Aroā nō Independence i Missouri

Independence, Missouri, nā Al Rounds

24–30 nō Mē

Te Parau Ha’api’ira’a ʼe te mau Parau Fafau 58–59

« ’Ia ’ana’anatae i te ’ohipa maita’i »

I muri a’e i te tai’ora’a i te Te Parau Ha’api’ira’a ʼe te mau Parau Fafau 58–59, ’a feruri i te mau uira’a i muri nei : E aha te mana’o i fa’auruhia ia ’outou e fa’a’ite i tā ’outou piha ? E aha tā ’outou e tīa’i nei e ’ite mai rātou ? Nāhea ʼoutou i te tauturu ia rātou ʼia ʼite mai i te reira mau mea ?

Pāpa’i i te mau mana’o e tae mai

’ītona fa’a’itera’a

Tītau i te mana’o

Nō te fa’auru i te mau melo o te piha ’ia fa’a’ite mai i te mea tā rātou i ’apo mai i roto i tā rātou tuatāpapara’a i te pāpa’ira’a mo’a, ’e pāpa’i i te mau uira’a i muri nei i ni’a i te tāpura ’ere’ere : E aha tā tātou i ’apo mai ? Nāhea tātou i te ora i te mea tā tātou i ’apo mai ? E nehenehe te mau melo o te piha e tāpura i raro a’e i te uira’a mātāmua, te mau parau mau tā rātou i ’ite mai i roto i Te Parau Ha’api’ira’a ʼe te mau Parau Fafau 58–59. I muri iho, e nehenehe rātou e rave i te tahi tau minuti nō te ’āparau i te mau mana’o nō te orara’a i teie mau parau mau ’e ’ia pāpa’i i tō rātou mau mana’o i raro a’e i te uira’a piti.

’ītona ha’api’ira’a

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 58:1–5, 26–33

E tae mai te mau ha’amaita’ira’a ’ia au i te tālena a te Atua ’e i tō tātou itoito.

• Tē ha’api’i nei Te Parau Ha’api’ira’a ’e te mau Parau Fafau 58 i te mau parau mau ’o te nehenehe e hōpoi mai i te hau i roto i te mau taime tāmatara’a. E ’ite mai te mau melo o te piha i te tahi o teie mau parau mau i te roara’a o tā rātou tuatāpapara’a i teie tuha’a ; e ani ia rātou ’ia fa’a’ite mai i te mea tā rātou i ’ite mai. ’Aore rā, e ’imi mai rātou i te mau ’īrava 1–5, 26–33 ’ei piha, ’ei ta’ata hō’ē ’aore rā ’ei mau pupu, i te tahi mea ’o te nehenehe e tauturu i te hō’ē ta’ata e fa’aruru nei i te ’ati ’aore rā ’o tē tīa’i nei i te hō’ē ha’amaita’ira’a tei fafauhia. I muri a’e i te fa’a’itera’a mai i te mea tā rātou i ’ite mai, e nehenehe paha te mau mau melo o te piha e fa’a’ite mai i te mau ’itera’a rau ’aore rā te tahi atu mau pāpa’ira’a mo’a ’o te ha’apāpū i te mau parau mau i roto i te teie mau ’īrava.

• ’Ei tuha’a nō tā ’outou tāu’ara’a parau o teie parau tumu, e fa’a’ite atu ’outou i te video « Hope Ya Know, We Had a Hard Time » (ChurchofJesusChrist.org) ’e e ’āparau e aha tā tātou e nehenehe e rave nō te tauturu i te feiā e fa’aruru nei i te mau taime fifi. E nehenehe ato’a te fa’ahitira’a a te tuahine Linda S. Reeves i roto i « Te tahi atu mau rāve’a tauturu » e tauturu i tā ’outou tāu’ara’a parau. Nāhea te mau parau a te tuahine Reeves i te fa’atupu mai i ni’a i tō tātou hi’ora’a i tō tātou mau tāmatara’a ?

Te Parau Ha’api’ira’a ’e te mau Parau Fafau 58:26–29

E nehenehe tātou e « fa’atupu fa’arahi ho’i i te parau-ti’a » nō tō tātou « iho hina’aro ».

• E aha tā te mau melo o te piha i ha’api’i mai nā roto mai i tā rātou tuatāpapara’a i Te Parau Ha’api’ira’a ’e te mau Parau Fafau 58:26–29 i teie hepetoma ? E nehenehe paha ’outou e tāpupu i te piha ’e e ani i te mau pīahi ’ia ’āparau i roto i tā rātou mau pupu i te mau pereota ’o tā rātou i ’ite mai e mea faufa’a i roto i teie mau ’īrava. Nāhea teie mau ’īrava i te fa’auru ia tātou ’ia « fa’atupu fa’arahi ho’i i te parau-ti’a » ? (’īrava 27). Nō te aha te Fatu i hina’aro ai ’eiaha tātou ’ia « ha’avīhia i te mau mea ato’a » ? (’īrava 26). E aha tā teie mau ’īrava e parau nei nō ni’a i te mea tā te Fatu e hina’aro ’ia riro mai tātou ?

Te Parau Ha’api’ira’a ’e te mau Parau Fafau 59:9–19

’Ua riro te sābati ’ei mahana nā te Fatu.

