Te tau ’auhune i Farāni, nā James Taylor Harwood

18–24 nō Tēnuare

Te Parau Ha’api’ira’a ʼe te mau Parau Fafau 3–5

« E haere noa tā’u ’ohipa i mua »

E tauturu te tuatāpapara’a i Te Parau Ha’api’ira’a ʼe te mau Parau Fafau 3–5 ia ’outou, hou ’outou ’a hi’o fa’ahou ai i te mau mana’o i roto i teie arata’i, nō te fāri’i i te arata’ira’a a te Vārua Maita’i. E tauturu te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare ia ’outou ’ia hāro’aro’a i te ’ā’amu tei arata’i i te mau heheura’a e vai ra i roto i teie mau tuha’a.

Pāpa’i i te mau mana’o e tae mai

Tītau i te mana’o

’A hōro’a i te mau melo o te piha te tahi tau minuti nō te hi’o fa’ahou i te pāpa’ira’a mo’a tā rātou i tai’o i te fare ’e ’ia ’imi mai i te hō’ē tuha’a ’īrava tā rātou i ’ite e mea faufa’a. I muri iho, e ani ia rātou ’ia fa’a’ite mai i te mea o tā rātou i ha’api’i mai i te tahi melo o te piha.

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 3:1–15

’Ia hau tō tātou ti’aturi i te Atua i te taiā i te ta’ata.

• Mai ia Iosepha Semita, ’ua fa’aruru a’ena tātou pā’āto’a i te fa’ahepora’a a te tahi mau ta’ata ’ia rāve i te mea o tā tātou i ’ite e mea hape. E aha te mau parau mau o tā tātou i ’apo mai nā roto mai i Te Parau Ha’api’ira’a ’e te mau Parau Fafau 3:1–15 ’o tē tauturu ia tātou ’ia vai ha’apa’o noa i te Atua i roto i te mau huru orara’a ato’a ?

• ’Ua ti’a ia Iosepha Semita ’ia ’avauhia, nō tōna māta’ura’a i te ta’ata hau atu i te Atua, e ti’a ato’a rā iāna iho ’ia fa’aitoitohia. E ani i te mau melo o te piha ’ia hi’o i roto i te tuha’a 3 e mea nāhea te Fatu i te ’avaura’a ’e i te fa’aitoitora’a ia Iosepha. ’Ei hi’ora’a, e tāpura rātou i ni’a i te tāpura ’ere’ere te mau pereota nō roto mai i te mau ’īrava 1–15 tei roto te mau ’āvaura’a a te Fatu ’e te tahi atu mau pereota tei roto tāna fa’aitoitora’a ’ia tātarahapa ’e ’ia vai ha’apa’o noa. E aha tā te ’itera’a o Iosepha e ha’api’i nei ia tātou nō ni’a e mea nāhea te Fa’aora i te tauturu ia tātou ’ia upo’oti’a i ni’a i tō tātou mau hape ?

Te Parau Ha’api’ira’a ’e te mau Parau Fafau 4

Tē ani nei te Fatu ia tātou ’ia tāvini iāna ma tō tātou ’ā’au ato’a.

• Te mau huru maita’i e fa’ata’a ra i te mau tāvini a te Fatu tei tāpurahia i roto i Te Parau Ha’api’ira’a ’e te mau Parau Fafau 4:5–6 e mau huru maita’i ato’a ïa nō Iesu Mesia. Nō te tauturu i te mau melo o te piha ’ia ’apo rahi mai, e ani ’outou ia rātou ’ia mā’iti i te hō’ē o te mau huru maita’i ’e ’ia ’imi i te tātarara’a ’aore rā i te tahi atu pāpa’ira’a mo’a ’o tē tauturu ia rātou ’ia hāro’aro’a maita’i a’e i te huru maita’i (hi’o, ’ei hi’ora’a , te fa’ahitira’a a te tuahine Elaine S. Dalton i roto i te « Mau rāve’a tauturu hau atu »). E ani ’outou i te tahi mau pīahi ’ia fa’a’ite mai i te mea tā rātou i ’ite mai. E fa’a’ite ato’a mai rātou i te tumu rātou i mā’iti ai teie huru maita’i ’ia riro ’ei tītaura’a nō te tāvinira’a i roto i te bāsileia o te Atua. Nāhea tātou ’ia fa’ananea i teie mau huru maita’i ? (hi’o ’īrava 7).

