’Ua pi’i mai ’oia iā’u ma tō’u i’oa nā Michael Malm

11–17 nō Tēnuare

Te Parau Ha’api’ira’a ’e te mau Parau Fafau 2 ; Iosepha Semita–’Ā’amu 1:27–65

« E riro te mau ’ā’au o te mau tamari’i i te fāriu i tō rātou ra mau metua »

Hou ’outou ’a taiʼo ai i te mau manaʼo i roto i teie arataʼi, ’a tuatāpapa Te Parau Ha’api’ira’a ’e te mau Parau Fafau 2 ’e Iosepha Semita–’Ā’amu 1:27–65, e ’a pāpa’i i tō ’outou manaʼo pae vārua.

Pāpa’i i te mau mana’o e tae mai

Tītau i te mana’o

Nō te fa’aitoito i te mau melo o te piha ha’api’ira’a ’ia fa’a’ite mai i te mau hi’ora’a ’e te mau ’itera’a rau i fāri’ihia e rātou ’a tai’o ai rātou i teie mau pāpa’ira’a mo’a, e nehenehe ’outou e ani ia rātou ’ia fa’a’ite mai i te hō’ē ’īrava tei ha’aferuri hōhonu ia rātou, hau atu i tei matarohia. E aha tei ha’amanava ia rātou nō ni’a i taua ’īrava ra ?

Ha’api’i i te ha’api’ira’a tumu

Iosepha Semita—’Ā’amu 1:27–65

’Ua pi’ihia Iosepha Semita e te Atua nō te rave i tāna ’ohipa.

• E fāna’o ānei tā ’outou piha ha’api’ira’a ’ia ha’amana’o fa’ahou i te ’ā’amu e vai ra i roto i te Iosepha Semita—’Ā’amu 1:27–65? E ani atu i te hō’ē melo o te piha ha’api’ira’a ’ia fa’ati’a poto mai i te reira, ’aore rā e fa’ati’a ’āpipiti te mau melo o te piha ha’api’ira’a i te ’ā’amu i te tahi ’e te tahi, ’aore rā ’ei mau pupu iti. E fa’aitoito ia rātou ’ia tu’u ato’a i te mau tuha’a hu’ahu’a ’o tā rātou e ha’amana’o ra. Nāhea teie ’ā’amu i te ha’apūai i tō tātou ’itera’a pāpu nō te pi’ira’a hanahana o Iosepha Semita ? E aha te mau ha’api’ira’a o teie ’ā’amu tā tātou i ha’api’i mai nō ni’a i te fa’anahora’a ’ohipa a te Atua ?

• ’A feruri i te fa’a’ite’ite i te mau tao’a ’aore rā i te mau hōho’a nō ni’a i te ’ohipa i pi’ihia ai o Iosepha Semita, mai te Buka a Moromona ’aore rā, te hōho’a o te hō’ē hiero. E ’ite mai te mau melo o te piha ha’api’ira’a i te mau ’īrava i roto i te Iosepha Semita—’A’amu 1:33–42 ’o tē ha’api’i ra nō ni’a i teie mau huru o te misiōni a te peropheta. Nāhea te ’ohipa a te Atua nō Iosepha Semita e tu’ati ai i te ’ohipa a te Atua nō tātou ? E aha tā tō tātou mau peropheta ora i ha’api’i mai ia tātou nō ni’a i teie ’ohipa ?

Te Parau Ha’api’ira’a ’e te mau Parau Fafau 2

’Ua haere mai o Eliaha e fa’afāriu i tō tātou ’ā’au i tō tātou mau tupuna.

• E nehenehe tā ’outou piha ha’api’ira’a e fana’o nā roto mai i te hō’ē mātutura’a nō ni’a ’o vai ’o Eliaha, ’e nō ni’a i te mana tā’atira’a o tāna i fa’aho’i fa’ahou mai ? E tai’o te mau melo o te piha ha’api’ira’a nō ni’a ia Eliaha i roto i te Bible Dictionary ’aore rā, te Arata’i nō te mau Pāpa’ira’a mo’a ’aore rā, e hi’o fa’ahou i te ’ā’amu nō roto mai i tōna orara’a (hi’o Te mau Arii 1 17–18). E aha tā teie mau ha’amāramaramara’a i tu’u mai i roto i tō tātou hāro’aro’ara’a nō Te Parau Ha’api’ira’a ’e te mau Parau Fafau 2 ? E nehenehe ’outou e paraparau nō ni’a e aha te aura’a ’ia tītiro i te hō’ē tao’a. Penei a’e e tauturu te tahi mau tao’a, mai te punu mā’a, te hō’ē pute urina e hutira’a tōna, ’aore rā, te hō’ē tītiro e ha’amana i te hō’ē parau. Nāhea teie mau tao’a e tauturu ai ia tātou ’ia hāro’aro’a e aha te aura’a nō te tā’ati i te mau ’utuāfare ia hō’ē ? Nāhea teie mana e tauturu ai ’ia fa’atupu i te ’ōpuara’a nō te poietera’a o te fenua nei ? (hi’o Te Parau Ha’api’ira’a ’e te mau Parau Fafau 138:47–48 ’e te fa’ahitira’a parau a te peresideni Russell M. Nelson i roto i te « Mau rāve’a tauturu hau atu »). Nō te tauturu i te mau melo o te piha ha’api’ira’a ’ia ’ite e mea nāhea te tohura’a i roto i Te Parau Ha’api’ira’a ’e te mau Parau Fafau 2 i te tupura’a, e nehenehe ’outou e mātutu i Te Parau Ha’api’ira’a ’e te mau Parau Fafau 110:13–16.

