo magpuyo sama sa among pagpuyo ug magdumala og mga kalibutan ug mga gingharian sama kanamo.’

“Kining upat ka talagsaong gasa makahatag nato og mas daghang kalipay kon kita modawat niini. Nahimo kining posible tungod kay si Jehova mikunsad aron moanhi sa yuta isip ang batang si Jesus” (“Upat ka Gasa Nga Gitanyag ni Jesukristo Kaninyo” [Debosyonal sa Pasko sa Unang Kapangulohan, Dis. 2, 2018], broadcasts.ChurchofJesusChrist.org).

Pagpalambo sa Atong Pagtudlo

Andama ang imong kaugalingon sa espirituhanong paagi. “Ang gamhanan nga pagtudlo sa ebanghelyo nagpasabut nga dili lang mag-andam og usa ka leksyon apan mag-andam sa atong kaugalingon. … Ang epektibong mga magtutudlo sa ebanghelyo—sa dili pa sila maghunahuna sa pagpuno sa oras sa klase—motutok sa pagpuno sa ilang mga kasingkasing sa Espiritu Santo” (Pagtudlo sumala sa Pamaagi sa Manluluwas, 12).