Iosepha Semita e nā ʼite toʼotoru e tūturi ra i roto i te pure.

15–21 nō Fepuare

Te Parau Ha’api’ira’a ’e te mau Parau Fafau 14–17

« ’Ia ti’a ’ei ’ite »

’A feruri nō ni’a i te ha’api’ira’a tumu ’e i te mau ’ohipa i tupu tei fa’aitehia i roto i Te Parau Ha’api’ira’a ’e te mau Parau Fafau 14–17. Nāhea ’outou ’ia fa’auru i te feiā tā ’outou e ha’api’i nei « ’ia ti’a ’ei ’ite nō [teie] mau ’ohipa » ? (Te Parau Ha’api’ira’a ’e te mau Parau Fafau 14:8

Pāpa’i i te mau mana’o e tae mai

ītona fa’a’itera’a

Tītau i te mana’o

E aha tā te mau melo o te piha ha’api’ira’a i ’ite mai e mea faufa’a i roto i tā rātou tuatāpapara’a i te pāpa’ira’a mo’a nō te ta’ata iho ’aore rā nō te ’utuāfare ? E ani paha ’outou i tō te piha ha’api’ira’a ’ia fa’a’ite mai i te hō’ē hi’ora’a nō ni’a i te ’āmuira’a mai i roto i te ’ohipa a te Fatu nā roto mai i te tuha’a tāta’itahi o Te Parau Ha’api’ira’a ’e te mau Parau Fafau 14–17.

ītona ha’api’ira’a

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 14–16

Tē ani manihini nei te Fatu ia tātou ʼia ’āmui mai i roto i tāna ’ohipa.

• E aha tā te mau melo o te piha ha’api’ira’a i ’ite nō ni’a i te ’utuāfare Whitmer ? (hi’o te Feiā Mo’a, 1:68–69). E riro i te mea maita’i nō rātou ia titi’a i ni’a i te tāpura, te tahi mau ’ohipa nō ni’a i te ’utuāfare Whitmer. Nāhea teie mau ’ohipa i tupu e tauturu ai ia tātou ’ia hāro’aro’a maita’i a’e i te a’o a te Fatu ia Whitmer mā i roto i te mau tuha’a 14–16 ? ’Ei hi’ora’a, nō te aha te Fatu i fa’aau ai i tāna ’ohipa i te ’auhune o te hō’ē fa’a’apu ?

• Nō te fa’ati’a i te mau melo o te piha ha’api’ira’a ’ia fa’a’ite mai i tō rātou mau mana’o nō ni’a i te ’āmuira’a mai i roto te ’ohipa a te Fatu, e pāpa’i ’outou i te mau fa’ahorora’a o te pāpa’ira’a mo’a i muri nei i ni’a i te tāpura ’ere’ere : Te Parau Ha’api’ira’a ’e te mau Parau Fafau 14:1 ; 14:2–4 ; 14:5, 8 ; 14:6–7 ; 14:9–11 ; 15:6. E tai’o tāta’ipiti te mau melo o te piha ha’api’ira’a hō’ē o teie mau tuha’a o te pāpa’ira’a mo’a, ’e ’ia ’āparau e aha tā rātou i ha’api’i mai nō ni’a i te ’ohipa a te Fatu. E fa’aite mai te tahi o te mau pupu tāta’ipiti i te piha, e aha tā rātou i ’āparau.

• E ani i te mau melo o te piha ha’api’ira’a ’ia fa’a’ite mai i tō rātou mau ’itera’a ma te tauturu ia vētahi ’ē ’ia ha’afātata atu i te Fa’aora, ’oia ho’i ’ei misiōnare rave tāmau, ’aore rā, ’ei mau misiōnare rave ’ohipa ’e nā roto i te ’ohipa aupurura’a. Nāhea rātou i te ’itera’a i te mau parau a te Fatu i roto i Te Parau Ha’api’ira’a ’e te mau Parau Fafau 15:6 ’e 16:6 i te tupura’a i roto i tō rātou orara’a ? ’E aha tā tātou i ʼapo mai nā roto mai i teie mau tuha’a ’o tē tauturu ia tātou ’ia fa’aineine i te poro i te ’evanelia ?

  te feiā e ’ō’oti ra i te tītona

  Fa’ahōho’ara’a o te feiā e ’ō’oti ra i te tītona, nā Greg Newbold

Te Parau Ha’api’ira’a ’e te mau Parau Fafau 17

E nehenehe tātou e vai ha’apa’o noa i te mea tā tātou i ’ite, noa atu e pāto’i mai vetahi ’ē ia tātou.