• E riro paha te ’apora’a mai nō ni’a i « te mau fa’aotira’a i fafauhia i te mau metua » (Te Parau Ha’api’ira’a ’e te mau Parau Fafau 2:2) e tauturu i te feiā ’o tā ’outou e ha’api’i ra ’ia hāro’aro’a maita’i a’e i te mana o te autahu’ara’a i tonohia mai ai o Eliaha ’ia fa’aho’i mai. ’O vai « te mau metua » ? (hi’o Te Parau Ha’api’ira’a ’e te mau Parau Fafau 27:9–10). E aha te mau fafaura’a tei ravehia e te Fatu ia Aberahama, Isaaka ’e Iakoba? (hi’o Genese17:1–8 ; 22:16–18 ; 26:1–5, 24 ; 28:11–15 ; Aberahama 2:8–11). E aha te aura’a ’ia « tanu » i teie mau fafaura’a i roto i tō tātou ’ā’au ? Nāhea te ravera’a i te reira i te tauturu ia tātou ’ia fāriu i tō tātou ’ā’au i tō tātou mau tupuna ?

Hiero nō Palmyra (New York)

• Nō te fa’auru i te mau melo o te piha ha’api’ira’a ’ia fāriu i tō rātou ’ā’au i tō rātou mau tupuna, e nehenehe e ani i te tahi mau melo ’ia arata’i i te hō’ē mātutura’a nō ni’a i te tumu parau. ’A feruri i te fa’aō ato’a mai i te tauturu ’ohipa hiero ’e ’ā’amu ’utuāfare o te pāroita. E nehenehe ’outou e ha’amata nā roto i te tai’ora’a i Te Parau Ha’api’ira’a ’e te mau Parau Fafau 2:2–3 ’e te anira’a i te feiā e mātutu ’ia fa’a’ite mai i te mau ’itera’a i te fāriura’a tō rātou ’ā’au i tō rātou mau tupuna. E aha tei tupu i roto i tō rātou orara’a tei tauturu ia rātou ’ia hina’aro ’ia ha’api’i mai nō ni’a i tō rātou ’ā’amu ’utuāfare ? E aha te mau mana’o tā rātou e nehenehe e hōro’a nō te tauturu i te tahi atu mau melo o te piha ha’api’ira’a ’ia fa’aō mai i roto i te tāvinira’a o te ’ā’amu ’utuāfare ’e te hiero ? E nehenehe ato’a te fa’ahitira’a parau a te peresideni Dallin H. Oaks i roto i te « Mau rāve’a tauturu hau atu » e tauturu. E nehenehe ato’a ’outou e arata’i i te mau melo i te FamilySearch.org nō te mau mana’o.

Mau rāve’a tauturu hau atu

Te ’ōpuara’a o te poietera’a.

’Ua ha’api’i peresideni Russell M. Nelson :

« Te ora mure ore, maoti te Tara’ehara, ’o te ’ōpuara’a hope roa ïa o te Poietera’a. Nō te fa’ahiti i teie parau i roto i tōna pae ’ino, ’ia ’ore noa atu te mau ’utuāfare e tā’atihia i roto i te mau hiero mo’a, e riro te ao tā’āto’a nei i te ha’amou ta’ato’ahia.

« Te mau ’ōpuara’a o te Poietera’a, te Hi’ara’a ’e te Tara’ehara, ’ua niu tā’āto’ahia i ni’a i te ’ohipa mo’a e ravehia nei i roto i te mau hiero a Te ’Ēkālesia a Iesu Mesia i te Feiā Mo’a i te mau Mahana Hope’a Nei » (« The Atonement », Ensign, Novema 1996, 35). Hi’o ato’a Mose 1:39.

E nehenehe te mau ta’ata ato’a e rave i te tahi ’ohipa.

’Ua ha’api’i te peresideni Dallin H. Oaks : « I roto i te ’ohipa nō te fa’aorara’a i tei pohe, e rave rahi te mau ’ohipa e ti’a ’ia ravehia… Tā tātou ha’ara’a, e ’ere i te fa’ahepora’a i te mau ta’ata ’ia rave i te mau mea ato’a, ’o tē fa’aitoitora’a rā i te mau ta’ata ato’a ’ia rave i te hō’ē mea » (« Family History : ‘In Wisdom and in Order,’ » Ensign, Tiunu 1989, 6).

Ha’amaita’ira’a i tā tātou ha’api’ira’a

E fa’aō mai i te mau pīahi ’aita e tuatāpapa nei i te mau pāpaʼiraʼa moʼa i te fare. ’Ia pāpu ia ’outou ē, e fa’aō mai tō te piha ha’api’ira’a ato’a i roto i te mātutura’a ma te au maita’i, e tae noa atu te feiā tei ’ore i tai’o i te fare.