Sagrado a Kakaywan, ni Greg K. Olsen

Enero 4–10

Joseph Smith—Pakasaritaan 1:1–26

“Nakitak ti Kasla Adigi a Lawag”

Laglagipen a ti kapatgan a panagsaganam ket ti panagadal kadagiti nasantuan a kasuratan ken panangibiagmo no ania ti nasursurom. Matulongannaka ti Espiritu a mangammo no ania ti ipamaysam iti klase.

Isuratmo dagiti Impresionmo

Yawis ti Panagbibinninglay

Ania dagiti nauneg a pannakaammo ken pannakaawat a nagun-od dagiti miembro ti klase bayat ti panagadalda iti Joseph Smith—Pakasaritaan 1:1–26 itoy a lawas? Nalabit a mabalinmo nga i-display ti maysa a ladawan ni Joseph Smith wenno ti Umuna a Parmata ket awisem dagiti miembro ti klase a mangisurat iti pisarra ti sumagmamano a nauneg a pannakaammo ken pannakaawat [insights] manipud iti panagadalda, kasta met kadagiti bersikulo a nakasarakanda kadagitoy. Mabalinda pay nga ibinglay no kasano a napapigsa dagiti pammaneknekda maipapan ken Joseph Smith ken ti misionna bayat ti panagsursuroda maipapan kenkuana itoy a lawas.

Isuro ti Doktrina

Joseph Smith—Pakasaritaan 1:5–18

No agsaludsodtayo a sipapammati, sungbatannatayonto ti Dios.

• Mabalin a marikna dagiti miembro ti klasem iti tarigagay ni Joseph nga agsapul iti kinapudno iti maysa a lubong nga adu dagiti maisursuro nga agsisinupiat a kapanunotan. Kasano a maipada ti pannakatikaw iti aldawtayo iti no ania ti nakaipasanguanna? Tapno matulongan a makita dagiti miembro ti klase no kasano a masarakantayo dagiti sungbat kadagiti saludsodtayo, mabalinmo nga awisen ida a mangilista iti pisarra dagiti nadumaduma a wagas a panagsapul dagiti tao iti kinapudno. Kalpasanna mabalinda nga irebyu ti Joseph Smith—Pakasaritaan 1:5–18 ket inayon iti listaan no ania ti inaramid ni Joseph Smith a nangsapul kadagiti sungbat dagiti saludsodna.

• Mabalin nga ibinglay dagiti miembro ti klase no kasano a sinurotda ti pagwadan ni Joseph Smith iti panagsapsapulda iti kinapudno ken no kasano a sinungbatan ti Dios ida. Ti palawag ni Presidente Russel M. Nelson iti “Dagiti Nainayon a Resources” ket mangisingasing iti sumagmamano a wagas a mabalin a pakasapulantayo iti kinapudno manipud iti Dios.

  

  Palugodannatayo ti kararag a makisarita iti Dios.

Joseph Smith—Pakasaritaan 1:15–20

Nakita ni Joseph Smith ti Dios nga Ama ken ti Anakna ni Jesucristo.

• Impalgak ti Umuna a Parmata ti sumagmamano a kinapudno maipapan iti Dios a maisuppiat iti pammati ti adu iti aldaw ni Joseph. Mabalin a basaen dagiti miembro ti klase ti Joseph Smith—Pakasaritaan 1:15–20 ket lasinenda ti maysa a banag a masursuroda maipapan iti Dios. Apay a napateg a maammuan dagitoy a kinapudno maipapan iti Dios?

• No sumarungkar ni Joseph Smith iti klasetayo, ania koma ti saludsodentayo maipapan iti padasna? Ti video “Ask of God: Joseph Smith’s First Vision” (ChurchofJesusChrist.org) makaited kadagiti miembro ti klase kadagiti nayon a nauneg a pannakaammo ken pannakaawat maipapan iti Umuna a Parmata ni Joseph Smith (kitaen met iti “Dagiti Nainayon a Resources”). Mabalin nga utobenda no kasano a makumpletoda ti maysa a binatog kas iti daytoy: “Gapu ta napasamak ti Umuna a Parmata, ammok a …” Ania dagiti bendision a simmangbay iti biagtayo gapu iti Umuna a Parmata?

