karnero nga nagsunod kang Jesus

Pagpauli, ni Yongsung Kim

Hulyo 12–18

Doktrina ug mga Pakigsaad 77–80

“Ako Mogiya Kaninyo”

Hinumdumi nga ang mga kalihokan niini nga outline mga sugyot lamang. Samtang mainampoon nimong tun-an ang Doktrina ug mga Pakigsaad 77–80, ang Espiritu mogiya kanimo aron masayud unsaon sa pagtudlo sa labing maayo ang mga sakop sa imong klase.

Irekord ang Imong mga Impresyon

pagpaambit nga icon

Dapita ang Pagpaambit

Ang ubang sakop sa imong klase mas lagmit nga mopaambit sa ilang mga hunahuna kon hangyoon nimo silang daan. Ikonsiderar ang pagkontak sa pipila kanila pipila ka adlaw sa dili pa magklase sa paghangyo kon mahimo ba silang motambong nga andam mopaambit og usa ka butang nga makahuluganon kanila gikan sa Doktrina ug mga Pakigsaad 77–80.

icon sa pagtudlo

Itudlo ang Doktrina

Doktrina ug mga Pakigsaad 77

Ang Dios mopadayag sa Iyang mga misteryo ngadto sa mga nagtinguha nga mahibalo niini.

• Ang mga sakop sa klase mahimong mopaambit og mga panabut nga ilang nakita mahitungod sa mga simbolo diha sa basahon sa Pinadayag atol sa ilang pagtuon sa seksyon 77 niining semanaha. Ang paghisgot kalabut sa mga tubag nga nadawat ni Joseph Smith mahimong mosangput sa usa ka diskusyon kon sa unsang paagi ang mga sakop sa klase makatinguha og pagsabut kon magtuon sila sa mga kasulatan. Unsay atong makat-unan gikan sa mga matang sa mga pangutana nga gipangutana ni Joseph? Ang mga sakop sa klase tingali andam nga mopaambit og mga kasinatian sa dihang ang ilang mga pangutana sa ebanghelyo miresulta ngadto sa mas dakong panabut.

Doktrina ug mga Pakigsaad 78:17–19

Ang Ginoo mogiya kanato.

• Aron makasugod og diskusyon mahitungod sa Doktrina ug mga Pakigsaad 78:17–19, mahimo ka nga mopakita og mga litrato sa pipila ka sakop sa imong klase samtang bata pa (hangyoa silang daan sa pagdala niini nga mga litrato sa klase). Patag-ana ang klase kon kinsa ang anaa sa matag litrato. Ang mga sakop sa klase nga midala sa mga litrato mahimong mosulti kon sa unsang paagi sila nausab sukad nakuha kadto nga mga litrato. Dayon ang klase mahimong mobasa sa Doktrina ug mga Pakigsaad 78:17–19 ug mamalandong og mga pangutana nga sama niini: Sa unsang paagi kita sama sa gagmayng mga bata ngadto sa Ginoo? Sa unsang mga paagi gusto Niya nga mahimo kitang sama sa mga bata (tan-awa sa Mosiah 3:19), ug sa unsang paagi gusto Niya nga kita molambo? Unsa nga tambag ang Iyang gihatag kanato niini nga mga bersikulo sa pagtabang kanato nga molambo?

  Aron mapalapdan ang panabut sa mga sakop sa imong klase kon sa unsang paagi ang Ginoo mahimong “mogiya [kanato]” (bersikulo 18), ikonsiderar ang pagpaambit sa pamahayag diha sa Dugang nga mga Kapanguhaan.

Doktrina ug mga Pakigsaad 79–80

Ang tawag sa pagserbisyo sa Dios mas importante kay sa asa kita moserbisyo.

