talon ni Martin Harris

Talon ni Martin Harris, ni Al Rounds

Pebrero 22–28

Doktrina ken Katulagan 18–19

“Napateg dagiti Kararua”

Iti laeng babaen ti Espiritu Santo a mabalbaliwan ti puso ti maysa a tao. Insuro ni Presidente Henry B. Eyring, “No mangisuroka kadagiti pagbatayan iti doktrina, umayto ti Espiritu Santo” (“Discussion with Elder Richard G. Scott and Elder Henry B. Eyring” [Church Educational System satellite training broadcast, Ago. 11, 2003]).

Isuratmo dagiti Impresionmo

icon iti panagbibinninglay

Yawis ti Panagbibinninglay

Tapno maparegta dagiti miembro ti klase a mangibinglay kadagiti padasda iti nasantuan a kasuratan, aggigiddan a mangbasa iti Doktrina ken Katulagan 18:34–36. Kalpasanna idawat kadagiti miembro ti klase a mangibinglay iti maysa a bersikulo a nabasada iti daytoy a lawas a nakabigbiganda iti timek ti Apo.

icon iti panangisuro

Isuro ti Doktrina

Doktrina ken Katulagan 18:10–16; 19:15–20, 39–41

Agragsak ti Apo no agbabawitayo.

• Adu a tao ti manginaig iti panagbabawi iti negatibo a rikna. Kasano a dagiti balikas ti Apo iti Doktrina ken Katulagan 18 ken 19 ket makatulong a makita dagiti miembro ti klase a ti panagbabawi ket maysa a banag a makaparagsak? Mabalinmo nga isurat iti pisarra ti Ti panagbabawi ket  ken idawat nga isingasing dagiti miembro ti klase dagiti wagas a mangileppas iti daytoy a binatog, a maibatay no ania ti nabasada manipud kadagiti benneg 18 ken 19. (Ibilang ti panangrebyu iti Doktrina ken Katulagan18:10–16; 19:15–20, 39–41 iti klase.)

• Ania ti kayat a sawen ti “mangyararaw iti panagbabawi”? (Doktrina ken Katulagan 18:14). Mabalin nga ibilang dagiti miembro ti klase daytoy a saludsod bayat ti panangbasada iti Doktrina ken Katulagan 18:10–16. Apay a no dadduma pilien dagiti tao ti saan nga agbabawi? Kasano a maparegtatayo dagiti ay-ayatentayo nga umasideg iti Mangisalakan ken umawat iti pammakawan? Allukoyem dagiti miembro ti klase a mangsapul iti maysa a banag iti Doktrina ken Katulagan 18:10–16 wenno 19:15–20 a makatulong.

Doktrina ken Katulagan 18:10–16

“Napateg dagiti kararua iti imatang ti Dios.”

• Kasano a matulongam dagiti miembro ti klase a makaawat no kasano ti kapateg ti tunggal maysa kadatayo iti imatang ti Dios? Mabalinda a basaen ti Doktrina ken Katulagan 18:10–16 ken ibinglayda dagiti padas a dimteng kadakuada ti pannakaawat iti pategda iti Dios. Kasano nga apektuanan dagitoy a bersikulo ti wagas a panangkitatayo iti bagitayo? dagiti dadduma a tao? Kasano nga ipakita kadatayo ti Dios a dakkel ti pategtayo Kenkuana?

  Ni Jesus a nakaiggem iti bassit nga ubing a lalaki

  Pateg ti Maysa a Kararua, ni Liz Lemon Swindle

Doktrina ken Katulagan 19:15–19

Nagsagaba ni Jesucristo para iti amin a sangkataw-an.

