Panawen ti Ani sadiay France, ni James Taylor Harwood

Enero 18–24

Doktrina ken Katulagan 3–5

“Maituloy ti Aramidko”

Ti panagadal iti Doktrina ken Katulagan 3–5 sakbay nga irebyum dagiti kapanunotan iti daytoy a balabala ket mangtulongto kenka nga umawat iti pannarabay manipud iti Espiritu Santo. Ti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ti makatulong kenka a makaawat iti pakasaritaan a mangiturong kadagiti paltiing a nairekord kadagitoy a benneg.

Isuratmo dagiti Impresionmo

Yawis ti Panagbibinninglay

Mangted kadagiti miembro ti klase iti sumagmamano a minuto a mangrebyu kadagiti nasantuan a kasuratan a basaenda iti pagtaengan ken mangsapul iti maysa a binatog a nasarakanda a napnuan kaipapanan. Kalpasanna awisem ida a mangibinglay iti nasursuroda iti sabali pay a tao iti klase.

Isuro ti Doktrina

Doktrina ken Katulagan 3:1–15

Nasken nga agtalektayo iti Dios imbes nga agbuteng iti tao.

• Kas ken ni Joseph Smith, addaantayo amin iti padas no mariknatayo ti panangpilit dagiti dadduma a tao kadatayo nga agaramid iti maysa a banag nga ammotayo a biddut. Ania dagiti kinapudno a masursurotayo manipud iti Doktrina ken Katulagan 3:1–15 a makatulong kadatayo nga agtalinaed a napudno iti Dios kadagiti kasta a kasasaad?

• Kinasapulan a madusa ni Joseph Smith gapu iti ad-adda a panagbutengna iti tao ngem iti Dios, ngem kinasapulanna met latta a maparegta. Awisem dagiti miembro ti klase a mangsapul iti benneg 3 no kasano nga agpada a dinusa ken pinaregta ti Apo ni Joseph. Kas pagarigan, mabalinda nga ilista iti pisarra dagiti ragup ti balikas manipud kadagiti bersikulo 1–15 a naglaon kadagiti panangrikiar ti Apo ken dadduma pay a ragup ti balikas a naglaon iti panangparegtana nga agbabawi ken panagtalinaed a napudno. Ania ti isuro kadatayo ti padas ni Joseph maipapan no kasano a tulongannatayo ti Mangisalakan a mangparmek kadagiti bidduttayo?

Doktrina ken Katulagan 4

Idawat ti Apo kadatayo nga agserbitayo Kenkuana iti amin a pusotayo.

• Dagiti kababalin a mangiladawan kadagiti katulongan ti Apo a nailista iti Doktrina ken Katulagan 4:5–6 ket dagiti kababalin met ni Jesucristo. Tapno matulongan dagiti miembro ti klase nga agsursuro iti ad-adu pay, mabalinmo nga awisen ida a mangpili iti maysa kadagiti kababalin [quality] ken mangsapul kadagiti pangilawlawag wenno mainayon a nasantuan a kasuratan a mangtulong kadakuada a makaawat a nasaysayaat iti kababalin (kitaen, kas pagarigan, ti palawag ni Sister Elaine S. Dalton iti “Dagiti Nayon ti Resources”). Mabalinmo nga idawat iti sumagmamano a tao a mangibinglay no ania ti nasarakanda. Mabalinda pay nga ibinglay no apay a ti pinilida a kababalin ket kasapulan para iti serbisio iti pagarian ti Dios. Kasano nga ad-adda a mapadur-astayo dagitoy a kababalin? (kitaen iti bersikulo 7).

