15–21 nō Māti.

Te Parau Ha’api’ira’a ʼe te mau Parau Fafau 27–28

« ’Ia rave ’āfaro-noa-hia te mau mea ato’a e ti’a ai »

Noa atu ’ua tupu te mau ’ohipa tei fa’atupu i te mau heheura’a i roto i Te Parau Ha’api’ira’a ʼe te mau Parau Fafau 27–28 i te hō’ē tau ’e i te hō’ē vāhi ta’a ’ē, te mau parau tumu rā i roto i teie mau tuha’a, e mea tano maita’i ïa nō teie mahana. E aha te mau parau tumu ’o tē nehenehe e ha’amaita’i i te mau melo o tā ’outou piha ha’api’ira’a i roto i te mau huru orara’a tā rātou e fa’aruru nei ?

Pāpa’i i te mau mana’o e tae mai

Tītau i te mana’o

E vaiho i te tahi tau minuti ri’i i te mau melo o te piha ha’api’ira’a ’ia hi’o fa’ahou i Te Parau Ha’api’ira’a ʼe te mau Parau Fafau 27–28 ’e ’ia ’ite mai i te hō’ē ’īrava ’aore rā, i te hō’ē pereota ’o tā rātou i ’ite e mea faufa’a. Nō te hōro’a i te hō’ē taime i te tā’āto’ara’a ’ia paraparau, ’a vāhi ’āpipiti te piha ha’api’ira’a nō te fa’a’ite i te mea i ’itehia e rātou.

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 27:1–2

E rave tātou i te ’ōro’a mo’a ma te mata hō’ē i te hanahana o te Atua.

• Nō te fa’aitoito i te mātutura’a i Te Parau Ha’api’ira’a ’e te mau Parau Fafau 27:1–2, ’a feruri i te pāpa’i i te hō’ē uira’a mai teie i ni’a i te tāpura ’ere’ere : E aha tā te Fa’aora i ha’api’i ia tātou nō ni’a i te tumu o te ōro’a mo’a ? E nehenehe te mau melo o te piha ha’api’ira’a e hi’o i te mau pereota i roto i teie mau ’īrava ’o tē tauturu ia rātou ’ia pāhono i te uira’a. E riro paha rātou i te hina’aro e fa’a’ite mai i te mau mana’o tā rātou i fāri’i nō ni’a e nāhea e roa’a ai i te hō’ē ’itera’a hau atu i te mo’a ’a rave ai rātou i te ’ōro’a mo’a.

  E nehenehe te mau melo o te piha ha’api’ira’a e ’ite mai i te tahi atu mau fa’ahi’ora’a nā roto i te tai’ora’a i te mea tā te Fa’aora i parau i te taime ’a ha’amau ai ’oia i te ’ōro’a mo’a (hi’o Luka 22:19–20; 3 Nephi 18:1–11). ’Ahiri ’ua tae mai te Fa’aora i tā tātou purera’a ’ōro’a, e aha te mea tā tātou e rave ta’a ’ē atu ?

  

  Tei roro i te ’ōro’a mo’a te mau tāpa’o nō te tusia a te Fa’aora.

Te Parau Ha’api’ira’a ’e te mau Parau Fafau 27:15–18

E tauturu te ha’ana a te Atua ia tātou ’ia pāto’i i te ’ino.

• Nāhea ’outou i te tauturu i te mau melo o te piha ha’api’ira’a ’ia hāro’aro’a e nāhea ’ia fa’a’ohipa i te ha’ana a te Atua nō te pāto’i i te ’ino i tō tātou nei ’anotau ? ’A feruri e ani i te hō’ē ta’ata ’ia pāpa’i hōho’a i ni’a i te tāpura ’ere’ere i te ha’ana i fa’ata’ahia i roto i te mau ’īrava 15–18. I muri iho, e nehenehe te mau melo o te piha ha’api’ira’a e fa’a’ite mai i te mau ha’amāramaramara’a tā rātou i ’ite mai i roto i tā rātou iho tuatāpapara’a nō ni’a te mau tuha’a o te ha’ana. ’Aore rā, e tai’o tō te piha ha’api’ira’a Te Parau Ha’api’ira’a ’e te mau Parau Fafau 27:15–18 ’e ’ia tāpa’o i te mau tuha’a o te ha’ana i ni’a i te tāpura ’ere’ere ’e te mau tuha’a o te tino tā rātou e pāruru. E aha te aura’a ’ia ’ahu i te ha’ana o te Atua ? E nehenehe paha te mau melo o te piha ha’api’ira’a e paraparau nō ni’a e nāhea te Fatu i te pāruru ia tātou i te ’ino ’ia ’ahu ana’e tātou i te ha’ana a te Atua.

