29 nō Māti–4 nō ʼĒperēra

Pāsa

« ’O vau nei ho’i ’oia ’o tē ora nei, ’o vau nei ’oia ’o tei taparahihia »

’Aore roa e ’ohipa faufa’a rahi nō tātou ’ia hāro’aro’a hau atu i te tāra’ehara a Iesu Mesia. E feruri i te mau ta’ata e haere mai nei i roto i tā ’outou piha ha’api’ira’a; e aha te tauturu ia rātou ’ia fa’ahōhonu i tō rātou fa’aro’o ia Iesu Mesia ?

Pāpa’i i te mau mana’o e tae mai

Tītau i te mana’o

Nō te mea ho’i ē, ’ua tuatāpapa tā ’outou piha ha’api’ira’a i te Parau Ha’api’ira’a ’e te mau Parau Fafau i teie matahiti, ’ua ’itehia paha ia rātou te mau ’īrava faufa’a nō ni’a i te Fa’aora. ’A ha’amata i te ha’api’ira’a nā roto i te hōro’ara’a ia rātou i te taime nō te fa’a’ite mai i te reira mau ’īrava. Nāhea tā tātou tuatāpapara’a i te Parau Ha’api’ira’a ’e te mau Parau Fafau e tae mai ai i teie taime i te fa’ahōhonura’a i tō tātou fa’aro’o ia Iesu Mesia ?

Ha’api’i i te ha’api’ira’a tumu

’Ua fa’atupu Iesu Mesia i te « tāra’ehara ti’a mau ».

• Nō te faufa’a rahi o te parau ha’api’ira’a nō te tāra’ehara o Iesu Mesia, ’a feruri i te rave i te taime e rava’i nō te ha’apāpū ē, tē hāro’aro’a ra te piha ha’api’ira’a i te reira. Nō te rave i te reira, e nehenehe ’outou e pāpa’i i ni’a i te tāpura ’ere’ere i te mau uira’a mai teie : E aha te tāra’ehara o Iesu Mesia ? E aha tā te reira e fa’atupu i ni’a i tō’u orara’a i te mau mahana ato’a ? E aha tā te reira e fa’atupu i ni’a i tō’u orara’a mure ’ore ? Nāhea vau i te fāri’i i te mana fa’aora o te Fa’aora i roto i tō’u orara’a ? E hōro’a i te mau melo o te piha ha’api’ira’a i te tahi tau minuti nō te feruri i teie mau uira’a ’e nō te ’imi i te mau pāpa’ira’a mo’a ’o tē tauturu i te pāhonora’a i te reira. E nehenehe te mau melo o te piha ha’api’ira’a e pāpa’i i tā rātou mau fa’ahorora’a i ni’a i te tāpura ’ere’ere, ’e e nehenehe ’outou e paraparau i te tahi o te reira. Teie te tahi mau hi’ora’a : Luka 22:39–44 ; 1 Ioane 1:7 ; 2 Nephi 2:6–9 ; Mosia 3:5–13, 17–18 ; Alama 7:11–14 ; Moroni 10:32–33 ; Te Parau Ha’api’ira’a ʼe te mau Parau Fafau 19:16–19 ; 45: 3–5.

• E ti’a ia ’outou e ani i te mau melo o te piha ha’api’ira’a ’ia tai’o i te mau parau iho a te Fa’aora nō ni’a i tōna mamae i roto i Te Parau Ha’api’ira’a ʼe te mau Parau Fafau 19:16–19. Nāhea teie mau ’īrava i te fa’arahi i tō tātou fa’ahiahia i te tusia a Iesu Mesia ? Te tahi atu mau video nō te Pāsa tā ’outou e nehenehe e fa’a’ite, ’ua tāpurahia te reira i roto i « Mau rāve’a tauturu hau atu ».

  

  te Fatu nō te pure, nā Yongsung Kim

Parau Ha’api’ira’a ʼe te mau Parau Fafau 76:11–14, 20–24 ; 110:1–10

’Ua fa’a’ite pāpū te peropheta Iosepha Semita ē, tē ora nei Iesu Mesia.

• ’Ua ’ite Iosepha Semita i te Fa’aora tei ti’afa’ahou ’e ’ua fa’a’ite i te hō’ē ’itera’a pāpū pūai ē, tē ora nei Iesu Mesia. Nō te tauturu i te mau melo o te piha ha’api’ira’a ’ia tuatāpapa i te ’itera’a pāpū o Iosepha Semita, e nehenehe ’outou e vāhi ia rātou nā roto e piti pupu, ’e e fa’aue i te pupu tāta’itahi ’ia tai’o i te Te Parau Ha’api’ira’a ʼe te mau Parau Fafau 76:11–14, 20–24 ’aore rā, 110:1–10. ’A ani i te melo tāta’itahi o te piha ha’api’ira’a ’ia ’imi hō’ē a’e ta’o i roto i teie mau ’īrava ’o tē fa’ata’a ra i te Fa’aora. E nehenehe te mau melo o te piha ha’api’ira’a, te tahi i muri mai i te tahi, e pāpa’i i ni’a i te tāpura ’ere’ere i te mau parau tei ’itehia mai ia rātou, ’e e nehenehe ’outou e fa’a’ohipa i teie mau ta’o nō te arata’i i te hō’ē ’āparaura’a nō ni’a i te mau maita’i ’e te mana o te Fa’aora. Nāhea te ’itera’a pāpū o Iosepha Semita i te ha’apūai i tō tātou fa’aro’o i roto i te atuara’a ’e te misiōni a Iesu Mesia ?

