8–14 nō Fepuare

Te Parau Ha’api’ira’a ʼe te mau Parau Fafau 12–13 ; Iosepha Semita—’Ā’amu 1:66–75

« I ni’a iho ia ’ōrua e ta’u nā tāvini taea’e nei »

Mai tā te Vārua Maita’i i ha’amāramarama i te ferurira’a o Iosepha Semita ’e o Oliver Cowdery nō ni’a i te mau pāpa’ira’a mo’a, e nehenehe ato’a ’oia e fa’auru ia ’outou mai te mea ē, e tuatāpapa ’outou nā roto i te pure Te Parau Ha’api’ira’a ʼe te mau Parau Fafau 12–13 ’e Iosepha Semita—’Ā’amu 1:66–75.

Pāpa’i i te mau mana’o e tae mai

Tītau i te mana’o

Hō’ē rāve’a nō te fa’aitoito i te fa’a’itera’a mai, ’oia ho’i, e ani i te mau melo o te piha ha’api’ira’a e mea nāhea tā rātou ’ia tuatāpapa i te mau pāpa’ira’a mo’a. E aha tā rātou i rave nō te ’ite i te mau mana’o i roto i te mau pāpa’ira’a mo’a i teie hepetoma ?

Ha’api’i i te ha’api’ira’a tumu

Te Parau Ha’api’ira’a ʼe te mau Parau Fafau 13

’Ua fa’aho’ihia mai te autahu’ara’a a Aarona e Ioane Bāpetizo.

• Hō’ē rāve’a nō te ’āparau i te mau parau mau i roto i Te Parau Ha’api’ira’a ʼe te mau Parau Fafau 13 ’o tē paraparaura’a ïa te mau melo o te piha ha’api’ira’a e nāhea teie tuha’a i te tauturu i te feiā ’āpī ’ia hāro’aro’a maita’i a’e i te Autahu’ara’a a Aarona. E aha tā te tuha’a 13 e ha’api’i nei nō ni’a i te Autahu’ara’a a Aarona o te ti’a i te feiā ’āpī tamāroa ’e te feiā ’āpī tamāhine ’ia māramarama ? Nō te hōro’a i te ta’ata tāta’itahi i te rāve’a nō te ’āmui mai, e nehenehe ’outou e ani i te mau melo o te piha ha’api’ira’a ’ia ’āparau ’āpitipiti i teie uira’a ’e i muri iho, ’ia fa’a’ite mai i te piha ha’api’ira’a e aha tā rātou i ’apo mai nā roto mai i te tahi ’e te tahi.

• Tē hōro’a nei te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare i te mau rāve’a tauturu ’o tē nehenehe e fa’ata’a i te tahi mau pereota i roto i Te Parau Ha’api’ira’a ʼe te mau Parau Fafau 13. E nehenehe ’outou e ani i te mau melo o te piha ha’api’ira’a ’ia fa’a’ite mai i te mau mea tā rātou i ’apo mai i roto i te tuatāpapara’a i teie mau rāve’a tauturu. Nō te fa’atupu i te hō’ē ’āparaura’a nō ni’a i te mau tāviri tei fa’ahitihia i roto i teie tuha’a, e nehenehe ’outou e fa’a’ite i te hō’ē ruru tāviri ’e e ani i te mau melo o te piha ha’api’ira’a ’ia paraparau nō ni’a i te mau mea tā te mau tāviri e fa’ati’a ia tātou ’ia rave. E nehenehe ato’a te ha’amāramaramara’a a te tuahine Ruth ’e a Elder Dale G.Renlund i roto i «  Mau rāve’a tauturu hau atu » e tauturu. E aha te mau ha’amaita’ira’a e roa’a ia tātou nā roto i te mau tāviri o te Autahu’ara’a a Aarona ? Nāhea tō tātou orara’a i te ta’a ’ē ’ia ’ore teie mau ha’amaita’ira’a ?

• Te tuha’a o te ’una’una o te ’evanelia i fa’aho’ihia mai, ’o tōna ïa fa’aō-ato’a-ra’a ia tātou i roto i taua ā ’ohipa nei mai te mau tāne ’e te mau vahine i roto i te mau pāpa’ira’a mo’a : I te patura’a i te bāsileia o te Atua i ni’a i te fenua nei. E nehenehe e parau ē, nā te reira e fa’ariro nei ia tātou ’ei « nā tāvini taea’e » ’e o rātou. E aha te aura’a ’ia riro ’ei tāvini taea’e i roto i te ’ohipa a te Fatu? EE nehenehe Mataio 3:13–17 ; Luka 1:13–17 ; 3:2–20 e tauturu i te mau melo o te piha ha’api’ira’a ’ia māramarama i te ’ohipa i ravehia e Ioane Bāpetizo.

  

  tē bāpetizo nei Iosepha Semita ia Oliver Cowdery, nā Del Parson

Iosepha Semita—’Ā’amu 1:66–75

E roa’a ia tātou te mana o te Atua nā roto i te mau ’ōro’a.

