15–21 marzo

Tzol’lebʼ ut Sumwank 27–28

“Chixjunil li k’a’aq re ru tento taab’aanumanq chi tustu”

Us ta li k’a’ru ke’musiq’ank reheb’ li k’utb’esinb’il na’leb’ neke’tawman sa’ Tzolʼlebʼ ut Sumwank 27–28 ke’k’ulman sa’ jun li hoonal ut na’ajej jalan, li na’leb’ neke’k’utman sa’eb’ li tasal a’an wankeb’ x’aajelil ru sa’ li kutan a’in. K’a’ru li na’leb’ naru narosob’tesiheb’ li komon sa’ li tzoleb’aal sa’eb’ li k’a’aq re ru yookeb’ chi nume’k wi’?

Tz’iib’a li nakak’oxla

Xkanab’ankileb’ chi wotzok

K’e xhoonaleb’ li komon sa’ li tzoleb’aal re te’ril ru wi’chik Tzolʼlebʼ ut Sumwank 27–28 ut te’xtaw jun raqal malaj jun ch’ol aatin li wan xyaalal choq’ reheb’. Re xk’eeb’aleb’ xhoonal chixjunileb’ re wotzok, naru taak’uub’eb’ ru li komon sa’ li tzoleb’aal sa’ ka’kab’il re naq te’xwotz li te’xtaw.

Xk’utb’al li tzolʼlebʼ

Tzol’leb’ ut Sumwank 27:1–2

Tento tootz’aqonq sa’ li loq’laj wa’ak chi junaj ru lix sa’ qu rik’in lix loq’al li Dios.

• Re xtikib’ankil li aatinak chirix Tzolʼlebʼ ut Sumwank 27:1–2, k’oxla xtz’iib’ankil jun li patz’om sa’ li pizarron jo’ a’in: K’a’ru kixk’ut chiqu li Kolonel chirix li rajb’al li loq’laj wa’a’k? Eb’ li komon sa’ li tzoleb’aal naru te’xsik’eb’ ch’ol aatin sa’eb’ li raqal a’an li te’tenq’anq reheb’ chixsumenkil li patz’om a’an. Maare te’raj xwotzb’al li na’leb’ xe’xk’ul chirix chan ru xnumsinkil junaq hoonal loq’ naq neke’tz’aqon sa’ li loq’laj wa’ak.

  Eb’ li komon sa’ li tzoleb’aal naru te’xtaw xna’leb’eb’ naq neke’ril ru li kixye li Kolonel naq kixtikib’ li loq’laj wa’ak (chi’ilmanq Lukas 22:19–20; 3 Nefi 18:1–11; chi’ilmanq ajwi’ li video “La Última Cena” sa’ ChurchofJesusChrist.org). Wi ta li Kolonel wanq raj sa’ li qach’utam re li loq’laj wa’ak, k’a’ raj ru taqab’aanu chi jalan?

  

  Li loq’laj wa’ak nareetali lix mayej li Kolonel.

Tzolʼlebʼ ut Sumwank 27:15–18

Li kolb’a-ib’ aq’ej re li Dios nokoxtenq’a chixkuyb’al li ink’a’us.

• Chan ru naru nakatenq’aheb’ li komon sa’ li tzoleb’aal chixtawb’al ru chan ru roksinkil li kolb’a-ib’ aq’ej re li Dios re xk’uyb’al li ink’a’ us sa’eb’ li qakutankil? K’oxla xpatz’b’al re anihaq naq tixyiib’ xjalam-uuch li kolb’a-ib’ aq’ej sa’ li pizarron jo’ ch’olob’anb’il sa’eb’ li raqal 15–18. Chirix a’an eb’ li komon sa’ li tzoleb’aal naru te’xwotz li na’leb’ xe’xtaw sa’ li tzolok sa’ junesal chirixeb’ xcha’alil li kolb’a-ib’ aq’ej. Malaj ut, li tzoleb’aal naru te’ril ru Tzolʼlebʼ ut Sumwank 27:15–18 ut te’xtz’iib’a k’a’ruheb’ lix cha’aleb’ li kolb’a-ib’ aq’ej sa’ li pizarron, jo’ ajwi’ xcha’alil li junxaqalil neke’xram. K’a’ru naraj naxye xk’eeb’al chiqix li kolb’a-ib’ aq’ej re li Dios? Maare eb’ li komon sa’ li tzoleb’aal naru te’aatinaq chirix chan ru naq li Qaawa’ naxkol qix rajlal sut naq naqak’e chiqix li kolb’a-ib’ aq’ej re li Dios.

