te ’ānāvai i te hitira’a mahana

10–16 nō Mē.

Te Parau Ha’api’ira’a ʼe te mau Parau Fafau 49–50

« ’O tei nō ’ō mai nā i te Atua ra e māramarama ïa »

Nō te « poro haere i te parau nō te parau mau nā roto i te Fa’aa’o » (Te Parau Ha’api’ira’a ʼe te mau Parau Fafau 50:17), ’a ’imi i te fa’aurura’a hanahana ’a feruri ai ’outou i Te Parau Ha’api’ira’a ʼe te mau Parau Fafau 49–50. ’Ia mātara noa ’outou i te arata’ira’a a te Atua ’a ha’api’i ai ’outou.

Pāpa’i i te mau mana’o e tae mai

’ītona fa’a’itera’a

Tītau i te mana’o

Ta’a ’ē noa atu i te fa’a’itera’a i te mau mana’o tā rātou i fāri’i i te taime tuatāpapara’a i te mau pāpa’ira’a mo’a, e fana’o mai te mau melo o te piha nā roto i te tāu’aparaura’a e nāhea teie mau mana’o i te tae mai. E nehenehe ’outou e ani i te mau melo o te piha ’ia fa’a’ite mai i te tahi ’e te tahi te mau mana’o nō ni’a i te hō’ē ’īrava i roto i Te Parau Ha’api’ira’a ʼe te mau Parau Fafau 49–50 ’e e ’āparau e aha tei arata’i ia rātou i te reira mana’o.

’ītona ha’api’ira’a

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 49; 50:1–36

E nehenehe te mau parau mau o te ’evanelia e tauturu iā’u ’ia ’ite i te mau ha’api’ira’a hape.

• ’Ua hōro’ahia mai te tuha’a 49 nō te ha’apāpū i te ha’api’ira’a tumu mau ’o tei fa’atītī’aifaro i te mea tā vetahi e ha’api’i ra (hi’o i te arata’ira’a o teie hepetoma i roto Mai, pe’e mai—nō te ta’ata hō’ē ’e te ’utuāfare nō te ’ite mai i te terera’a o te ’ā’amu). Nō te tauturu i te mau melo o te piha ’ia hi’o haere i teie tuha’a, e nehenehe ’outou e tāpupu i te mau melo ’e ’ia fa’ata’a i te pupu tāta’itahi hō’ē o te mau tumu parau o te ha’api’ira’a tumu tei fa’ahitihia (mai tei tāpurahia i roto i te upo’o parau o te tuha’a nō te tuha’a 49). E nehenehe te mau pupu e tāu’aparau i te mau uira’a i muri nei : E aha te mau parau mau tā te Fatu i ha’api’i nō ni’a i teie tumu parau i roto i te tuha’a 49 ? E aha tā te mau ta’ata e ti’aturi nei nō ni’a i teie tumu parau i teie mahana ? E aha te tahi atu mau parau mau tā te Fatu i ha’api’i nō ni’a i te reira tumu parau nā roto mai i tō tātou mau peropheta nō te mau mahana hope’a nei ? ’A hōro’a i te mau melo o te piha hō’ē rāve’a nō te fa’a’ite mai i tō rātou māuruuru nō te mau parau mau tei heheuhia mai i tō tātou nei mahana.

• Mai te mau peresibutero i Kirtland « ’aita…i ’ite i te mau huru nō te fa’a’itera’a a te mau vārua ’e’ē » (Te Parau Ha’api’ira’a ’e te mau Parau Fafau 50, tuha’a upo’o parau), tē uiui nei tātou i te tahi taime, te ’ohipa tā tātou e fāri’i ra ’aore rā e ’ite ra nō ’ō mai ānei i te Vārua ’aore rā nō te tahi atu fa’aurura’a. E aha tā tātou e nehenehe e ha’api’i mai nā roto mai i Te Parau Ha’api’ira’a ’e te mau Parau Fafau 50:1–36 nō te tauturu ia tātou ’ia ’ite i te fa’aurura’a a te Vārua ? E nehenehe ’outou e vaiiho i te melo o te piha tāta’itahi ’ia mā’iti i te hō’ē pu’e ’īrava nō te tuatāpapa, ’e i muri iho e ani i te mau pīahi ’ia fa’a’ite mai i te mea tā rātou i ’ite mai.

Te Parau Ha’api’ira’a ’e te mau Parau Fafau 49:15–17

E mea faufa’a te fa’aipoipora’a i rotopū i te tāne ’e te vahine i roto i te fa’anahora’a a te Atua.

• Nō te mea e mea faufa’a te fa’aipoipora’a i roto i te fa’anahora’a a te Metua i te Ao ra, tē hina’aro nei Sātane e fa’atupu i te tapitapi nō te reira. E fana’o tā ’outou piha nā roto i te hāmanira’a i te hō’ē tāpura i ni’a te tāpura ’ere’ere nō te mau parau mau tā te Fatu i heheu mai nō ni’a i te fa’aipoipora’a. ’Ei hi’ora’a, e aha te mau parau mau nō ni’a i te fa’aipoipora’a tā tātou i ha’api’i mai nā roto mai i Te Parau Ha’api’ira’a ’e te mau Parau Fafau 49:15–17 ? Te tahi atu mau pāpa’ira’a mo’a tauturu ’oia ho’i Genese 2:20–24 ; 1 Korinetia 11:11 ; ’aore rā, te tahi e ’itehia i roto « Mariage, se marier » i roto i te buka arata’i o te mau pāpa’ira’a mo’a (scriptures.ChurchofJesusChrist.org). E ’ite ato’a te mau melo o te piha te mau parau mau i roto i « Te ’Utuāfare : E poro’i i tō te Ao Nei ». Fa’atumuhia i ni’a i mea tā tātou i ’apo mai nā roto mai i teie mau rāve’a tauturu, nō te aha te fa’aipoipora’a i rotopū i te tāne ’e te vahine e mea faufa’a nō te fa’anahora’a a te Atua ? (hi’o « Te tahi atu mau rāve’a tauturu »).

