tē pāpa’i ra te pāpa’i parau i ni’a i te hō’ē pēpa

25–31 nō Tēnuare

Te Parau Ha’api’ira’a ’e te mau Parau Fafau 6–9

« ’O teie te Vārua o te heheura’a »

Tē ha’api’i nei Te Parau Ha’api’ira’a ’e te mau Parau Fafau 6–9 i te mau parau tumu faufa’a roa nō ni’a i te fāri’ira’a i te heheura’a. E fa’a’ohipa i teie mau parau tumu nā roto i te ’imira’a i te heheura’a nō ni’a e nāhea ’ia tauturu i te mau melo o te piha ha’api’iraa ’ia ha’api’i mai nā roto i teie mau tuha’a.

Pāpa’i i te mau mana’o e tae mai

ītona fa’a’itera’a

Tītau i te mana’o

Nō te fa’aitoito i mau melo o te piha ha’api’ira’a ’ia fa’a’ite mai i tō rātou mau ’itera’a i te tuatāpapara’a i Te Parau Ha’api’ira’a ’e te mau Parau Fafau 6–9, e nehenehe ’outou e ani ia rātou ’ia ’āparau, mai te mea e tano, i tō rātou mau mana’o pae vārua tei fāri’ihia i roto i tā rātou tuatāpapara’a. E aha te mau parau poro’i a te Fatu nō rātou ?

ītona ha’api’ira’a

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 6 ; 8–9

Tē paraparau mai nei te Metua i te Ao ra iā’u nā roto i « te Vārua o te parau mau ».

• E rave rahi ha’api’ira’a tā te Fatu ia tātou nō ni’a i te heheura’a a te ta’ata iho i roto i teie mau tuha’a, ’e e’ita e haere ’ia ha’api’i i te tā’āto’ara’a i roto i te ārea o te hō’ē ha’api’ira’a. E riro rā e mea maita’i ’ia vāhi i te piha e toru a’e pupu ’e e ani i te pupu tāta’itahi ’ia ’imi i te tuha’a 6, 8, ’aore rā 9, nō te ’ite mai i te mau pāhonora’a i te mau uira’a mai teie : Nāhea te Vārua Maita’i ’ia paraparau ia tātou ? Nāhea tātou e ’ite ai e heheura’a a te ta’ata iho teie ? Nāhea tātou e fa’aineine ai ia tātou iho nō te fāri’i i te heheura’a ? I muri iho, e fa’a’ite mai te hō’ē o te pupu tāta’itahi, i tō te piha ha’api’ira’a, te mea i ’itehia mai e rātou. E fa’aitoito ato’a ’outou i te mau melo o te piha ha’api’ira’a ’ia fa’a’ite mai i tō rātou iho mau ’itera’a ma te ’itera’a i te heheura’a o te ta’ata iho. ’Ei hi’ora’a, tē vai ra ānei hō’ē ’ohipa i roto i Te Parau Ha’api’ira’a ’e te mau Parau Fafau 6:22–24 e fa’aha’amana’o nei i te mau ’itera’a tā tātou i fāri’i ?

• E nehenehe te ’āparaura’a nō ni’a i te heheura’a o te ta’ata iho e ha’aparuparu i te mau ta’ata i roto i tā ’outou piha ’o tē pure nei ’ia arata’ihia, ’o tei ’ore rā e mana’o nei ’ua fāri’i ’oia i te reira. E riro te reira i te tauturu ia rātou ’ia ’ite ē, ’ua ’aro ato’a o Oliver Cowdery i te mau mana’o mai te reira te huru ’a mana’o ai ’oia ē e’ita e māra’a iāna ’ia huri i te parau mai tāna i mana’o e mea ’ōhie. E ti’a ia ’outou ’ia ani i te mau melo o te piha ha’api’ira’a ’ia ’imi i te a’o a te Fatu ia Oliver i roto i te tuha’a 9. E aha te parau poro’i i roto i teie tuha’a ’o tē nehenehe e tauturu i te hō’ē ta’ata e mana’o nei ē, ’aita te Fatu e pāhono nei i tā rātou mau pure ? E nehenehe te mau fa’ahitira’a i roto i te « Mau rāve’a tauturu hau atu » e tauturu atoʼa.

  Oliver Cowdery

  Oliver Cowdery, nā Lewis A. Ramsey

Te Parau Ha’api’ira’a ’e te mau Parau Fafau 6–7

« Mai te au i tā ’oe i hina’aro iā’u nei e nā-reira-hia ïa ia ’oe nā ».

• Tē tītau nei te arata’i o teie hepetoma i roto i te Mai pe’e mai—nō te ta’ata hō’ē ’e te ’utuāfare ’ia tāpa’ohia te mau ta’o mai te hia’ai i roto i te mau tuha’a 6–7. Penei a’e e nehenehe te mau melo o te piha e fa’a’ite mai e aha tā rātou i ha’api’i mai nā roto i teie ravera’a, ’aore rā e nehenehe ’outou e rave ’āmui i te ’ohipara’a ’e tō te piha. E aha tā tā tātou mau ’ohipa i te mau mahana ato’a i ha’api’i ia tātou nō ni’a i tō tātou mau hia’ai ? Nāhea te Fatu i te tauturu ia tātou ’ia taui i tō tātou mau hia’ai ?

