Karayan ti Susquehanna

Pebrero 8–14

Doktrina ken Katulagan 12–13; Joseph Smith—Pakasaritaan 1:66–75

“Kadakayo Padak a Katulongan”

Kas met laeng iti pannakalawlawag ti Espiritu Santo iti panunot da Joseph Smith ken Oliver Cowdery maipanggep kadagiti nasantuan a kasuratan, maparegtanaka no nainkararagan nga adalem ti Doktrina ken Katulagan 12–13 ken Joseph Smith—Pakasaritaan 1:66–75.

Isuratmo dagiti Impresionmo

icon iti panagbibinninglay

Yawis ti Panagbibinninglay

Maysa a wagas tapno mayallukoy ti panagbibinninglay ket mangsaludsod kadagiti miembro ti klase no kasano nga adalenda dagiti nasantuan a kasuratan. Ania ti inaramidda a mangsapul kadagiti nauneg a pannakaammo ken pannakaawat [insights] kadagiti nasantuan a kasuratan iti daytoy a lawas?

icon iti panangisuro

Isuro ti Doktrina

Doktrina ken Katulagan 13

Ti Aaronic Priesthood ket insubli ni Juan Bautista.

• Maysa a wagas tapno mailawlawag dagiti kinapudno iti Doktrina ken Katulagan 13 ket pagsasaritaan dagiti miembro ti klase no kasano a makatulong daytoy a benneg kadagiti agtutubo tapno maawatanda a nasaysayaat ti Aaronic Priesthood. Ania ti isuro ti benneg 13 maipapan iti Aaronic Priesthood a nasken a maawatan dagiti agtutubo a lallaki ken agtutubo a babbai? Tapno maikkan ti tunggal maysa iti gundaway a makiraman, mabalinmo nga idawat kadagiti miembro ti klase a mangilawlawag iti daytoy a saludsod iti kada paris ket kalpasanna mangibinglay iti klase no ania ti nasursuroda manipud iti tunggal maysa.

• Ti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ket mangisingasing kadagiti resources a makatulong a mangilawlawag iti sumagmamano a ragup ti balikas iti Doktrina ken Katulagan 13. Mabalinmo nga idawat kadagiti miembro ti klase nga ibinglayda ti no ania ti nasursuroda manipud iti panagadal kadagitoy a resources. Tapno maparegta ti panaglilinnawag maipapan kadagiti tulbek a nadakamat iti daytoy a benneg, mabalinmo nga i-display ti maysa a set dagiti tulbek ket awisem dagiti miembro ti klase a mangisarita no ania ti palugodan dagiti tulbek nga aramidentayo. Makatulong pay ti panangilawlawag da Sister Ruth ken Elder Dale G. Renlund iti “Dagiti Nainayon a Resources.” Ania dagiti bendision a maited dagiti tulbek ti Aaronic Priesthood a pakagun-odantayo? Kasano a maiduma koma ti biagtayo no awan dagitoy a bendision?

• Paset ti ngayed ti naisubli nga ebanghelio ket ti panangiramanna kadatayo iti isu met la nga aramid kas iti aramid dagiti lallaki ken babbai kadagiti nasantuan a kasuratan: panangbangon iti pagarian ti Dios iti daga. Pagbalinennatayo a, no ar-arigen, “pada a katulongan” kadakuada. Ania ti kayat a sawen ti agbalin a pada a katulongan iti aramid ti Apo?? Mateo 3:13–17; Lucas 1:13–17; 3:2–20 ket makatulong kadagiti miembro ti klase a makaawat a nasaysayaat ti trabaho nga aramid ni Juan Bautista.

  Ni Joseph Smith a mangbumbuniag ken ni Oliver Cowdery

  Bumbuniagan ni Joseph Smith ni Oliver Cowdery, ni Del Parson

Joseph Smith—Pakasaritaan 1:66–75

Dagiti ordinansa ti mangyasideg kadatayo iti bileg ti Dios.