• TiDoktrina ken Katulagan 4 ket maiturong ken ni Joseph Smith Sr., a nagtarigagay a mangammo no kasano a makatulong iti aramid ti Apo. Makatulong pay daytoy a benneg iti asino man kadatayo nga agtarigagay nga agserbi iti Apo. Daytoy ti maysa a wagas tapno maadal daytoy a benneg: makapagtitinnulong dagiti miembro ti klase iti babassit a grupo a mangisurat iti deskripsion ti trabaho para kadagiti katulongan ti Dios, nga usaren ti benneg 4 kas pangiwanwan. Kasano a maigiddiat dagitoy a kualipikasion kadagiti dadduma pay a deskripsion iti trabaho? Apay a napateg dagitoy a kababalin iti panagaramid iti trabaho ti Dios? Makatulong pay ti palawag ni Elder David A. Bednar ti “Dagiti Nainayon a Resources” a mangtulong a mangipaawat kadagiti miembro ti klase iti kinapateg ti panangpadur-as kadagitoy a kababalin.

Doktrina ken Katulagan 5

Umay ti saksi ti kinapudno kadagiti napakumbaba ken mamati.

• No nai-display dagiti balitok a pinanid tapno makita ti lubong, dayta kadi ti mangkumbinsi iti tunggal maysa a pudno ti Libro ni Mormon? Apay wenno apay a saan? (kitaen iti Doktrina ken Katulagan 5:7). Mabalin a sukisoken dagiti miembro ti klase ti benneg 5 para kadagiti nalawag a pannakaammo ken pannakaawat [insights] a makatulong kadakuada a mangsungbat iti maysa a tao nga agdawat iti pakakitaan a pudno ti Libro ni Mormon. Ania ti insuro ti Apo kada Joseph Smith ken Martin Harris a makatulong kadatayo a manggun-od iti bukodtayo a saksi kadagiti kinapudno ti ebanghelio?

  

  Martin Harris, ni Lewis A. Ramsey

Dagiti Nainayon a Resources

Ti saguday kayatna a sawen ti pigsa.

Inlawlawag ni Sister Elaine S. Dalton daytoy a kaipapanan ti saguday: “Tisaguday [virtue] maysa a balikas a masansan a ditayo mangngeg iti kagimongan iti agdama, ngem ti ramut a balikas [root word] iti Latin a virtus kayatna a sawen ti pigsa. Agtagikua dagiti nasagudayan a babbai ken lallaki iti naulimek a dignidad ken akin-uneg a pigsa. Managtalekda gapu ta maikarida nga umawat ken matarabay ti Espiritu Santo” (“A Return to Virtue,” Ensign wenno Liahona, Nob. 2008, 79).

Panagbalin a missionary.

Kinuna ni Elder David A. Bednar: “Ti proseso ti panagbalin a missionary saan nga agkasapulan iti agtutubo a lalaki nga agkawes iti puraw a polo ken kurbata [wenno ti maysa nga agtutubo a babai nga agkawes iti bestida] iti pagadalan iti inaldaw wenno mangsurot kadagiti pangiwanwan para iti missionary iti panagturog ken panangriingna. … Ngem mapadakkelmo ti tarigagaymo nga agserbi iti Dios [kitaen iti Doktrina ken Katulagan 4:3], ket marugiam ti agpanunot kas iti panagpanunot dagiti missionary, agbasa kas iti panagbasa dagiti missionary, agkararag kas iti panagkararag dagiti missionary, ken agrikna kas iti panagrikna dagiti missionary. Maliklikam dagiti nailubongan nga impluensia a mangigapu tapno pumanaw ti Espiritu Santo, ket mapadakkel ti panagtalekmo iti panangbigbig ken panagtulnog kadagiti naespirituan a parikna” (“Becoming a Missionary,” Ensign wenno Liahona, Nob. 2005, 45–46).

Panangpadur-as iti Panangisurotayo

Agdamag kadagiti saludsod a mangyallukoy iti napateg a panaglilinnawag. Dagiti saludsod a nasursurok ngem maysa ti umno a sungbatna ket mangawis kadagiti agad-adal a sumungbat maibatay kadagiti bukodda a kapanunotan, rikna, ken padas. Kas pagarigan, mabalinmo a saludsoden, “Kasano nga ammom no makisasao ti Dios kenka?” (Kitaen iti Panangisuro iti Wagas ti Mangisalakan, 33.)