te ta’ata fa’aapu ’e te mau pua’atoro

Te rēnira’a mātāmua, nā James Taylor Harwood

17–23 nō Mē

Te Parau Ha’api’ira’a ’e te mau Parau Fafau 51–57

« Hō’ē ti’a’au ha’apa’o maita’i, te parau-ti’a ’e te rave pa’ari »

I te tahi taime, te fa’aurura’a nō te mea tā ’outou e ti’a e ha’api’i e tae mai ’ia tāu’aparau ana’e ’outou i te mau pāpa’ira’a mo’a ’e te hō’ē melo o tō ’outou ’utuāfare ’aore rā i te hō’ē hoa.

Pāpa’i i te mau mana’o e tae mai

ītona fa’a’itera’a

Tītau i te mana’o

’A feruri e fa’a’ite i teie mau parau a Elder Quentin L. Cook : « Tē ti’aturi nei au ē, e hi’o fa’ahou tātou tāta’itahi ’e tō tātou ’utuāfare i te mau ti’a’aura’a tā tātou e ha’apa’o » (« Te ti’a’aura’a—te hō’ē ti’aturira’a mo’a », Ensign ’aore rā, Liahona, Novema 2009, 94). E nehenehe ’outou i muri iho e ani i te mau melo o te piha e aha tā rātou i ha’api’i mai nā roto mai i te mau tuha’a 51–57 nō ni’a i tā rātou mau ti’a’aura’a.

’ītona ha’api’ira’a

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 51:9, 15–20

Tē hina’aro nei te Fatu ia tātou ’ia riro ’ei ti’a’au ha’apa’o maita’i, te parau-ti’a ’e te pa’ari.

• Nāhea ’outou i te tauturu i te mau melo o te piha ’ia feruri e nāhea te mau parau a te Fatu i roto i te tuha’a 51 e tano ai ia rātou ? E pāpa’i i ni’a i te tāpura ’ere’ere E aha tā te Fatu i hōro’a mai iā’u ? ’e e ani i te mau melo o te piha ’ia tāpura mai i tā rātou mau pāhonora’a (hi’o « Te tahi atu mau rāve’a tauturu » nō te mau mana’o). I muri iho, e ’imi mai rātou i te mau parau tumu i roto i te mau ’īrava 9, 15–20 ’o te ha’api’i ia rātou ’ia riro ’ei mau ti’a’au maita’i a’e nō te mau mea i ni’a i tā rātou tāpura. ’Aore rā, e nehenehe ’outou e fa’atumu i ni’a i te mau ta’o « ha’apa’o maita’i », « parau-ti’a », ’e « rave pa’ari » i roto i te ’īrava 19, ma te tāu’aparau e nāhea teie mau parau tāta’itahi e nehenehe ai e arata’i ia tātou i roto i te fa’aotira’a i tā tātou mau ti’a’aura’a. Mai te mea e hina’arohia, hi’o ’āmui fa’ahou te tātarara’a o « te ti’a’au, te ti’a’aura’a » i roto i Te mau fa’ahorora’a ’e tō rātou aura’a (scriptures.ChurchofJesusChrist.org).

’āua matie

Te mau melo e ora ra i te ture nō te ha’amo’ara’a, ’ua hōro’a i te mau mea ato’a tā rātou e vai ra i te ’Ēkālesia.

Te Parau Ha’api’ira’a ’e te mau Parau Fafau 52:10; 53:3; 55:1–3

E fāri’ihia te hōro’a o te Vārua Maita’i nā roto i te tu’ura’a rima.

• E rave rahi mau ’īrava i roto i teie mau heheura’a e fa’ahiti nei te fāri’ira’a i te Vārua Maita’i nā roto i te tu’ura’a rima. Mai te mea e ’ana’anatae te mau melo o tā ’outou piha i te hō’ē tāu’ara’a parau nō ni’a i teie tumu parau, e ’ani atu i te mau pīahi e aha tā rātou i ha’api’i mai i roto i Te Parau Ha’api’ira’a ’e te mau Parau Fafau 52:10; 53:3; 55:1–3 nō ni’a i te hōro’a o te Vārua Maita’i. Nō te hau atu nō ni’a i teie tumu parau, hi’o Te mau ’Ohipa 8:14–17; 19:1–6. Penei a’e e nehenehe te mau melo o te piha e paraparau mai nō ni’a i tō rātou mau ’itera’a nō te fāri’ira’a i te hōro’a o te Vārua Maita’i ’aore rā e aha tā rātou e nehenehe e rave nō te fāri’i tāmau noa i tāna fa’aurura’a i roto i tō rātou orara’a.

Te Parau Ha’api’ira’a ’e te mau Parau Fafau 52:9–11, 22–27

E nehenehe tātou e fa’a’ite i te ’evanelia i te mau vāhi tei reira tātou.

• I tō te Fatu tonora’a e rave rahi feiā fa’atere o te ’Ēkālesia i Missouri, ’ua ani ’oia ia rātou ’ia fa’a’ohipa maita’i i te taime nō te rāterera’a ’e nō te « a’o haere nā te pae ’e’ā » (mau ’īrava 25–27). E nehenehe te tai’ora’a i Te Parau Ha’api’ira’a ’e te mau Parau Fafau 52:9–11, 22–27 e arata’i i te hō’ē tāu’ara’a parau nō ni’a e nāhea tātou i te fa’a’ite i te ’evanelia « nā te pae ’e’ā », ’aore rā i te roara’a mau o tā tātou orara’a. E nehenehe te mau melo o te piha e tātara mai nāhea rātou i te ravera’a nō te fa’a’ite i te ’evanelia ’ei hō’ē tuha’a nō tō rātou orara’a.

