galaxy sa kawanangan

Dangpanan, ni Shaelynn Abel

Hulyo 5–11

Doktrina ug mga Pakigsaad 76

“Dako ang Ilang Ganti ug Walay Katapusan ang Ilang Himaya”

Sama sa daghang panan-awon nga narekord diha sa mga kasulatan, ang panan-awon diha sa seksyon 76 miabut sa dihang si Joseph Smith ug Sidney Rigdon namalandong sa mga kasulatan (bersikulo 19). Ikaw usab makadawat og pagpadayag—lakip ang giya kon unsaon sa pagtudlo—samtang mamalandong ka sa Doktrina ug mga Pakigsaad 76.

Irekord ang Imong mga Impresyon

pagpaambit nga icon

Dapita ang Pagpaambit

Aron matabangan ang mga sakop sa klase nga maghisgot sa unsay ilang nabasa diha sa Doktrina ug mga Pakigsaad 76, mahimo nimo silang dapiton sa paghunahuna nga ang usa ka higala sa laing tinuohan nangutana unsa ang atong gituohan mahitungod sa kinabuhi human sa kamatayon. Unsa nga mga bersikulo gikan sa seksyon 76 ang ilang ipaambit sa ilang higala? Ang mga sakop sa klase mahimo usab nga mopaambit og usa ka butang gikan sa “Mga Tingog sa Pagpahiuli: ang mga Pagpamatuod sa ‘Panan-awon’” nga makahuluganon kanila.

icon sa pagtudlo

Itudlo ang Doktrina

Doktrina ug mga Pakigsaad 76

Ang kaluwasan moabut pinaagi ni Jesukristo, ang Anak sa Dios.

• Daghang mga tawo, kon maghunahuna sila sa seksyon 76, maghunahuna mahitungod sa plano sa kaluwasan ug sa tulo ka gingharian sa himaya. Unsaon nimo pagtabang ang mga sakop sa klase nga makakita nga ang sentro niini nga pagpadayag mao ang Manluluwas nga si Jesukristo? Mahimo nimong hangyoon ang mga sakop sa klase sa pagpaambit og usa ka bersikulo nga ilang nakit-an diha sa seksyon 76 nga nakapalig-on sa ilang pagtuo diha ni Jesukristo. Kon magkinahanglan sila og tabang, mahimo nimo silang giyahan ngadto sa mga bersikulo nga sama sa 1–5, 20–24, 39–43, 69, 107–8.

• Aron matabangan ang mga sakop sa klase sa pagsusi sa mga kalainan tali niadtong makapanunod sa tulo ka gingharian sa himaya, isulat sa pisara ang Celestial, mga bersikulo 50–70, 92–96; Terrestrial, mga bersikulo 71–79, 97; ug Telestial, mga bersikulo 81–90, 98–106, 109–12. Ang mga sakop sa klase mahimong mopili og usa sa tulo ka hugpong sa mga bersikulo ug mangita og hugpong sa mga pulong nga naghulagway sa relasyon tali ni Jesukristo ug sa mga tawo nga makapanunod sa katugbang nga gingharian. Unsa ang gitudlo niini nga mga pulong kanato mahitungod sa pagkahimong mga disipulo ni Jesukristo? Unsaon nato paglig-on ang atong relasyon Kaniya ug sa Amahan? Sa unsang paagi Sila motabang kanato? Unsay buot ipasabut sa pagkahimong “maisug diha sa pagpamatuod ni Jesus”? (bersikulo 79).

  lawak sa panimalay sa ika-desinuybe nga siglo

  Si Joseph Smith nakakita sa panan-awon sa mga ang-ang sa himaya diha sa lawak nga sama niini.

Doktrina ug mga Pakigsaad 76:5–10, 113–18

Ang mga misteryo sa Dios “masabtan [lamang] pinaagi sa gahum sa Balaan nga Espiritu.”

• Mahimong makapaikag sa mga miyembro sa imong klase nga mahibalo nga dili tanang miyembro sa Simbahan ang midawat dayon sa pinadayag diha sa seksyon 76. Sama pananglit, si Brigham Young miingon: “Ingon niana ang akong mga tradisyon nga, sa dihang ang Panan-awon unang miabut kanako, direkta kining nahisupak ug sukwahi sa akong kanhi edukasyon. Miingon ako, Hulat og kadiyot. Wala ko kini isalikway; apan wala ako makasabut niini.” Mipasabut siya nga kinahanglan niya nga “maghunahuna ug mag-ampo, magbasa ug maghunahuna, hangtud nga ako kining nasayran ug hingpit nga nasabtan alang sa akong kaugalingon” (sa “The Vision,” Revelations in Context, 150). Unsay atong makat-unan gikan sa iyang kasinatian nga makatabang kanato kon ang Dios mopadayag og mga butang nga lahi kay sa atong kasamtangang panabut? Unsa ang gitudlo sa Doktrina ug mga Pakigsaad 76:5–10, 113–18 kanato kon unsaon nato sa pagdawat “sa mga tinagoan sa … kabubut-on [sa Dios]”? (bersikulo 10).

Doktrina ug mga Pakigsaad 76:50–70, 92–95

Gusto sa Dios nga ang tanan Niyang mga anak makatagamtam sa celestial nga himaya uban Kaniya.

• Alang sa uban, mahimong makapawala sa kadasig o lisud ang paghunahuna sa tanan nga gikinahanglan kanato aron mahimong sarang sa celestial nga gingharian. Ikonsiderar kon unsaon nimo pagtabang ang mga sakop sa klase nga makakaplag og paglaum “pinaagi ni Jesus ang tigpataliwala” (bersikulo 69). Sama pananglit, mahimo nimo silang dapiton sa pagbasa sa mga bersikulo 50–70 ug 92–95. Dapita sila sa pagpaambit kon unsaon nila pagtubag ang tawo nga moingon, “Ang pagsunod sa ebanghelyo sa kalibutan karon lisud kaayo; dili ko sigurado kon angay pa ba kining buhaton” o “Dili igo ang akong kamaayo alang sa celestial nga gingharian.” Unsay atong masulti aron sa pagdasig o pag-awhag niining tawhana?

Pagpalambo sa Atong Pagtudlo

Pagtutok diha sa Manluluwas ug sa Iyang doktrina. “Pangutan-a ang imong kaugalingon kanunay, ‘Sa unsang paagi ang akong gitudlo makatabang sa mga sakop sa akong klase nga makapalambo og hugot nga pagtuo diha kang Kristo, maghinulsol, maghimo ug motuman og mga pakigsaad uban sa Dios, ug modawat sa Espiritu Santo?’” (Pagtudlo sumala sa Pamaagi sa Manluluwas, 20).