• Mai te mea e ha’api’i ’outou i te feiā ’āpī, e hina’aro paha ’outou e fa’atū’ati Te Parau Ha’api’ira’a ’e te mau Parau Fafau 27:15–18 i te mau fa’aturera’a e vai ra i roto i te Nō te pūai o te feiā ’āpī. ’Ei hi’ora’a, e nehenehe te mau melo o te piha ha’api’ira’a e tai’o i te mau ’īrava ’e e mātutu i te tumu e hina’aro ai tātou i te ha’ana a te Atua. I muri iho, e ’ohipa ’āpipiti rātou ’e e hi’o fa’ahou rātou i te hō’ē o te mau fa’aturera’a i roto i te Nō te pūai o te feiā ’āpī. E aha tā tātou e ’apo mai nā roto mai i teie mau rāve’a nō ni’a i te mau ’arora’a a Satane ia tātou ? Nāhea te ha’ana a te Atua i te tauturu ia tātou ’ia pāto’i i teie mau ’arora’a ? Nāhea tātou ’ia ’ahu i tāna ha’ana ?

Te Parau Ha’api’ira’a ’e te mau Parau Fafau 28

’Ua fāri’i te peropheta ora i te heheura’a nō te ’Ēkālesia a te Fatu.

• Nō te tauturu i te mau melo o te piha ha’api’ira’a ’ia ha’api’i mai nō ni’a i te ti’ara’a o te peropheta, e nehenehe ’outou e hi’o fa’ahou i te ’itera’a tei arata’i ia Iosepha Semita ’ia pure ’e ’ia fāri’i i te tuha’a 28 (hi’o te upo’o tuha’a), ’e i muri iho e nehenehe ’outou e tai’o i te mau ’īrava 2–3, 6–7, 11–13. Nāhea Sātane i te fa’ati’aturi ia tātou ’ia pe’e i te feiā tā te Fatu i ’ore i mā’iti ? E nehenehe ’outou e ani i te mau melo o te piha ha’api’ira’a ’ia fa’a’ite mai i te mau ’itera’a tei ha’apūai i tō rātou ’itera’a pāpū ē, e fāri’i te peropheta i te heheura’a nō te ’Ēkālesia.

• Hō’ē rāve’a nō te mau melo o te piha ha’api’ira’a nō te hi’o fa’ahou i Te Parau Ha’api’ira’a ’e te mau Parau Fafau 28 ’o te ferurira’a ïa ē, ’ua matau rātou i te hō’ē ta’ata tei fāri’i i te hō’ē pi’ira’a ’āpī i roto i te ’Ēkālesia. E aha tā tātou e fa’a’ite atu nō roto mai i Te Parau Ha’api’ira’a ’e te mau Parau Fafau 28:1–6, 13–16 nō te tauturu i taua ta’ata ra i roto i tōna pi’ira’a ? E riro te fa’ahitira’a parau i roto i « Mau rāve’a tauturu hau atu » e hōro’a mai i te tahi mau fa’ahi’ora’a nō te mātutura’a.

Mau rāve’a tauturu hau atu

A’o nō ni’a i te heheura’a o te ta’ata iho.

’Ua ha’api’i mai te peresideni Joseph F. Smith ’e tōna nā tauturu i roto i te Peresidenira’a Mātāmua :

« I te taime o te mau ’ōrama, te mau fa’aheita’oto, te mau reo, te tohu, te mau ’āehuehura’a, ’aore rā, te mau huru hōro’a ’umerehia ato’a, ’aore rā te fa’aurura’a, e fa’atae mai ai i te mea e pāto’i nei i te hō’ēra’a o te mau heheura’a i fāri’ihia e te ’Ēkālesia, ’aore rā e pāto’i nei i te mau fa’aotira’a a tōna mau huimana fa’atere i fa’atōro’ahia, e ’ite te feiā mo’a i te mau mahana hope’a nei ē, e’ita nō ō mai i te Atua ra, noa atu e hi’ora’a parau mau te reira. I roto i te mau ’ohipa e’ita nā te fa’aro’o e tae noa atu i te mau ’ohipa pae vārua, e fāri’i te feiā mo’a i te arata’ira’a ’e te heheura’a nō ō mai i te Atua ra, e au nō rātou iho, ’aita rā te reira e hōro’a i te tura nō te fa’atere ia vetahi ’ē.

« Ua pāpa’ihia i roto i te ’ā’amu o te ’Ēkālesia, e rave rahi te mau heheura’a ha’avare tei fatuhia e te feiā ha’avare-huna ’aore rā e te mau pupu fa’aro’o ha’avī o tei ti’aturi i roto i te mau fa’a’itera’a i ’imihia e rātou nō te arata’i i te tahi atu mau ta’ata o tei fāri’i, ’e i roto i teie mau hi’ora’a ato’a, ’ua tupu i reira te pe’ape’a, te ’oto ’e te ano rahi » (Joseph F. Smith, Anthon H. Lund, Charles W. Penrose, « E reo fa’aara », Improvement Era, Setepa 1913, 1148–49).

Ha’amaita’ira’a i tā tātou ha’api’ira’a

E fa’atumu i ni’a i te ha’api’ira’a tumu. ’Ua ha’api’i mai te peresideni Boyd K. Packer ē : « Nā roto i te ha’api’ira’a tumu, e hāro’aro’a, ’ē ’e taui te huru ’e te peu » (« ’Eiaha e fēa’a », Ensign ’aore rā Liahona, Mē 2004, 79). ’A ha’api’i ai tātou, e fa’atumu tātou i ni’a i te mau ha’api’ira’a a Iesu Mesia mai te mea e hina’aro tātou e tauturu i te mau vārua ’ia haere iāna ra.