Te tere o te feiā mo’a i Kirtland, nā Sam Lawlor

12–18 nō ’Ēperēra

Te Parau Ha’api’ira’a ’e te mau Parau Fafau 37–40

« E mai te mea ’aita ’outou e riro ’ei hō’ē ra, e ’ere ho’i ’outou nō’u nei »

Hou ’a fa’aineine ai i te mea tā ’outou e rave i roto i te piha ha’api’ira’a, ’a tuatāpapa ma te pure i Te Parau Ha’api’ira’a ’e te mau Parau Fafau 37–40. E mea pāpū a’e ’outou nō te fāri’i i te arata’ira’a pae vārua i roto i tā ’outou fa’aineinera’a nō te ha’api’i, mai te mea tē vai ra, nā mua roa, tō ’outou iho ’itera’a e tano i teie mau pāpa’ira’a mo’a.

Pāpa’i i te mau mana’o e tae mai

Tītau i te mana’o

’A feruri i te pāpa’i i ni’a i te tāpura ’ere’ere, ’A tai’o ai au i Te Parau Ha’api’ira’a ’e te mau Parau Fafau 37–40, ’Ua ’ite tō’u ’ā’au ē, tē parau nei te Fatu iā’u . E fa’a’ite mai te mau melo o te piha ha’api’ira’a e nāhea rātou ’ia fa’ahope i te pereota. Fa’aitoito ia rātou ’ia fa’a’ite mai i te mau ’īrava nā roto mai i tā rātou tai’ora’a ’ei tuha’a nō tā rātou pāhonora’a.

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 37–38

E ha’aputuputu te Atua ia tātou nō te ha’amaita’i ia tātou.

• I te tahi mau taime e mea ’ōhie ’ia ha’api’i mai, nā roto mai i te mau heheura’a i roto i Te Parau Ha’api’ira’a ’e te mau Parau Fafau, ’ia feruri ana’e tātou ia tātou iho i te vāhi o te mau ta’ata nō rātou te tumu i hōro’ahia ai teie parau. Nō te tauturu i te mau melo o te piha ha’api’ira’a ’ia rave i te reira ma te mau tuha’a 37–38, e ani ’outou ia rātou ’ia feruri, mai tē huru rā ē, tē ora nei rātou i Fayette, New York, i te matahiti 1831. E fa’ahua te hō’ē melo o te piha ha’api’ira’a ’o ’oia o Iosepha Semita,’e e tai’o i te tuha’a 37 i tō te piha. E aha tō tātou huru i mua i teie fa’auera’a ? E feruri paha te mau pīahi, mai te huru ra ē, tē vai ra tō rātou hō’ē hoa ’o tē ’ore e hina’aro nei e ha’aputuputu i Ohio ; e ’imi mai rātou i roto i te tuha’a 38 i te mau parau tumu ’o tē nehenehe e fa’aitoito i tō rātou hoa ’ia ha’apa’o i te fa’auera’a ’ia ha’aputuputu mai. (Mai te mea e tītauhia, e arata’i ihoa rā ’outou ia rātou i te mau ’īrava 1–4, 11–12, 17–22, ’e 27–33). E hina’aro ato’a paha te mau melo o te piha e fa’a’ite mai e mea nāhea te mau parau tumu mai teie te huru i te tauturu ia rātou ’ia ha’apa’o i te hō’ē fa’auera’a tei riro ’ei mea fifi.

• ’Aita te feiā mo’a i te mau mahana hope’a nei e fa’aue-fa’ahou-hia ’ia tere e ha’aputuputu i te vāhi hō’ē, e tāmau rā tātou i te ha’aputuputu ’ei mau ’utuāfare, ’ei mau pāroita, ’e ’ei mau titi. Nō te ’āparau e nāhea teie mau putuputura’a i te ha’amaita’i ia tātou i teie mahana, e vāhi outou i te piha nā roto e piti pupu. E ani i te hō’ē pupu ’ia ’imi Te Parau Ha’api’ira’a ’e te mau Parau Fafau 38:31–33 e ’ia ’imi i te mau ha’amaita’ira’a e roa’a nā roto i te ha’aputuputura’a i te mau ’utuāfare, e ani i te tahi atu pupu ’ia ’imi i roto i teie ā mau ’īrava i te mau ha’amaita’ira’a e roa’a nā roto i te ha’aputuputura’a ’ei mau pāroita, ’e ’ei mau titi. I muri iho, e fa’a’ite mai rātou i tō rātou mau mana’o i mua i te piha. Nāhea tātou e ha’amaita’ihia ai ’ia ha’aputuputu ’āmui ’ei hō’ē piha o te Ha’api’ira’a Sabati ?

Te Parau Ha’api’ira’a ’e te mau Parau Fafau 38:24–27

’Ia hō’ē te nuna’a o te Atua.

