Tō Peter Whitmer fare, nā Al Rounds

1–7 nō Māti.

Te Parau Ha’api’ira’a ’e te mau Parau Fafau 20–22

« Te tupura’a o te ’Ēkālesia a te Mesia »

’A pāpa’i i tō ’outou mau mana’o pae vārua ’a tuatāpapa ai ’outou i Te Parau Ha’api’ira’a ’e te mau Parau Fafau 20–22. E arata’i te tahi o te mau fa’aurura’a ia ’outou i ni’a i te mau mana’o ’o tē tauturu ia ’outou i te taime ’a ha’api’i ai ’outou.

Pāpa’i i te mau mana’o e tae mai

Tītau i te mana’o

I roto i tā rātou tuatāpapara’a i te fare, e noa’a i te mau melo o te piha ha’api’ira’a te mau hi’ora’a nō ni’a i te mau ha’amaita’ira’a i te vaira’a mai te ’Ēkālesia mau i ni’a i te fenua nei. E ani ia rātou ’ia fa’a’ite mai i te hō’ē vāhi nō roto mai i teie mau tuha’a e fa’ahōho’a nei i te tumu nō tō rātou mauruuru i te fa’aho’i-fa’ahou-ra’a-hia mai te ’Ēkālesia.

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 20–21

’Ua fa’aho’i-fa’ahou-hia mai te ’Ēkālesia a Iesu Mesia.

• E fāna’o te mau melo o te piha ha’api’ira’a nā roto i te tuatāpapara’a i te mau tueara’a e vai ra i roto i Te ’Ēkālesia a Iesu Mesia i te Feiā Mo’a i te mau Mahana Hope’a Nei ’e i te ’Ēkālesia i ha’amauhia e te Mesia i tahito ra. E nehenehe ’outou e rēni i ni’a i te tāpura ’ere’ere e maha rēni mai ni’a haere i raro ma te tāpa’ohia i nā e pae ta’o Ha’api’ira’a tumu, Te mau ’ōro’a, Te mana fa’atere o te autahu’ara’a, ’e Te mau peropheta. E hōro’a ’outou i te mau fa’ahorora’a i muri nei nō ni’a i te ’Ēkālesia a Iesu Mesia i tahito ra : Mataio 16:15–19 ; Ioane 7:16–17 ; Ephesia 2:19–22 ; 3 Nephi 11:23–26 ; Moroni 4–5. ’E ’imi te mau melo o te piha ha’api’ira’a e aha tā te mau ’īrava tāta’itahi e ha’api’i nei nō ni’a i te ’Ēkālesia a te Mesia, ’e e pāpa’i atu i te ’īrava i roto i te tuha’a tano o te tāpura. (E tano ato’a te tahi mau fa’ahorora’a i roto i te tahi atu mau tuha’a). E nā reira ato’a rātou nō te mau fa’ahorora’a i muri nei nō ni’a i te ’Ēkālesia a te Mesia tei fa’aho’i-fa’ahou-hia mai : Te Parau Ha’api’ira’a ’e te mau Parau Fafau 20:17–25, 60, 72–79 ; 21:1–2. E aha tā ’outou i ’apo mai nō ni’a i te fa’aho’i-fa’ahou-ra’a-hia mai te ’Ēkālesia a te Mesia nā roto mai i teie fa’atu’atira’a ?

Te Parau Ha’api’ira’a ’e te mau Parau Fafau 20:37, 75–79; 22

E tauturu te mau ’ōro’a mo’a ia tātou ’ia riro mai te Fa’aora.

• Hōro’a i te taime i te mau melo o te piha ha’api’ira’a ’ia tuatāpapa i te mau tītaura’a nō te bāpetizora’a i fa’a’itehia i roto i Te Parau Ha’api’ira’a ’e te mau Parau Fafau 20:37, ’e e ani ia rātou ’ia feruri māite i te mau uira’a mai teie : Nāhea teie mau tītaura’a i te tauturu ia tātou ’ia fa’aineine ’ia bāpetizohia i roto i te ’Ēkālesia a te Fatu ? E aha te aura’a ’ia rave i te i’oa o te Mesia i ni’a ia tātou ? (hi’o Mosia 5:5–12). E aha te tauturu ia ’outou ’ia tāpe’a noa i tō ’outou « hia’ai onoono ’ia tāvini ia [Iesu Mesia] e tae noa atu i te hope’a » ?

• E aha tā te tuha’a 22 e ha’api’i nei nō ni’a i te bāpetizora’a ? E ani i te mau melo o te piha ha’api’ira’a ’ia feruri, e hoa tō rātou ’o tei bāpetizohia i roto i te tahi ’ē atu ’Ēkālesia. E tai’o rātou i teie tuha’a nō te ’ite mai i te a’o nō te tauturu i tō rātou hoa ’ia māramarama nō te aha e mea faufa’a te bāpetizora’a i roto i te ’Ēkālesia a te Fa’aora o tei fa’aho’i-fa’ahou-hia mai. E ha’uti ta’ata ora te mau melo o te piha ha’api’ira’a i teie ’ā’amu ’aore rā e ha’uti ’āpipiti.

• E tai’o ’āmui i Te Parau Ha’api’ira’a ’e te mau Parau Fafau 20:75–79 ’e e ani i tō te piha ha’api’ira’a ’ia feruri e aha tā teie mau ’īrava e ha’api’i nei nō ni’a i te Fa’aora ’e tōna mana i roto i tō tātou orara’a. E aha te mau ta’o ’aore rā te mau fa’ahitira’a ta’a ’ē ’ia tai’o ana’e tātou i nā pure o te ’ōro’a mo’a mai teie te huru ? Nō te aha e mea faufa’a ’ia rave i te ’ōro’a mo’a i te mau hepetoma ato’a ?