• Wi nakatzoleb’ li saaj, naru nakajunji ru Tzolʼlebʼ ut Sumwank 27:15–18 rik’ineb’ lix tusulal li wank neke’tawman sa’ Choq’ re Xkawilaleb’ li Saaj. Qayehaq, eb’ li komon sa’ li tzoleb’aal naru te’ril ruheb’ li raqal ut te’aatinaq chirix k’a’ut naq aajel ru choq’ qe li kolb’a-ib’ aq’ej re li Dios. Chirix a’an naru te’k’anjelaq sa’ ka’kab’il ut te’rileb’ lix tusulal li wank sa’ Choq’ re Xkawilaleb’ li Saaj. K’a’ru naqatzol sa’eb’ li hu a’an chirix chan ru naq laj Satanas naxyal qarahob’tesinkil? Chan ru naru chiqatenq’ankil li kolb’a-ib’ aq’ej re li Dios re xnumsinkileb’ li rahob’tesink? Chan ru naqak’e chiqix lix kolb’a-ib’ aq’ej?

Tzolʼlebʼ ut Sumwank 28

Li yo’yookil profeet naxk’ul li k’utb’esinb’il na’leb’ choq’ re lix Iglees li Qaawa’.

• Re xtenq’ankileb’ li komon sa’ li tzoleb’aal chi tzolok chirix lix k’anjel li profeet, naru te’ril li k’a’ru kik’amok re laj Jose Smith chi tijok ut chixk’ulb’al li tasal 28 (chi’ilmanq xjolomil li tasal, ut chirix a’an naru neke’ril ruheb’ li raqal 2–3, 6–7, 11–13. Chan ru naq laj Satanas naxyal xq’unb’esinkil qach’ool re naq te’qataaqe li ani ink’a’ b’oqb’il xb’aan li Dios? Naru taakanab’eb’ li komon sa’ li tzoleb’aal chixwotzb’al xnumsihomeb’ li xkawresi lix nawom xch’ooleb’ naq li profeet naxk’ut li k’utb’esinb’il na’leb’ choq’ re li Iglees.

• Jun na’leb’ re chan ru naq eb’ li komon sa’ li tzoleb’aal naru te’ril wi’chik ru Tzolʼlebʼ ut Sumwank 28 a’an xk’oxlankil naq neke’xnaw ru anihaq li toje’ xk’ul junaq x’ak’ b’oqb’il k’anjel sa’ li Iglees. K’a’ raj ru naru taqawotz sa’ Tzolʼlebʼ ut Sumwank 28:1–6,13–16 re xtenq’ankil li kristiaan a’an sa’ lix b’oqb’il k’anjel? Li aatin li natawman sa’ “Xkomon chik li k’anjeleb’aal” naru naxk’e xkomon li na’leb’ re aatinak.

Xkomon chik li k’anjeleb’aal

Na’leb’ chirix li k’utb’esinb’il na’leb’ re junesal.

Li Awa’b’ej Joseph F. Smith ut eb’ laj tenq’ aj k’ehol na’leb’ re sa’ li Xb’eenil Awa’b’ejil ke’xk’ut:

“Naq li k’utb’esinb’il matk’, li matk’, li aatinob’aal, li profeetil aatin, li k’oxlahom, malaj a’ yaal junaq chik xnimal ru maatan malaj musiq’ahom naxk’e junaq na’leb’ moko naxk’am ta rib’ rik’ineb’ li k’utb’esinb’il na’leb’ k’ulub’anb’ileb’ xb’aan li Iglees, malaj naxka’pak’ali ru li neke’xb’aanu laj jolominel xaqab’anb’ileb’, eb’ laj Santil Paab’anel sa’ Roso’jikeb’ li Kutan naru neke’xnaw naq moko re ta li Dios a’an, maak’a’ na’ajman re wi tz’aqal yaal naq nak’utun. … Sa’ li tzolok re ruchich’och’ jo’ ajwi’ re li Musiq’ej, eb’ laj santil paab’anel naru neke’xk’ul xb’eresinkil ut choxahil k’utb’esinb’il na’leb’ choq’ reheb’ a’an, a’b’an a’an moko naxk’e ta xwankileb’ re xb’eresinkileb’ jalaneb’ chik kristiaan. …

“Sa’ li resilal li Iglees wankeb’ resil naab’al li yoob’anb’il k’utb’esinb’il na’leb’ yeeb’ileb’ xb’aaneb’ b’alaq’ aj winq, li ke’paab’ank re li na’leb’ li ke’raj naq te’k’ulub’aaq xb’aaneb’ jalaneb’ chik kristiaan; rajlal sut naq na’ux a’in, li k’a’ru ke’xk’ul a’an li lub’ik ch’oolej, yot’e’k, ut ch’a’ajkilal” (Joseph F. Smith, Anthon H. Lund, Charles W. Penrose, “A Warning Voice”, Improvement Era, septiembre 1913, 1148–1149).

Xchaab’ilob’resinkil li qak’utum

Jayali aawib’ sa’ li tzol’leb’ tz’aqal yaal. Li Awa’b’ej Boyd K. Packer kixk’ut: “Li tzol’leb’ tz’aqal yaal, naq natawman ru, naxjal li k’a’uxleb’aal ut li wank” (“No temáis”, Liahona, mayo 2004, 79). Naq yooqo chi k’utuk, tento taqajayali qib’ sa’eb’ lix k’utum li Jesukristo wi naqaj tenq’ank chixk’amb’aleb’ li aamej rik’in a’an.