Emma Smith

8–14 nō Māti

Te Parau Ha’api’ira’a ʼe te mau Parau Fafau 23–26

« Fa’a’eta’eta i te ’Ēkālesia »

Hou te tai’ora’a i teie arata’i, ’a tai’o i Te Parau Ha’api’ira’a ʼe te mau Parau Fafau 23–26 ’e ’a feruri hōhonu i te mau parau tumu o tā ’outou e mana’o ra ē, e fa’aitoito te reira i te mau melo o tā ’outou piha ha’api’ira’a. I muri iho, ’a feruri e aha te mau rāve’a e tauturu ia ’outou ’ia ha’api’i, tae noa atu i tei hōro’ahia mai i roto i teie arata’i.

Pāpa’i i te mau mana’o e tae mai

ītona fa’a’itera’a

Tītau i te mana’o

E aha te mau ha’amaita’ira’a tā tātou i fāri’i « ’a ha’apa’o ai [tātou] i tō [tātou] taime i te ha’api’ira’a mai i te mau pāpa’ira’a mo’a » ? (Te Parau Ha’api’ira’a ʼe te mau Parau Fafau 26:1). Nāhea tātou i te fāri’ira’a i te Vārua i roto i tō tātou ’utuāfare ? E nehenehe paha te mau melo o te piha ha’api’ira’a e fa’a’ite mai e mea nāhea rātou i te upo’oti’ara’a i ni’a i te mau fifi ’aore rā, i ni’a i te mau fa’a’ana’anataera’a nō te hōro’a i te taime nō te tuatāpapara’a i te pāpa’ira’a mo’a a te ta’ata iho ’e a te ’utuāfare.

ītona ha’api’ira’a

Ha’api’i i te ha’api’ira’a tumu

Te Parau Ha’api’ira’a ʼe te mau Parau Fafau 23–26

E nehenehe tātou pā’āto’a e ha’apūai i te ’Ēkālesia.

• E hina’aro paha ’outou ’ia hi’ohi’o ’e te mau melo o te piha ha’api’ira’a i te aura’a o te parau ra « fa’aitoito i te ’Ēkālesia » (Te Parau Ha’api’ira’a ʼe te mau Parau Fafau 25:7). E nehenehe te hō’ē ta’ata e fa’a’ite mai i te mau tātarara’a i roto i te fa’atoro parau o te ta’o ra fa’aitoito ’aore rā te mau hi’ora’a nō te fa’aitoitora’a tā rātou i ’ite. E aha tā tātou mau rāve’a nō te fa’aitoito i te tahi ’e te tahi ? Nāhea te reira i te fa’aitoito i te ’Ēkālesia ? E aha atu ā tā tātou e ha’api’i mai i roto i Te Parau Ha’api’ira’a ʼe te mau Parau Fafau 23–26 ’o te nehenehe e tauturu ia tātou ’ia ha’apūai i te ’Ēkālesia ? E nehenehe ato’a ’outou e ’āparau e nāhea teie mau parau tumu e tano ai nō te ha’apūai i tō tātou ’utuāfare. Nō te fa’a’ohipa i teie mau parau tumu i roto i tā tātou mau ’ohipa aupurura’a, e nehenehe ’outou e hi’o fa’ahou i te tahi mau tuha’a o te parau poro’i a te tuahine Bonnie H.Cordon « Te rirora’a ’ei tīa’i māmoe » (Ensign ’aore rā Liahona, Novema 2018, 74–76).

Te Parau Ha’api’ira’a ʼe te mau Parau Fafau 24

E nehenehe te Fa’aora e fa’ateitei ia tātou « i [tō tātou] mau ’ati ».

• ’Ua hōro’ahia mai te heheura’a i roto i Te Parau Ha’api’ira’a ʼe te mau Parau Fafau 24 nō te « ha’apūai, fa’aitoito, ’e ha’api’i » ia Iosepha ’e ia Oliver i roto i te hō’ē tau tāmatara’a (Te Parau Ha’api’ira’a ʼe te mau Parau Fafau 24, tuha’a upo’o parau ; hi’o ato’a Feiā mo’a, 1:94–96). E nehenehe ’outou e ani i te piha ha’api’ira’a ’ia ’imi i teie tuha’a nō te mau fa’a’itera’a ē, ’ua ’ite pāpū te Fatu ia Iosepha ’e i tōna orara’a. Nāhea tō te Fatu pāhonora’a i te mau hina’aro o Iosepha ? Nāhea ’oia i te rave ato’a i te reira nō tātou i teie mahaha ? E ani i te mau melo o te piha ha’api’ira’a ’ia fa’a’ite mai i te mau ’itera’a ’a ’ite ai rātou ē, ’ua ’ite pāpū te Fatu i tō rātou iho huru orara’a ’e ’ua fa’ateitei ia rātou i roto i te mau ’ati.

  tē fa’aora ra Iesu i te ta’ata

  ’Ua fa’aora ’oia e rave rahi mau ma’i, nā J.Kirk Richards

Te Parau Ha’api’ira’a ʼe te mau Parau Fafau 25

« E vahine mā’itihia » ’o Emma Smith.

