pamilia nga agbasbasa kadagiti nasantuan a kasuratan

Disiembre 30–Enero 3

Doktrina ken Katulagan 1

“Dumngegkayo, O Dakayo a Tattao”

Bayat ti panangbasam iti Doktrina ken Katulagan 1, panunotem no ania dagiti bersikulo a mabalinmo nga ipamaysa iti klase ken no kasano a matulongam dagiti miembro ti klase a masursuruan manipud kadagitoy a bersikulo.

Isuratmo dagiti Impresionmo

icon iti panagbibinninglay

Yawis ti Panagbibinninglay

Mabalinmo a rugian ti panagadalmo iti Doktrina ken Katulagan iti klase babaen ti panangkiddaw kadagiti miembro ti klase no ania ti riknada maipapan iti panagadalda iti daytoy a libro ti nasantuan a kasuratan itoy a tawen. Ania dagiti binatog manipud iti benneg 1 a mangtulong kadakuada a makarikna ti gagar a mangbasa iti Doktrina ken Katulagan? Mabalinmo nga idawat kadakuada a sukisoken iti benneg 1 para iti bersikulo nga ibinglayda no padpadasenda nga allukoyen ti maysa a tao a mangbasa itoy sagrado a libro.

icon iti panangisuro

Isuro ti Doktrina

Doktrina ken Katulagan 1

Awisennatayo ti Apo a “sukimaten dagitoy a bilin.”

• Bayat ti panangilawlawagmo iti “pakauna” ti Apo iti Doktrina ken Katulagan (bersikulo 6), mabalin a makatulong nga ilawlawag ti maysa a tao iti klase no ania ti pakauna ken ti panggep nga ipaayna iti maysa a libro. Kalpasanna mabalin a paglilinnawagan ti klase no kasano nga ipaay ti benneg 1 dayta a panggep para iti Doktrina ken Katulagan. Kas pagarigan, ania dagiti tema a yam-ammo ti benneg 1 ti libro? Ania dagiti panggep nga adda iti libro? Ania dagiti masarakantayo iti daytoy a benneg a makaimpluensia iti wagas a panagbasatayo iti Doktrina ken Katulagan itoy a tawen?

• Ti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ket awisennatayo a mangibilang no kasano nga agtignaytayonto a mayannurot iti bilin ti Apo a “sukimaten dagitoy a bilin” (bersikulo 37). Nalabit a makaibinglay dagiti miembro ti klase no ania ti planoda nga aramiden itoy a tawen tapno maaramidda a napateg ti panangadalda iti Doktrina ken Katulagan. Anianto ti sukimatenda? Kasano a maigiddiat ti panagsukimat iti panagbasa laeng? Ania dagiti pamay-an iti panagadal a nasarakanda a kangrunaan a makatulong?

Doktrina ken Katulagan 1:1–6, 23–24, 37–39

Agsarita ti Dios babaen dagiti katulonganna, ket maipatungpalto dagiti balikasna.

• Adu kadatayo ti addaan kadagiti miembro ti pamilia, gagayyem, ken kaam-ammo a saan a kapada ti pammatitayo maipapan kadagiti sibibiag a propeta. Nalabit a mabalin nga ibinglay dagiti miembro ti klase dagiti kinapudno a masarakanda iti benneg 1 a mabalinda nga usaren a pangsungbat iti maysa a tao nga agduadua kadagiti pammatida maipapan kadagiti propeta. Mabalinmo nga isingasing a kitaenda nangnangruna kadagiti bersikulo 1–6 ken 37–39. Ania ti isuro dagitoy a bersikulo maipapan iti Apo ken dagiti propetana?

• Mabalin nga agessem dagiti miembro ti klase a masursuruan a pinagsasaritaan ti maysa a konseho nga inawagan ni Joseph Smith ti panangipablaak kadagiti paltiing ti Propeta, sinuppiat ti sumagmamano a miembro ti konseho ti ideya. Nabainanda iti kinakapuy ni Joseph iti panagsurat, ket nagdanagda amangan ta makaigapu iti ad-adu pay a parikut para kadagiti Santo ti panangipablaak kadagiti paltiing (kitaen iti Saints, 1:140–43). Kasano a risuten ti benneg 1 dagitoy a pakaseknan? (kitaen, kas pagarigan, kadagiti bersikulo 6, 24, 38).