• Nō te tauturu i te mau melo o te piha ’ia hi’o haere e aha tā te Fatu i ha’api’i i te feiā mo’a mātāmua i Missouri nō ni’a i te sābati, e ani ia rātou ’ia ’imi mai Te Parau Ha’api’ira’a ’e te mau Parau Fafau 59:9–19 ’e ’ia tāpura mai i ni’a i te tāpura ’ere’ere e aha tā te ’īrava tāta’itahi e ha’api’i nei ia tātou nō ni’a i te sābati. E nehenehe ato’a te mau melo o te piha e fa’a’ite mai nāhea tō rātou ’itera’a pāpū nō te sābati i te tupura’a i te rahi ’a ha’amo’a ai rātou i te mahana sābati. Tē vai rā i roto i te Sabbath.ChurchofJesusChrist.org te tahi mau video o te nehenehe e tauturu i te ’āparaura’a.

• I roto i Te Parau Ha’api’ira’a ’e te mau Parau Fafau 59, ’ua ha’api’i te Fatu nō ni’a i te mahana sābati ma te fa’a’ohipa i te mau parau mai « te ’oa’oara’a », « te mata ’oa’oa » ’e « te ’oa’oa » (mau ’īrava 14–15). E nehenehe te mau melo o te piha e ’imi mai i te mau ta’o mai teie i roto i te mau ’īrava 9–19. I muri iho e fa’a’ite mai te mau pīahi i te mea tā rātou e rave nei nō te fa’ariro i te sābati ’ei mea ’oa’oa. Nāhea tātou i te fa’a’ohipa i teie mau ’īrava nō te ha’api’i ia vetahi ’ē nō te aha tātou e fa’atura ai i te mahana sābati ?

• E nehenehe ato’a teie ’āparaura’a e riro ’ei hō’ē rāve’a nō te mau melo o te piha ’ia fa’a’ite mai i te mau mana’o e nāhea rātou ’e tō rātou ’utuāfare i te fa’a’ohipa i te sābati nō te fa’ariro i tō rātou fare ’ei pū nō tā rātou ha’api’ira’a i te ’evanelia. E ani ia rātou ’ia fa’a’ite mai nāhea tā rātou mau tauto’ora’a i te tauturu ia rātou ’ia vai « pāruru[hia]… ’ia ’ore ’ia vi’ivi’i i te mau mea o teie nei ao » (’īrava 9).

  te faraoa ’e te mau ’āu’a nō te ’ōro’a mo’a

  Te ’ōro’a moa ’o te hō’ē ïa tuha’a faufa’a roa nō te fa’aturara’a i te sābati.

’ītona te tahi atu mau rāve’a tauturu

Te tahi atu mau rāve’a tauturu

E nehenehe tō tātou mau ’ati e arata’i ia tātou i te Fa’aora.

’Ua ha’api’i ’o Linda S. Reeves, melo tahito nō te Peresidenira’a rahi o te Sōtaiete Tauturu ē :

« E fa’ati’a te Fatu ’ia tāmatahia tātou, i te tahi taime i te fāito hope’a o tō tātou pa’ari. ’Ua ’ite nā tātou i te orara’a o tei herehia e tātou—’e tō tātou ato’a iho paha—’ia ’ama roa i te auahi, ’e ’ua ui māere tātou ē, nō te aha te hō’ē Metua here ’e te aupuru i te Ao ra e fa’ati’a ai i te mau ’ohipa mai teie te huru ’ia tupu mai. ’Aita rā ’oia e vaiiho ia tātou i roto i te rehu ; e ti’a ’oia ma te hōhora i tōna rima, ’e ma te ani manihini onoono ia tātou ’ia haere atu iāna ra…

« … E hina’aro rahi tōna ’ia tauturu ia tātou, ’ia tāmāhanahana ia tātou, ’e ’ia tāmarū i tō tātou māuiui mai te mea ē e ti’aturi tātou i te mana o te tara’ehara ’e e fa’atura ho’i i tā tātou mau fafaura’a. E nehenehe te mau tāmatara’a ’e te mau ’ati tā tātou e fārerei e riro ’ei mau ’ohipa ’o te arata’i ia tātou iāna ra, ’e ’ia ha’apa’o i tā tātou mau fafaura’a, i reira ho’i e ti’a ai ia tātou ’ia ho’i fa’ahou i mua i tōna aro ’e ’ia fāri’i i te mau mea ato’a nā tō tātou Metua ra » (« ’A tītau i te mau ha’amaita’ira’a nō tā ’outou mau fafaura’a », Ensign ’aore rā Liahona, Novema 2013, 119–20).

Ha’amaita’ira’a i tā tātou ha’api’ira’a

’Ia pāpū ē tē ha’api’i ra ’outou i te ha’api’ira’a tumu mau. « ’A ui tāmau ia ’outou iho, ‘nāhea te mea tā’u e ha’api’i nei i te tauturu i tā’u mau pīahi ’ia patu i te fa’aro’o i te Mesia, ’ia tātarahapa, ’ia rave ’e ’ia ha’apa’o i te mau fafaura’a e te Atua, ’e ’ia fāri’i i te Vārua Maita’i ?’ »(Ha’api’ira’a mai tā te Fa’aora, 20).