Li rochoch laj Peter Whitmer xb’aan laj Al Rounds

1–7 marzo

Tzolʼlebʼ ut Sumwank 20–22

“Lix waklijik lix Iglees li Kristo”

Tz’iib’a li nakak’oxla rik’in li Musiq’ej naq yooqat chixtzolb’al Tzolʼlebʼ ut Sumwank 20–22. Junjunq reheb’ li k’oxlahom a’an naru neke’xk’e aana’leb’ li te’tenq’anq aawe chi k’utuk.

Tz’iib’a li nakak’oxla

Xkanab’ankileb’ chi wotzok

Sa’ li tzolok sa’ kab’l, eb’ li komon sa’ li tzoleb’aal maare xe’xk’ulatq xna’leb’ chirixeb’ li osob’tesihom xb’aan naq wan li Iglees tz’aqal yaal sa’ li ruchich’och’. Kanab’eb’ chixwotzb’al jun raqal reheb’ li tasal a’an li naxk’ut k’a’ut naq neke’xb’antioxi naq kik’ojob’aak wi’chik li Iglees.

Xk’utb’al li tzolʼlebʼ

Tzolʼlebʼ ut Sumwank 20–21

Lix Iglees li Jesukristo kik’ojob’aak wi’chik.

• Eb’ li komon sa’ li tzoleb’aal naru neke’tenq’aak naq te’xtzol lix juntaq’eetil lix Iglees li Jesukristo Reheb’ laj Santil Paab’anel sa’ Roso’jikeb’ li Kutan ut li Iglees kixk’ojob’ li Kristo najter. Naru taayiib’ sa’ li pizarron kaahib’ raqal xtusulal, k’ab’a’inb’ileb’ rik’ineb’ li aatin Tzol’leb’, K’ojob’anb’il k’anjel, Xwankilal li tijonelil, ut Eb’ li profeet. Naru ajwi’ taak’eheb’ li raqal a’in chirix lix Iglees li Kristo najter: Mateo 16:15–19; Jwan 7:16–17; Efesios 2:19–22; 3 Nefi 11:23–26; Moroni 4–5. Eb’ li komon sa’ li tzoleb’aal naru te’xk’e reetal li naxk’ut li junjunq chi raqal chirix lix Iglees li Kristo ut te’xtz’iib’a li raqal sa’ li tusulal sa’ li pizarron. (Junjunq reheb’ li raqal naru neke’oksiman sa’ wiib’ oxib’ li tusulal.) Naru te’xb’aanu ajwi’ li ch’ina k’anjel a’an rik’ineb’ li raqal a’in li neke’aatinak chirix lix Iglees li Kristo k’ojob’anb’il wi’chik: Tzolʼlebʼ ut Sumwank 20:17–25, 60, 72–79; 21:1–2. K’a’ru neketzol chirix lix k’ojob’ankil wi’chik lix Iglees li Kristo rik’in li juntaq’eetink a’in?

Tzolʼlebʼ ut Sumwank 20:37, 75–79; 22

Eb’ li loq’laj k’ojob’anb’il k’anjel nokohe’xtenq’a chi wulak jo’ li Kolonel.

• K’e xhoonaleb’ li komon sa’ li tzoleb’aal re naq te’xtzol li k’a’ru na’ajman ru choq’ re li kub’iha’ nayeeman sa’ Tzolʼlebʼ ut Sumwank 20:37 ut kanab’eb’ chixtz’ilb’al rixeb’ li patz’om jo’eb’ a’in: Chan ru naq nokoxtenq’a li na’ajman ru re xkawresinkil qib’ choq’ re li kub’iha’ sa’ lix Iglees li Qaawa’? K’a’ru naraj naxye xk’ulb’al xk’ab’a’ li Kristo sa’ qab’een? (chi’ilmanq Mosiah 5:5–12). K’a’ru natenq’ank aawe chi wank “chi k’eek’o aach’ool chi k’anjelak chiru li Jesukristo toj sa’ roso’jik”?

• K’a’ru naxk’ut li tasal 22 chirix li kub’iha’? Patz’ reheb’ li komon sa’ li tzoleb’aal naq te’xk’oxla naq wan jun ramiiweb’ kub’enaq xha’ sa’ junaq chik iglees. Naru te’ril ru li tasal a’in re xsik’b’al xna’leb’eb’ re xtenq’ankil li ramiiweb’ chixtawb’al ru k’a’ut naq aajel ru li kub’iha’ sa’ lix Iglees li Kolonel k’ojob’anb’il wi’chik. Eb’ li komon sa’ li tzoleb’aal naru te’xk’utb’esi li hoonal a’an jo’ tzoleb’aal malaj sa’ ka’kab’il.

• Ilomaq ru sa’ komonil Tzolʼlebʼ ut Sumwank 20:75–79 ut k’e xb’oqb’aleb’ li komon sa’ li tzoleb’aal chixk’eeb’al reetal li neke’xk’ut li raqal a’an chirix li Kolonel ut lix wankilal sa’ li qayu’am. B’ar wan li aatin malaj ch’ol aatin nawulak chiqu naq naqileb’ ru li tij re li loq’laj wa’ak chi jo’kan? K’a’ut naq aajel ru tz’aqonk sa’ li loq’laj wa’ak rajlal xamaan?

