pagtaengan ni Peter Whitmer

Pagtaengan ni Peter Whitmer, ni Al Rounds

Marso 1–7

Doktrina ken Katulagan 20–22

“Ti Ilulutuad ti Simbaan ni Cristo”

Isuratmo dagiti naespirituan nga impresionmo bayat ti panagadalmo iti Doktrina ken Katulagan 20–22. Mabalin a mangiturong ti sumagmamano kadagitoy nga impresion kadagiti kapanunotan a makatulong kenka no mangisuroka.

Isuratmo dagiti Impresionmo

icon iti panagbibinninglay

Yawis ti Panagbibinninglay

Kabayatan ti panagadalda iti pagtaengan, mabalin a nakagun-od dagiti miembro ti klase kadagiti nauneg a pannakaammo ken pannakaawat [insights] maipapan kadagiti bendision ti kaadda iti pudno a Simbaan iti daga. Awisem ida a mangibinglay iti maysa a binatog manipud kadagitoy a benneg a mangiladawan no apay nga agyamanda iti pannakaisubli ti Simbaan.

icon iti panangisuro

Isuro ti Doktrina

Doktrina ken Katulagan 20–21

Naisublin ti Ti Simbaan ni Jesucristo dagiti Santo iti Ud-udina nga Aldaw.

• Mabalin a mairanud dagiti miembro ti klase manipud iti panagadalda kadagiti pagpadaan ti Ti Simbaan ni Jesucristo dagiti Santo iti Ud-udina nga Aldaw ken ti Simbaan nga impasdek ni Cristo idi un-unana. Mabalinmo nga idrowing iti pisarra ti maysa a tsart nga addaan iti uppat a kolum a nasuratan iti Doktrina, Dagiti Ordinansa, Turay iti Priesthood, ken Dagiti Propeta. Mabalinmo nga ited dagiti sumaganad a reperensia maipapan iti Simbaan ni Cristo kadagiti nagkauna a panawen: Mateo 16:15–19; Juan 7:16–17; Taga Efeso 2:19–22; 3 Nephi 11:23–26; Moroni 4–5. Mabalin nga ilasin dagiti miembro ti klase no ania ti isuro ti tunggal binatog maipapan iti Simbaan ni Cristo ken isurat ti reperensia iti maitutop a kolum iti pisarra. (Maaramat ti sumagmamano a reperensia ti ad-adu pay ngem maysa a kolum.) Mabalinda nga aramiden ti isu met laeng para kadagiti sumaganad a reperensia maipapan iti naisubli a Simbaan ni Cristo Doktrina ken Katulagan 20:17–25, 60, 72–79; 21:1–2. Ania ti masursurom maipapan iti Pannakaisubli ti Simbaan ni Cristo manipud iti daytoy a panagdasig?

Doktrina ken Katulagan 20:37, 75–79; 22

Tulongannatayo dagiti sagrado nga ordinansa nga agbalin a kas iti Mangisalakan.

• Mangted kadagiti miembro ti klase iti oras nga agadal kadagiti kualipikasion para iti panagbuniag a nailadawan iti Doktrina ken Katulagan 20:37, ket idawat kadakuada a mangutob kadagiti saludsod a kas kadagitoy: kasano a tulongannatayo dagitoy a kualipikasion nga agsagana a mabuniagan iti Simbaan ti Apo? Ania ti kayat a sawen ti alaen iti nagan ni Cristo iti bagbagitayo? (kitaen iti Mosiah 5:5–12). Ania dagiti tulong a mapagtalinaedmo ti “pangngeddeng[mo] nga agpaay ken ni [Jesucristo] agingga iti panungpalan”?

• Ania ti isuro ti benneg 22 maipapan iti panagbuniag? Idawatmo kadagiti miembro ti klase a mangipapan nga adda maysa a gayyemda a nabuniagan iti sabali a simbaan. Mabalinda a basaen daytoy a benneg tapno sapulen ti balakad a mangtulong iti gayyemda a makaawat no apay a kasapulan ti panagbuniag iti naisubli a Simbaan ti Mangisalakan. Mabalin a iyakem dagiti miembro ti klase daytoy a buya kas maysa a klase wenno kada paris.

