C. C. A. Christensen (1831–1912), Zion’s Camp [Kampo sa Zion], c. 1878, tempera diha sa muslin nga panapton, 78 × 114 ka pulgada. Brigham Young University Museum of Art, gasa sa mga apo ni C. C. A. Christensen, 1970

Septyembre 13–19

Doktrina ug mga Pakigsaad 102–105

“Human sa Dako nga Kalisdanan … Moabut ang Panalangin”

Samtang mangandam ka sa pagtudlo sa Doktrina ug mga Pakigsaad 102–5, paminaw sa mga pag-aghat sa Espiritu. Mahimong giyahan ka Niya ngadto sa mga baruganan nga wala hisguti niini nga outline nga makapanalangin sa mga tawo nga imong tudloan.

Irekord ang Imong mga Impresyon

Dapita ang Pagpaambit

Ang mga sakop sa klase mahimong mosulat og usa o duha ka bersikulo gikan sa Doktrina ug mga Pakigsaad 102–5 nga ilang nakita nga makahuluganon alang kanila sa personal nga paagi. Dayon mahimo silang makigbaylo og mga bersikulo ngadto sa laing sakop sa klase ug hisgutan sa usag usa kon unsay ilang nakat-unan gikan niini nga mga bersikulo.

Itudlo ang Doktrina

Doktrina ug mga Pakigsaad 103; 105

Ang atong mga pagsulay motudlo kanato og bililhon nga mga leksyon ug mohatag kanato ug kasinatian.

• Samtang ang mga sakop sa klase nagtuon sa mga seksyon 103 ug 105 niining semanaha, mahimong nakakaplag sila og mga baruganan nga makatabang kanato sa mga panahon sa pagsulay o oposisyon; tuguti sila sa pagpaambit sa unsay ilang nakaplagan. O mahimo nimo silang dapiton sa pagpangita sa ingon nga mga baruganan diha sa Doktrina ug mga Pakigsaad 103:5–7, 12, 36; 105:5–6, 9–12, 18–19 (tan-awa usab sa “Dugang nga mga Kapanguhaan”). Unsa ang gisugyot niini nga mga baruganan kon unsaon nato sa pagresponde kon mag-atubang og kalisud o kasagmuyo? Ang mga sakop sa klase tingali andam nga mopaambit og mga kasinatian diin ang mga panalangin miabut “human sa dako nga kalisdanan” (Doktrina ug mga Pakigsaad 103:12).

• Kon gibati nimo nga ang pipila ka background sa kasaysayan o personal nga mga istorya mahitungod sa Kampo sa Zion mapuslanon, mahimo nimong dapiton ang usa ka tawo sa pagribyu sa usa sa mosunod nga mga kapanguhaan sa dili pa magklase ug sa pagpaambit sa daklit sa unsay ilang nakat-unan: Mga Santos, 1:222–235; “Mga Tingog sa Pagpahiuli: Kampo sa Zion” (sa outline niining semanaha diha sa Dali, Sunod Kanako—Alang sa mga Indibidwal ug mga Pamilya). Kon makabiyahe kita pabalik sa panahon ug makaistorya sa Kampo sa Zion, unsa kaha ang atong isulti sa pag-awhag kanila? Unsa kaha ang ilang isulti sa pag-awhag kanato?

  

  Ang Kampo sa Zion mipundo diha sa daplin sa Suba sa Little Fishing, nga gipakita dinhi.

Doktrina ug mga Pakigsaad 104:11–18

Ang matag usa kanato “usa ka tinugyanan ibabaw sa yutan-on nga mga panalangin.”

• Aron matabangan ang mga sakop sa klase nga mahimong personal ang mga pagtulun-an diha sa Doktrina ug mga Pakigsaad 104:11–18, mahimo nimo silang dapiton sa paghanduraw nga isalig nila ang usa ka bililhong butang ngadto sa laing tawo. Unsay ilang isulti nianang tawhana? Unsa ang ilang mapaabut gikan kaniya? Ang mga sakop sa klase mahimo dayon nga mobasa sa Doktrina ug mga Pakigsaad 104:11–18 aron madiskubrihan unsa ang gisalig sa Ginoo nganhi kanato ug unsa ang Iyang gipaabut gikan kanato. Sa unsang paagi makaapekto kini nga mga bersikulo sa paagi nga maghunahuna kita sa kalibutan, sa atong mga panalangin, o sa mga tawo libut kanato?

