Ni Joseph Smith ken dagiti Tallo a Saksi a nakaparintumeng nga agkarkararag

Pebrero 15–21

Doktrina ken Katulagan 14–17

“Agpaay a Saksi”

Panunotem maipapan iti doktrina ken dagiti pasamak a nailadawan iti Doktrina ken Katulagan 14–17. Kasano a maparegtamto dagiti tao a suruam tapno “agpaay a saksi [kadagitoy] a banag”? (Doktrina ken Katulagan 14:8).

Isuratmo dagiti Impresionmo

icon iti panagbibinninglay

Yawis ti Panagbibinninglay

Ania ti natakuatan dagiti miembro ti klasem a napateg iti bukod wenno sangapamiliaan a panagadalda? Mabalinmo nga awisen ti klase a mangibinglay iti maysa a nauneg a pannakaammo ken pannakaawat maipapan iti pannakiraman iti aramid ti Apo manipud iti tunggal benneg iti Doktrina ken Katulagan 14–17.

icon iti panangisuro

Isuro ti Doktrina

Doktrina ken Katulagan 14–16

Awisennatayo ti Apo a makiraman iti aramidna.

• Ania ti ammo dagiti miembro ti klase maipapan iti pamilia Whitmer? (kitaen iti Saints, 1:68–69). Mabalin a makatulong kadakuada a mangilista iti pisarra ti sumagmamano a kinapudno maipapan kadagiti Whitmer. Kasano dagitoy a kinapudno a makatulong iti nasaysayaat a pannakaawattayo iti balakad ti Apo kadagiti Whitmer kadagiti benneg 14–16? Kas pagarigan, apay nga indasig ti Apo ti aramidna iti panagapit iti maysa a kataltalonan?

• Tapno mapalugodan a mangibinglay dagiti miembro ti klase iti kapanunotanda maipapan iti pannakiraman iti aramid ti Apo, mabalinmo nga isurat dagiti sumaganad a reperensia iti pisarra: Doktrina ken Katulagan 14:1; 14:2–4; 14:5, 8; 14:6–7; 14:9–11; 15:6. Mabalin a basaen dagiti miembro ti klase ti maysa kadagitoy a binatog iti nasantuan a kasuratan iti kada paris ken paglilinnawagan no ania ti masursuroda maipapan iti aramid ti Apo. Mabalin nga ibinglay iti klase ti sumagmamano kadagiti paris no ania ti napaglilinnawaganda.

• Awisem dagiti miembro ti klase a mangibinglay kadagiti padasda a mangtultulong kadagiti dadduma pay nga umasideg iti Mangisalakan, agraman dagiti full-time wenno service missionary ken babaen iti ministering. Kasano a nakitadan dagiti balikas ti Apo iti Doktrina ken Katulagan 15:6 ken 16:6 a naipatungpal iti biagda? Ania ti masursurotayo manipud kadagitoy a benneg a makatulong kadatayo nga agsagana a mangibinglay iti ebanghelio?

  dagiti trabahador iti bangkag nga agan-ani iti trigo

  Ladawan dagiti trabahador ti bangkag ti trigo ni Greg Newbold

Doktrina ken Katulagan 17

Makapagtalinaedtayo a napudno no ania ti ammotayo, nupay didatayo awaten dagiti dadduma.

• Apay a nangipaay ti Apo kadagiti saksi ti Libro ni Mormon? Mabalin a makaibinglay dagiti miembro ti klase kadagiti kapanunotan a napasamak kadakuada bayat ti panagbasada iti Doktrina ken Katulagan 17. Mabalin a masarakan dagiti nainayon a kapanunotan kadagiti nasantuan a kasuratan a naibasar iti paulo iti benneg 17 wenno iti “Ti Pammaneknek dagiti Tallo a Saksi,” a masarakan iti rugi ti Libro ni Mormon. Kasano nga inimpluensiaan ti pammaneknek dagiti Tallo a Saksi dagiti pammaneknektayo maipapan iti Libro ni Mormon?

• Uray no ditayo pay nakakita kadagiti anghel wenno naiggaman dagiti nabalitokan a pinanid, makapagpaneknektayo latta maipapan iti Libro ni Mormon. Ania ti masarakan dagiti miembro ti klase iti benneg 17 (agraman ti paulo ti benneg) a mariknada a mayaplikar kadakuada? No adda maysa nga agdamag no apay a mamatitayo a pudno ti Libro ni Mormon, ania koma ti ibagatayo? Mabalin a mangisurat dagiti miembro ti klase ti ababa a sungbat, ket mabalinmo nga awisen ti sumagmamano a mangibinglay iti insuratda. Ti adaw ni Presidente Ezra Taft Benson iti “Dagiti Nainayon a Resources” ti mabalin a mangparegta kadagiti miembro nga agpaneknek maipapan iti Libro ni Mormon kadagiti dadduma.

• Mabalin a makaparegta a paibinglay iti maysa a miembro ti klase dagiti padas ti dadduma pay a saksi kadagiti pinanid a balitok (kitaen iti “Ti Pammaneknek dagiti Walo a Saksi” iti Libro ni Mormon ken ti padas ni Mary Whitmer iti Saints, 1:70–71). Ania ti masursurotayo manipud ti padas dagitoy a saksi?

• Mabalinmo nga ibinglay dagiti seleksion manipud iti video “A Day for the Eternities” (ChurchofJesusChrist.org) kas paset ti panangilawlawagmo maipapan kadagiti saksi ti Libro ni Mormon (nangrugi ti paset maipapan iti Tallo a Saksi iti agarup 15:00).

dagiti nainayon a resources icon

Dagiti Nainayon a Resources

Iti panangibinglay iti pammaneknektayo maipapan iti Libro ni Mormon.

Inted ni Presidente Ezra Taft Benson ti sumaganad nga awis kadagiti miembro ti Simbaan idi 1988:

“Ti Libro ni Mormon ket ti ramit nga insangrat ti Dios nga ‘agsaknap iti daga kas iti layus, a mangummong kadagiti pili[na].’ (Moises 7:62.) Nasken nga agbalin daytoy a sagrado a libro ti nasantuan a kasuratan nga ad-adda pay a sentro ti panagikasabatayo, panagisurotayo, ken panagtrabahotayo kas missionary.

“… Iti daytoy a panawen ti elektronik a media ken ti nasaknap a pannakaiwaras ti naiprenta a balikas, datayonto ti pagsungbaten ti Dios no ditayo patignayen ti Libro ni Mormon iti naindaklan a wagas.

“Addaantayo iti Libro ni Mormon, addaantayo kadagiti miembro, addaantayo kadagiti missionary, addaantayo kadagiti resources, ket agkasapulan ti lubong. Itan ti panawen!

“Patpatgek a kakabsatko, marigatantayo a mangtarok iti bileg ti Libro ni Mormon, wenno ti nadiosan a papel nga ak-akmenna, wenno ti sakup a nasken a pakatignayanna” (Teachings of Presidents of the Church: Ezra Taft Benson [2014], 143–44).

Panangpadur-as iti Panangisurotayo

Agdamag kadagiti saludsod a mangyawis iti pammaneknek. Ti naparegta a saludsod ket mabalin a nabileg a wagas tapno mangawis iti Espiritu. Kas pagarigan, no mangisursuroka iti Doktrina ken Katulagan 14:9, mabalinmo a damagen ti saludsod kas iti “Kasano a naammuam a ni Jesucristo ti ‘silaw a di mailemmeng iti kasipngetan’?” (Kitaen iti Panangisuro iti Wagas ti Mangisalakan, 32.)