Iesu Mesia

19–25 nō ’Ēperēra

Te Parau Ha’api’ira’a ʼe te mau Parau Fafau 41–44

« Tā’u nei ture nō te fa’atere i tā’u nei ’Ēkālesia »

E’ita e haere ia ’outou ’ia ’āparau ’ei piha ha’api’ira’a te mau parau tumu ato’a i ha’api’ihia i roto i Te Parau Ha’api’ira’a ʼe te mau Parau Fafau 41–44. ’A ’imi i te fa’aurura’a nō te tauturu ia ’outou ’ia titi’a i te mau parau tumu e tano roa a’e nō tā ’outou piha ha’api’ira’a.

Pāpa’i i te mau mana’o e tae mai

ītona fa’a’itera’a

Tītau i te mana’o

I te nene’ira’ahia te mau heheura’a i roto i te tuha’a 42, ’ua pāpa’i Iosepha Semita ē, ’ua fāri’i te feiā mo’a « i te reira ma te ’oa’oa » (« Rata ia Martin Harris », 22 nō Fepuare 1831, josephsmithpapers.org). E fa’aitoito i te mau melo o te piha ha’api’ira’a ’ia fa’a’ite mai i te mau mea nō roto mai i tā rātou iho tuatāpapara’a ’aore rā a te ’utuāfare nō teie hepetoma ’o tā rātou i fāri’i ma te ’oa’oa.

ītona ha’api’ira’a

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 41–42

E fa’atere te mau ture a te Atua i tāna ’Ēkālesia, ’e e nehenehe e fa’atere i tō tātou orara’a.

• I roto i Te Parau Ha’api’ira’a ’e te mau Parau Fafau 41, ’ua tauturu te Fatu i te feiā mo’a ’ia fa’aineine nō te fāri’i i tāna ture ’o tāna i heheu mai tau mahana ri’i noa i muri mai (hi’o te tuha’a 42). Nāhea te heheura’a i roto i te tuha’a 41 i tauturu ai i te feiā mo’a ’ia fāri’i i te ture a te Atua ? Nō te tauturu i te mau melo o te piha ha’api’ira’a ’ia pāhono i teie uira’a, e ani ’outou ia rātou ’ia tai’o i Te Parau Ha’api’ira’a ’e te mau Parau Fafau 41:1–6 ’e ’ia ’ite mai i te mau parau tumu ’o tē tauturu ia tātou ’ia fari’i i te ture a te Atua. Nāhea tātou ’ia fa’a’ohipa i teie mau parau tumu ’ia fāna’o ana’e tātou i te mau rāve’a nō te fāri’i i te arata’ira’a nō ’ō mai i te Fatu ra ?

• Tē ani nei te arata’i nō teie hepetoma i roto i te Mai, pe’e mai—nō te ta’ata hō’ē e te ’utuāfare ’ia vāhi i te tuha’a 42 i roto e pae pupu ’īrava ’o tē hōhora mai tāta’itahi i te hō’ē parau tumu faufa’a o te ’evanelia. E tauturu teie mau ha’apupura’a ia ’outou ’ia ’āparau i teie tuha’a ’e tō te piha. ’Ei hi’ora’a, e pāpa’i ’outou i te mau fa’ahorora’a i ni’a i te tāpura ’ere’ere ’e e ani tāta’itahi i tō te piha ha’api’ira’a ’ia mā’iti i te hō’ē pupu. ’A ani i tō te piha ha’api’ira’a ’ia tai’o mai i tā rātou mau ’īrava ’e ’ia ’ite mai i te mea ’o tā rātou e mana’o ra e mea faufa’a nō tātou i tō tātou nei ’anotau. I muri iho e nehenehe rātou e fa’a’ite mai i te mau hi’ora’a nō roto mai i tō rātou iho orara’a ’ei fa’ahōho’a e mea nāhea rātou i te ha’amaita’ihia ’a fa’atere ai tātou i tō tātou orara’a nā roto i teie mau ture.

Te Parau Ha’api’ira’a ’e te mau Parau Fafau 41:9-11

Tē ani nei te Fatu i tāna mau tāvini ’ia fa’atusia.

• ’Ua fa’auehia Edward Partridge, te ’episekōpo mātāmua o te ’Ēkālesia i fa’aho’i-fa’ahou-hia mai, ’ia fa’aru’e i tāna ’ohipa ’e ’ia « ha’apau i tōna taime tā’āto’a » i te tāvinira’a i roto i tōna pi’ira’a. Noa atu ’aita te reira tītaura’a nō tātou, e aha tā tātou e ’ite nei i roto i teie mau ’īrava ’o tē nehenehe e fa’a’ohipahia i roto i tā tātou tāvinira’a i te Atua ?

Te Parau Ha’api’ira’a ’e te mau Parau Fafau 42:61, 65–68 ; 43:1–7

E ’āfa’i mai te heheura’a i te hau, te ’oa’oa, ’e te ora mure ’ore.

• Mai te feiā fa’atere mātāmua o te ’Ēkālesia, e mau uira’a paha tā te mau melo o te piha ha’api’ira’a e au ra e mau « parau ’aro » nō te mea tē tītau nei rātou i te arata’ira’a a te Fatu. E fa’aitoito ia rātou ’ia pāpa’i i te hō’ē uira’a tā rātou ’aore rā, i te hō’ē fifi ’o tā rātou e hina’aro nei i te hō’ē heheura’a nō rātou iho. E aha tā tātou i ’ite mai i roto i Te Parau Ha’api’ira’a ’e te mau Parau Fafau 42:61, 65–68 ’o te tauturu ia tātou ’a ’imi ai tātou i te heheura’a ?