• Tapno mangnayon iti espiritu ti panangilawlawagmo, mabalin a basaen wenno kantaen dagiti miembro ti klase ti “Joseph Smith’s First Prayer” (Hymns, no. 26). Ania ti maitulong daytoy a himno kadatayo a maawatan ken marikna maipapan iti Umuna a Parmata? Nalabit mabalin nga ibinglay ti sumagmamano a miembro ti klase no kasano a naammuanda para iti bagbagida a talaga a nakita ni Joseph ti Dios nga Ama ken ni Jesucristo iti Sagrado a Kakaywan. Wenno mabalinmo nga awisen dagiti full-time missionary (wenno ti maysa a kasubsubli a missionary) tapno sumarungkar iti klase ket mangisarita no kasano nga naimpluensiaan ti Umuna a Parmata ti biag dagiti tao nga isursuroda.

Joseph Smith—Pakasaritaan 1:21–26

Makapagtalinaedtayo a napudno no ania ti ammotayo, nupay didatayo awaten dagiti dadduma.

• Mabalin a kabaelan dagiti miembro ti klase nga ilasin ti sumagmamano a banag a napadasan ni Joseph Smith idi rugianna nga ibaga kadagiti dadduma a tao maipapan iti parmatana (kitaen iti Joseph Smith—Pakasaritaan 1:21–26). Mabalinda nga ibinglay dagiti binatog a mangparegta kadakuada no kariten dagiti dadduma ti pammatida.

• No adda dagiti am-ammom a miembro ti ward a nakapadasen iti pannakasuppiat gapu ta miembroda ti Simbaan, ibilang ti panangidawat kadakuada nga umay iti klase a nakasagana a mangibinglay no kasano a mapagtalinaedda a napigsa ti pammatida. Ania ti masursurotayo manipud iti pagwadan ni Joseph Smith iti Joseph Smith—Pakasaritaan 1:21–26?

Dagiti Nainayon a Resources

Suroten ti pagwadan ni Joseph.

Insuro ni Presidente Russell M. Nelson:

“Nangituding ni Propeta Joseph Smith iti maysa a pagtuladan a surotentayo iti panangrisut kadagiti saludsodtayo. Naipamaysa iti kari ni Santiago a no agkurangtayo iti kinasirib mabalintayo iti agdawat iti Dios [kitaen iti Santiago 1:5], direkta nga inturong ni ubing a Joseph ti saludsodna iti Nailangitan nga Ama. Nagsapsapul iti bukod a paltiing, ken ti panagsapsapulna ti nanglukat iti daytoy maudi a dispensasion.

“Iti maipada a wagas, ania ti maluktanto kadakayo iti panagsapsapulyo? Ania a pagsiriban ti kurang kadakayo? Ania ti mariknayo a kasapulan unay a maammuan wenno maawatanyo? Suroten ti pagwadan ni Propeta Joseph. Mangsarak iti naulimek a lugar a masansan a mabalinyo a papanan. Ipakumbabayo ti bagiyo iti sango ti Apo. Ibukbokyo ti pusoyo iti Nailangitan nga Amayo. Umasideg Kenkuana para kadagiti sungbat ken pannakaliwliwa ” (“Revelation for the Church, Revelation for Our Lives,” Ensign wenno Liahona, Mayo 2018, 95).

Umuna a Parmata ni Joseph Smith.

Tapno mabasa ti pannakailadawan ti Umuna a Parmata a mangala iti sumagmamano a pakaammuan ni Joseph Smith, kitaen iti Saints, 1:14–16.

Panangpadur-as iti Panangisurotayo

Ikarigatam a manggun-od iti bukodmo a pammaregta. Dimo pagarupen a dagitoy a balabala ket kas pangiturong a nasken a surotem bayat ti panangisurom. Ketdi, usarem dagitoy a mangparayray kadagiti kapanunotan ken mangitandudo iti pammaregta bayat ti panangutobmo iti doktrina kadagiti nasantuan a kasuratan ken dagiti kasapulan dagiti tao a sursuruam.