• Isuro dagiti balikas ti himno “Come, Listen to a Prophet’s Voice” (Hymns, no. 21) ti sumagmamano kadagiti isu met la a pagbatayan a naisuro iti benneg 1. Nalabit a mabalinyo a kantaen wenno basaen ti himno nga aggigiddan ket kalpasanna awisem dagiti miembro ti klase a mangsapul kadagiti binatog iti himno ken dagiti bersikulo iti benneg 1 a mangisuro kadagiti isu met la a pagbatayan.

  sesion iti sapasap a komperensia

  Kasaritanatayo ti Dios babaen dagiti katulonganna.

Doktrina ken Katulagan 1:12–30, 35–36

Insubli ti Apo ti ebangheliona a mangtulong kadatayo a mangsango kadagiti karit kadagiti ud-udina nga aldaw.

• Ania dagiti kapanunotan nga adda kadagiti miembro ti klase bayat ti panagbasada iti pannakailadawan dagiti maudi nga aldaw kadagiti bersikulo 13–16? Ania ti mapaspasamak iti lubong iti agdama a mangipatungpal kadagitoy a naipadto a panangiladawan? Allukoyem dagiti miembro ti klase a mangibinglay iti ania man a banag a nasarakanda iti benneg 1 a nangtulong kadakuada tapno makarikna iti talna ken panagtalek iti baet dagiti karit ti aldawtayo.

• Tapno matulongan dagiti miembro ti klase a mangutob kadagiti bendision nga adda kadatayo gapu ta naisublin ti ebanghelio, mabalinmo nga isurat iti pisarra ti Ania ti isuro dagiti bersikulo17–23 no apay nga insubli ti Apo ti ebangheliona? Mabalin a sukisoken dagiti miembro ti klase dagitoy a bersikulo ken ibinglayda dagiti kapanunotanda iti tunggal maysa. Kas pagarigan, kasano a natulongannatayo dagiti kinapudno a naisubli babaen ken ni Joseph Smith a nangpapigsa iti pammatitayo? (kitaen iti bersikulo 21).

Doktrina ken Katulagan 1:19–28

Usaren ti Apo “dagiti nalupoy ken nanumo” tapno mangipatungpal iti aramidna.

• Maysa a napateg a tema ti Doktrina ken Katulagan 1 ket ti akem “dagiti nalupoy ken nanumo” iti naindaklan nga aramid ti Apo iti ud-udina nga aldaw (bersikulo 23). Awisem dagiti miembro ti klase a mangsukisok kadagiti bersikulo 19–28 tapno masursuro no kasano a mayaplikar kadatayo dagiti balikas a “nalupoy” ken “nanumo” kas katulongan ti Apo. Bayat ti panangibinglayda iti nasarakanda, mabalinmo nga ilawlawag dagiti saludsod kas kadagitoy: Ania dagiti kababalin a kayat ti Apo nga adda kadagiti katulonganna? Anianto ti ipatungpal ti Apo babaen kadagiti katulonganna kadagiti ud-udina nga aldaw? Kasano a maipatpatungpalen dagiti padto kadagitoy a bersikulo iti intero a lubong ken iti bukodtayo a biag?

Panangpadur-as iti Panangisurotayo

Tulongam dagiti agad-adal a mangyarig kadagiti nasantuan a kasuratan iti bagbagida. Dagiti isu met la a kinapudno a nagparegta kadagiti nagkauna a Santo ti makatulong kadatayo a mangsango kadagiti karittayo iti agdama. Bayat ti panangisurom iti Doktrina ken Katulagan, tulongam dagiti miembro ti klase a mangaramid kadagiti koneksion kadagiti mensahe ti Apo ken ni Joseph Smith ken iti mabalin nga isao ti Apo kadakuada iti personal. (Kitaen iti Panangisuro iti Wagas ti Mangisalakan, 21.)