• Nō te tauturu i te mau melo ’ia māramarama e nāhea te Atua ’ia heheu mai nō te arata’i i tāna ’Ēkālesia, e ani ia rātou ’ia tai’o i Te Parau Ha’api’ira’a ’e te mau Parau Fafau 43:1–7.

Te Parau Ha’api’ira’a ’e te mau Parau Fafau 43:8–10

Tē ha’aputuputuhia nei tātou nō te « ha’api’i ’e e pāturu… i te tahi ’e te tahi ».

• Nāhea tātou ’ia fa’a’ohipa Te Parau Ha’api’ira’a ’e te mau Parau Fafau 43:8–10 nō te ha’api’i i te hō’ē ta’ata e mana’o nei ē, ’aita e faufa’a ’ia haere i te mau purera’a a te ’Ēkālesia ? E tauturu te tāpura i roto i te « Mau rāve’a tauturu hau atu » ’ia tūtonu i teie ’āparaura’a nō ni’a i te mau ’ōpuara’a hanahana a te mau pupu autahu’ara’a ’e a te Sōtaiete Tauturu (e tano ato’a te tāpura nō te mau piha ha’api’ira’a a te Feiā ’Āpī Tamāhine). E fa’a’ite mai te mau melo o te piha ha’api’ira’a e nāhea tō rātou ’āmuira’a mai i roto i te mau pupu autahu’ara’a, te Sōtaiete Tauturu ’e te mau piha ha’api’ira’a i te ha’amaita’i ia rātou. E aha tā te mau ’īrava 8–10 e hōpo’i mai nō ni’a i te mea tā tātou e ti’a e rave nō te fa’aineine ’e te ’āmuira’a atu i roto i tā tātou mau purera’a ?

  piha Ha’api’ira’a Sābati nā te feiā ’āpī

  Tē putuputura’a mai i te fare purera’a ’o te hō’ē ïa rāve’a nō te « ha’api’i ’e te pāturu… i te tahi e te tahi ».

ītona mau rāve’a tauturu hau atu

Mau rāve’a tauturu hau atu

Nō te aha tātou i fa’anahonahohia ai ’ei mau pupu autahu’ara’a ’e ’ei Sōtaiete Tauturu.

’Ua fa’ata’a mai te tuahine Julie B. Beck, peresideni tahito rahi nō te Sōtaiete Tauturu ē, nō te aha te Atua i fa’anaho ai ia tātou ’ei mau pupu autahu’ara’a ’e ’ei mau Sōtaiete Tauturu :

1. « Nō te fa’anaho ia tātou i raro a’e i te autahu’ara’a ’e ’ia au i te hōho’a o te autahu’ara’a ».

2. « Nō te fa’atumu i te mau tamari’i tamāroa ’e te mau tamari’i tamāhine a te Metua i te Ao ra i ni’a i te ’ohipa nō te fa’aorara’a ’e nō te fa’aō ia rātou i roto i te reira. ’Ua riro te mau pupu autahu’ara’a ’e te mau Sōtaiete Tauturu ’ei mau aupipira’a fa’atupuhia ma te mau hōpoi’a nō te tauturu i roto i te ’ohipa a tō tātou Metua, nō te fa’atupu i te ora mure ’ore o tāna mau tamari’i ».

3. « Nō te tauturu i te mau ’episekōpo ’ia fa’atere, ma te pa’ari, te fare maeha’a a te Fatu. Tei roto i te fare maeha’a a te Fatu, te ’taime, te mau tārēni, te aroha, te mauiha’a, ’e te mau faufa’a moni’ nā te mau melo o te ’Ēkālesia [Manuel 2: Administration de l’Eglise,,6.1.3, ChurchofJesusChrist.org]. E fa’a’ohipahia te mau tārēni o te feiā mo’a nō te tauturu i te aupurura’a i te feiā veve e te nava’i ’ore ’e nō te patu i te bāsileia o te Fatu ».

4. « Nō te hōro’a te pāruru ’e te ha’apūra’a nō te mau tamari’i a te Metua i te Ao ra ’e nō tō rātou mau ’utuāfare i te mau mahana hope’a nei ».

5. « Nō te ha’apūai ’e nō te pāturu ia tātou i roto i tō tātou mau ti’ara’a ’e te mau hōpoi’a o tō tātou ’utuāfare ’ei mau tāmaiti ’e ’ei mau tāmahine nā te Atua ». ( »Why We Are Organized into Quorums and Relief Societies » [Brigham Young University devotional, Jan. 17 2012], speeches.byu.edu).

Ha’amaita’i i tā tātou ha’api’ira’a

Ani manihini. « Nō te ’orera’a e tītau tāmau noa ’ia rave i te tahi ’ohipa ta’a ’ē, ’a feruri i te ani i te mau pīahi ’ia feruri rātou iho i te mau rāve’a nō te fa’a’ohipa i te mea tā rātou i ’apo mai » (Ha’api’ira’a mai tā te Fa’aora, 35).