Tāpitira’a o te Buka a Moromona mau i pāpa’i-rima-hia.

1–7 nō Fepuare.

Te Parau Ha’api’ira’a ʼe te mau Parau Fafau 10–11

« ’Ia upo’oti’a ’oe »

E aha te mau fa’aurura’a i tae mai ’a tai’o ai ’outou Te Parau Ha’api’ira’a ʼe te mau Parau Fafau 10–11 ? E aha te mau mana’o i tupu mai i roto ia ’outou nō ni’a i te mau hina’aro o te ta’ata tā ’outou e ha’api’i ra ?

Pāpa’i i te mau mana’o e tae mai

Tītau i te mana’o

Nō te hōro’a i te taime i te mau melo o te piha ha’api’ira’a ’ia parau mai nō ni’a i te mea tā rātou i ’apo mai nā roto i tā rātou iho ’e tā te ’utuāfare tuatāpapara’a i te pāpa’ira’a mo’a, e nehenehe ’outou e pāpa’i i ni’a i te tāpura ’ere’ere Te Parau Ha’api’ira’a ʼe te mau Parau Fafau 10 ’e Te Parau Ha’api’ira’a ʼe te mau Parau Fafau 11. E pāpa’i mai te tahi mau melo o te piha ha’api’ira’a, i raro a’e i te upo’o tuha’a, te nūmera o te ’īrava i reira te ’itera’ahia e rātou te hō’ē parau mau faufa’a roa. ’A mā’iti i te tahi mau ’īrava, ’e e ani i te mau melo o te piha ha’api’ira’a ’ia fa’a’ite mai i te mau parau mau tā rātou i ’ite mai i reira.

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 10:1–33

Tē ’imi nei Sātane e ha’amou i te ’ohipa a te Atua.

• E tauturu Te Parau Ha’api’ira’a ’e te mau Parau Fafau 10 i te mau melo o te piha ha’api’ira’a ’ia ’ite ’e ’ia pāto’i i te mau tauto’ora’a a Sātane nō te ha’amou i tō rātou fa’aro’o. Nō te hōro’a i te tahi ’ā’amu o teie tuha’a, e nehenehe ’outou e ani i te hō’ē melo o te piha ’ia fa’ati’a mai i te ’ā’amu nō nā ’api 116 tei ’īritihia o te Buka a Moromona tei mo’e ia Martin Harris (hi’o i te upo’o parau o te tuha’a nō Te Parau Ha’api’ira’a ’e te mau Parau Fafau 3 ’e te Feiā Mo’a, 1:50–53). I muri iho e ’imi te mau melo o te piha ha’api’ira’a i Te Parau Ha’api’ira’a ’e te mau Parau Fafau 10:1–33 nō te ’ite mai i te ’ōpuara’a a Sātane nō te mau ’api i mo’e. E aha tā tātou e ha’api’i mai nei i roto i teie mau ’īrava nō ni’a i te mau rāve’a e fa’a’ohipahia nei e Satane, ’e nō te aha ’oia e rave ai i teie mau mea ? (hi’o ato’a ’irava 63). E mea nāhea ’oia ’ia ’ohipa i taua ā mau rāve’a ra i tō tātou nei ’anotau ? E mea nāhea te Fatu i te tauturu ia tātou ’ia upo’oti’a i ni’a ia Sātane i roto i tō tātou orara’a ?

Te Parau Ha’api’ira’a ’e te mau Parau Fafau 10:34–52

« ’ua hau te pa’ari [o te Fatu] i te ’aravihi o te diabolo ra ».

• ’Ia paruparu noa atu tātou nō tā tātou mau hara, e roa’a te tīa’ira’a ia tātou nā roto i te ’itera’a e nāhea tō te Fatu fa’a’orera’a i te hara i ravehia e Iosepha Semita ’e e Martin Harris, i tō rāua ha’apa’o-’ore-ra’a i te parau a te Fatu ’e te mo’era’a nā 116 ’api nō te ’īritira’a o te Buka a Moromona. ’A feruri, nāhea ’outou i te tauturu i te mau melo o te piha ’ia roa’a te tīa’ira’a i roto i teie ’ā’amu. ’Ei hi’ora’a, e nehenehe ’outou e ani ia rātou ’ia fa’a’ite mai i te mea tā rātou i ’apo mai nō ni’a i te Fatu nā roto mai i Te Parau Ha’api’ira’a ’e te mau Parau Fafau 10:34–52 (hi’o ato’a Te Parau Ha’api’ira’a ’e te mau Parau Fafau 3:1–3). E nehenehe te mau melo o te piha e fa’a’ite mai nāhea rātou i te ’itera’a ē, « ’ua hau te pa’ari [o te Fatu] i te ’aravihi o te diabolo ra ». (Te Parau Ha’api’ira’a ’e te mau Parau Fafau 10:43). Nāhea teie ’itera’a i te ha’apūai i tō tātou fa’aro’o iāna ?

  

  Ha’apotora’a Moromona i te mau ’api, nā Tom Lovell

Te Parau Ha’api’ira’a ’e te mau Parau Fafau 11

Mai te mea e ani tātou i te Atua, e fāri’i tātou.

