Te rurura’a i te pūhapa, nā Worthington Whittredge

3–9 nō Mē

Te Parau Ha’api’ira’a ’e te mau Parau Fafau 46–48

« ’A ’imi ’ono’ono i te mau hōro’a maita’i roa a’e »

’A tai’o ai ’outou i Te Parau Ha’api’ira’a ’e te mau Parau Fafau 46–48, e fa’a’ite pāpū mai te Vārua Maita’i ia ’outou nō ni’a i te mau parau mau i roto i teie mau tuha’a. E nehenehe te pāpa’ira’a ’e te hi’o-fa’ahou-ra’a i te mau mana’o e tauturu ia ’outou ’ia ’ite mai i te mau rāve’a nō te tauturu i te mau melo o te piha ’ia ’ite mai i taua ā mau parau mau.

Pāpa’i i te mau mana’o e tae mai

Tītau i te mana’o

E nehenehe te reira e tauturu i te mau melo o te piha ’ia fa’a’ite mai i te tahi taime, te terera’a o tā rātou tuatāpapara’a pāpa’ira’a mo’a a te ta’ata hō’ē ’aore rā a te ’utuāfare. ’Ei hi’ora’a, ’ia fa’a’ite ana’e mai te mau melo o te piha i te hō’ē ’itera’a nō te hō’ē ’ohipa tā rātou i ’ite mai ’aore rā tā te hō’ē melo o te ’utuāfare i ’ite mai i teie hepetoma, e nehenehe ’outou e ani ia rātou e aha tā rātou i rave i roto i tā rātou tuatāpapara’a o tei fa’aitoito i te reira mau ’itera’a.

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 46:1–7

E ti’a ia tātou ’ia fāri’i poupou i te ta’ata ato’a i te ’Ēkālesia a Iesu Mesia.

• Nō e rave rahi, nāhea ’e e aha tā rātou i fāri’i i roto i te mau purera’a a te ’Ēkālesia o te nehenehe e fa’auru ma te au maita’i i tā rātou ’ohipa i roto i te ’Ēkālesia. E nehenehe te mau arata’ira’a a te Fatu i roto i Te Parau Ha’api’ira’a ’e te mau Parau Fafau 46:1–7 e tauturu i te mau melo o tā ’outou pāroita ’ia fa’atupu i te mau ’itera’a nō te purera’a hau atu i te fāri’i maita’i ’e te au maita’i nō te tahi ’e te tahi ’e nō te mau rātere. E ’imi mai te mau melo o te piha i roto i teie mau ’īrava, te mau tumu parau e tū’ati i te mau rurura’a a te ’Ēkālesia ’e ’ia pāpa’i mai i ni’a i te tāpura ’ere’ere te mea tā rātou i ’ite mai. Nō te mau mea tāta’itahi i roto i te tāpura, e tāu’aparau mai te piha e aha tā te parau tumu e fa’a’ite nei i roto i te fa’a’ohipara’a.

• Nāhea te mau arata’ira’a a te Fatu i roto i Te Parau Ha’api’ira’a ’e te mau Parau Fafau 46 i te tauturu i te mau melo o te piha ’ia hi’o i te mau purera’a a te ’Ēkālesia ’ei hō’ē rāve’a nō te fāri’i i te Vārua Maita’i ? E nehenehe ’outou e ani i te mau melo o te piha ’ia imi i roto i Te Parau Ha’api’ira’a ’e te mau Parau Fafau 46: 2 ’e ’ia ’āparau mai i te taime ’a ’ite ai rātou i te feiā fa’atere ’e te mau ’orometua i te arata’ira’a i te mau purera’a ma te Vārua Maita’i. E aha te ti’ara’a o rātou ’o tē haere mai nei i te mau purera’a ? ’A feruri, e ani i te mau melo o te piha ’ia fa’a’ite mai i te mau taime ’a fāri’i ai rātou ’ua fa’aterehia ’e ’ua arata’ihia i te hō’ē purera’a ma te Vārua Maita’i.

• Penei a’e e nehenehe ’outou e ani i te tahi mau melo o te piha ’ia fa’a’ite mai i tō rātou mau ’itera’a i te taime mātāmua ’a haere mai ai rātou i te hō’ē purera’a ’a te ’Ēkālesia a Iesu Mesia i te Feiā Mo’a i te mau Mahana Hope’a nei. E aha tei tauturu ia rātou ’ia ’ite i te fāri’i-poupou-ra’a ? E aha te a’o tā rātou e hōro’a i te tahi mau melo nō te tauturu ’ia fāri’i poupou hau atu ā tā tātou mau purera’a o te ’Ēkālesia ? Nāhea tātou i te fa’a’ohipa i te a’o a te Fatu e ’itehia i roto i Te Parau Ha’api’ira’a ’e te mau Parau Fafau 46:1–7 ? E vaiiho i te mau melo o te piha ’ia fa’a’ohipa i te mea tā rātou e parau ’ia ’ite ana’e rātou i te hō’ē ta’ata ’e’ē ’ia tomo mai i roto i te fare purera’a nō te taime mātāmua.

