mga tawo nga nagmiting duol sa lim-aw

Ang Miting sa Kampo, ni Worthington Whittredge

Mayo 3–9

Doktrina ug mga Pakigsaad 46–48

“Pangitaa sa Matinguhaon nga Paagi ang Labing Maayo nga mga Gasa”

Samtang magbasa ka sa Doktrina ug mga Pakigsaad 46–48, ang Espiritu Santo mahimong mopamatuod kanimo sa mga kamatuoran niini nga mga seksyon. Ang pagrekord ug pagribyu sa mga impresyon makatabang nimo sa pagpangita og mga paagi sa pagtabang sa mga sakop sa klase nga makadiskubre niining sama nga mga kamatuoran.

Irekord ang Imong mga Impresyon

pagpaambit nga icon

Dapita ang Pagpaambit

Mahimong makatabang sa mga sakop sa klase ang pagpaambit, matag karon ug unya, kon kumusta na ang ilang personal o tibuok pamilya nga pagtuon sa kasulatan. Sama pananglit, kon ang mga sakop sa klase mopaambit og panabut mahitungod sa usa ka butang nga nadiskubrihan nila o sa usa ka sakop sa pamilya niining semanaha, mahimo nimo silang pangutan-on kon unsay ilang gibuhat sa ilang pagtuon nga nakaaghat niadto nga mga panabut.

icon sa pagtudlo

Itudlo ang Doktrina

Doktrina ug mga Pakigsaad 46:1–7

Kinahanglang hangupon nato ang tanan diha sa Simbahan ni Jesukristo.

• Alang sa daghan, giunsa ug unsa ang ilang gibati sa mga miting sa Simbahan mahimong dako og impluwensya sa ilang kalihokan diha sa Simbahan. Ang mga instruksyon sa Ginoo diha sa Doktrina ug mga Pakigsaad 46:1–7 makatabang sa mga miyembro sa inyong ward sa paghimo og mas maabi-abihon, makahuluganon nga mga kasinatian sa pagsimba alang sa usag usa ug alang sa mga bisita. Ang mga sakop sa klase mahimong mosiksik niini nga mga bersikulo, mangita og mga baruganan nga may kalabutan sa mga miting sa Simbahan ug molista diha sa pisara sa unsay ilang nakit-an. Sa matag aytem sa lista, ang klase mahimong maghisgot og mga ehemplo nga nagpakita niana nga baruganan.

• Sa unsang paagi ang mga instruksyon sa Ginoo diha sa Doktrina ug mga Pakigsaad 46 makatabang sa mga sakop sa klase nga makita ang mga miting sa Simbahan isip usa ka oportunidad nga mabati ang Espiritu Santo? Mahimo nimong dapiton ang mga sakop sa klase sa pagsiksik sa Doktrina ug mga Pakigsaad 46:2 ug paghisgot og higayon nga nakakita sila og mga lider ug mga magtutudlo nga mipahigayon og mga miting pinaagi sa Espiritu Santo. Unsa ang tahas niadtong motambong sa mga miting? Ikonsiderar ang pagdapit sa mga sakop sa klase sa pagpaambit og mga higayon sa dihang mibati sila nga ang usa ka miting gidumala ug gigiyahan sa Espiritu Santo.

• Tingali mahimo ka nga modapit og pipila ka mga sakop sa klase sa pagpaambit sa ilang mga kasinatian sa dihang una silang mitambong og miting sa Ang Simbahan ni Jesukristo sa mga Santos sa Ulahing mga Adlaw. Unsay nakatabang nila nga mobati nga gihangup? Unsa nga tambag ang ilang mahatag sa ubang mga miyembro aron makatabang sa paghimo sa atong mga miting sa Simbahan nga mas mahinangpon? Unsaon nato sa paggamit ang tambag sa Ginoo diha sa Doktrina ug mga Pakigsaad 46:1–7? Papraktisa ang mga sakop sa klase sa unsay ilang isulti kon makakita sila og estranghero nga mosulod sa chapel sa unang higayon.

