manuskrito ti Libro ni Mormon

Replika ti orihinal a manuskrito ti Libro ni Mormon.

Pebrero 1–7

Doktrina ken Katulagan 10–11

“Tapno Agballigika”

Ania dagiti impresion nga adda kenka bayat ti panangbasam iti Doktrina ken Katulagan 10–11? Ania dagiti kapanunotan nga immay kenka maipapan kadagiti kasapulan dagiti tao a sursuruam?

Isuratmo dagiti Impresionmo

icon iti panagbibinninglay

Yawis ti Panagbibinninglay

Tapno maikkan dagiti miembro ti klase iti gundaway nga agsarita maipapan iti nasursuroda iti bukod ken sangapamiliaan a panagadalda, mabalinmo nga isurat iti pisarra ti Doktrina ken Katulagan 10 ken Doktrina ken Katulagan 11. Mabalin nga isurat dagiti sumagmamano a miembro ti klase, iti babaen ti ania man a paulo, ti numero ti maysa a bersikulo a pakasarakanda ti napateg a kinapudno. Pumili iti sumagmamano kadagiti bersikulo, ket mangawis kadagiti miembro ti klase a mangibinglay kadagiti kinapudno a nasarakanda sadiay.

icon iti panangisuro

Isuro ti Doktrina

Doktrina ken Katulagan 10:1–33

Kalikaguman ni Satanas a dadaelen ti aramid ti Dios.

• Ti Doktrina ken Katulagan 10 ket makatulong kadagiti miembro ti klase a mangbigbig ken mangkedked kadagiti panagkagumaan ni Satanas a mangdadael iti pammatida. Tapno mangted iti sumagmamano a konteksto iti pakasaritaan para iti daytoy a benneg, mabalinmo nga awisen ti maysa a miembro ti klase a mangibinglay iti pakasaritaan ni Martin Harris iti pannakapukaw ti naipatarus a 116 a pinanid iti Libro ni Mormon (kitaen ti paulo ti benneg iti Doktrina ken Katulagan 3 ken Saints, 1:50–53). Kalpasanna mabalin a sukisoken dagiti miembro ti klase ti Doktrina ken Katulagan 10:1–33 tapno saraken ti plano ni Satanas para kadagiti napukaw a panid. Ania ti masursurotayo manipud kadagitoy a bersikulo maipapan kadagiti wagas a pakapagtrabahuan ni Satanas ken no apay nga aramidenna dagitoy a banag? (kitaen met iti bersikulo 63). Kasano nga agtartrabaho isuna iti kasta met a wagas iti aldawtayo? Kasano a tulongannatayo ti Apo a mangsaranget ken ni Satanas iti biagtayo?

Doktrina ken Katulagan 10:34–52

Nabilbileg ti “sirib [ti Apo] ngem iti panangballaibo ti sairo.”

• No mariknatayo a maup-upaytayo maipapan kadagiti basoltayo, makasaraktayo iti namnama iti panangammo no kasano a nagbayad ti Apo gapu iti basol nga inaramid da Joseph Smith ken Martin Harris idi nagsukirda iti Apo ken napukawda ti 116 a panid ti patarus ti Libro ni Mormon. Ibilangmo no kasano a matulongam dagiti miembro ti klase a mangsapul iti namnama iti daytoy a pakaammuan. Kas pagarigan, mabalinmo nga awisen ida a mangibinglay iti maysa a banag a masursuroda maipapan iti Apo manipud iti Doktrina ken Katulagan 10:34–52 (kitaen met iti Doktrina ken Katulagan 3:1–3). Mabalin nga ibinglay dagiti miembro ti klase no kasano a nakitadan a “nabilbileg ti sirib ti Apo ngem iti panangballaibo ti sairo” (Doktrina ken Katulagan 10:43). Kasano a mangpapigsa iti pammatitayo Kenkuana daytoy a pannakaammo?

