Te fare fa’a’apu a Martin Harris, na Al Rounds

22–28 nō Fepuare.

Te Parau Ha’api’ira’a ’e te mau Parau Fafau 18–19

« E faufa’a rahi tō te mau vārua ta’ata »

E mea nā roto ana’e i te Vārua Maita’i e taui ai te ’ā’au o te hō’ē ta’ata. ’Ua ha’api’i mai te peresideni Henry B. Eyring ē : « Ia ha’api’i ’outou i te mau parau tumu ha’api’ira’a, e tae mai te Vārua Maita’i » (« ’Āparaura’a ’e ’o Elder Richard G. Scott ’e Elder Henry B. Eyring » [Church Educational System ha’apurorora’a ha’api’ipi’ira’a pe’e’utari, 11 nō ’Ātete 2003]).

Pāpa’i i te mau mana’o e tae mai

Tītau i te mana’o

Nō te fa’auru i te mau melo o te piha ha’api’ira’a ’ia fa’a’ite mai i tō rātou mau ’itera’a ’e te mau pāpa’ira’a mo’a, e tai’o ’āmui i Te Parau Ha’api’ira’a ’e te mau Parau Fafau 18:34–36. I muri iho e ani i te mau melo o te piha ha’api’ira’a ’ia fa’a’ite mai i te hō’ē ’īrava tā rātou i tai’o i teie hepetoma i ’ite ai rātou i te reo o te Fatu.

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 18:10–16 ; 19:15–20, 39–41

E ’oa’oa te Fatu ’ia tātarahapa ana’e tātou.

• E rave rahi ta’ata e tu’ati nei te tātarahapa ’e te mau ’āehuehu hape. Nāhea te mau parau a te Fatu i roto i Te Parau Ha’api’ira’a ’e te mau Parau Fafau 18 ’e 19 e tauturu ai i te mau melo o te piha ha’api’ira’a ’ia hi’o i te tātarahapa mai te hō’ē ’oa’oara’a ? E nehenehe ’outou e pāpa’i i ni’a i te tāpura ’ere’ere Te tātarahapa, o te  ’e e ani i te mau melo o te piha ha’api’ira’a ’ia fa’a’ite mai i te mau rāve’a nō te fa’ahope i teie pēreota i niuhia i ni’a i tā rātou tai’ora’a i te tuha’a 18 ’e 19. (’A feruri i te hi’o fa’ahou i Te Parau Ha’api’ira’a ’e te mau Parau Fafau 18:10–16 ; 19:15–20, 39–41 i roto i te piha ha’api’ira’a.)

• E aha te aura’a « ʼia ti’aoro i te parau tātarahapa » ? (Te Parau Ha’api’ira’a ’e te mau Parau Fafau 18:14). Penei a’e e nehenehe te mau melo o te piha ha’api’ira’a e feruri i teie uira’a ’a tai’o ai rātou Te Parau Ha’api’ira’a ’e te mau Parau Fafau 18:10–16. Nō te aha te ta’ata e mā’iti ai, i te tahi taime, ’eiaha e tātarahapa ? Nāhea tātou ’ia fa’auru i te feiā ’o tā tātou i here ’ia haere i te Fa’aora ra ’e ’ia fāri’i i te fa’a’orera’a hara ? E fa’aitoito i te mau melo o te piha ha’api’ira’a ’ia ’imi i te tahi mea i roto i Te Parau Ha’api’ira’a ’e te mau Parau Fafau 18:10–16 ’aore rā 19:15–20 ’o tē nehenehe e tauturu.

Te Parau ha’api’ira’a ’e te mau Parau Fafau 18:10–16

« E faufa’a rahi tō te mau vārua ta’ata i tō te Atua hi‘ora’a mai ».

• Nāhea ’outou i te tauturu i te mau melo o te piha ha’api’ira’a ’ia hāro’aroa i tō tātou tāta’itahi faufa’a rahi i te hi’ora’a o te Atua ? E tai’o paha rātou i Te Parau Ha’api’ira’a ’e te mau Parau Fafau 18:10–16 ’e ’ia fa’a’ite mai i tō rātou mau ’itera’a ’a hāro’aro’a ai rātou i tō rātou faufa’a rahi nō te Atua. Nāhea teie mau ’īrava i te tauira’a i tō tātou huru i te hi’ora’a ia tātou iho ? i te tahi atu mau ta’ata ? Nāhea te Atua i te fa’a’ite mai ia tātou ē, e mea faufa’a rahi tātou nāna ?

  

  Te faufa’a o te hō’ē vārua ta’ata, nā Liz Lemon Swindle

Te Parau Ha’api’ira’a ’e te mau Parau Fafau 19:15–19

’Ua mamae Iesu Mesia nō tō te ao ato’a nei.