Te Parau Ha’api’ira’a ’e te mau Parau Fafau 52:14–19

’Ua hōro’a te Atua i te hō’ē hōho’a nō te ’āpera’a i te ’ino’inora’a.

• Nō te fa’aō mai i te hōho’a tā te Fatu i heheu mai i roto i Te Parau Ha’api’ira’a ’e te mau Parau Fafau 52:14–19, e nehenehe ’outou e fa’a’ite atu i te mau hi’ora’a o te tahi atu mau hōho’a e mea matauhia e te mau pīahi, mai te mau hōho’a e nehenehe e hāmani i te mau tao’a ’aore rā te mau hōho’a nō te huru ravera’a. E nehenehe te mau melo o te piha e fa’a’ite mai i tō rātou iho mau hi’ora’a. Nō te aha e mea faufa’a te mau hōho’a ? Nāhea e nehenehe ai ia tātou e fa’a’ohipa i te hōho’a i roto i te mau ’īrava 14–19 nō te ’āpe i te ’ino’inora’a tā tātou e ’ite nei i roto i te ao nei i teie mahana ?

Te Parau Ha’api’ira’a ’e te mau Parau Fafau 54

E nehenehe au e fāriu atu i ni’a i te Fatu, ’ia ha’amāuiuihia vau e te mau mā’itira’a a vetahi ’ē.

• E rave rahi o tātou tei māuruuru ’ore i te ’itera’a ē ’aita te ta’ata tā tātou i ti’aturi e fa’atura nei i tāna mau fafaura’a. ’Ua tupu te reira i te feiā mo’a nō Colesville, New York, ’o tei tīa’i nō te pārahi atu i ni’a i te mau fenua ’o Leman Copley i Ohio. Nō te ha’api’i mai nā roto mai i teie ’ohipa i tupu, ’ia hi’o fa’ahou te mau melo o te piha i te upo’o parau nō te tuha’a 54 (hi’o ato’a Te feiā mo’a, 1:125–28 ; « A Bishop unto the Church », te mau heheura’a i roto i te terera’a ’ā’a’mu, 78–79). ’Ua ti’a ia rātou e feruri ē e hoa tō rātou i rotopū i te feiā mo’a nō Colesville, ’e i muri iho ’ia hi’o mai i te a’o i roto i te tuha’a 54 ’o tā rātou e nehenehe e fa’a’ite i tō rātou hoa. ’Aore rā, e nehenehe rātou e ’imi i roto i te heheura’a i te hō’ē ’ohipa ’o te nehenehe e tauturu i te hō’ē ta’ata tei māuiui nō te mau mā’itira’a a te tahi ta’ata. (E nehenehe ’outou e fa’a’ite atu i te parau fafau o te ’īrava 6 i te feiā e ha’apa’o nei i tā rātou mau fafaura’a.)

• Te Parau Ha’api’ira’a ’e te mau Parau Fafau 54:10 tei roto e rave rahi mau pereota ’o tā te mau melo o tā ’outou piha e ’ite mai e mea faufa’a, mai te « fa’a’oroma’i i roto i te ’ati », « ’imi mai iā’u i te mātāmua roa » ’e « fa’aeara’a nō tō rātou vārua ». E mā’ite mai te mau pīahi hō’ē pereota nō te feruri ’e nō te tuatāpapa, ma te fa’a’ohipa i te nota i raro i te ’api ’aore rā te tahi atu mau rāve’a tauturu nō te hi’o haere i te mau pāpa’ira’a mo’a i fa’ahitihia. I muri iho e nehenehe rātou e fa’a’ite i tō rātou mau mana’o.

’ītona te tahi atu mau rāve’a tauturu

Te tahi atu mau rāve’a tauturu

Tā tātou mau ti’a’aura’a

’Ua fa’ata’a mai te peresideni Spencer W. Kimball ē : « I roto i te ’Ēkālesia, hō’ē ti’a’au, ’o te hō’ē ïa ti’aturira’a pae vārua ’aore rā pae tino mo’a nō te reira tē vai nei te hō’ē hōpoi’a. Nō te mea nā te Fatu te mau mea ato’a, e mau ti’a’au ana’e tātou nō tō tātou tino, tō tātou vārua, tō tātou ’utuāfare ’e nō tō tātou mau fatura’a. (Hi’o Te Parau Ha’api’ira’a ’e te mau Parau Fafau 104:11–15.) Hō’ē ti’a’au ha’apa’o maita’i ’o te hō’ē ïa ta’ata o te fa’a’ohipa i te hō’ē fa’ahepora’a parau-ti’a, e aupuru i tāna iho ’e e fāriu atu i te feiā veve ’e te nāva’i ’ore » (« Welfare Services: The Gospel in Action », Ensign, Novema 1977, 78).

Ha’amaita’ira’a i tā tātou ha’api’ira’a

Tauturu i te mau pīahi ’ia pāturu te tahi ’e te tahi. ’A fa’atupu i te hō’ē piha au maita’i i reira te mau pīahi e pāturu ai ’e e fa’aitoito ai te tahi ’e te tahi. E ani ia rātou ’ia hōro’a mai i te mau mana’o ’e te mau rāve’a ’o te ha’amaita’i i tā rātou tuatāpapara’a a te ta’ata hō’ē ’e te ’utuāfare. (Hi’o Ha’api’ira’a mai tā te Fa’aora, 36.)