Ni Jesus a nakatakder iti sango dagiti nakaparintumeng a tattao

Agtamedto ti Tunggal Tumeng, ni J. Kirk Richards

Marso 22–28

Doktrina ken Katulagan 29

Ummongento ni Jesucristo dagiti Taona

Ti kasayaatan a wagas tapno agsagana a mangisuro iti Doktrina ken Katulagan 29 ket nainkararagan nga adalen daytoy ken agkalikagum a maaddaan iti pangiwanwan ti Espiritu. Ibilang dagiti dadduma pay a wagas tapno maawis ti Espiritu iti biagmo, kas iti panagayuno, idadar-ay iti templo, wenno panagserbi kadagiti dadduma.

Isuratmo dagiti Impresionmo

icon iti panagbibinninglay

Yawis ti Panagbibinninglay

Iti Doktrina ken Katulagan 29:5, imbaga ti Apo kadagiti Santo, “Itag-ayyo ti puspusoyo ket agragsakkayo.” Mabalinmo nga awisen dagiti miembro ti klase a mangibinglay iti maysa a banag a nasursuroda iti bukod ken sangapamiliaan a panagadalda a mangigapu kadakuada tapno “itag-ayda ti puspuso[da] ken agragsak[da],”

icon iti panangisuro

Isuro ti Doktrina

Doktrina ken Katulagan 29

Nangisagana ti Nailangitan nga Ama iti maysa a plano para iti pannakaitan-oktayo.

• Maysa a wagas tapno mayallukoy ti panagsursuro iti pagtaengan ket mangparnuay kadagiti aktibidad a masarakan iti balabala iti agdama a lawas iti Umaykayo, Sumurot Kaniak—Para kadagiti Indibidual ken Pamilia. Kas pagarigan, mabalinmo nga ilista iti pisarra dagiti paset ti plano ti pannakaisalakan, kas iti biag sakbay daytoy a biag, Panagparsua, ti Pannubbot ni Jesucristo, ken dadduma pay. Nalabit a makaibinglay dagiti miembro ti klase iti maysa a banag a nabasada manipud iti Doktrina ken Katulagan 29 maipapan kadagitoy a paset ti plano. Mabalinmo pay a paibinglay kadakuada no ania koma ti isuroda manipud iti daytoy a benneg iti maysa a tao a dina ammo maipapan iti plano ti Dios.

Doktrina ken Katulagan 29:1–8, 14–21

Ummongento ni Jesucristo dagiti taona sakbay ti Maikadua a Yaayna.

• Tapno matulongan a mangipaawat kadagiti miembro ti klase no apay nga ummongen ni Jesucristo dagiti taona, mabalinmo nga awisen ida a mangbasa kadagiti bersikulo 1–8 ken paglilinnawagan dagiti saludsod maipapan iti panagguummong, kas iti: Kasano a napadasantayon ti panangummong ken panangsaluad kadatayo ni Cristo, kas iti panangummong ken panangsaluad ti maysa a pamusian kadagiti piekna? Kasano nga agguummongtayo iti Mangisalakan? (kitaen, kas pagarigan, iti bersikulo 2). Mabalin nga ibinglay dagiti miembro ti klase no kasano a pinaraburan ida ti panagguummong ken panagdayaw a kaduada dagiti dadduma pay a miembro ti Simbaan.

  pamusian ken dagiti piek

  Namin-ano a Gundaway, ni Liz Lemon Swindle

• Tapno matulongan dagiti miembro ti klase a mangpanunot iti pagrebbenganda a mangtulong iti Nailangitan nga Ama a mangummong kadagiti annakna, mabalinmo nga ibinglay dagiti balikas ni Presidente Russell M. Nelson iti “Dagiti Nainayon a Resources.” Wenno mabalinmo nga ipabuya ti video nga “A Witness of God” (ChurchofJesusChrist.org). Ania ti masursurotayo maipapan iti panagguummong manipud kadagitoy a mensahe? Kasano a mangpatibker dagitoy a mensahe iti kuna ti Apo iti Doktrina ken Katulagan 29:1–8?