  nā ta’ata fa’aipoipo i rāpae’au i te hiero

  ’Ua ha’apa’ohia e te Atua te fa’aipoipora’a i rotopū i te tāne ’e te vahine.

Te Parau Ha’api’ira’a ʼe te mau Parau Fafau 50:13–22

E fa’ateitei-’āmui-hia te mau ’orometua ha’api’i ’e te mau pīahi nā te Vārua.

• Te arata’ira’a a te Fatu nō ni’a i te porora’a ’e te fāri’ira’a i te parau mau, e nehenehe e hōro’a mai i te hō’ē rāve’a maita’i nō te tāu’aparau i te ti’ara’a ’o tā ’outou i fa’a’ite ’ei ’orometua ha’api’i ’e ’ei mau melo nō te piha i roto i te parau nō te ha’api’ira’a mai i te ’evanelia. ’A feruri e ani i te mau melo o te piha ’ia hi’o ’āpipiti fa’ahou i Te Parau Ha’api’ira’a ʼe te mau Parau Fafau 50:13–22 ’e ’ia ’āparau i te mau ti’ara’a o te Vārua, te mau ’orometua ha’api’i ’e te mau pīahi. E nehenehe te tahi mau ta’ipiti e fa’a’ite mai i te piha e aha tā rāua i ha’api’i mai. E aha « te tahi atu rāve’a » tā tatou e tāmata i te tahi taime nō te ha’api’i ’aore rā nō te ’apo mai i te ’evanelia ? (’īrava 17). Nāhea tātou e nehenehe ai e fāri’i maita’i a’e nā roto i te Vārua ? E aha tei fa’auruhia ia tātou ’ia rave i roto i tō tātou ’utuāfare ’e i te fare purera’a nō te ha’api’i ’e nō te ’apo maita’i mai a’e i te ’evanelia ?

’ītona te tahi atu mau rāve’a tauturu

Te tahi atu mau rāve’a tauturu

E mea faufa’a te fa’aipoipora’a nō te fa’anahora’a a te Metua i te ao ra.

’Ua fa’ata’a mai o Elder David A. Bednar nō te aha e mea faufa’a te fa’aipoipora’a nō te fa’anahora’a nō te fa’aorara’a a te Atua.

« Nā roto i te fa’auera’a hanahana, ’ua fa’ata’ahia te tāne ’e te vahine nō te haere ’āmui i mua e tae atu i te parau-ti’a ’e i te hō’ē ’īra’a o te hanahana. Nō te ta’a-’ē-ra’a o tō rāua huru ’e tō rāua ’aravihi, e hōro’a tāta’itahi mai te mau tāne ’e te mau vahine i te aura’a o te fa’aipoipora’a te mau ’itera’a ātea ’e te mau ’itera’a rau ’ōtahi. E tauturu ta’a ’ē te tāne ’e vāhine terā rā e ’aifāito nō te fa’atupu i te hō’ēra’a ’e hō’ē hō’ēra’a ’o te ’ore roa e tae’ahia nā roto i te tahi ’ē atu rāve’a. E fa’aoti te tāne ’e e ha’amaita’i i te vāhine ’e e fa’aoti te vahine ’e e ha’amaita’i i te tāne ’a ha’api’i mai ai rāua, ’a ha’apūai ’e ’a ha’amaita’i ai rāua te tahi ’e te tahi …

« Hō’ē ’utuāfare tē vai ra hō’ē tāne ’e hō’ē vahine here ’e te auraro i roto, ’o te hō’ē ïa vāhi maita’i roa i reira te mau tamari’i e aupuruhia ai ma te here ’e te parau-ti’a ’e i reira te mau hina’aro pae vārua ’e pae tino o te mau tamari’i e nehenehe ai e pāhonohia. ’Oia ato’a te huru ta’a ’ē o te mau tāne ’e o te mau vahine e tauturu i te fa’aotira’a i te hō’ē aura’a o te fa’aipoipora’a, nō te reira ā huru e mea faufa’a roa nō te fa’aamu, nō te aupuru, ’e nō te ha’api’i i te mau tamari’i » (« Marriage Is Essential to His Eternal Plan », Ensign, Tiunu 2006, 83–84).

Ha’amaita’ira’a i tā tātou ha’api’ira’a

Arata’i i te mau tāu’ara’a parau fa’auruhia. E ’ohipa tā te mau ta’ata ato’a e hōro’a, i te tahi rā taime e ’ere te tā’āto’ara’a te fāna’o. Ma te pe’era’a i te fa’aurura’a a te Vārua, ’a ’imi i te mau rāve’a nō te ha’amara’a i te rahira’a ’ia fa’a’ite mai i tō rātou mau mana’o ’e tō rātou mau hina’aro hōhonu.