• Aron matabangan ang mga sakop sa klase nga mas makasabut sa “pamaagi nga … ang Ginoo [mi]takda sa paghatag sa [Iyang] mga santos” (Doktrina ug mga Pakigsaad 104:16), mahimo nimo silang dapiton sa pagbasa sa Doktrina ug mga Pakigsaad 104:11–18 nga mangita kon unsay atong makat-unan mahitungod sa pamaagi sa Ginoo sa pagsangkap sa Iyang mga Santos. Base sa unsay atong nakat-unan gikan sa Doktrina ug mga Pakigsaad 104:11–18, unsa ang pamaagi sa Ginoo sa pagsangkap sa Iyang mga Santos? Mahimo usab nimong ipaambit kini nga pamahayag ni Presidente Marion G. Romney: “Ang Ginoo … makahimo sa pag-atiman sa [mga kabus] nga wala ang atong tabang kon iyang tuyo ang pagbuhat sa ingon. … Apan nagkinahanglan kita niini nga kasinatian; kay pinaagi lamang sa atong pagkat-on unsaon sa pag-atiman sa usag usa nga atong mapalambo sa atong kaugalingon ang Kristohanong gugma ug disposisyon nga gikinahanglan aron mahimo kitang sarang nga makabalik ngadto sa iyang presensya” (“Living Welfare Principles,” Ensign, Nob. 1981, 92). Hatagi ang mga sakop sa klase og pipila ka minuto sa pagrekord sa ilang mga impresyon mahitungod sa paagi nga makatabang sila sa pagsangkap sa uban sumala sa pamaagi sa Ginoo.

Dugang nga mga Kapanguhaan

Ang makaputli nga gahum sa mga pagsulay.

Si Elder Orson F. Whitney mitudlo: “Walay kasakit nga atong giantus, walay pagsulay nga atong nasinati ang makawang. Modugang kini sa atong edukasyon, sa pagpalambo niana nga mga kalidad sama sa pasensya, hugot nga pagtuo, kalig-on ug pagkamapainubsanon. Ang tanan natong giantus ug gilahutay, ilabi na kon kini atong giantus nga may pasensya, makapalig-on sa atong mga kinaiya, molimpyo sa atong mga kasingkasing, mopadako sa atong mga kalag, ug mohimo kanatong mas malumo ug mahigugmaon, mas angayan nga pagatawgong mga anak sa Dios … ug kini pinaagi sa kasub-anan ug pag-antus, paghago ug kalisdanan, aron makaangkon sa edukasyon nga maoy usa sa atong gianhi dinhi ug diin kita mahimong mas mahisama sa atong Amahan ug Inahan sa langit” (sa Spencer W. Kimball, Faith Precedes the Miracle [1972], 98).

Si Elder David A. Bednar miingon: “Adunay panahon sa matag usa sa atong kinabuhi, kita dapiton sa pagmartsa ngadto sa atong kaugalingon nga Kampo sa Zion. Ang katukma sa mga imbitasyon magkalain-lain, ug ang piho nga mga babag nga atong masugatan sa panaw mahimong lahi. Apan ang atong padayon ug makanunayon nga tubag sa dili kalikayan nga tawag sa katapusan ang makatubag sa pangutana nga ‘Kinsa ang dapig sa Ginoo?’” (“Dapig sa Ginoo: Mga Leksyon gikan sa Kampo sa Zion,” Liahona, Hulyo 2017, 23).

Pagpalambo sa Atong Pagtudlo

Pakigtambayayong uban sa mga sakop sa pamilya. “Tungod kay ang panimalay mao ang sentro sa pagpuyo ug pagkat-on sa ebanghelyo, ang imong mga paningkamot sa paglig-on sa usa ka sakop sa klase mahimong labing epektibo kon makigtambayayong ka sa [iyang] … mga sakop sa pamilya” (Pagtudlo sumala sa Pamaagi sa Manluluwas, 8).