te ti’a ra Iesu i mua i te feiā e tūturi ra

E tu’u te mau turi ato’a i raro, nā J. Kirk Richards

22–28 nō Māti

Te Parau Ha’api’ira’a ’e te mau Parau Fafau 29

E ha’aputuputu Iesu Mesia i tōna ra mau ta’ata

Te rāve’a faufa’a roa a’e nō te fa’aineine ’ia ha’api’i i Te Parau Ha’api’ira’a ’e te mau Parau Fafau 29 ’o te tuatāpapa-māite-ra’a ïa i te reira i roto i te pure ’e te ’imira’a i te arata’ira’a a te Vārua. ’A feruri i te tahi atu mau rāve’a nō te ani i te Vārua i roto i tō ’outou orara’a, mai te ha’apaera’a mā’a, te haerera’a i te hiero, ’aore rā te tāvinira’a ia vetahi ’ē.

Pāpa’i i te mau mana’o e tae mai

’ītona fa’a’itera’a

Tītau i te mana’o

I roto i Te Parau Ha’api’ira’a ’e te mau Parau Fafau 29:5, ’ua parau te Fatu i te feiā mo’a : « ’A ha’amae’e na i tō ’outou ’ā’au i ni’a ’e ’ia ’oa’oa ». E nehenehe ’outou e ani i te mau melo o te piha ha’api’ira’a ’ia fa’a’ite mai i te mea tā rātou i ha’api’i mai i roto i tā rātou iho ’aore rā i tā te ’utuāfare tuatāpapara’a, ’o tē tura’i ia rātou ’ia « ha’amae’e na i tō [rātou] ’ā’au i ni’a ’e ’ia ’oa’oa ».

ītona ha’api’ira’a

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 29

’Ua faaineine te Metua i te Ao ra i te hō’ē fa’anahora’a nō tō tātou fa’ateiteira’a.

• Hō’ē rāve’a nō te fa’aitoito i te ha’api’ira’a mai i te fare ’o te fa’atupura’a ïa i ni’a i te mau fa’anahora’a e ’itehia i roto i te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare. ’Ei hi’ora’a, e nehenehe ’outou e pāpa’i i ni’a i te tāpura ’ere’ere te mau tuha’a nō te fa’anahora’a nō te fa’aorara’a, mai te orara’a hou teie nei orara’a, te Poietera’a, te Tara’ehara a Iesu Mesia, ’e tē vai atu ā. E fa’a’ite mai te mau melo o te piha ha’api’ira’a i te mea tā rātou i ha’api’i mai i roto i Te Parau Ha’api’ira’a ’e te mau Parau Fafau 29 nō ni’a i teie mau tuha’a o te fa’anahora’a. E nehenehe ato’a ’outou e ani ia rātou ’ia fa’a’ite mai e aha tā rātou e ha’api’i atu i te hō’ē ta’ata tei ’ore i ’ite i te fa’anahora’a a te Atua nō roto mai i teie tuha’a.

Te Parau Ha’api’ira’a ’e te mau Parau Fafau 29:1–8, 14–21

E ha’aputuputu Iesu Mesia i tōna nuna’a hou tōna ho’i-piti-ra’a mai.

• Nō te tauturu i te mau melo o te piha ha’api’ira’a ’ia hāro’aro’a nō te aha Iesu Mesia e ha’aputuputu ai i tōna nuna’a, e ani atu ’outou ia rātou ’ia tai’o i te mau ’īrava 1–8 e ’ia mātutu i te mau uira’a nō ni’a i te ha’aputuputura’a, mai teie : Nāhea tātou e ’ite ai i te ha’aputuputura’a ’e te pārurura’a a te Mesia ia tātou, mai te moa ufa e ha’aputuputu i tāna mau fanau’a ? Nāhea tātou ’ia ha’aputuputu atu i te Fa’aora ra ? (hi’o, ’ei hi’ora’a, ’īrava 2). E nehenehe te mau melo o te piha e fa’a’ite mai e mea nāhea rātou i te ha’amaita’ira’ahia nā roto i te ha’aputuputura’a ’e te ha’amorira’a ’e te tahi atu mau melo o te ’Ēkālesia.

  moa ufa ’e te mau fanau’a

  E hia taime, nā Liz Lemon Swindle

• Nō te tauturu i te mau melo o te piha ha’api’ira’a ’ia feruri nō ni’a i tā rātou hōpoi’a ’ia tauturu i te Metua i te Ao ra ’ia ha’aputuputu i tāna mau tamari’i, e nehenehe ’outou e fa’a’ite atu i te mau parau a te peresideni Russell M. Nelson i roto i te « Mau rāve’a tauturu hau atu ». E aha tā tātou i ha’api’i mai nō ni’a i te ha’aputuputura’a nā roto mai i teie mau parau ? Nāhea teie mau parau e ha’apūai ai i te mea tā te Fatu i parau i roto i Te Parau Ha’api’ira’a ’e te mau Parau Fafau 29:1–8 ?

