26 nō ’Ēperēra–2 nō Mē

Te Parau Ha’api’ira’a ’e te mau Parau Fafau 45

« E fa’atupuhia te mau parau tā’u i fafau atu »

’A tuatāpapa ai ’outou i Te Parau Ha’api’ira’a ’e te mau Parau Fafau 45, ’a feruri e aha tā te mau ’īrava, te mau fa’ahitira’a parau nā roto mai i te feiā fa’atere o te ’Ēkālesia, te mau ’itera’a rau, te mau uira’a ’e te tahi atu mau rāve’a tauturu ’o tā ’outou e nehenehe e fa’a’ohipa nō te ha’api’i i te ha’api’ira’a tumu. ’A ha’api’i ai ’outou, e ani i te mau melo o te piha ’ia pāpa’i i te mau fa’aitoitora’a tā rātou i fāri’i ’e ’ia rave i te hō’ē fa’anahora’a nō te rave i te reira.

Pāpa’i i te mau mana’o e tae mai

Tītau i te mana’o

E pāpa’i te mau melo o te piha i ni’a i te hō’ē ’api parau te nūmera o te hō’ē ’īrava nō roto mai i Te Parau Ha’api’ira’a ’e te mau Parau Fafau 45 tei fa’auru ia rātou. I muri iho, e ’ohi mai i te mau ’api parau, e mā’iti mai te tahi, ’e e ani i te mau melo o te piha tei pāpa’i i te reira ’ia tai’o i tā rātou mau ’īrava i te piha ’e ’ia fa’a’ite mai nō te aha rātou i mā’iti ai i te reira. E fa’aitoito ia vetahi ’ia fa’a’ite ato’a mai i tō rātou mau mana’o.

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 45:1–5

’O Iesu Mesia tō tātou pāruru i piha’i iho i te Metua.

• E nehenehe ānei te hō’ē ta’ata i roto i te piha e tātara mai e aha tā te hō’ē pāruru e rave ? E mea maita’i a’e e ’imi i te tātarara’a o te parau pāruru i roto i te buka fa’atoro parau. Nā roto i teie hāro’aro’ara’a, e nehenehe te mau melo o te piha e tai’o to’opiti i Te Parau Ha’api’ira’a ’e te mau Parau Fafau 45:3–5. E nehenehe rātou e fa’a’ite i te tahi ’e te tahi te mau ta’o ’aore rā te mau parau o teie mau ’īrava nō te tauturu ia rātou ’ia māramarama i te ti’ara’a ’o Iesu Mesia ’ei pāruru i piha’i iho i te Metua. (Hi’o ato’a 2 Nephi 2:8–9; Mosia 15:7–9; Moroni 7:27–28; Te Parau Ha’api’ira’a ’e te mau Parau Fafau 29:5; 62:1.) ’A feruri e ani i te mau melo o te piha ’ia fa’a’ite mai i tō rātou mau mana’o nō ni’a i te Fa’aora te rirora’a ’ei pāruru nō rātou.

Te Parau Ha’api’ira’a ’e te mau Parau Fafau 45:11–75

’Eiaha tātou e taiā i te tae-piti-ra’a mai.

• Nāhea ’outou i te tauturu i te mau melo o te piha ’ia hi’o i te mau fa’aarara’a ’e te mau fafaura’a tei ’ī i te tīa’ira’a i roto i te tuha’a 45 ? ’Ei hi’ora’a, e nehenehe ’outou e pāpa’i i ni’a i te tāpura ’ere’ere te mau upo’o parau mau parau tohu ’e mau ha’amaitaira’a i fafauhia mai ’e e pāpa’i te mau melo o te piha i raro i teie mau upo’o parau te mau ha’api’ira’a tā rātou i ’ite mai i roto i Te Parau Ha’api’ira’a ’e te mau Parau Fafau 45:11–75. Nō te aha te Fatu i hina’aro ai ’ia ’ite tātou nō ni’a i teie mau mea na mua roa ? E aha tā tātou e rave nō te fāri’i i te mau ha’amaita’ira’a tei fafauhia mai ?

• Penei a’e e nehenehe te mau melo o te piha e ’aitaui te mau parau a’o te tahi ’e te tahi e nāhea ’ia vai ’ana’anatae noa ’e te ti’aturi ’a fa’aruru ai tātou i te mau ’ati rahi tei tohuhia nō tō tātou ’anotau (mai tei fa’ata’ahia i roto i Te Parau Ha’api’ira’a ’e te mau Parau Fafau 45:11–75). Nō te tauturu i te mau melo o te piha ’ia tīa’i i te tae-piti-ra’a mai ma te fa’aroo, ’eiaha ra ma te ri’ari’a, e nehenehe ’outou e fa’a’ite i te video « Men’s Hearts Shall Fail Them » (ChurchofJesusChrist.org). I nāhea te ’ā’au o te ta’ata i te ha’afifi ia rātou i tō tātou nei ’anotau ? (hi’o ’īrava 26). E aha te a’o tā te peresideni Nelson i hōro’a i roto i teie video nō te tauturu ia tātou ’ia fa’aruru i te mau ’ohipa ri’ari’a ma te hau ?