  

  E ’ōro’a mo’a te ’ōro’a mo’a.

Te Parau Ha’api’ira’a ’e te mau Parau Fafau 20:38–60

E ha’amaita’i te tāvinira’a autahu’ara’a i te mau melo o te ’Ēkālesia ’e i tō rātou mau ’utuāfare.

• Nā te fa’a’itera’a o te mau hōpoi’a o te autahu’ara’a i roto i Te Parau Ha’api’ira’a ’e te mau Parau Fafau 20:38–60 e tauturu i te mau melo o te piha ha’api’ira’a ’ia fa’a’ā’ano i tō rātou hāro’aro’ara’a i te tāvinira’a autahu’ara’a. E tītau paha ’outou ia rātou ’ia feruri ē, ’ua fātata roa te hō’ē hoa tei bāpetizo-’āpī-hia ’aore rā te hō’ē melo o te ’utuāfare i te fa’atōro’ahia i roto i te autahu’ara’a. Nāhea rātou ’ia fa’a’ohipa i teie mau ’īrava nō te tauturu iāna ’ia hāro’aro’a i tāna mau hōpoi’a ? E aha te mau hi’ora’a tā rātou e fa’a’ite atu nō te tauturu iāna ’ia hāro’aro’a e nāhea ’ia rave i teie mau hōpoi’a ’o tē nehenehe e tauturu iāna ’ia riro hau atu ā mai ia Iesu Mesia ? Penei a’e e ha’uti teata mai rātou i teie ’āparaura’a.

  Hau atu, nāhea rātou ’ia fa’a’ohipa i teie mau ’īrava nō te tauturu i te hō’ē tuahine tei bāpetizo-’āpī-hia ’ia ’ite nāhea ’oia e ’āpiti mai i i te ’ohipa i hōhorahia mai i’ōnei ? (E nehenehe te fa’ahitira’a i roto i te « Mau rāve’a tauturu hau atu » e tauturu).

Te Parau Ha’api’ira’a ’e te mau Parau Fafau 21:4–7

E ha’amaita’ihia tātou ’ia fāri’i ana’e tātou i te parau a te Fatu nā roto mai i tāna peropheta.

• Tei roto i Te Parau Ha’api’ira’a ’e te mau Parau Fafau 21 te mau fa’ahitira’a parau pūai nō ni’a i te pe’era’a i te peropheta a te Fatu. Nō te tauturu i te mau melo o te piha ha’api’ira’a ’ia feruri ’e ’ia ’āparau i teie mau fa’ahitira’a parau, e ani ia rātou ’ia ’imi i te mau ’īrava 4–7 nō te hō’ē pereota o tā rātou e hina’aro ’ia hāro’aro’a maita’i a’e ’e ’ia pāpa’i i te pereota i ni’a i te tāpura ’ere’ere. E mā’iti i te tahi o te mau pereota, ’e e ’āparau ’e tō te piha e aha tō te reira tātarara’a. E aha tā teie mau pereota e ha’api’i nei ia tātou nō ni’a i te pe’era’a i te peropheta a te Fatu ?

Mau rāve’a tauturu hau atu

Tē ’ohipa nei tātou pā’āto’a ’e te mana o te autahu’ara’a.

« E fa’atōro’ahia te mau tāne i te mau tōro’a o te autahu’ara’a, ’āre’a te mau vahine ’e te mau tāne, e tītau-manihini-hia rātou ’ia fa’a’ohipa i te mana ’e i te mau ha’amaita’ira’a o te autahu’ara’a i roto i tō rātou orara’a…

« … E a’o ’e e pure [te mau vahine] i roto i te mau ’āmuira’a, e amo rātou i te mau ti’ara’a e rave rahi nō te fa’aterera’a ’e nō te tāvinira’a, e ’āmui rātou i roto i te mau ’āpo’ora’a a te autahu’ara’a o te fenua iho ’e i te fāito teitei, ’e e tāvini i roto i te mau misiōni porora’a ’evanelia nā te ao ato’a nei. Nā roto i teie ’e te tahi atu rāve’a, e fa’a’ohipa te mau vahine i te mana fa’atere o te autahu’ara’a, noa atu ’aita rātou i fa’atōro’ahia i te tōro’a o te autahu’ara’a.

« … I roto i te mau pi’ira’a o te ’Ēkālesia, te mau ’ōro’a hiero, te mau aura’a ’utuāfare, ’e te marū, te tāvinira’a a te ta’ata hō’ē, e nu’u te mau vahine ’e te mau tane o te Feiā Mo’a i te mau mahana hope’a nei ma te mana ’e te mana fa’atere o te autahu’ara’a. Teie turu’ira’a pae piti o te mau tāne ’e te mau vahine i roto i te fa’aotira’a i te ’ohipa a te Atua nā roto i tōna mana, ’o te pū ïa o te ’evanelia a Iesu Mesia » (Gospel Topics,« Te mau ha’api’ira’a a Iosepha Semita nō ni’a i te autahu’ara’a, te hiero, te mau vahine », topics.ChurchofJesusChrist.org).

Ha’amaita’ira’a i tā tātou ha’api’ira’a

E ’apo ’āmui mai tātou. ’Ei ’orometua ha’api’i, tē ’apo mai ra ’outou ’e te toe’a o tā ’outou piha ha’api’ira’a. ’A fa’a’ite i tō ’outou hina’aro mau ’ia ’apo mai nā roto mai ia rātou, nā roto i te fa’aro’ora’a i tō rātou mau mana’o.