• Nāhea ’outou i te tauturu i te mau melo o te piha ha’api’ira’a ’ia fāri’i i te fa’a’itera’a a te Vārua Maita’i ’a feruri hōhonu ai rātou i te fa’ata’ara’a a te Fa’aora nō tōna iho mamae tara’ehara ? (Te Parau Ha’api’ira’a ’e te mau Parau Fafau 19:15–19). Penei a’e e nehenehe ’outou e ani i te hō’ē ta’ata ’ia hīmene mai i te hō’ē hīmene nō ni’a i te Fa’aora. E nehehene ato’a ’outou e fa’a’ite i te hō’ē hōho’a nō te Fa’aora, ’e e ani i te mau melo o te piha ha’api’ira’a ’ia tai’o i te mau ’īrava 15–19 ; i muri iho, e pāpa’i rātou i tō rātou mau mana’o ’e mau ’āehuehu. (E nehenehe te mau parau a Elder D. Todd Christofferson i roto i te « Mau rāve’a tauturu hau atu » i te fa’ahōhonu ato’a i te ’ā’au mehara o te mau melo o te piha ha’api’ira’a nō te mamae o te Fa’aora.) E nehenehe hō’ē pereota, mai tei pāpa’ihia ni’a i te tāpura ’ere’ere, e tauturu i te mau melo o te piha ha’api’ira’a ’ia feruri : Tē māuruuru nei au nō te Tara’ehara a Iesu Mesia nō te mea […] E hina’aro paha te tahi mau melo o te piha ha’api’ira’a e fa’a’ite mai i te mea ’o tā rātou i pāpa’i ’e ’ia hōro’a mai i tō rātou ’itera’a pāpū nō Iesu Mesia.

Te Parau Ha’api’ira’a ’e te mau Parau Fafau 19:16–26, 34–41

E tītau pinepine te ravera’a i te hina’aro o te Atua i te fa’atusiara’a.

• ’A fa’aruru ai te mau melo o te piha ha’api’ira’a i te mau huru orara’a ’o tē tītauhia ia rātou ’ia fa’atusia nō te ’evanelia, e riro te reira ’ei fa’aurura’a nō rātou ’ia ha’api’i mai nō ni’a i te tusia tā Martin Harris i rave ’ia nene’ihia te Buka a Moromona. Penei a’e e nehenehe ’outou e ani i te hō’ē o te piha ha’api’ira’a ’ia haere ineine mai nō te fa’ati’a mai nō ni’a i te fa’aotira’a a Martin ’ia piri i tāna fare fa’a’apu nō te ’aufau i te nene’ira’a o te Buka a Moromona (hi’o Feiā mo’a, 1:76–78). Tei hea mau ’īrava o te tuha’a 19 tei tauturu iāna ’ia rave i tāna fa’aotira’a ? E hina’aro paha ’outou e ani i te mau melo o te piha ha’api’ira’a ’ia fa’a’ite mai e mea nāhea te Buka a Moromona i te ha’amaita’ira’a ia rātou ’e ’ia fa’a’ite mai i tō rātou ’ā’au mēhara nō te tusia a Martin Harris ’e te tahi atu mau ta’ata tei fa’atusia ia rātou ’ia nene’ihia te buka.

• E hina’aro paha te tahi o te piha e fa’a’ite mai i te hō’ē tusia tā rātou i rave nō te Fatu ? E nehenehe te reira e arata’i i te mau melo o te piha ha’api’ira’a ’ia feruri nō ni’a i tō rātou iho hina’aro ’ia fa’atusia. E fa’aitoito ia rātou ’ia fa’a’ite mai i te mea tei ’itehia e rātou nā roto mai i Te Parau Ha’api’ira’a ’e te mau Parau Fafau 19 ’o tei fa’auru ia rātou ’ia rave i te fa’atusiara’a ’ia au i te hina’aro o te Atua (hi’o iho ā rā te mau ’īrava 16–26, 34–41).

Mau rāve’a tauturu hau atu

Te ho’o o te aroha o te Atua.

Ma te fa’ahiti i Te Parau Ha’api’ira’a ’e te mau Parau Fafau 19:18, ’ua parau ’o Elder D. Todd Christofferson ē : « E ha’amana’o nā tātou i te ho’o o te aroha tao’a rahi o te Atua. Tōna māuiui pohe i Getesemane ’e i ni’a i te sātauro, ua rahi a’e i tā te ta’ata e nehenehe e fa’a’oroma’i. Tera rā, nō tōna here i tōna Metua ’e ia tātou, ’ua fa’a’oroma’i ’oia, ’e ’ei hope’ara’a, ’ua nehenehe ’iāna ’ia pupu mai nō tātou, te tāhuti ’ore ’e te ora mure ’ore » (« ’A fa’aea i roto i tō’u here », Ensign ’aore rā Liahona, Novema 2016, 50).

Ha’amaita’ira’a i tā tātou ha’api’ira’a

Fa’atupu i te hō’ē vāhi ’o tē ani i te Vārua. ’Ua rau te mau rāve’a e nehenehe ai ’outou e ani i te Vārua i roto i tā ’outou piha ha’api’ira’a. Nā te pehe ’ōmuara’a e fa’atupu i te tura. Nā te fa’a’itera’a i te here ’e te ’itera’a pāpu e fa’atupu i te hō’ē vāhi māhanahana pae vārua. (Hi’o Ha’api’ira’a mai tā te Fa’aora, 15