• Nō te hōro’a i te mau melo o te piha ha’api’ira’a i te rāve’a nō te fa’a’ite pāpū i te tahi ’e te tahi nō ni’a i te mau ha’amaita’ira’a e roa’a nā roto i te fāri’ira’a i te mau ’ōro’a o te autahu’ara’a, e nenehene ’outou e ani ia rātou ’ia hi’o fa’ahou i te Iosepha Semita—’Ā’amu 1:66–75, tae noa atu i te fa’aarara’a o te ’īrava 71, ma te ’imi i te mau ha’amaita’ira’a i fāri’ihia e Iosepha rāua o Oliver i muri a’e i tō rāua bāpetizora’a ’e te fa’atōro’ara’a i te autahu’ara’a. Nāhea te mau ’ōro’a i te hōro’a mai i te pūai pae vārua ? I muri iho e nehenehe te mau melo o te piha ha’api’ira’a e fa’a’ite mai i tō rātou iho mau ’itera’a i te taime ’a fāri’i ai rātou i te pūai o te Atua ’o te tae mai nā roto i te fāri’ira’a i te mau ’ōro’a o te autahu’ara’a mai te bāpetizora’a, te ’ōro’a mo’a, ’aore rā, te mau ’ōro’a o te hiero.

• E fāna’o te mau melo o te piha ha’api’ira’a i te hāmanira’a i te hō’ē tāpura ’o tē fa’a’ite ra i te mau ha’amaita’ira’a e fāri’ihia nā roto i te mau ’ōro’a o te autahu’ara’a. ’Ei hi’ora’a, e nehenehe ’outou e pāpa’i i ni’a i te tāpura i te mau upo’o parau Te mau ’ōro’a ’e Te mau ha’amaita’ira’a. E nehenehe te mau melo o te piha ha’api’ira’a e ’imi i te mau pāpa’ira’a mo’a mai teie i raro nei nō te fa’a’ī i te tāpura : Ioane 14:26 ; te Mau ’ohipa 2:38 ; Te Parau Ha’api’ira’a ʼe te mau Parau Fafau 84:19–22 ; 131:1–4 ; Iosepha Semita—’Ā’amu 1:73–74. Tei roto ato’a te tahi atu mau ha’amaita’ira’a tā rātou i fāri’i maoti teie mau ’ōro’a. E nehenehe paha rātou e fa’a’ite mai i te mau ’itera’a ’a ’ite ai rātou ē, ’ua hōro’a mai te mau ’ōro’a tei fāri’ihia e rātou i te mana o te Fa’aora i roto i tō rātou orara’a.

Mau rāve’a tauturu hau atu

E aha te mau tāviri o te autahu’ara’a ?

’Ua hōro’a mai o Elder Dale G.Renlund ’e tana vahine, o Ruth, i teie ha’amāramaramara’a nō ni’a i te mau tāviri o te autahu’ara’a.

« Te parau te mau tāviri o te autahu’ara’a e fa’a’ohipahia ïa i roto e piti rāve’a ta’a ’ē. Te mātāmua, tē fa’a’ite ra ïa i te hō’ē ti’ara’a ’aore rā, te hō’ē ha’amaita’ira’a ta’a ’ē i hōro’ahia i te feiā ato’a e fāri’i i te Autahu’ara’a a Aarona ’aore rā, te Autahu’ara’a a Melehizedeka ’Ei hi’ora’a, e fāri’i te mau taea’e tei mau i te Autahu’ara’a a Aarona i te mau tāviri nō te utuutura’a a te mau melahi ’e te mau tāviri o te fa’aineinera’a ’evanelia nō te tātarahapa ’e nō te bāpetizora’a utuhi ’ia matara te hara (hi’o Te Parau Ha’api’ira’a ʼe te mau Parau Fafau 13:1 ; 84:26–27). E fāri’i te mau taea’e tei mau i te Autahu’ara’a a Melehizedeka i te tāviri nō te mau parau ’aro o te bāsileia, te tāviri nō te ’itera’a i te Atua, ’e te mau tāviri nō te mau ha’amaita’ira’a pae vārua ato’a o te ’Ēkālesia (hi’o Te Parau Ha’api’ira’a ʼe te mau Parau Fafau 84:19 ; 107:18).

« Te piti o te rāve’a e fa’a’ohipahia te parau te mau tāviri o te autahu’ara’a, e parau ïa nō te feiā fa’atere. E fāri’i te feiā fa’atere o te autahu’ara’a i te mau tāviri autahu’ara’a hau atu, te ti’ara’a nō te fa’atere i ni’a i te hō’ē pupu o te ’Ēkālesia ’aore rā, hō’ē pupu autahu’ara’a. ’E nō reira, te mau tāviri o te autahu’ara’a, ’o te mana fa’atere ïa ’e te mana nō te arata’i, ’e nō te fa’atere i te ’Ēkālesia » (Te Autahu’ara’a a Melehizedeka : Te māramaramara’a i te ha’api’ira’a tumu, te orara’a i te mau parau tumu [2018], 26).

Ha’amaita’ira’a i tā tātou ha’api’ira’a

Fa’a’ite pinepine i tō ’outou ’itera’a pāpū. « E nehenehe tō ’outou ’itera’a pāpū ’ōhie ’e te hōhonu e riro ’ei fa’aurura’a pūai i ni’a i te feiā tā ’outou e ha’api’i ra. ’Aita e tītauhia te nehenehe ’aore rā, te roa » (Ha’api’ira’a mai tā te Fa’aora, 11). ’A feruri i te fa’a’ite i tō ’outou iho ’itera’a pāpū nō te Autahu’ara’a a Aarona ’a ’āparau ai ’outou i Te Parau Ha’api’ira’a ʼe te mau Parau Fafau 13.