Mga Santos nga nangandam sa pagbalhin

Mga Santos Namalhin ngadto sa Kirtland, ni Sam Lawlor

Abril 12–18

Doktrina ug mga Pakigsaad 37–40

“Kon Kamo Dili Magkahiusa Kamo Dili Akò”

Sa dili pa magplano kon unsay imong buhaton sa klase, tun-i sa mainampuong paagi ang Doktrina ug mga Pakigsaad 37–40. Mas malagmit nga makadawat ka og espirituhanong giya sa imong pagpangandam sa pagtudlo kon una ka nga makaangkon og makahuluganong personal nga mga kasinatian kalabut niini nga mga kasulatan.

Irekord ang Imong mga Impresyon

icon sa pagpaambit

Dapita ang Pagpaambit

Ikonsiderar ang pagsulat sa pisara, Samtang nagbasa ko sa Doktrina ug mga Pakigsaad 37–40, mibati ko nga ang Ginoo nagsulti kanako nga . Ang mga sakop sa klase mahimo nga mopaambit unsaon nila pagkompleto sa kapahayag. Awhaga sila sa pagpaambit og mga bersikulo gikan sa ilang nabasa isip kabahin sa ilang mga tubag.

icon sa pagtudlo

Itudlo ang Doktrina

Doktrina ug mga Pakigsaad 37–38

Ang Dios mopundok kanato aron sa pagpanalangin kanato.

• Usahay mas sayon ang pagkat-on gikan sa mga pinadayag sa Doktrina ug mga Pakigsaad kon hunahunaon nato ang atong mga kaugalingon nga anaa sa dapit sa mga tawo diin orihinal kining gihatag. Aron matabangan ang mga sakop sa klase sa pagbuhat niini sa mga seksyon 37–38, mahimo nimo silang dapiton sa paghunahuna nga nagpuyo sila sa Fayette, New York, niadtong 1831. Ang usa ka sakop sa klase mahimong magpakaaron ingnon nga si Joseph Smith ug mobasa sa seksyon 37 ngadto kanila. Unsa kaha ang posible natong reaksyon niini nga sugo? Tingali ang mga sakop sa klase mahimong maghunahuna nga duna silay higala nga dili gusto nga makigpundok ngadto sa Ohio; mahimo sila nga magsiksik sa seksyon 38 alang sa mga baruganan nga tingali makaawhag sa ilang higala nga magmatinud-anon sa sugo nga magpundok. (Kon gikinahanglan, mahimo nimo silang giyahan ngadto mismo sa mga bersikulo 1–4, 11–12, 17–22, ug 27–33.) Ang mga sakop sa klase mahimong andam usab nga mopaambit kon sa unsang paagi ang susama nga mga baruganan nakatabang kanila sa dihang kinahanglan nilang mosunod og usa ka sugo nga daw lisud.

• Ang mga Santos sa Ulahing mga Adlaw wala na gisugo sa pagpundok pinaagi sa pagbalhin ngadto sa usa ka dapit, apan magpundok gihapon kita diha sa mga pamilya, mga ward, ug mga stake. Aron sa paghisgot kon sa unsang paagi kini nga pagpundok nakapanalangin kanato karon, mahimo nimong bahinon ang klase ngadto sa duha ka grupo. Hangyoa ang usa ka grupo sa pagsiksik sa Doktrina ug mga Pakigsaad 38:31–33 ug sa pagpangita og mga panalangin nga magamit ngadto sa pagpundok isip mga pamilya, ug hangyoa ang laing grupo sa pagsiksik sa samang tudling ug sa pagpangita og mga panalangin nga magamit ngadto sa pagpundok isip mga ward ug mga stake. Mahimo dayon nilang ipaambit ang ilang mga hunahuna diha sa klase. Sa unsang paagi kita napanalanginan pinaagi sa pagpundok isip klase sa Sunday School?