• Nō te aha te Fatu i hōro’a ai i te mau ’ite nō te Buka a Moromona ? E fa’a’ite te mau melo o te piha ha’api’ira’a i te mau mana’o tei tupu i roto ia rātou ’a tai’o ai rātou i Te Parau Ha’api’ira’a ’e te mau Parau Fafau 17. E ’itehia te tahi atu ā mau mana’o i roto i te mau pāpa’ira’a mo’a nō ni’a i te reira, i roto i te upo’o parau nō te tuha’a 17 ’aore rā i roto i « Te ’itera’a pāpū o nā ’ite to’otoru », i te ’ōmuara’a o te Buka a Moromona. Nāhea te ’itera’a pāpū o nā ’ite to’otoru i fa’auru ai i tō tātou mau ’itera’a pāpū nō te Buka a Moromona ?

• Noa atu ’aita tātou i ’ite i te mau melahi ’aore rā ’aita i fāfā i te mau ’api auro, e nehenehe tātou e fa’a’ite pāpū ā nō te Buka a Moromona. E aha tā te mau melo o te piha ha’api’ira’a i ’ite mai i roto i te tuha’a 17 (i roto ato’a i te upo’o parau o te tuha’a) tā rātou e mana’o nei e fa’a’ohipa nō rātou ? ’Ia ui noa mai te ta’ata nō te aha tātou e ti’aturi ai e parau mau te Buka a Moromona, e aha tā tātou e parau ? E nehenehe paha te mau melo o te piha ha’api’ira’a e pāpa’i i te hō’ē pāhonora’a poto, ’e e tītau ’outou i te tahi ’ia fa’a’ite mai i tā rātou i pāpa’i. E nehenehe te fa’ahitira’a a te peresideni Ezra Taft Benson i roto i te « Mau rāve’a tauturu hau atu » e fa’auru i te mau melo ’ia fa’a’ite mai i tō rātou ’itera’a pāpū nō te Buka a Moromona ia vētahi ’ē.

• E riro paha ’ei taime fa’auru ’ia fa’a’ite mai te hō’ē melo nō te piha ha’api’ira’a i te mau ’itera’a i orahia e te tahi atu mau ’ite nō te mau ’api auro (hi’o « Te ’itera’a pāpū o nā ’ite to’ova’u » i roto i te Buka a Moromona ’e te ’itera’a o Mary Whitmer i roto i te Feiā Mo’a, 1:70–71).). ’E aha tā tātou i ’apo mai i roto i te mau ’itera’a o teie mau ’ite ?

ītona mau rāve’a tauturu hau atu

Mau rāve’a tauturu hau atu

Fa’a’itera’a i tō tātou ’itera’a pāpū nō ni’a i te Buka a Moromona

’Ua hōro’a mai te peresideni Ezra Taft Benson i te tītaura’a i muri nei i te mau melo o te ’Ēkālesia i te matahiti 1988 ra :

« Te Buka a Moromona ’o te hō’ē ïa mauiha’a tā te Atua i fa’ata’a nō te ’purumu i te fenua mai te diluvi ra, nō te ha’aputuputu i [tāna] i mā’iti.’ (Mose 7:62). Tītauhia ’ia riro teie putu pāpa’ira’a mo’a ’ei tūru’ira’a rahi a’e i roto i tā tātou porora’a, tā tātou ha’api’ira’a ’e tā tātou ’ohipa misiōnare.

« … I teie ’anotau nō te natirara ’e te mau rāve’a ha’apurorora’a i te parau nene’i, e riro te Atua i te fa’ahapa ia tātou ’ia ’ore noa atu tātou e tura’i i te Buka a Moromona ia ha’amana’ohia i tōna fāito ’umerehia.

« E Buka a Moromona tā tātou, e mau melo tā tātou, e mau misiōnare tā tātou, e mau rāve’a tā tātou, ’e tē vai ra tō te ao nei hia’ai. Teie taua taime ra !

« Tō’u mau taea’e ’e mau tuahine here ē, tē tāfifi nei tō tātou hāro’aro’ara’a i te mana o te Buka a Moromona, i te ti’ara’a hanahana ato’a e ha’utihia e āna, e tae noa atu i te ’ā’ano o te vāhi e tāpaehia e āna » (Te mau ha’api’ira’a a te mau peresideni o te Ekalesia : Ezra Taft Benson [2014], 143–44).).

Ha’amaita’ira’a i tā tātou ha’api’ira’a

Ui i te mau uira’a o te tītau i te ’itera’a pāpū. E riro te hō’ē uira’a fa’auruhia ’ei rāve’a pūai nō te tītau i te Vārua. ’Ei hi’ora’a, ’ia ha’api’i ana’e ’outou i Te Parau Ha’api’ira’a ’e te mau Parau Fafau 14:9, e ui ’outou « E mea nāhea ’outou i ’ite ai ē, o Iesu Mesia ’te māramarama e’ita e hunahia i roto i te pouri’ ? » (Hi’o Ha’api’ira’a mai tā te Fa’aora, 32).