• Tē ani nei te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare ia tātou ’ia tai’o i Te Parau Ha’api’ira’a ’e te mau Parau Fafau 11 mai tē huru ra ’ua pāpa’ihia te reira nō tātou. E hina’aro paha te mau melo o te piha ha’api’ira’a e fa’a’ite mai i te mea tā rātou i ’ite i roto i teie tuha’a, e mea maita’i roa a’e nō rātou. Nāhea rātou ’ia fa’anaho nō te fa’a’ohipa i te mea o tā rātou i ha’api’i mai ?

• Hō’ē rāve’a nō te fa’aitoito i te ’āparaura’a i Te Parau Ha’api’ira’a ’e te mau Parau Fafau 11 ’o te anira’a ïa i te mau melo o piha ha’api’ira’a ’ia ’ite mai i te hō’ē parau tumu i roto i te tuha’a ’e i muri iho ’ia pāpa’i i te hō’ē uira’a nō ni’a i te reira. Teie te huru o taua mau uira’a ra « E aha te aura’a ’ia ’ati i te Mesia ma tō ’ā’au ato’a ? » (’īrava 19) ’aore rā, « Nāhea e noa’a ai te parau a te Atua ia tātou ? » (’īrava 21). E tu’u te mau melo o te piha ha’api’ira’a i tā rātou mau uira’a i te pae ni’a o te hō’ē ’api parau ’e ’a hōro’a ai i tā rātou ’api parau ’ati a’e te piha ma te tu’u ato’a atu i te mau mana’o ’e i te mau pāhonora’a e roa’a mai i te mau uira’a a te tahi ’e te tahi. (’Ei tauturura’a, e vāhi i te piha ha’api’ira’a ’ei pupu na’ina’i). I reira te mau melo o te piha ha’api’ira’a e fa’a’ite mai ai i te tā’āto’ara’a, tō rātou mau mana’o nō ni’a i tā vetahi ’ē mau pahonora’a i tā rātou uira’a.

Te Parau Ha’api’ira’a ’e te mau Parau Fafau 11:8–26

E hō mai te Atua i tōna Vārua ’a fa’aineine ai tātou ia tātou iho ’ia au i tōna haere’a.

• E fana’o ānei te mau melo o te piha ha’api’ira’a ’ia ’āparau nō ni’a i te rāve’a ’ia ’ite i te heheura’a o te ta’ata iho nā roto i te Vārua ? Mai te mea te reira iho ā, e ha’amata ’outou i te mātutu ma te ani ia rātou ’ia feruri ē, ’ua anihia rātou ’ia pāpa’i i te mau parau mau nō ni’a i te rāve’a ’ia fāri’i i te heheura’a o te ta’ata iho nā roto i te Vārua. E aha te mea tā rātou e tu’u nō roto mai i Te Parau Ha’api’ira’a ’e te mau Parau Fafau 11:8–26 ? ’Ei hi’ora’a, e aha tā rātou e pāpa’i nō ni’a i te fa’aineinera’a ’ia fāri’i i te arata’ira’a nō tō tātou orara’a ’e te mau pāhonora’a i tā tātou mau uira’a ? E aha tā rātou e parau nō ni’a e nāhea ’ia ’ite i te mau pāhonora’a ’ia tae mai te reira ? ’A tītau i te mau melo o te piha ha’api’ira’a ’ia feruri e nāhea rātou ’ia fa’a’ohipa i te mea ’o tā rātou i ’apo mai ’a tūtava ai rātou i te ’imi i te heheura’a o te ta’ata iho.

  ’Ei tuha’a nō teie ’ohipara’a, e nehenehe ’outou e fa’a’ite i teie fa’ahitira’a a te tuahine Julie B. Beck, peresideni rahi tahito nō te Sōtaiete Tauturu : « Te ’aravihi ’ia fa’ati’ahia, ’ia fāri’i, ’e ’ia ’ohipa i ni’a i te heheura’a o te ta’ata iho, o te ’aravihi hō’ē roa ïa ’e te mea faufa’a roa a’e ’o tē noa’a mai i roto i teie orara’a » (« E nīni’i atu vau i tō’u vārua i ni’a i te mau tāvini vahine i taua ’anotau ra », Ensign ’aore rā Liahona, Mē 2010, 11).

Ha’amaita’i i tā tātou ha’api’ira’a

’A fa’aō ia rātou ’o tē ’aro nei. Nāhea ’outou ’ia rave ’ia tu’ati ’ore ana’e te hō’ē melo o te piha ha’api’ira’a i te toe’a o te piha ? I te tahi mau taime, hō’ē noa mea e hina’arohia e āna, ’ia tau’a-ato’a-hia ’oia. ’A feruri i te ani i te reira pīahi ’ia ’āmui mai i roto i te hō’ē ha’api’ira’a i muri nei. Mai te mea ’aita te reira pīahi e pāhono i tā ’outou mau tauto’ora’a i te ha’amatara’a, ’a tāmau noa i te fa’a’ite i te here ’e te tau’ara’a iāna. (Hi’o Ha’api’ira’a mai tā te Fa’aora, 8–9).