• E riro vetahi mau ’ohipa i tupu i te mau mahana hope’a nei, mai tei fa’ata’ahia mai i roto i Te Parau Ha’api’ira’a ’e te mau Parau Fafau 29:14–21 ’ei mea pe’ape’a nō te mau melo o te piha ha’api’ira’a. E vaiho ia rātou ’ia fa’a’ite mai i tō rātou mana’o. Nō te aha te Fatu i fa’aara mai ai ia tātou nō teie mau mea e tupu mai ? E aha te mau parau mau tāmāhanahana tā tātou i ha’api’i mai nō ni’a i te Fa’aora ’e te ha’aputuputura’a i te mau ’īrava 1–8? Nāhea teie ha’aputuputura’a e tauturu ai ia tātou ’ia tīa’i i teie mau mea e tupu mai, ma te fa’aro’o ’eiaha ra ma te ri’ari’a ? ’Ei tuha’a nō tā ’outou mātutura’a, e nehenehe ’outou e hīmene i te hō’ē hīmene nō ni’a i te ha’aputuputura’a, mai te « Pi’i mai ra te Atua » (Te mau hīmene, n°8), ’e e ’āparau e aha tā te hīmene e ha’api’i nei nō ni’a i te ha’aputuputura’a o ’Īsera’ela.

Te Parau Ha’api’ira’a ’e te mau Parau Fafau 29:34–35

Te mau fa’auera’a ato’a a te Fatu e mea pae vārua ana’e ïa.

• Noa atu ē ’ia hi’ohia vetahi mau fa’auera’a e mea pae tino, e mea pae vārua te mau fa’auera’a ato’a i te hi’ora’a a te Fatu. Nō te hāro’aro’a i teie parau mau, e tai’o ’āmui mai tō te piha ha’api’ira’a i te mau ’īrava 34–35 ’e e tāpura mai i ni’a i te tāpura ’ere’ere i te tahi mau fa’auera’a, e tae noa atu i te mau parau tumu pae vārua ’e te mau ha’amaita’ira’a e tū’ati atu i te reira. E nehenehe rātou e fa’a’ite mai i te mau hi’ora’a nō roto mai i tō rātou orara’a ’aore rā, nō roto mai i te mau pāpa’ira’a mo’a ’o tei tauturu ia rātou ’ia ’ite i te nātura pae vārua o te mau fa’auera’a a te Atua. Nāhea teie ’ohipara’a e taui ai i tā tātou huru hi’ora’a i te mau fa’auera’a ?

’ītona mau rāve’a tauturu hau atu

Mau rāve’a tauturu hau atu

Te Parau Ha’api’ira’a ’e te mau Parau Fafau 29

’Āmuira’a atu i roto i te haʼaputuputuraʼa o ’Īserāʼela

’Ua ha’api’i te peresideni Russell M. Nelson :

« E mea pāpū teie te mau mahana hopeʼa nei, ’e tē rū nei te Fatu i tāna ’ohipa nō te haʼaputuputu ia ’Īserāʼela. Taua haʼaputuputuraʼa ra, ʼo te ʼohipa faufaʼa roa a’e ïa i niʼa i te fenua nei, i teie mahana. ʼAita e ʼohipa ʼē atu e faʼa’auhia i te rahi, ʼaita e ʼohipa ʼē atu e faʼa’auhia i te faufaʼa rahi, ʼaita e ʼohipa ʼē atu e faʼa’auhia i te hanahana. E mai te mea e māʼiti ʼoutou, mai te mea e hinaʼaro ʼoutou, e nehenehe ʼoutou e riro ʼei tuhaʼa faufaʼa rahi nō te reira. E nehenehe ’outou e riro mai ʼei tuhaʼa rahi nō te tahi mea rahi, te tahi mea faʼahiahia !

« ʼIa paraparau anaʼe tātou i te parau nō te haʼaputuputuraʼa, tē parau nei tātou i teie parau mau faufaʼa rahi : E tiʼa i te mau tamariʼi atoʼa a tō tātou Metua i te Ao ra, i nā pae e piti ʼo te pāruru, ʼia faʼaroʼo i te poroʼi nō te ʼevanelia a Iesu Mesia tei faʼahoʼi-fa’ahou-hia mai. Nā rātou e faʼaoti nō rātou iho mai te mea e hinaʼaro rātou ʼia ʼite atu ā i te reira.

ʼUa faʼaherehere tō tātou Metua i te Ao ra ’e rave rahi o tāna mau vārua tei hau atu i te maita’i—o tāʼu paha e nehenehe e parau ē, tāna pupu ’oi roa a’e—nō teie tuhaʼa hopeʼa. Taua mau vārua tei hau atu i te maita’i—taua mau ta’ata ’oi ra, taua mau aito ra—’o ’outou ïa ! » (« Tīa’ira’a nō Isera’ela » [purera’a nā te feia ’āpī ’ati ti’a te ao nei, 3 nō Tiunu 2018], ChurchofJesusChrist.org).

Ha’amaita’ira’a i tā tātou ha’api’ira’a

E ha’api’i māramarama ’e te ’ōhie. ’Oi i te tāmatara’a i te fa’a’ana’anatae i tā ’outou piha ha’api’iraa, ’a ha’api’i atu i te ha’api’ira’a tumu mā te māramarama ’e te ’ōhie. E nenehene ’outou e ti’aturi ē tē mau nei « te mana o te parau a te Atua » « i te pūai hope nō te fa’auru i te ferurira’a o te mau ta’ata… te tahi noa atu mea ē atu » (Alama 31:5).