  

  Li loq’laj wa’ak a’an jun loq’laj k’ojob’anb’il k’anjel.

Tzolʼlebʼ ut Sumwank 20:38–60

Lix k’anjel li tijonelil narosob’tesiheb’ li komon re li Iglees ut eb’ lix junkab’al.

• Lix ch’olob’ankileb’ lix k’anjel li tijonelil natawman sa’ Tzolʼlebʼ ut Sumwank 20:38–60 naru naxtenq’aheb’ li komon sa’ li tzoleb’aal chixnimob’resinkil lix tawomeb’ ru chirix lix k’anjel li tijonelil. Maare naru taakanab’eb’ chixk’oxlankil naq jun ramiiweb’ malaj jun komon sa’ xjunkab’aleb’ li xkub’e xha’ toje’, ok re chi k’ojob’aak sa’ jun opiis re li tijonelil. Chan raj ru te’roksi li raqal a’an re xtenq’ankil li kristiaan a’an chixtawb’al ru lix k’anjel? B’ar raj wan li eetalil te’xwotz re xtenq’ankil chixtawb’al ru chan ru naq xk’anjelankil li teneb’ahom a’an naru naxtenq’a chi wulak jo’ li Jesukristo? Maare naru te’xk’utb’esi li seraq’ik a’an.

  Jo’kan ajwi’, chan raj ru te’roksi li raqal a’an re xtenq’ankil junaq komon ixq toje’ xkub’e xha’ chirilb’al chan ru naq naru natz’aqon sa’ li k’anjel ch’olob’anb’il aran? (Li aatin natawman sa’ “Xkomon chik li k’anjeleb’aal” naru natenq’an.)

Tzolʼlebʼ ut Sumwank 21:4–7

Osob’tesinb’ilo rajlal sut naq naqak’ul li raatin li Dios rik’in xtz’uumaleb’ re lix profeet.

• Sa’ Tzolʼlebʼ ut Sumwank 21 wankeb’ na’leb’ chirix chan ru xtaaqenkil lix profeet li Qaawa’. Re xtenq’ankileb’ li komon sa’ li tzoleb’aal chi aatinak ut chixtz’ilb’al rixeb’ li na’leb’ a’an, kanab’eb’ chirilb’al ru li raqal 4–7 re xsik’b’al jun ch’ol aatin li neke’raj xtawb’al ru chi us ut chixtz’iib’ankil sa’ li pizarron. Sik’ ru junjunqeb’ li ch’ol aatin ut aatinanqex jo’ tzoleb’aal chirix k’a’ru naraj naxye li junjunq. K’a’ru neke’xk’ut chiqu li ch’ol aatin a’an chirix xtaaqenkil lix profeet li Qaawa’?

Xkomon chik li k’anjeleb’aal

Chiqajunil nokok’anjelak rik’in lix wankil li tijonelil.

“Eb’ li winq neke’k’ojob’aak sa’eb’ li opiis re li tijonelil, ut neke’b’oqe’, li ixq jo’ ajwi’ li winq, chixk’ulb’al lix wankil ut eb’ li rosob’tesihom li tijonelil sa’eb’ lix yu’am. …

“… [Eb’ li ixq] neke’jultikan ut neke’tijok sa’eb’ li ch’utam, neke’k’anjelak sa’ jalan jalanq jolomil ut k’anjel, neke’tz’aqon sa’eb’ li ch’utam re li tijonelil sa’eb’ lix na’aj ut sa’ chixjunil li Iglees, ut neke’k’anjelak sa’ mision sa’ chixjunil li ruchich’och’. Chi jo’ka’in ut naab’al chik ru, eb’ li ixq neke’xk’anjela lix wankil li tijonelil us ta ink’a’ neke’k’ojob’aak sa’ junaq opiis re li tijonelil. …

“Sa’ eb’ li b’oqb’il k’anjel, sa’ eb’ li k’ojob’anb’il k’anjel re li santil ochoch, sa’ li wank sa’ junkab’al, ut sa’ li k’anjel sa’ junesal, eb’ li ixq ut eb’ li winq aj Santil Paab’anel sa’ Roso’jikeb’ li Kutan neke’k’anjelak rik’in lix wankilal li tijonelil ut chi k’eeb’ileb’ xwankil xb’aan. Lix chapb’aleb’ rib’ li winq ut eb’ li ixq sa’ xb’aanunkil lix k’anjel li Dios rik’in lix wankilal a’an, aajel ru sa’ lix evangelio li Jesukristo” (Temas del Evangelio, “Enseñanzas de José Smith sobre el sacerdocio, el templo y las mujeres,” topics.ChurchofJesusChrist.org).

Xchaab’ilob’resinkil li qak’utum

Nokotzolok sa’ komonil. Jo’ aj k’utunel, laa’at ajwi’ nakattzolok sa’ li tzoleb’aal. Re xk’utb’al laa wajom re tzolok rik’ineb’ a’an, ab’i lix na’leb’eb’.