• Basaen ti Doktrina ken Katulagan 20:75–79 nga aggigiddan, ket awisem dagiti miembro ti klase a mangibilang no ania ti isuro dagitoy a bersikulo maipapan iti Mangisalakan ken ti bilegna iti biagtayo. Ania dagiti napateg a balikas wenno ragup ti balikas no basaentayo dagiti kararag iti sakramento iti kastoy a wagas? Apay a napateg a makiranudtayo iti sakramento iti tunggal lawas?

  diakono nga agipaspasa iti sakramento

  Ti sakramento ket maysa a sagrado nga ordinansa.

Doktrina ken Katulagan 20:38–60

Ti serbisio iti priesthood ti mangbendision kadagiti miembro ti Simbaan ken dagiti pamiliada.

• Ti panangiladawan kadagiti pagrebbengan iti priesthood iti Doktrina ken Katulagan 20:38–60 ket makatulong kadagiti miembro iti klasem a mangpadakkel iti pannakaawatda iti serbisio iti priesthood. Nalabit a maawismo ida a mangipapan a maysa a kabumbuniag a gayyem wenno miembro ti pamilia ti dandanin maordenan iti saad iti priesthood. Kasano nga usarenda dagitoy a bersikulo a mangtulong a mangipaawat kenkuana dagiti pagrebbenganna? Ania dagiti pagarigan nga ibinglayda a mangtulong a mangipaawat kenkuana no kasano a ti panangipatungpal kadagita a pagrebbengan a makatulong kenkuana nga agbalin nga ad-adda pay a kas ken ni Jesucristo? Nalabit a mabalinda a yakem daytoy a pagsasaritaan.

  Kas mainayon, kasano a mausarda dagitoy a bersikulo a mangtulong a makita ti maysa a kabumbuniag a kabsat a babai no kasano a mabalinna ti makiraman iti aramid a nailadawan ditoy? (Mabalin a makatulong ti palawag iti “Dagiti Nainayon a Resources“.)

Doktrina ken Katulagan 21:4–7

Mabendisionantayo no umawattayo iti balikas ti Apo babaen ti propetana.

• Naglaon ti Doktrina ken Katulagan 21 kadagiti nabibileg a palawag maipapan iti panagsurot iti propeta ti Apo. Tapno matulongan dagiti miembro ti klase a mangutob ken mangilawlawag kadagitoy a palawag, idawat kadakuada a mangsukisok kadagiti bersikulo 4–7 para iti ragup ti balikas a kayatda a maawatan a nasaysayaat ken isurat ti ragup ti balikas iti pisarra. Pumili iti sumagmamano kadagiti ragup ti balikas, ket paglilinnawagan kas klase no ania ti mabalin a kaipapananda. Ania ti isuro kadatayo dagitoy a ragup ti balikas maipapan iti panagsurot iti propeta ti Apo?

dagiti nainayon a resources icon

Dagiti Nainayon a Resources

Agtrabahotayo amin nga addaan iti bileg ti priesthood.

“Maordenan dagiti lallaki kadagiti saad ti priesthood, idinto a maawis dagiti babbai ken lallaki a mangpadas iti bileg ken dagiti bendision ti priesthood iti biagda. …

“… Agikasaba ken agkararag [dagiti babbai] kadagiti kongregasion, mangpunnoda iti adu a posision ti kinadaulo ken serbisio, makiramanda kadagiti priesthood council kadagiti lokal ken sapasap a lebel, ken agserbida kadagiti pormal a panagproselayt a mision iti intero a sangalubongan. Kadagitoy ken dadduma pay a wagas, aramaten dagiti babbai ti turay ti priesthood uray no saanda a naordenan iti saad iti priesthood. …

“… Kadagiti eklesiastikal a takem [calling], ordinansa iti templo, relasion iti pamilia, ken naulimek, ken indibidual a panagministro, agtultuloy a dumur-as nga addaan iti bileg ti priesthood dagiti babbai ken lallaki a Santo iti Ud-udina nga Aldaw. Daytoy a panagtitinnulong dagiti lallaki ken babbai iti panangipatungpal iti aramid ti Dios babaen iti bilegna ket naisentro iti ebanghelio ni Jesucristo” (Gospel Topics, “Joseph Smith’s Teachings about Priesthood, Temple, Women,” topics.ChurchofJesusChrist.org).

Panangpadur-as iti Panangisurotayo

Aggigiddantayo a masursuruan. Kas maysa a mannursuro, makipagsursuroka kadagiti dadduma pay iti klase. Ipakitam ti kinatallugodmo a makasursuro manipud kadakuada babaen ti panangdengngegmo kadagiti kapanunotanda.