Enero 25–31

Doktrina ken Katulagan 6–9

“Daytoy ti Espiritu ti Paltiing”

Isuro tiDoktrina ken Katulagan 6–9 dagiti napapateg a pagbatayan maipapan iti panangawat iti paltiing. Yaplikarmo dagitoy a pagbatayan babaen ti panagkalikagum a manggun-od iti paltiing no kasano a matulongan a makasursuro dagiti miembro ti klase manipud kadagitoy a benneg.

Isuratmo dagiti Impresionmo

Yawis ti Panagbibinninglay

Tapno maallukoy dagiti miembro ti klase a mangibinglay kadagiti padasda iti panagadal iti Doktrina ken Katulagan 6–9, mabalinmo nga awisen ida a mangilawlawag, no maitutop, kadagiti ania man a naespirituan nga impresion a naawatda kabayatan ti panagadalda. Ania dagiti mensahe ti Apo para kadakuada?

Isuro ti Doktrina

Doktrina ken Katulagan 6; 8–9

Makisao ti Nailangitan nga Ama kaniak babaen “ti Espiritu ti kinapudno.”

• Adu ti isuro ti Apo kadatayo maipapan iti bukod a paltiing kadagitoy a benneg, ket mabalin a dimo kabaelan nga isuro amin dagitoy iti maysa a klase. Mabalin a makatulong a bingayen ti klase iti tallo a grupo ken kiddawem iti tunggal grupo a sukisoken iti benneg 6, 8, wenno 9, a mangsapsapul kadagiti sungbat dagiti saludsod kas kadagitoy: Kasano a makisarita kadatayo ti Espiritu Santo? Kasano a mailasintayo ti bukod a paltiing? Kasano nga isaganatayo dagiti bagbagitayo nga umawat iti paltiing? Kalpasanna mabalin nga ibinglay biit ti maysa manipud iti tunggal grupo iti klase no ania ti natakuatan ti grupoda. Mabalin pay nga allukoyem dagiti miembro ti klase a mangibinglay kadagiti bukodda a padas iti panangilasin iti bukod a paltiing. Kas pagarigan, adda kadi ania man a banag iti Doktrina ken Katulagan 6:22–24 a mangipalagip kadatayo kadagiti padastayo idi?

• Ti panagsarita maipapan iti bukod a paltiing ket mabalin a makaupay kadagiti tao iti klasem nga agkarkararag para iti pannarabay ngem dida marikna nga adda maaw-awatda. Makatulong daytoy kadakuada a mangammo a nagkarigatan ni Oliver Cowdery iti isu met la a rikna idi dina kabaelan ti agipatarus kas kalaka ti ninamnamana. Mabalinmo nga awisen dagiti miembro ti klase a mangsukisok iti balakad ti Apo ken ni Oliver iti benneg 9. Ania dagiti mensahe iti daytoy a benneg ti makatulong iti maysa a tao a makarikrikna a saan a sungsungbatan ti Apo dagiti kararagda? Mabalin a makatulong pay dagiti palawag iti “Dagiti Nainayon a Resources.”

  

  Oliver Cowdery, ni Lewis A. Ramsey

Doktrina ken Katulagan 6–7

“Kas iti panagtarigagayyo kaniak ti maaramidto kadakayo.”

• Ti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia ket mangisingasing iti panangisurat kadagiti pagarigan dagiti balikas kas iti tarigagay kadagiti benneg 6–7. Nalabit a makaibinglay dagiti miembro ti klase no ania ti nasursuroda manipud iti dayta nga ehersisio, wenno mabalinyo a sangkamaysa nga aramiden ti aktibidad kas maysa a klase. Ania ti isuro kadatayo dagiti inaldaw a tignaytayo maipapan kadagiti tarigagaytayo? Kasano a makatulong kadatayo ti Apo a mangbalbaliw kadagiti tarigagaytayo?

Doktrina ken Katulagan 6:29–37

No kumitatayo iti Apo, matulongannatayo a mangparmek iti duadua ken buteng.

• Apay a no dadduma “agbuteng[tayo] … nga agaramid iti nasayaat”? (bersikulo 33). Nalabit a mabalin nga isingasing dagiti miembro ti klase ti sumagmamano a posible a gapu, a nayon kadagiti kapanunotan manipud iti Doktrina ken Katulagan 6:29–37 a mangted kadakuada iti tured nga agaramid iti nasayaat.

• Iti panangirugi iti panaglilinnawag no kasano a tulongannatayo ni Jesucristo a “saan nga agduadua, saan nga agbuteng” (bersikulo 36), mabalinmo nga idawat kadagiti miembro ti klase a mangisurat iti papel ti sumagmamano a banag a mabalin a pagbutngan dagiti tao. (Nangted ni Elder Ronald A. Rasband iti sumagmamano a pagarigan iti mensahena “Be Not Troubled” [Ensign wenno Liahona, Nob. 2018, 18].) Kalpasanna mabalinmo a basaen iti napigsa ti sumagmamano kadagitoy a papel ket ilawlawag no kasano a matulongannatayo ti Mangisalakan ken ti pangsubbot a bilegna no mabutengtayo. Ti Doktrina ken Katulagan 6:29–37 ket addaan sumagmamano a nalawag a pannnakaawat (kitaen met iti 1 Juan 4:18). Ania ti kayat a sawen ti “kitaen [ni Cristo] iti tunggal panunot”? (bersikulo 36). Kasano a matulongannatayo daytoy a panangipokus iti Mangisalakan no maipasangotayo iti duadua wenno buteng?

Dagiti Nainayon a Resources

Pannakaawat no kasano a sungbatan ti Nailangitan nga Ama dagiti kararag.

“Iti biagko nasursurok a no dadduma diak makaawat iti sungbat iti kararag gapu ta ammo ti Apo a saanak a nakasagana. No sumungbat Isuna, masansan a ‘sangkabassit ditoy ken sangkabassit idiay’ [2 Nephi 28:30] gapu ta dayta laeng ti kabaelak ken dayta laeng amin ti pagtallugodak nga aramiden” (Robert D. Hales, “Waiting upon the Lord: Thy Will Be Done,” Ensign wenno Liahona, Nob. 2011, 73).

“Ania ti aramidem no nakapagsaganaka a nasayaat, nakapagkararagka iti napasnek, nakapagurayka iti umdas a panawen para iti sungbat, ket saanmo latta marikna ti sungbat? Mabalin a kayatmo a yebkas ti panagyaman no mapasamak dayta, gapu ta daytoy ti pakakitaan ti panagtalekna. No agbibiagka a maikari ket mayannurot ti pilim kadagiti pannursuro ti Mangisalakan ket kasapulam ti agtignay, mangirugi nga addaan iti panagtalek. … No agbibiagka a sililinteg ken agtigtignayka nga addaan iti panagtalek, saan nga ipalubos ti Dios a makaadayoka unay nga awan ti pammallaag a parikna no nakaaramidka iti biddut a pangngeddeng” (Richard G. Scott, “Using the Supernal Gift of Prayer,” Ensign or Liahona, May 2007, 10).

Panangpadur-as iti Panangisurotayo

Yebkasmo ti panagtalek kadagiti kabaelan dagiti agad-adal. Mabalin nga awan panagtalek ti sumagmamano a tao iti klasem iti kabaelanda nga agsursuro iti ebanghelio. Ibilangmo no kasano a maipanamnamam kadakuada a bayat ti panagkagumaanda nga agsursuro iti bukodda, isuronto ida ti Espiritu Santo. (Kitaen iti Panangisuro iti Wagas ti Mangisalakan, 29.)