Te Parau Ha’api’ira’a ’e te mau Parau Fafau 45:31–32

« ’A ti’a i roto i te mau vāhi mo’a », ’e ’eiaha e fa’anu’u-’ē-hia atu.

• E hina’aro paha te mau melo o te piha ’ia fa’a’ite mai i tō rātou mau mana’o nō ni’a i te huru o tā rātou tauto’ora’a nō te « ti’a i roto i te mau vāhi mo’a », mai tā te Fatu i a’o i roto i Te Parau Ha’api’ira’a ’e te mau Parau Fafau 45:31–32. Nāhea tātou i te fa’atupu i te mau vāhi mo’a i roto i tō tātou orara’a ? Te fa’ahitira’a parau i roto i « Te tahi atu mau rāve’a tauturu » ’e te hōho’a taviriihia « Stand Ye in Holy Places—Bloom Where You’re Planted » (ChurchofJesusChrist.org) e nehenehe e fa’arahi atu te mau mana’o i teie ’āparaura’a.

  

  Parabole nō nā Pāratenia hō’ē ’ahuru, nā Dan Burr.

Te tahi atu mau rāve’a tauturu

« ’A ti’a i te mau vāhi mo’a ».

’Ua ha’api’i mai te tuahine Ann M. Dibb, hō’ē melo tahito nō te peresidenira’a rahi o te Feiā ’Āpī Tamāhine ē, te fa’auera’a ’ia ti’a i roto i te mau vāhi mo’a ’e ’eiaha e fa’anu’u ’ē atu « te fa’ata’a mai nei nāhea tātou e nehenehe ai e fāri’i i te pāruru, te pūai ’e te hau i te mau taime pe’ape’a ». I muri a’e i te tāpa’ora’a ē, teie mau vāhi mo’a tei roto ïa tō tātou mau hiero, te mau fare purera’a ’e tō tātou mau fare, ’ua parau ’oia ē, « e nehenehe tā tātou e ’ite mai i te tahi atu ā mau vāhi ». Tē nā-ō-fa’ahou ra ’oia :

« Nā mua roa e ti’a ia tātou ’ia feruri i te ta’o ra vāhi ’ei ārea pāpū ’aore rā ’ei hō’ē pae fenua. Tera rā, e nehenehe ato’a te hō’ē vāhi e riro mai ‘te hō’ē huru, te hō’ē vaira’a ’aore rā te fāito mana’o’ [Merriam-Webster.com Buka fa’atoro parau, “place,” merriam-webster.com]. Tē aura’a ra, e riro ato’a ïa te mau vāhi mo’a ra ’ei taime—te mau taime i reira te Vārua Maita’i e fa’a’ite pāpū ai ia tātou, te mau taime i reira tātou e putapū ai i te here ’o te Metua i te Ao ra ’aore rā te mau taime e fāri’i ai tātou i te pāhonora’a i tā tātou mau pure. Hau atu ā, tē ti’aturi nei au ē, te taime ato’a e vai itoito ’outou nō te ti’a mai nō te parau-ti’a, tera iho mau taime ’aita atu e ta’ata ’ē tei hina’aro ’ia nā reira, tē fa’atupu ra ’outou i te hō’ē vāhi mo’a » (« Tō ’outou mau vāhi mo’a », Ensign ’aore rā Liahona, Mē 2013, 115).

Ha’amaita’ira’a i tā tātou ha’api’ira’a

Riro ’ei hō’ē ’itera’a pāpū ora. ’A ora ai ’outou i te ha’api’ira’a tumu tā ’outou e ha’api’i ra, e nehenehe ’outou e fa’a’ite i tō ’outou iho ’itera’a pāpū pūai e parau mau te reira. E ha’apāpū te Vārua Maita’i i tō outou ’itera’a pāpū i te ’ā’au o te mau melo o tā ’outou piha. ’A feruri i te mau parau tumu ’o tā ’outou e ha’api’i i teie hepetoma ’e i te mau hepetoma i muri nei. Nāhea ’outou ’ia ora tā’āto’a i te reira ? (Hi’o Ha’api’ira’a mai tā te Fa’aora,13–14.)