• Tapno maikkan dagiti miembro ti klase iti gundaway nga agpaneknek iti tunggal maysa maipapan kadagiti bendision a sumangbay manipud iti yaawat kadagiti ordinansa iti priesthood, mabalinmo nga awisen ida a mangrebyu iti Joseph Smith—Pakasaritaan 1:66–75, agraman iti pakaammo iti bersikulo 71, a mangsapsapul kadagiti bendision nga inawat da Joseph ken Oliver kalpasan ti panagbuniag ken pannakaordenda iti priesthood. Kasano a maipaay dagiti ordinansa ti naespirituan a bileg? Kalpasanna mabalin nga ibinglay dagiti miembro ti klase iti bukodda a padas idi nariknada ti bileg ti Dios a sumangbay manipud iti panangawatda kadagiti ordinansa iti priesthood kas iti panagbuniag, ti sakramento, wenno dagiti ordinansa iti templo. Mabalinmo pay nga ipabuya ti video “Blessings of the Priesthood” (ChurchofJesusChrist.org) kas paset ti panaglilinnawag.

• Mabalin a mairanud dagiti miembro ti klase manipud iti panangaramid iti maysa a tsart a mangipakita kadagiti bendision a sumangbay manipud kadagiti ordinansa iti priesthood. Kas pagarigan, mabalinmo nga isurat iti pisarra dagiti paulo nga Dagiti Ordinansa ken Dagiti Bendision. Mabalin nga sukisoken dagiti miembro ti klase dagiti nasantuan a kasuratan kas iti sumaganad tapno isurat iti tsart: Juan 14:26; Dagiti Aramid 2:38; Doktrina ken Katulagan 84:19–22; 131:1–4; Joseph Smith—Pakasaritaan 1:73–74. Mabalinda met nga iraman dagiti dadduma pay a bendision a naawatdan gapu kadagitoy nga ordinansa. Mabalin nga ibinglayda dagiti padas idi nariknada a dagiti ordinansa a naawatda ti nangyeg iti bileg ti Mangisalakan iti biagda.

dagiti nainayon a resources icon

Dagiti Nainayon a Resources

Ania dagiti tulbek ti priesthood?

Nangidiaya ni Elder Dale G. Renlund ken ti asawana, ni Ruth, iti panangilawlawag maipapan kadagiti tulbek ti priesthood.

“Ti termino a dagiti tulbek iti priesthood ket maaramat iti dua a naiduma a wagas. Maibasar ti umuna iti maitudo a karbengan wenno pribilehio a maited iti amin nga umawat iti Aaronic wenno Melchizedek Priesthood. … Kas pagarigan, umawat dagiti Aaronic Priesthood holder kadagiti tulbek ti panagserserbi dagiti anghel ken dagiti tulbek ti panangisagana iti ebanghelio ti panagbabawi ken ti panagbuniag babaen ti pannakairarem para kadagiti pannakaugas dagiti basol (kitaen iti Doktrina Ken Katulagan 13:1; 84:26–27). Umawat dagiti Melchizedek Priesthood holder iti tulbek dagiti kinadatdatlag ti pagarian, ti tulbek ti pannakaammo ti Dios, dagiti tulbek ti amin a naespirituan a bendision ti Simbaan (kitaen iti Doktrina Ken Katulagan 84:19; 107:18). …

“Ti maikadua a wagas a pakaaramatan iti termino a dagiti tulbek iti priesthood ket maibasar iti panangidaulo. Umawat dagiti lider iti priesthood kadagiti mainayon a tulbek iti priesthood, ti karbengan a mangidaulo iti mabuangay a dibision ti Simbaan wenno korum. Maipanggep iti daytoy, dagiti tulbek iti priesthood ket ti turay ken bileg a mangiturong, mangidaulo, ken mangituray iti Simbaan” (The Melchizedek Priesthood: Understanding the Doctrine, Living the Principles [2018], 26).

Panangpadur-as iti Panangisurotayo

Iburaymo a masansan ti pammaneknekmo. “Ti simple, naimpusuan a pammaneknekmo iti naespirituan a kinapudno ket nabileg a makaimpluensia kadagiti sursuruanyo. … Saan a kasapulan a nalaing ken atiddog daytoy” (Panangisuro iti Wagas ti Mangisalakan, 11). Ibilangmo ti panangibinglay iti bukodmo a pammaneknek maipapan iti Aaronic Priesthood bayat ti panangilawlawagmo iti Doktrina Ken Katulagan 13.