Marso 15–21

Doktrina ken Katulagan 27–28

“Nasken a Naurnos ti Pannakaaramid dagiti Amin a Banag”

Nupay dagiti pasamak a nangparegta kadagiti paltiing iti Doktrina ken Katulagan 27–28 ket napagteng iti sabali a panawen ken lugar, dagiti pagbatayan a naisuro kadagitoy a benneg ket adda pakainaiganna iti agdama. Ania dagiti pagbatayan a mabalin a mangparabur kadagiti miembro ti klasem kadagiti kasasaad a pakaipaspasanguanda?

Isuratmo dagiti Impresionmo

Yawis ti Panagbibinninglay

Ikkam dagiti miembro ti klase iti sumagmamano a minuto a mangrebyu iti Doktrina ken Katulagan 27–28 ken mangsapul iti bersikulo wenno ragup ti balikas a makitada a napnuan kaipapanan. Tapno maikkan ti tunggal maysa iti gundaway a mangibiglay, mabalinmo a bingayen dagiti miembro ti klase iti kada paris tapno ibinglayda no ania ti nasarakanda.

Isuro ti Doktrina

Doktrina ken Katulagan 27:1–2

Nasken nga awatentayo ti sakramento a naitalimudok dagiti matatayo iti dayag ti Dios.

• Tapno mayallukoy ti panaglilinnawag maipapan iti Doktrina ken Katulagan 27:1–2, ibilang ti panangisurat iti maysa a saludsod kas iti daytoy iti pisarra: Ania ti insuro ti Mangisalakan kadatayo maipapan iti panggep ti sakramento? Mabalin a sapulen dagiti miembro ti klase dagiti ragup ti balikas kadagitoy a bersikulo a mangtulong kadakuada a mangsungbat iti saludsod. Mabalin nga agtallugodda a mangibinglay kadagiti impresion nga inawatda maipapan iti no kasano ti maaddaan iti nasagsagrado a padas no makiranranud iti sakramento.

  Mabalin a sapulen dagiti miembro ti klase dagiti mainayon a nauneg a pannakaammo ken pannakaawat babaen ti panangbasa no ania ti kinuna ti Mangisalakan iti inrugina ti sakramento (kitaen iti Lucas 22:19–20; 3 Nephi 18:1–11; kitaen met iti video “The Last Supper” iti ChurchofJesusChrist.org). No adda ti Mangisalakan iti mitingtayo iti sakramento, ania koma ti mabalin a sabali nga aramidentayo?

  

  Ti sakramento ket naglaon kadagiti simbolo ti sakripisio ti Mangisalakan.

Doktrina ken Katulagan 27:15–18

Tulongannatayonto ti kabal ti Dios a mangsarked iti dakes.

• Kasano a matulongam dagiti miembro ti klase a makaawat no kasano nga usaren ti kabal ti Dios a mangsarked iti dakes iti aldawtayo? Ibilang ti panangidawat iti maysa a tao nga agdrowing iti pisarra iti kabal ti Dios a nailadawan kadagiti bersikulo 15–18. Kalpasanna mabalin nga ibinglay dagiti miembro ti klase dagiti ania man a nauneg a pannakaammo ken pannakaawat [insights] a natakuatanda iti bukod a panagadalda maipapan kadagiti piraso ti kabal. Wenno mabalin a basaen ti klase ti Doktrina ken Katulagan 27:15–18 ket naganan dagiti piraso ti kabal iti pisarra ken dagiti paset ti bagi a salaknibanda. Ania ti kayat a sawen ti mangikawes iti kabal ti Dios? Mabalin a pagsasaritaan dagiti miembro ti klase no kasano a saluadannatayo ti Apo manipud iti dakes no ikawestayo ti kabal ti Dios?

