Inawagannak babaen iti Nagan, ni Michael Malm

Enero 11–17

Doktrina ken Katulagan 2; Joseph Smith—Pakasaritaan 1:27–65

“Umasidegto dagiti Puso dagiti Annak kadagiti Ammada”

Sakbay a basaem dagiti kapanunotan iti daytoy a balabala, adalem ti Doktrina ken Katulagan 2 ken Joseph Smith—Pakasaritaan 1:27–65, ket isuratmo dagiti naespirituan nga impressionmo.

Isuratmo dagiti Impresionmo

Yawis ti Panagbibinninglay

Tapno maallukoy dagiti miembro ti klase a mangibinglay kadagiti nalawag a pannakaammo ken pannakaawat ken padpadas bayat ti panagadalda kadagitoy a nasantuan a kasuratan, mabalinmo nga idawat kadakuada a mangibinglay iti maysa a bersikulo a nakaigapu iti panagutobda iti naun-uneg ngem iti gagangay. Ania ti nakaawisan ti riknada maipapan iti dayta a bersikulo?

Isuro ti Doktrina

Joseph Smith—Pakasaritaan 1:27–65

Inawagan ti Dios ni Joseph Smith a mangaramid iti aramidna.

• Mairanud kadi ti klasem manipud iti panangrebyu iti estoria iti Joseph Smith—Pakasaritaan 1:27–65? Mabalinmo nga awisen ti maysa a miembro ti klase a manggupgop iti daytoy, wenno mabalin nga isarita dagiti miembro ti klase ti estoria iti tunggal maysa iti kada paris wenno babassit a grupo. Allukoyem ida a mangiraman iti adu a detalye agingga iti kabaelanda a malagip. Kasano a papigsaen daytoy nga estoria dagiti pammaneknektayo maipapan iti nadiosan a takem [calling] ni Joseph Smith? Ania ti masursuro dagiti ubbing manipud iti daytoy nga estoria maipapan iti no kasano nga aramiden ti Dios ti aramidna?

• Ibilang ti panangi-display kadagiti banag wenno ladawan a mainaig iti aramid a nakaawagan ni Joseph Smith nga aramidenna, kas iti Libro ni Mormon wenno ti ladawan ti maysa a templo. Mabalin a sapulen dagiti miembro ti klase dagiti bersikulo iti Joseph Smith—Pakasaritaan 1:33–42 a mangisuro maipapan kadagitoy nga aspekto ti mision ti Propeta. Kasano a mainaig ti aramid ti Dios para ken ni Joseph Smith iti aramid ti Dios para kadatayo? Ania ti isuro kadatayo dagiti sibibiag a propeta maipapan iti daytoy nga aramid?

Doktrina ken Katulagan 2

Immay ni Elias a mangyasideg iti puspusotayo kadagiti kapuonantayo.

• Mangted pagimbagan kadi iti klasem manipud iti panaglilinnawag maipapan iti kinasiasino ni Elias ken maipapan iti bileg a pangilantip nga insublina? Mabalin a basaen dagiti miembro ti klase maipapan ken ni Elias iti Pangiwanwan iti Nasantuan a Kasuratan wenno irebyu ti estoria manipud iti biagna (kitaen iti 1 Ar-ari 17–18). Ania ti inayon daytoy nga impormasion iti pannakaawattayo iti Doktrina ken Katulagan 2? Mabalinmo pay nga isarita maipapan iti kaipapanan ti mangilantip iti maysa a banag. Mabalin a makatulong ti sumagmamano a banag, kas iti maysa a delata ti taraon, bag a plastik a pagurnongan nga adda siperna, wenno maysa a pagtatak a mangpasingked iti dokumento. Kasano a makatulong kadatayo dagitoy a banag tapno maawatan no ania ti kaipapanan ti mangilantip kadagiti pamilia a sangkamaysa? Kasano a mangtulong daytoy a bileg a mangipatungpal iti panggep ti panagparsua iti lubong? (kitaen iti Doktrina ken Katulagan 138:47–48 ken ti palawag ni Presidente Russell M. Nelson iti “Dagiti Nainayon a Resources”). Tapno matulongan a makita dagiti miembro ti klase no kasano a naipatungpal ti padto iti Doktrina ken Katulagan 2 , mabalinmo nga ilawlawag ti Doktrina ken Katulagan 110:13–16.