• Te Parau Ha’api’ira’a ’e te mau Parau Fafau 4 e parau teie nō Iosepha Semita metua, ’o tei hina’aro ’ia ’ite nāhea ’oia ’ia tauturu i te ’ohipa a te Fatu. E tauturu ato’a teie tuha’a ia tātou e hina’aro nei e tāvini i te Fatu. Teie te hō’ē rāve’a nō te tuatāpapa i teie tuha’a : E ha’a te mau melo o te piha ’ei mau pupu na’ina’i nō te pāpa’i i te fa’ata’ara’a ’ohipa nō te mau tāvini a te Atua, ma te fa’a’ohipa i te tuha’a 4 ’ei hō’ē arata’i. Nāhea teie mau huru maita’i i ta’a ’ē ai i te tahi atu mau fa’ata’ara’a ’ohipa ? Nō te aha e mea faufa’a teie mau huru maita’i i roto i te ravera’a i te ’ohipa a te Atua ? E tauturu te fa’ahitira’a parau a Elder David A. Bednar i roto i te « Mau rāve’a tauturu hau atu » i mau melo o te piha ha’api’ira’a ’ia māramarama i te faufa’a rahi nō te ha’amaita’ira’a i teie mau huru maita’i.

Te Parau Ha’api’ira’a ’e te mau Parau Fafau 5

E tae mai te hō’ē ’itera’a pāpū nō te parau mau i te feiā ’ā’au ha’eha’a ’e te fa’aro’o.

• Mai te mea e piahia te mau ’api ’auro ’ia ’ite tō te ao nei, e ti’aturi ānei te mau ta’ata ato’a ē, e parau mau te Buka a Moromona ? Nō te aha, ’aore rā, nō te aha ’aita ? (hi’o Te Parau Ha’api’ira’a ’e te mau Parau Fafau 5:7). Penei a’e e nehenehe te mau melo o te piha e ’imi i roto i te tuha’a 5 i te mau mana’o ’o tē nehenehe e tauturu ia rātou ia pāhono i te ta’ata e ani mai i te ha’apāpūra’a ē, e parau mau te Buka a Moromona. E aha tā te Fatu i ha’api’i ia Iosepha Semita ’e ia Martin Harris ’o tē nehenehe e tauturu ia tātou ’ia roa’a i tō tātou iho ’itera’a pāpu nō te mau parau mau o te ’evanelia ?

  

  Martin Harris, nā Lewis A. Ramsey

Mau rāve’a tauturu hau atu

Vīretu ’o te pūai ïa.

’Ua hōro’a te tuahine Elaine S. Dalton i teie tātarara’a o te vīretu : « te vīretu, e ta’o teie e fa’aro’o varavarahia i roto i te tōtaiete o teie tau, tera rā, tōna a’a ta’o nō roto mai i te reo Latino virtus te aura’a, ’o te pūai ïa. Te mau nei te mau vahine ’e te mau tāne vīretu i te hō’ē tura hau ’e te pūai nō roto roa mai. E feiā ti’aturi rātou, nō tō rātou ti’amā ’ia fari’i ’e ’ia arata’ihia e te Vārua Maita’i » (« E ho’i fa’ahou ā i te peu maita’i », Ensign ’aore rā Liahona, Novema 2008, 79).

Te rirora’a ’ei misiōnare.

’Ua parau o Elder David A. Bednar : « Te fa’anahora’a nō te rirora’a ’ei misiōnare, ’aita ïa e tītau nei i te hō’ē tamāroa ’ia ’ō’omo i te ’ahu tāne uouo ’e te tā’amu ’arapo’a [e ’aore rā i te hō’ē tamāhine ’ia ’ō’omo i te ’ahu topa] i te fare ha’api’ira’a i te mau mahana ato’a ’aore rā, ’ia pe’e i te mau arata’ira’a misiōnare ’a haere ai e ta’oto ’e ’a ara ai […] Tera rā, e nehenehe ’outou e fa’a’ī i tō ’outou hia’ai ’ia tāvini i te Atua [hi’o Te Parau Ha’api’ira’a ’e te mau Parau Fafau 4:3], ’e e nehenehe ’outou e ha’amata i te feruri ’ia au i te ferurira’a o te mau misiōnare, ’ia tai’o ’ia au i te tai’ora’a a te mau misiōnare, ’ia pure ’ia au i te pure a te mau misiōnare, ’e ’ia manava ’ia au i te manava o te mau misiōnare. E nehenehe ’outou e ’ape i te mau ’umera’a a tō te ao nei, ’o tē fa’ahaere ’ē i te Vārua Maita’i, ’e e nehenehe tō ’outou ti’aturira’a e mara’a nā roto i te ’itera’a ’e te pāhonora’a i te muhumuhu a te Vārua » (« Te rirora’a ’ei misiōnare », Ensign ’aore rā Liahona, Novema 2005, 45–46).

Ha’amaita’ira’a i tā tātou ha’api’ira’a

’A ui i te mau uira’a e fa’aitoito i te ’āparaura’a poupouhia. Nā te mau uira’a tei hau i te hō’ē pāhonora’a tano e tūra’i i te mau pīahi ’ia pāhono ’ia au i tō rātou mau mana’o, mau manava, ’e te mau ’ohipa i tupu i roto i tō rātou orara’a. ’Ei hi’ora’a, e tano ’outou e ui atu : « E mea nāhea ’outou e ’ite ai e aha te taime te Atua e paraparau mai ai ia ’outou ? » (Hi’o Ha’api’ira’a mai tā te Fa’aora, 33