• Nō te tauturu i te mau melo o te piha ha’api’ira’a ’ia ’ite i te faufa’a rahi o te ta’ata iho i roto i te heheura’a a te Fatu ia Emma Smith, ’a feruri i teie ’ohipara’a : E ani i te ’āfara’a o te piha ha’api’ira’a ’ia ’imi i te tuha’a 25 nō te mau mea tā te Fatu i ani ia Emma ’ia rave, ’e e ani i te tahi atu ’āfara’a ’ia ’imi i te mau mea tā te Fatu i fafau e rave ’oia . E ani ia rātou ’ia tāpura i te mau mea i ’itehia mai ia rātou ’e ’ia fa’a’ite mai i te reira i te tahi ’e te tahi. E nehenehe te tahi mau melo o te piha ha’api’ira’a e fa’a’ite mai i te mau parau tumu tei riro ’ei mea faufa’a ta’a ’ē nō rātou.

• E aha te mau ta’o ’e te mau pereota i roto i te tuha’a 25 e pāturu nei i te parau a te Fatu ia Emma Smith, « e vahine mā’itihia ’oe » ? (’īrava 3). E nehenehe ato’a te mau melo o te piha ha’api’ira’a e ’āparau i te huru nō tō Emma orara’a i te mau parau tumu i roto i teie heheura’a. E tauturu te rāve’a tauturu, « Reo nō te fa’aho’ira’a mai » i roto i te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare.

• Ia au i Te Parau Ha’api’ira’a ʼe te mau Parau Fafau 25:11–12, e aha te mana’o o te Fatu nō ni’a i te hīmene mo’a ? E nehenehe paha te piha ha’api’ira’a e ’āparau i te mau rāve’a nō te fa’a’ohipa i te mau hīmene nō te ani i te Vārua i roto i tō rātou ’utuāfare.

Te Parau Ha’api’ira’a ʼe te mau Parau Fafau 25:5, 14

E ’imi tātou ’ia roa’a te « vārua ha’eha’a ».

• ’Ua a’o te Fatu ia Emma ’ia « tāmau noa i te vārua ha’eha’a » (Te Parau Ha’api’ira’a ʼe te mau Parau Fafau 25:14; hi’o ato’a i te ’īrava 5). Nō te hi’ohi’o e aha te aura’a nō te reira, e nehenehe ’outou e pāpa’i ha’eha’a i ni’a i te tāpura ’ere’ere ’e e ani i te mau melo o te piha ha’api’ira’a ’ia pāpa’i i pīha’i iho i te mau mea tā te reira ta’o e ha’aferuri ia rātou. ’Ei reira rātou e ’imi ai i te tuha’a 25 nō te mau ta’o ’e te mau pereota tā rātou e feruri ra ē, e tū’ati i ni’a i te ha’eha’a ’e e fa’a’ite mai ai i te mau mea i ’itehia mai e rātou. ’A feruri e fa’a’ite i te fa’ahitira’a parau a Elder David A.Bednar i roto i « Mau rāve’a tauturu hau atu ». Nō te aha e mea faufa’a ’ia vai ha’eha’a noa ?

Te Parau Ha’api’ira’a ʼe te mau Parau Fafau 25:10, 13

E ’imi tātou i te mau mea nō te hō’ē ao maita’i a’e.

• Nō te tauturu i te mau melo o te piha ha’api’ira’a ’ia fa’a’ohipa i te a’ora’a a te Fatu ’ia « ha’apae ’oe i te mau mea nō teie nei ao, ’e e tītau ho’i i te mau mea nō tei maita’i a’e ra » (Te Parau Ha’api’ira’a ʼe te mau Parau Fafau 25:10), e nehenehe ’outou e ani ia rātou ’ia tāpura mai i te mau hi’ora’a o « te mau mea nō teie nei ao » ’e te mau hi’ora’a nō « te mau mea nō te hō’ē [ao] maita’i a’e ». E aha te a’o tā tātou e nehenehe e fa’a’ite i te tahi ’e te tahi nō te tauturu ia tātou ’ia rōtahi i ni’a i te mau mea nō te ora mure ? Nāhea te a’o i roto i te ’īrava 13 e tū’ati ai i teie fā ?

ītona mau rāve’a tauturu hau atu

Mau rāve’a tauturu hau atu

Te ha’eha’a o te pūai ïa.

’Ua fa’ata’a mai o Elder David A.Bednar ē : « Pinepine te huru Mesia o te ha’eha’a i te māramarama-’ore-hia i roto i tō tātou nei ao. E mea pūai te marū, e ʼere i te mea paruparu ; e mea ʼohipa, e ʼere i te mea faʼaea noa ; e mea itoito, e ʼere i te mea māmahu ; e mea haʼavī, e ʼere i te mea fa’arahi atu ; e mea haʼihaʼi, e ʼere i te mea faʼarahi ; e mea maitaʼi, e ʼere i te mea ʼāhitahita. Hō’ē ta’ata ha’eha’a e’ita ’oia e riri ’ōhie noa, e ’ere i te mea fa’ahua, ’e ’aore rā, e ’ere i te mea ha’avī, ’e e ’ite ’ōhie ’oia i te ’ohipa a vetahi ’ē » (« ’O te ha’eha’a ’e te marū te ’ā’au », Ensign ’aore rā Liahona, Mē 2018, 32).

Haʼamaitaʼiraʼa i tā tātou haʼapiʼiraʼa

E fa’a’ite pāpū nō te mau ha’amaita’ira’a i fafauhia mai. ’Ia ani ana’e ’outou i te mau melo o te piha ha’api’ira’a ’ia fa’a’ohipa i te mau mea tā rātou e ’apo mai nei, e fa’a’ite pāpū i te mau ha’amaita’ira’a tā te Atua i fafau mai (hi’o Ha’api’ira’a mai tā te Fa’aora,35).