• Ang usa ka himno nga sama sa “Pagkatam-is nga Kantahon sa Gugma Niyang Walay Sama” (Mga Himno, nu. 101) makatabang usab sa mga sakop sa klase sa paghunahuna ug paghisgot kon unsaon sa paghimo sa atong mga miting sa Simbahan nga mas mahinangpon ug makabayaw. Tingali ang mga sakop sa klase mahimong magdungan sa pagkanta sa himno ug pagpaambit og mga ideya gikan sa mga pulong sa kanta kon unsaon sa pagtabang sa uban nga mobati sa gugma sa Dios diha sa simbahan.

  mga miyembro diha sa simbahan

  Ang Ginoo mitudlo nga ang tanan gihangop diha sa Iyang Simbahan.

Doktrina ug mga Pakigsaad 46:7–33

Ang Langitnong Amahan mihatag og espirituhanong mga gasa alang sa kaayohan sa Iyang mga anak.

• Ang unang mga Santos hugtanong nagtuo sa mga pagpakita sa Espiritu Santo. Sa unsang paagi nimo matabangan ang mga sakop sa imong klase sa paglig-on sa ilang pagtuo nga kini nga mga gasa mahimong mapakita sa atong kinabuhi karon? Mahimo nimong sugdan pinaagi sa pagdapit sa mga sakop sa klase sa pagbasa sa Doktrina ug mga Pakigsaad 46:7–33 nga magpares o diha sa ginagmay nga mga grupo. Hangyoa sila sa pagpangita og dili mominos sa lima ka espirituhanong mga gasa ug sa paghisgot og mga paagi nga ilang nakita kini nga mga gasa sa ilang kinabuhi o sa kinabuhi sa tawo nga ilang kaila—lakip sa mga tawo diha sa klase. Unsay ilang nakita nga mahimo nilang mapaambit sa klase aron sa paglig-on sa ilang pagtuo niini nga mga gasa?

• Ang Ginoo mipahayag nga ang mga gasa sa Espiritu makabenepisyo niadtong nagmatinud-anon ug “dili alang sa timailhan” (bersikulo 9). Tingali ang mga sakop sa klase mahimong maghisgot kon sa unsang paagi ang espirituhanong mga gasa makabenepisyo sa mga matinud-anon. Sa unsang paagi kini nga mga gasa makatabang niadtong gustong makaangkon o mapalig-on ang ilang pagpamatuod mahitungod sa ebanghelyo?

• Ang ubang mga tawo nahigugma sa Dios ug naningkamot sa pagtuman sa Iyang mga sugo apan wala mobati nga nakasinati sila og bisan unsa nga mga gasa sa Espiritu. Sa unsang paagi makatabang ang tambag diha sa Doktrina ug mga Pakigsaad 46:7–33?

Doktrina ug mga Pakigsaad 47

Ang Espiritu Santo makagiya kanato samtang atong tumanon ang atong mga calling.

• Daghang tawo ang makasabut sa unsay gibati ni John Whitmer sa dihang gusto siya og kasiguroan nga ang iyang calling nagagikan sa Dios. Tingali ang mga sakop sa klase mahimong mopaambit og ilang susama nga mga kasinatian. Unsay atong makita diha sa Doktrina ug mga Pakigsaad 47 nga mahimong makahatag ni John Whitmer og pagsalig diha sa iyang buluhaton?

Pagpalambo sa Atong Pagtudlo

Imong tahas isip magtutudlo. Ang pagtudlo labaw pa kay sa pagpresentar lang og impormasyon nga imong giandam. Apil sa ubang butang, naglakip kini sa pagmugna og palibut diin ang mga sakop sa klase makakat-on ug makadiskubre mismo og mga kamatuoran ug mopaambit sa ilang nakat-unan ngadto sa uban. Sama pananglit, sa tibuok leksyon, pangutan-a ang mga sakop sa klase mahitungod sa ilang mga kasinatian sa pagtuon sa mga kasulatan diha sa panimalay.