Te Parau Ha’api’ira’a ’e te mau Parau Fafau 6:29–37

’Ia hi’o tātou i te Fatu, e tauturu mai ’oia ia tātou ’ia upo’oti’a i ni’a i te fea’a ’e te mata’u.

• Nō te aha i te tahi taime e « mata’u [tātou] i te rave i te ’ohipa maita’i » ? (’īrava 33). E riro te mau melo o te piha ha’api’ira’a i te hōro’a mai i te tahi mau tumu, e tae noa atu i te mau mana’o nō roto mai i Te Parau Ha’api’ira’a ’e te mau Parau Fafau 6:29–37 ’o te hōro’a i te itoito ia rātou ’ia rave i te maita’i.

• Nō te ha’amata i te hō’ē mātutura’a nō ni’a e nāhea Iesu Mesia i te tauturu ia tātou « ’eiaha e fea’a, ’eiaha e mata’u » (’īrava 36), e ti’a paha ia ’outou ’ia ani i te mau melo o te piha ha’api’ira’a ’ia pāpa’i i ni’a i te mau ’api parau te tahi mau mea e fea’a ai te ta’ata. (’Ua hōro’a mai ’o Elder Ronald A. Rasband i te tahi mau hi’ora’a i roto i tāna a’ora’a « ’Eiaha e pe’ape’a » [Ensign ’aore rā Liahona, Novema 2018, 18].) ’Ei reira ’outou e tai’o puai ai i te tahi o teie mau papie, ’e ’a mātutu nāhea te Fa’aora ’e tōna mana tāra’ehara e tauturu ai ia tātou noa atu te mata’u.Tē vai ra te tahi mau hi’ora’a i roto i Te Parau Ha’api’ira’a ’e te mau Parau Fafau 6:29–37 (hi’o ato’a 1 Ioane 4:18). E aha te aura’a e « hi’o [i te Mesia] i tō mau mana’o ato’a » ? (’īrava 36). Nāhea teie fa’atumura’a i ni’a i te Fa’aora i te tauturu ia tātou ’ia fa’aruru ana’e tātou i te fea’a ’aore rā, i te mata’u ?

’ītona mau rāve’a tauturu hau atu

Mau rāve’a tauturu hau atu

Te hāro’aro’ara’a e nāhea te Metua i te Ao ra ’ia pāhono i te mau pure.

« ’Ua ha’api’i mai au i roto i tō’u orara’a ē, i te tahi mau taime e’ita vau e fāri’i i te hō’ē pāhonora’a i te hō’ē pure nō te mea ’ua ’ite te Fatu ē, ’aita vau i ineine. ’Ia pahono mai ’oia, e mea pinepine e mea nā roto ïa i ’te tahi vāhi iti i’ōnei, e mai reira ho’i ’e i’ō te tahi vāhi iti’ [2 Nephi 28:30] nō te mea ’o tera ana’e te tā’āto’ara’a o te mea tā’u e nehenehe e fāri’i ’aore rā, tā’u i ineine i te rave » (Robert D. Hales, « Te ti’aturira’a i te Fatu : ’Ia tupu tō ’oe ra hina’aro », Ensign ’aore rā Liahona, Novema 2011, 73).

« E aha tā ’outou e rave ’ia fa’aineine maita’i ana’e ’outou, ’ia pure tu’utu’u ’ore ana’e, ’ia tīa’i i te taime tano nō te fāri’i i te hō’ē pāhonora’a, ’e ’aita ā e pāhonora’a i roto i te ’ā’au ? E hina’aro paha ’outou e ha’amaita’i i te ra’i ’ia tupu ana’e te reira, inaha e tāpa’o te reira nō tōna ti’aturi ia ’outou. ’Ia ora ti’amā ana’e ’outou ’e ’ua tu’ati tā ’outou mā’itira’a i te mau ha’api’ira’a a te Fa’aora, ’e e hina’aro ’outou e ha’a, e haere i mua ma te ti’aturi. … ’Ia ora parau-ti’a ana’e ’outou, ’e ’ia ’ohipa ana’e ma te ti’aturi, e’ita te Atua e vaiiho ia ’outou ’ia haere ātea ma te ’ore e fa’aara manava mai, mai te mea ’ua rave ’outou i te fa’aotira’a hape » (Richard G. Scott, « Fa’a’ohipara’a i te hōro’ara’a fa’ahiahia o te pure », Ensign ’aore rā Liahona, Me 2007, 10).

Ha’amaita’i i tā tātou ha’api’ira’a

’A fa’a’ite i te ti’aturira’a i roto i te mau ’aravihi o te mau pīahi. Tē vai nei paha te tahi ’o rātou tei ’ore e ti’aturi nei i tō rātou iho ’aravihi nō te ha’api’i i te ’evanelia. E ha’amana’o e nāhea ’outou e ha’apāpū ia rātou ē, ʼa tūtava ai rātou i te haʼapiʼi mai nā roto ia rātou iho, e haʼapiʼi te Vārua Maitaʼi ia rātou. (Hiʼo Ha’api’ira’a mai tā te Fa’aora, 29).