• Sumagmamano kadagiti pasamak iti ud-udina nga aldaw a nailadawan iti Doktrina ken Katulagan 29:14–21 ket mabalin a makapaleddaang kadagiti miembro ti klase. Paibinglay kadakuada no ania ti marikriknada. Apay a ballaagannatayo ti Apo maipapan kadagitoy a pasamak? Ania dagiti managpasingked a kinapudno ti masursurotayo maipapan iti Mangisalakan ken iti panagguummong manipud kadagiti bersikulo 1–8? Kasano a matulongannatayo ti panaguummong nga agtultuloy a mangpasungad kadagitoy a pasamak nga addaan iti pammati imbes nga panagbuteng? Kas paset ti panagpapatangyo, mabalinyo a kantaen ti maysa a himno maipapan iti panagguummong, kas iti “Israel, Israel, God Is Calling” (Hymns, no. 7), ket paglilinnawagan no ania ti isuro ti himno maipapan iti pannakaummong ti Israel.

Doktrina ken Katulagan 29:34–35

Naespirituan ti tunggal bilin ti Apo. ae.

• Nupay mabalin a kasla temporal ti sumagmamano a bilin, naespirituan iti Apo ti amin a bilin. Tapno maawatan daytoy a kinapudno, mabalin nga aggigiddan a basaen dagiti miembro ti klase dagiti bersikulo 34–35 ket ilista ti sumagmamano a bilin iti pisarra, mainayon dagiti naespirituan a pagbatayan ken bendision a mainaig iti tunggal maysa. Mabalinda nga ibinglay dagiti pagarigan manipud iti biagda wenno manipud kadagiti nasantuan a kasuratan a nakatulong kadakuada a mangkita iti naespirituan a kasasaad dagiti bilin ti Dios. Kasano nga apektuan daytoy nga aktibidad ti wagas a panangkitatayo kadagiti bilin?

dagiti nainayon a resources icon

Dagiti Nainayon a Resources

Doktrina ken Katulagan 29

Pannakiraman iti pannakaummong ti Israel.

Insuro ni Presidente Russell M. Nelson:

“Awan duadua a dagitoy ket dagiti ud-udina nga aldaw, ken padarsen ti Apo ti aramidna a mangummong iti Israel. Dayta a panagguummong ti kapatgan a banag a maar-aramid iti daga iti agdama. Awanen ti sabali pay a maidasig iti kinadakkelna, awanen ti sabali pay a maidasig iti kinapategna, awanen ti sabali pay a maidasig iti kinatan-okna. Ket no pilienyo, no tarigagayanyo, makapagbalinkayo a maysa a dakkel a pasetna. Makapagbalinkayo a maysa a dakkel a paset ti maysa a banag a dakkel, maysa a banag a naindaklan, maysa a banag a natan-okan!

“No saritaentayo maipapan iti panagguummong, isasaotayo laeng daytoy a kangrunaan a kinapudno: tunggal maysa kadagiti annak ti Nailangitan nga Ama, iti agsumbangir a paset ti belo, ket maikari a dumngeg iti mensahe ti naisubli nga ebanghelio ni Jesucristo. Ikeddengda para iti bagbagida no tarigagayanda a maammuan ti ad-adu pay. …

“Inlatang ti Nailangitan nga Amatayo ti adu kadagiti kataknengan nga espirituna—nalabit, makunak, ti kasayaatan a buyotna—para iti daytoy maudi a pasetna. Dagita a natakneng nga espiritu—dagita a kasayaatan a agay-ayam, dagita a bannuar—ket dakayo!” (“Hope of Israel” [worldwide devotional for youth, Hunio 3, 2018], ChurchofJesusChrist.org).

Panangpadur-as iti Panangisurotayo

Mangisuroka a nalawag ken simple. Imbes a padasem a pabuyaan ti klasem, isurom ti doktrina a nalawag ken simple. Mabalinmo ti agtalek a “ti saguday ti balikas ti Dios” ket addaanto iti “nabilbileg nga amang ti epektona iti panunot dagiti tao ngem iti… ania man a banag” (Alma 31:5).