• ’Ua fa’atū’ati paha te tahi mau melo o te piha ha’api’ira’a i te mau ha’api’ira’a i roto i Te Parau Ha’api’ira’a ’e te mau Parau Fafau ’e te mau parau ’e te mau parau tumu i roto i te hīmene « ’Ua ’ite au tē ora nei tō’u Fatu » (Te mau hīmene, no.69 ; hi’o te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare). E hina’aro paha rātou e fa’a’ite mai i te mau mea i ’itehia mai e rātou. E nehenehe ato’a ’outou e tai’o ’aore rā, e hīmene i teie hīmene ’e te piha ha’api’ira’a ’e ’ia ’imi i te mau tū’atira’a i ni’a i teie mau ’īrava : Te Parau Ha’api’ira’a ʼe te mau Parau Fafau 6:34 ; 45:3–5 ; 84:77 ; 98:18 ; 138:23. Nāhea tātou i te ’itera’a ē, tē ora nei tō tātou Fa’aora ?

Te Parau Ha’api’ira’a ʼe te mau Parau Fafau 29:26–27 ; 42:45–46 ; 63:49 ; 88:14–17, 27–31 ; 93:33–34

Nō Iesu Mesia ho’i tātou e ti’afa’ahou ai.

• Nō te tauturu i te mau melo o te piha ha’api’ira’a ’ia ’āparau e aha tā Te Parau Ha’api’ira’a ’e te mau Parau Fafau e ha’api’i nei nō ni’a i te ti’afa’ahoura’a, e nehenehe ’outou e ani ia rātou ’ia feruri ē, tē ani nei te hō’ē hoa ’aore rā, te hō’ē melo ’utuāfare e aha te aura’a ’ia ti’afa’ahou. Nāhea e ti’a ai ia tātou ’ia tauturu i te reira ta’ata ’ia hāro’aro’a e aha te ti’afa’ahoura’a ? ’A fa’aitoito i te mau melo o te piha ha’api’ira’a ’ia ’imi i Te Parau Ha’api’ira’a ʼe te mau Parau Fafau 88:14–17, 27–31 nō te hō’ē mea ’o tē nehenehe e tauturu. Teie te tahi atu mau fa’ahorora’a pāpa’ira’a mo’a Alama 11:40–45 ’e Alama 40:21–23. E aha te ti’a ia tātou ’ia fa’a’ite nō te tauturu i tō tātou hoa ’aore rā, i te melo o te ’utuāfare ’ia fāri’i i te ’oa’oa ’e te ti’aturi ’o tē tae mai nā roto i te ha’api’ira’a tumu o te ti’afa’ahoura’a ?

• Nāhea e ti’a ai ia ’outou ’ia tauturu i te mau melo o te piha ha’api’ira’a ’ia māta’ita’i ma te fa’ahiahia i te hōro’a o te ti’afa’ahoura’a o te Fa’aora ? E nehenehe paha ’outou e pāpa’i i ni’a i te tāpura ’ere’ere Maoti Iesu Mesia… ’e e ani i te mau melo o te piha ha’api’ira’a ’ia hi’o i roto i te mau ’īrava i muri nei i te mau ta’o ’o tē nehenehe e fa’ahope i teie pereota : Te Parau Ha’api’ira’a ʼe te mau Parau Fafau 29:26–27 ; 42:45–46 ; 63:49 ; 93:33–34. E aha tā te mau parau mau i roto i teie mau ’īrava e fa’atupu i ni’a i te huru o tō tātou hi’ora’a i te pohe ? E aha tā te reira e fa’atupu i ni’a i tō tātou orara’a i te mau mahana ato’a ?

Mau rāve’a tauturu hau atu

Ha’amaita’ira’a i tā tātou ha’api’ira’a

E tauturu i te mau melo o te piha ha’api’ira’a ’ia ’imi i roto i te mau pāpa’ira’a mo’a. « E ui i te mau uira’a ’o tē tītau i te feiā ’apo mai ’ia ’imi i te mau pāhonora’a i roto i te mau pāpa’ira’a mo’a. Tauturu ia rātou ’ia ’ite ē, noa atu ē, e rave rahi matahiti i teienei te pāpa’ira’ahia te mau pāpa’ira’a mo’a, tei roto i te reira te mau pāhonora’a i te mau uira’a ’e te mau fifi tā tātou pā’āto’a e fa’aruru nei » (Ha’api’ira’a mai tā te Fa’aora, 30).