Doktrina ug mga Pakigsaad 38:24–27

Ang katawhan sa Dios kinahanglang magkahiusa.

• Ang mga Santos nga nagpundok didto sa Ohio naggikan sa lain-laing kahimtang, apan ang Ginoo misugo kanila sa pagbuntog sa ilang mga kalahian ug “[mag]hiusa” (bersikulo 27). Nganong usahay mapakyas man kita sa pagtan-aw sa ubang tawo isip katumbas? Awhaga ang mga sakop sa klase sa pagpamalandong kon giunsa nila pagtagad ang uban samtang magbasa sila sa Doktrina ug mga Pakigsaad 38:24–27. Unsa ang gipasabut sa pagtamud sa atong kaigsoonan sama sa atong kaugalingon? Nganong imposible man nga tinud-anay nga mahimong katawhan sa Dios kon wala kita magkahiusa?

• Ang pagbasa sa Doktrina ug mga Pakigsaad 38:24–27 mahimong mosangput sa usa ka diskusyon mahitungod sa panaghiusa diha sa atong mga relasyon—isip mga sakop sa ward, mga pamilya, ug uban pa. Mahimo usab silang mamalandong ug mopaambit og mga hunahuna mahitungod sa usa ka pangutana sama sa “Unsay akong mabuhat aron sa pagtabang sa among ward nga mobati nga mas nagkahiusa?”

Doktrina ug mga Pakigsaad 38:39; 39–40

Ang Amahan nagtinguha nga mohatag kanato og mga katigayunan sa kahangturan.

• Ang paghimo og tsart tingali makatabang sa mga sakop sa klase sa paghisgot sa Doktrina ug mga Pakigsaad 38:39. Sa usa ka kolum, ang mga sakop sa klase mahimong molista og “mga katigayunan sa yuta,” o mga butang nga gikonsiderar nga bililhon dinhi apan dili molungtad sa sunod nga kinabuhi. Sa lain nga kolum, mahimo silang molista og “mga katigayunan sa kahangturan,” o mga butang nga gipakabililhon sa Dios ug nga molungtad sa kahangturan. Unsa nga mga kasinatian ang nagtudlo kanato nga ang mga katigayunan sa kahangturan mas bililhon kay sa mga katigayunan sa kalibutan?

• Si James Covel, sama sa kadaghanan kanato, adunay matarung nga mga tinguha. Apan ang iyang kapakyas sa pagsunod sa direksyon sa Dios maoy usa ka importanting pasidaan alang kanatong tanan. Aron matabangan ang mga sakop sa klase nga makat-on gikan sa kasinatian ni Covel, mahimo nimong dapiton ang pipila kanila sa pagsiksik sa seksyon 39 alang sa mga butang nga gipabuhat sa Ginoo kaniya. Ang uban mahimong magsiksik sa mga panalangin nga gisaad kaniya kon mosunod siya. Mahimo usab silang mosiksik sa seksyon 40 aron madiskobre nganong si James Covel wala makadawat niini nga mga panalangin. Sa unsang paagi ang iyang kasinatian magamit kanato? Unsa nga “mga kabalaka sa kalibutan” ang usahay makapugong kanato sa pagdawat sa pulong sa Dios “uban ang kalipay”? (Doktrina ug mga Pakigsaad 40:2).

Pagpalambo sa Atong Pagtudlo

Ayaw sulayi pagtudlo ang tanan diha sa leksyon. “Daghan kaayo ang pwedeng mahisgutan sa matag leksyon, apan dili kinahanglan nga matudlo ang tanan sa usa ka klasehan aron matandog ang kasingkasing sa usa ka tawo—kasagaran ang usa o duha ka importanting mga punto igo na” (Pagtudlo sumala sa Pamaagi sa Manluluwas, 7). Ang Espiritu Santo, mga komentaryo gikan sa mga sakop sa klase, ug ang mga ideya niini nga outline makatabang kanimo nga masayud asa motutok.