• Kasano a matulongam dagiti miembro ti klase a makarikna iti saksi ti Espiritu Santo bayat ti panangutobda iti panangiladawan ti Mangisalakan iti bukodna a pangsubbot a panagsagabana? (Doktrina ken Katulagan 19:15–19). Mabalinmo nga awisen ti maysa a tao a mangkanta iti paggugustona a himno maipapan iti Mangisalakan. Mabalinmo nga i-display ti ladawan ti Mangisalakan ket awisem dagiti miembro ti klase a mangbasa kadagiti bersikulo 15–19; kalpasanna mabalinda nga isurat dagiti kapanunotan ken riknada. (Dagiti balikas ni Elder D. Todd Christofferson iti “Dagiti Nainayon a Resources” ti mangpauneg pay iti panagyaman dagiti miembro ti klase iti panagsagaba ti Mangisalakan.) Ti maysa a binatog kas iti daytoy ket makatulong kadagiti miembro ti klase a mangutob iti: Agyamanak iti Pannubbot ni Jesucristo gapu iti … Mabalin nga agtallugod ti sumagmamano a miembro tapno mangibinglay kadagiti pammaneknekda maipapan ken ni Jesucristo.

Doktrina ken Katulagan 19:16–26, 34–41

Ti panagaramid iti pagayatan ti Dios ket agkasapulan iti sakripisio.

• No maipasango dagiti miembro ti klase kadagiti kasasaad a nasken a pagaramidanda kadagiti sakripisio para iti ebanghelio, mabalin a makaparegta para kadakuada ti sakripisio nga inaramid ni Martin Harris tapno maipablaak ti Libro ni Mormon. Mabalinmo nga awisen ti maysa a tao nga umay iti klase a nakasagana a mangisarita maipapan iti pangngeddeng ni Martin a mangisalda iti talonna tapno pagbayad iti pannakaiprenta ti Libro ni Mormon (kitaen iti Saints, 1:76–78). Ania dagiti bersikulo manipud iti benneg 19 a mabalin a nakatulong koma kenkuana a nagaramid iti pangngeddengna? Mabalin a kayatmo nga awisen dagiti miembro ti klase a mangibinglay no kasano a binendisionan ida ti Libro ni Mormon ken no kasano ti kadakkel ti panagyamanda iti sakripisio ni Martin Harris ken dadduma pay a nagsakripisio tapno maipablaak ti libro.

• Mabalin nga ibinglay ti maysa a tao iti klase ti sakripisio nga inaramidda para iti Apo. Mabalin a daytoy ti mangiturong kadagiti miembro ti klase tapno agpanunot maipapan iti bukodda a panagtallugod nga agsakripisio. Allukoyem ida a mangibinglay iti ania man a banag a masarakanda manipud iti Doktrina ken Katulagan 19 a mangparegta kadakuada nga agsakripisio tapno maaramid ti pagayatan ti Dios (kitaen nangnangruna dagiti bersikulo 16–26, 34–41).

nagiti nainayon a resources icon

Dagiti Nainayon a Resources

Ti gatad ti ayat ti Dios.

Agibasbasar iti Doktrina ken Katulagan 19:18, kinuna ni Elder D. Todd Christofferson: Ibilangtayo koma ti gatad ti napateg nga ayat ti Dios. … Ti panagtutuokna iti Getsemani ken iti krus ket nakarkaro ngem iti ania man a mabalin nga ibturan ti asino man a mortal. Nupay kasta, gapu iti ayatna para iti Amana ken para kadatayo, inibturanna, ken kas bungana, mabalinna nga idiaya kadatayo ti agpada nga imortalidad ken agnanayon a biag” (“Abide in My Love,” Ensign wenno Liahona, Nob. 2016, 50).

Panangpadur-as iti Panangisurotayo

Mangparnuay iti makaay-ayo ti aglawlaw tapno maawis ti Espiritu. Adu dagiti wagas a mabalinmo nga awisen ti Espiritu iti klasem. Ti pangyuna a musika ket makaallukoy iti panagraem. Dagiti panangipeksa iti ayat ken pammaneknek ket makaparnuay iti nabara, ken naespirituan nga aglawlaw. (Kitaen iti Panangisuro iti Wagas ti Mangisalakan, 15.)