• Nalabit a ti panangsursuro maipapan kadagiti “kari nga inaramid kadagiti amma” (Doktrina ken Katulagan 2:2) ket makatulong kadagiti sursuruam a makaawat a nasaysayaat iti bileg ti priesthood a nakaibaonan ni Elias nga isublina. Asino “dagiti amma”? (kitaen iti Doktrina ken Katulagan 27:9–10). Ania dagiti kari nga inaramid ti Apo kada Abraham, Isaac ken Jacob? (kitaen iti Genesis 17:1–8; 22:16–18; 26:1–5, 24; 28:11–15; Abraham 2:8–11). Ania ti kaipapanan ti “imula” dagitoy a kari iti puspusotayo? Kasano a ti panangaramid iti daytoy ket makatulong kadatayo a mangyasideg iti puspusotayo kadagiti kapuonantayo?

Templo ti Palmyra New York

• Tapno maparegta dagiti miembro ti klase a mangyasideg iti puspusoda kadagti kapuonanda, mabalinmo nga awisen ti sumagmamano a miembro a mangidaulo iti panaglilinnawag maipapan iti topiko. Ibilang ti panangiraman iti consultant iti templo ken family history iti ward. Mabalinmo a rugian babaen ti panangbasa iti Doktrina ken Katulagan 2:2–3 ket panangawis kadagiti lider iti panaglilinnawag tapno mangibinglay kadagiti padas a nakayasidegan ti puspusoda kadagiti kapuonanda. Ania ti napasamak iti biagda a nangtulong kadakuada a nagtarigagay nga agsursuro maipapan iti pakasaritaan ti pamiliada? Ania dagiti singasing a maitedda a makatulong iti dadduma pay a miembro ti klase a makiraman iti family history ken serbisio iti templo? Ti palawag ni Presidente Dallin H. Oaks iti “Dagiti Nainayon a Resources” ket makatulong pay a mangparegta kadagiti miembro ti klase. Mabalinmo pay nga iturong dagiti miembro iti FamilySearch.org para kadagiti kapanunotan.

Dagiti Nainayon a Resources

Ti panggep ti Panagparsua.

Insuro ni Presidente Russell M. Nelson:

“Ti agnanayon a biag, naaramid a posible babaen ti Pannubbot, ket ti kangatuan a panggep ti Panagparsua. Tapno isabali dayta a palawag iti negatibo a porma, no saan a mailantip dagiti pamilia kadagiti nasantuan a templo, madadaelto ti sangabukel a daga.

“Dagiti panggep ti panagparsua, ti Pannakatnag, ken ti Pannubbot ket mapagtitiponto amin iti sagrado nga aramid a naaramid kadagiti templo ti Ti Simbaan ni Jesucristo dagiti Santo iti Ud-udina nga Aldaw” (“The Atonement,” Ensign, Nob. 1996, 35). (Kitaen met iti Moises 1:39.

Makaaramid ti tunggal maysa iti maysa a banag.

Insuro ni Presidente Dallin H. Oaks: “Iti aramid ti panangsubbot kadagiti natay adu dagiti trabaho nga aramiden. … Ti panagkagumaantayo ket saan a mangpilit iti tunggal maysa a mangaramid iti amin a banag, ngem mangallukoy iti tunggal maysa nga agaramid iti maysa a banag” (“Family History: ‘In Wisdom and in Order,’” Ensign, Hunio 1989, 6).

Panangpadur-as iti Panangisurotayo

Iramanmo dagiti agad-adal a saan a nagadal kadagiti nasantuan a kasuratan iti pagtaengan. Penkem a marikna ti amin a miembro ti klase a komportableda iti pannakiraman ken panangibinglay iti panaglilinnawag, uray pay dagiti mabalin a saan a nagbasa iti pagtaengan.