• ’Ua haere mai te feiā mo’a tei ha’aputuputu i Ohio nā roto mai i te mau huru orara’a rau ato’a, ’ua fa’aue rā te Fatu ia rātou ’ia upo’oti’a i ni’a i tō rātou mau ta’a-’ē-ra’a ’e « ’ia riro ’ei hō’ē » (’īrava 27). Nō te aha tātou e hahi ’ē ai i te tahi taime i te hi’ora’a i te tahi atu mau nūna’a ’ei feiā ’aifāito ? E fa’aitoito i te mau melo o te piha ’ia feruri e nāhea rātou ’ia fa’ariro ia vetahi ’ē a tai’o ai rātou i Te Parau Ha’api’ira’a ’e te mau Parau Fafau 38:24–27. E aha te aura’a ’ia fa’afaufa’a i tō tātou mau tae’ae ’e mau tuahine mai ia tātou iho ? Nō te aha e’ita tātou e riro ’ei nūna’a mau nō te Atua, mai te mea ’aita tātou e riro ’ei hō’ē ?

• E nehenehe te tai’ora’a i Te Parau Ha’api’ira’a ’e te mau Parau Fafau 38:24–27 e arata’i i te hō’ē ’āparaura’a nō ni’a i te hō’ēra’a i roto i tō tātou mau aura’a—’ei mau melo nō te pāroita, te mau ’utuāfare, ’e tē vai atu ā. ’Ei hi’ora’a, e fa’a’ite mai te mau melo o te piha ha’api’ira’a i te mau fa’ahitira’a ’aore rā, te mau mana’o ’o tē tauturu ia rātou ’ia hāro’aro’a maita’i a’e i te mau parau tumu i roto i te mau ’īrava 24–27. E feruri ato’a rātou ’e e fa’a’ite mai i tō rātou māna’o nō ni’a i te hō’ē uira’a mai teie « E aha tā’u e rave nō te tauturu i tā tātou pāroita ’ia ’ite i te hō’ēra’a rahi a’e ? »

Te Parau Ha’api’ira’a ’e te mau Parau Fafau 38:39 ; 39–40

Tē hina’aro nei te Metua e hōro’a mai nō tātou te mau tao’a rahi o te ao mure ’ore.

• E tauturu te hāmanira’a i te hō’ē tāpura i te mau melo o te piha ha’api’ira’a ’ia ’āparau mai i Te Parau Ha’api’ira’a ’e te mau Parau Fafau 38:39. I roto i te hō’ē pae, e tāpura mai te mau melo o te piha ha’api’ira’a « te mau tao’a rahi o te ao nei », ’aore rā, te mau mea e ha’afaufa’ahia nei i’ōnei, ’o tē ’ore rā e ora maoro i te ao a muri a’e. I te tahi pae, e tāpura rātou « te mau tao’a rahi o te ao mure ’ore », ’aore rā, te mau mea tā te Atua e ha’afaufa’a nei ’e ’o tē ti’a i tōna vaira’a e a muri noa atu. E aha te mau ’itera’a tei ha’api’i ia tātou ē, e mea faufa’a a’e te mau tao’a rahi o te ao mure ’ore, i te mau tao’a rahi o te ao nei ?

• ’O James Covel, mai te rahira’a o tātou, tē hia’ai nei i te mau mea ti’a. ’Āre’a ra tōna paruparu ’ia ha’apa’o i te arata’ira’a a te Atua, ’ua riro ïa ’ei fa’aarara’a nō tātou pā’āto’a. Nō te tauturu i te mau melo o te piha ha’api’ira’a ’ia ’apo mai i te ’itera’a o Covel, e tītau ’outou i te tahi o rātou ’ia ’imi i roto i te mau tuha’a 39 te mau mea tā te Fatu i ani iāna ’ia rave. E ’imi te tahi o rātou i te mau ha’amaita’ira’a i fafauhia nōna mai te mea e ha’apa’o ’oia. E ’imi ato’a rātou i te tuha’a 40 nō te ’ite mai nō te aha James Covel i ’ore ai i fāri’i i teie mau ha’amaita’ira’a. Nāhea tōna ’itera’a e tano ai nō tātou ? E aha « te mau pe’ape’a o teie nei ao » ’o tē ’ōpani nei ia tātou i te tahi taime ’ia fāri’i i te parau a te Atua « ma te ’oa’oa »? (Te Parau Ha’api’ira’a ’e te mau Parau Fafau 40:2).

Ha’amaita’i i tā tātou ha’api’ira’a

’Eiaha e tāmata i te ha’api’i i te tā’āto’ara’a o te ha’api’ira’a « E rave rahi te mau mea e ’āparau i roto i te ha’api’ira’a tāta’itahi, e’ita rā e tītauhia ’ia ha’api’i i te tā’āto’ara’a i roto i te ārea o te hō’ē ha’api’ira’a nō te ha’aputapū i te ’ā’au o te ta’ata—te rahira’a o te taime, e nava’i noa hō’ē ’aore rā e piti tumu parau rahi ». (Ha’api’ira’a mai tā te Fa’aora, 7). E tauturu te Vārua Maita’i, te mau fa’ata’ara’a a te mau melo o te piha ha’api’ira’a, ’e te mau mana’o i roto i teie arata’i, ia ’outou ’ia ’ite i hea e tūtonu ai.