• Tingali adunay mga tawo sa imong klase nga mibati og kasagmuyo sa sinugdanan kalabut sa usa ka calling nga ilang nadawat sa ward o branch o sa dapit diin gi-assign sila sa pagserbisyo isip misyonaryo. Tingali ang pipila kanila andam nga mopaambit sa ilang mga kasinatian. Sa unsang paagi ang tambag sa Ginoo diha sa Doktrina ug mga Pakigsaad 80:3 makatabang kanato niini nga mga kahimtang? Unsa kaha ang gipasabut sa mga pulong nga “kini dili igsapayan”? O ang mga pulong nga “kamo dili molakaw nga masayop”? Unsa kaha ang labing mahinungdanon ngadto sa Ginoo kabahin sa atong mga calling? Ang mga hunahuna ni Elder David A. Bednar kalabut sa seksyon 80 diha sa iyang pakigpulong nga “Gitawag ngadto sa Buhat” mahimong makatabang usab (Liahona, Mayo 2017, 68).

• Ang mga pinadayag diha sa seksyon 79 ug 80 orihinal nga gitumong ngadto sa mga tawo nga gitawag sa pagsangyaw sa ebanghelyo, apan naglangkob kini og mga baruganan nga magamit kanatong tanan sa atong pagserbisyo sa Ginoo. Aron matabangan ang mga sakop sa klase sa pagpangita niini nga mga baruganan, mahimo nimo silang hangyuon nga magpakaaron-ingnon nga sila adunay higala kinsa bag-o lang nga nagpamiyembro sa Simbahan ug bag-o lang nakadawat sa iyang unang calling. Dapita ang mga sakop sa klase sa paghimo og sulat nga nagsuporta ug nagtambag ngadto sa ilang higala, ug awhaga sila sa pagkutlo gikan sa seksyon 79 ug 80 sa ilang pagbuhat niini. Dayon ang pipila ka sakop sa klase mahimong mopaambit sa unsay ilang gisulat.

  mga babaye nga nag-istoryahanay

  Ang Ginoo mahimuot kon moserbisyo kita Kaniya ug sa uban.

icon sa dugang nga mga kapanguhaan

Dugang nga mga Kapanguhaan

Ang Ginoo mogiya kanato pinaagi sa Espiritu Santo.

Si Presidente Henry B. Eyring mipaambit og kasinatian sa dihang nag-ampo siya alang sa giya sa usa ka importante nga desisyon ug nakat-on nga magiyahan sa Ginoo:

“Ako nag-ampo, apan sulod sa daghang mga takna ingon sa walay tubag. Kulang nalang og gamay nga mokaadlawon, may pagbati nga miabot kanako. Sukad masukad gikan sa akong pagkabata, ako mibati og ingon. Ang akong kasingkasing ug akong hunahuna ingon og nag-anam pagkamalinawon. Dihay kalinaw niadtong tago nga kahilum.

“Akong naamgohan ang akong kaugalingon nga sa dako nga tingog nag-ampo, ‘Langitnong Amahan, dili igsapayan unsay akong gipangayo. Baliwala na nako kon unsay akong gusto. Gusto lang nako nga matuman ang Imong kabubut-on. Kana lang ang akong gitinguha. Palihug sultihi ko unsay angay nakong buhaton.’

“Niadtong higayona gibati nako ang kamalinawon nga sukad akong gibati. Ug ang mensahe niabot, ug ako nakapaniguro diin kadto gikan. Pagkatin-aw kon unsay akong buhaton. Ako wala makadawat og saad sa sangputanan. Diha lamang ang kasiguroan nga nahimo akong gamayng bata kinsa gisultihan unsa ang dalan nga padulngan nga buot niya alang kanako” (“Sama sa Usa ka Gamayng Bata,” Liahona, Mayo 2006, 16).

Pagpalambo sa Atong Pagtudlo

Sugdi sa mga kasulatan. Sa dili pa modangup ngadto sa dugang nga mga kapanguhaan, pagmakugihon sa pagtuon ug pagpamalandong sa mga kasulatan. Modapit kini sa Espiritu sa pagtabang kanimo nga magamit ang imong gitun-an samtang magtudlo ka (tan-awa sa Pagtudlo sumala sa Pamaagi sa Manluluwas, 12).