• No mangisuroka kadagiti agtutubo, mabalin a kayatmo nga ikonekta ti Doktrina ken Katulagan 27:15–18 kadagiti pagrukodan iti Para iti Pigsa dagiti Agtutubo. Kas pagarigan, mabalin a basaen dagiti miembro ti klase dagiti bersikulo ken ilawlawag no apay a kasapulantayo ti kabal ti Dios. Kalpasanna, mabalinda ti agtrabaho iti kada paris ket irebyu ti maysa kadagiti pagrukodan iti Para iti Pigsa dagiti Agtutubo. Ania ti masursurotayo manipud kadagitoy a pagtaudan maipanggep kadagiti idadarup ni Satanas a maibusor kadatayo? Kasano a makatulong kadatayo ti kabal ti Dios a mangsarked kadagitoy a panagdarup? Kasano a maikawestayo ti kabalna?

Doktrina ken Katulagan 28

Awaten ti sibibiag a propeta ti paltiing para iti Simbaan ti Apo.

• Tapno matulongan a masursuro dagiti miembro ti klase maipapan iti akem ti maysa a propeta, mabalinmo nga irebyu ti padas a nangiturong ken ni Joseph Smith tapno agkararag ken umawat iti benneg 28 (kitaen iti paulo ti benneg), ket kalpasanna mabalinmo a basaen dagiti bersikulo 2–3, 6–7, 11–13. Kasano a padasen ni Satanas a mangkumbinsi kadatayo tapno sumurot kadagiti saan a dinutokan ti Apo? Mabalinmo nga awisen dagiti miembro ti klase a mangibinglay kadagiti padas a nangpapigsa iti pammaneknekda nga umawat ti propeta ti paltiing para iti Simbaan.

• Maysa a wagas tapno irebyu dagiti miembro ti klase ti Doktrina ken Katulagan 28 ket mangipapan nga adda am-ammoda a maysa a tao a kaaw-awatna ti baro a takem [calling] iti Simbaan. Ania ti maibinglaytayo manipud iti Doktrina ken Katulagan 28:1–6, 13–16 a mangtulong iti dayta a tao iti takemna? Mabalin a makanayon kadagiti nalawag a pannakaammo ken pannakaawat [insights] ti adaw iti “Dagiti Nainayon a Resources” iti panaglilinnawag.

Dagiti Nainayon a Resources

Agpabalakad maipapan iti bukod a paltiing.

Insuro ni Presidente Joseph F. Smith ken dagiti mamagbagana iti Umuna a Panguluen:

“No dagiti parmata, tagainep, pagsasao, padto, impresion wenno ania man a nakaskasdaaw a sagut wenno inspirasion, mangted iti maysa a banag a saan a maitunos kadagiti naawat a paltiing ti Simbaan wenno maisuppiat kadagiti pangngeddeng dagiti nadutokan nga autoridad, mabalin nga ammuen dagiti Santo iti Ud-udina nga Aldaw a saan a mainaig daytoy iti Dios, uray kasano man ti makita a kasla kinapudno daytoy. … Kadagiti nailubongan kasta met dagiti naespirituan nga aramid a pakaseknan, mabalin nga umawat dagiti Santo iti nadiosan a pannarabay ken paltiing a mangap-apekto iti bagbagida, ngem saan a daytoy ti mangted iti autoridad a mangiturong iti dadduma. …

“Nairekord iti pakasaritaan ti Simbaan ti adu a pakpakuna a paltiing nga imbaga dagiti managinkukuna wenno panatiko a mamati kadagiti parangarang a kinalikagumanda nga awaten dagiti dadduma pay a tao, ken iti tunggal pagarigan, agbanag ditoy ti pannakapaay, panagladingit ken pannakadadael” (Joseph F. Smith, Anthon H. Lund, Charles W. Penrose, “A Warning Voice,” Improvement Era, Sept. 1913, 1148–49).

Panangpadur-as iti Panangisurotayo

Agpokuska iti pudno a doktrina. Insuro ni Presidente Boyd K. Packer a ti “pudno a doktrina, no maawatan, ket mangbalbaliw kadagiti galad ken tignay” (“Do Not Fear,” Ensign wenno Liahona, Mayo 2004, 79). Bayat ti panangisurotayo, nasken nga agpokustayo kadagiti pannursuro ni Jesucristo no kayattayo ti tumulong a mangisangbay kadagiti kararua Kenkuana.