• E nehenehe ato’a te hō’ē hīmene mai teie « Ha’amaita’i ia Iesu ē, nō tōna ra here rahi » (Te mau hīmene, no.98) e tauturu i te mau melo o te piha ’ia feruri ’e ’ia ’āparau e nāhea ’ia fa’ariro i tā tātou mau purera’a o te ’Ēkālesia ’ei mea fāri’i poupou a’e ’e te faufa’a a’e. Penei a’e e nehenehe te mau melo o te piha e hīmene ’āmui ’e e fa’a’ite mai i te mau mana’o nō ni’a i te mau paraparau o te hīmene e nāhea i te tauturu ’ia vetahi ’ē ’ia fāri’i i te here o te Atua i te fare purera’a.

  

  ’Ua ha’api’i mai te Fatu ē ’ia fāri’i-poupou-hia te tā’āto’ara’a i roto i tāna ’Ēkālesia.

Te Parau Ha’api’ira’a ’e te mau Parau Fafau 46:7–33

E hōro’a te Metua i te Ao ra i te mau hōro’a pae vārua nō te maita’i o tāna mau tamari’i.

• ’Ua ti’aturi pāpū te feiā’ mo’a mātāmua i te mau fa’a’itera’a a te Vārua Maita’i. Nāhea ’outou i te tauturu i te mau melo o tā ’outou piha ’ia patu i tō rātou fa’aro’o ē e nehenehe teie mau hōro’a e fa’a’itehia mai i tō tātou nei ’anotau ? E nehenehe ’outou e ha’amata ma te anira’a i te mau melo o te piha ’ia tai’o to’opiti mai ’aore rā ma te pupu na’ina’i i Te Parau Ha’api’ira’a ’e te mau Parau Fafau 46:7–33. E ani ia rātou ’ia ’imi mai e pae a’e hōro’a pae vārua ’e ’ia tāu’aparau i te huru o tō rātou ’itera’a i teie mau hōro’a i te tupura’a i roto i tō rātou orara’a ’aore rā i roto i te orara’a o te tahi ta’ata tā rātou i matau—’oia ato’a te feiā i roto i te piha. E aha tā rātou i ’ite mai ’o tā rātou e nehenehe e fa’a’ite i te piha nō te patu i tō rātou fa’aro’o i roto i teie mau hōro’a ?

• ’Ua parau te Fatu ē e fana’o te mau hōro’a pae vārua nō te feiā ha’apa’o maita’i ’e « e ’eiaha ’ei tāpa’o » (’īrava 9). E nehenehe paha te mau melo o te piha e ’āparau nāhea te feiā ha’apa’o maita’i e fana’o ai i te mau hōro’a pae vārua. Nāhea teie mau hōro’a e tauturu ai i te feiā e hina’aro i te reira ’aore rā ’ia ha’apūai i tō rātou ’itera’a pāpū nō te ’evanelia ?

• ’Ua here vetahi mau ta’ata i te Atua ’e te tāmata nei i te ha’apa’o i tāna mau fa’auera’a, ’aita rā e mana’o nei ’ua tāmatamata rātou i te mau hōro’a o te Vārua. Nāhea te parau a’o i roto i Te Parau Ha’api’ira’a ’e te mau Parau Fafau 46:7–33 i te tauturu ?

Te Parau Ha’api’ira’a ’e te mau Parau Fafau 47

E arata’i tē Vārua Maita’i ia tātou ’ia rave fa’aoti ana’e tātou i tō tātou mau pi’ira’a.

• E rave rahi ta’ata te nehenehe e māramarama i te mea tā John Whitmer i fāri’i i te taime ’a hina’aro ai ’oia ’ia ha’apāpūhia ē nō ō mai tōna pi’ira’a i te Atua. E hina’aro paha te mau melo o te piha e fa’a’ite mai i te hō’ē ā ’ohipa i tupu nō rātou. E aha tā tātou i ’ite mai i roto i Te Parau Ha’api’ira’a ’e te mau Parau Fafau 47 ’o tei hōro’a ia John Whitmer i te ti’aturira’a i roto i tōna pi’ira’a ?

Ha’amaita’ira’a i tā tātou ha’api’ira’a

Tō ’outou ti’ara’a ’ei ’orometua ha’api’i. Te ha’api’ira’a ’ua hau atu ïa i te hōhora-noa-ra’a i te ha’amāramaramara’a ’o tā ’outou i fa’aineine. I roto i te tahi atu mau ’ohipa, tei roto ato’a te fa’atupura’a i te hō’ē vāhi au maita’i i reira te mau melo o te piha e nehenehe ai e ha’api’i mai ’e e ’ite mai i te mau parau mau nā roto ia rātou iho ’e ’ia fa’a’ite mai i te mea tā rātou i ’apo mai ia vetahi ’ē. ’Ei hi’ora’a, i te roara’a o te ha’api’ira’a, ’a ui atu i te mau melo o te piha nō ni’a i tō rātou mau ’itera’a nō te tuatāpapara’a i te mau pāpa’ira’a mo’a i te fare.