  Ni Mormon a mangyab-ababa kadagiti pinanid a balitok

  Ni Moroni a Mangyab-ababa kadagiti Pinanid, ni Tom Lovell

Doktrina ken Katulagan 11

No dumawattayo iti Dios, umawattayonto.

• Ti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia awisennatayo a mangbasa iti Doktrina ken Katulagan 11 a kasla naisurat daytoy nga agpaay kadatayo. Nalabit nga agtallugod dagiti miembro ti klase a mangibinglay iti banag manipud iti benneg nga adda pakainaiganna kadakuada. Kasano nga agplanoda a mangyaplikar no ania ti nasursuroda?

• Maysa a wagas tapno mayallukoy ti panaglilinnawag maipapan iti Doktrina ken Katulagan 11 ket ti panangawis kadagiti miembro ti klase a mangsapul iti pagbatayan iti benneg ket kalpasanna mangisurat iti maysa a saludsod maipapan iti daytoy. Mabalin nga iraman dagiti saludsod a kas iti “Ania ti kayat a sawen ti kumpet ken ni Cristo iti amin a pusom?” (bersikulo 19) wenno “Kasano a magun-odtayo ti balikas ti Dios?” (bersikulo 21). Mabalin nga ikabil dagiti miembro ti klase dagiti saludsodda iti ngato ti papel ket ipasa dagiti papelda kadagiti adda ti siled, a nayonan kadagiti kapanunotan ken posible a sungbat iti tunggal saludsod ti tunggal maysa. (Mabalin a makatulong nga umuna a bingayen ti klase iti babassit a grupo.) Kalpasanna mabalin nga ibinglay dagiti miembro ti klase ti sumagmamano a nauneg a pannakaammo ken pannakaawat [insights] nga insurat dagiti dadduma maipapan iti saludsodda.

Doktrina ken Katulagan 11:8–26

Itedto ti Dios ti Espirituna kadatayo bayat ti panangisaganatayo iti bagbagitayo iti wagasna.

• Mairanud kadi dagiti miembro ti klasem manipud iti panagsaritada no kasano a mailasin ti bukod a paltiing babaen ti Espiritu? No kasta, mabalinmo a rugian ti panaglilinnawag babaen ti panangawis kadakuada a mangipapan a naidawat kadakuada a mangisurat iti sumagmamano a kinapudno maipapan iti no kasano nga umawat iti bukod a paltiing. Ania koma ti iramanda manipud iti Doktrina ken Katulagan 11:8–26? Kas pagarigan, ania koma ti isuratda maipapan iti panangsagana nga umawat iti pannarabay para kadagiti biagtayo ken dagiti sungbat kadagiti saludsodtayo? Ania koma ti ibagada no kasano ti mangilasin kadagiti sungbat no sumangbayda? Awisem dagiti miembro ti klase a mangutob no kasano a yaplikardanto no ania ti nasursuroda bayat ti panagkagumaanda a manggun-od iti bukod a paltiing.

  Kas paset daytoy nga aktibidad, mabalinmo nga ibinglay daytoy a palawag manipud ken ni Sister Julie B. Beck, sigud a Sapasap a Panguluen ti Relief Society: “Ti kabaelan tapno maikari, umawat, ken agtignay a mayannurot iti bukod a paltiing ket maysa a kapatgan a paglaingan a mabalin a magun-od iti daytoy a biag” (“And upon the Handmaids in Those Days Will I Pour Out My Spirit,” Ensign wenno Liahona, Mayo 2010, 11).

Panangpadur-as iti Panangisurotayo

Iramanmo dagiti tao nga agkarkarigatan. Ania ti maaramidmo no kasla maisinsina ti maysa a miembro ti klase manipud iti dadduma iti klase? No dadduma kasapulanna laeng ti mairaman. Ibilangmo ti panangidawat iti daytoy a tao a makiraman iti umay nga adalen. No saan nga agresponde isuna kadagiti panagkagumaanmo iti umuna, ituloymo nga ipakita ti ayat ken pannakaseknan. (Kitaen iti Panangisuro iti Wagas ti Mangisalakan, 8–9.)