Te auahi pūhapara’a i ni’a i te Missouri, nā Bryan Mareko Taylor

31 nō Mē–6 nō Tiunu

Te Parau Ha’api’ira’a ’e te mau Parau Fafau 60–62

« Tei roto i tō’u nei rima te ta’ata ato’a »

’Ua parau Elder Ronald A. Rasband : « E ti’a ia tātou tāta’itahi ’ia ha’apūai nā mua ia tātou i te pae vārua ’e ’a ha’apūai atu ai i te feiā ’ati a’e ia tātou. ’A feruri pinepine i te mau pāpa’ira’a mo’a ’e ’a ha’amana’o i te mau mana’o ’e te mau hina’aro hōhonu tei tupu i roto ia ’outou ’a tai’o ai ’outou i te reira ». (« ’O te ’aramoina ia ’outou », Ensign ’aore rā Liahona, Novema 2016, 114).

Pāpa’i i te mau mana’o e tae mai

Tītau i te mana’o

E nehenehe ’outou e fa’auru i te hō’ē tāu’ara’a parau faufa’a roa, ma te anira’a i te mau melo o te piha ’ia pāhono mai i te hō’ē uira’a ’aore rā i te hō’ē mana’o ta’a ’ē nō ni’a i te mau pāpa’ira’a mo’a o tā rātou i tai’o i te fare. ’Ei hi’ora’a, e nehenehe ’outou e ani ia rātou e fa’a’ite mai i te tahi mea tā rātou i ’apo mai i teie hepetoma nō ni’a i te Metua i te Ao ra ’aore rā ia Iesu Mesia.

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 60:2–3, 7, 13–14; 62:3, 9

E māuruuru te Fatu ’ia hāmama ana’e tātou i tō tātou vaha nō te fa’a’ite atu i te ’evanelia.

• ’Ei melo nō te ’Ēkālesia, ’ua ’ite tātou ē e tao’a faufa’a rahi te fa’aho’i-fa’ahou-ra’a mai o te ’evanelia ’o te ha’amaita’i i te orara’a o te mau tamari’i a te Atua. Nō reira, nō te aha tātou e fa’ataiā ai e fa’a’ite atu i tō tātou ’itera’a pāpū ia vetahi ’ē ? ’A feruri i te ani i te mau melo o te piha ’ia tāpura mai i ni’a i te tāpura ’ere’ere te tahi o te mau tumu nō te aha ’aita tātou e nehenehe e hāmama i tō tātou vaha nō te fa’a’ite atu i te ’evanelia. I muri iho e tai’o mai te mau melo o te piha Te Parau Ha’api’ira’a ’e te mau Parau Fafau 60:2–3, 7, 13–14; 62:3, 9, ma te ’imi mai i te mau ta’o ’e te mau pereota o te fa’auru ia rātou e fa’a’ite atu i te ’evanelia. E nehenehe rātou e tāpura mai i te mea tā rātou i ’ite mai i ni’a i te tāpura ’ere’ere. Penei a’e e fa’a’ite mai te tahi pae o te mau pīahi i te hō’ē ’ohipa tei tupu ’a upo’otia ai rātou i ni’a i tō rātou taiā ’e i te fa’a’itera’a atu i te ’evanelia i te tahi ta’ata.

• I roto i Te Parau Ha’api’ira’a ’e te mau Parau Fafau 60–62, tē vai ra te mau ha’api’ira’a tei fa’ahiti-pāpū-hia, nō ni’a i te fa’a’itera’a i te ’evanelia. Nō te tauturu i te mau melo o te piha ’ia ’ite mai i teie mau ha’api’ira’a, e nehenehe ’outou e ani atu i te ta’ata tāta’itahi ’ia hi’o fa’ahou i te hō’ē o teie mau tuha’a ’e ’ia fa’a’ite mai i te mau mea ato’a tā rātou i ’ite mai ’o tē ha’api’i nei ia rātou nō ni’a i te fa’a’itera’a i te ’evanelia. E ha’amaita’i te reira i te ’āparaura’a ma te tai’o nō ni’a i te mau misiōnare hi’ora’a maita’i i te tahi atu vāhi i roto i te pāpa’ira’a mo’a (hi’o, ’ei hi’ora’a, Te mau ’Ohipa 8:27–40 ; Alama 19:16–17) ’e te ’āparaura’a i te mea tā tātou i ha’api’i mai nā roto mai ia rātou. E aha te mau hi’ora’a tā tātou e fa’a’ite atu nā roto mai i tō tātou iho orara’a ? E nehenehe te mau pīahi e fa’ati’a mai nāhea tā rātou fa’aōra’a mai i te ’evanelia, ’e e aha tā rātou i fāri’i nō ni’a i te mau ta’ata tei ha’api’i ia rātou ? E fānao tā ’outou mau pīahi i te tahi mau ha’utira’a, nā roto i te reira e ti’a ia tātou « ’ia hāmama i [tō tātou] vaha » ’e ’ia fa’a’ite atu i te ’evanelia.

  

  Tē hina’aro nei te Atua ’ia fa’a’ite tātou i te ’evanelia ia vetahi ’ē.

Te Parau Ha’api’ira’a ’e te mau Parau Fafau 60:2–4; 61:1–2, 20, 36–38; 62:1, 6

Tē ha’api’i nei te mau pāpa’ira’a mo’a ia tātou nō ni’a ia Iesu Mesia.

• E ani i te mau melo o te piha ’ia pāpa’i i ni’a i te tāpura ’ere’ere i te mau mea ato’a tā rātou i ha’api’i mai nō ni’a i te Fa’aora i teie hepetoma i te tuatāpapara’a i te mau tuha’a 60–62, ’e tae noa atu i te mau ’īrava e tū’ati ra. ’Aore rā, e ’imi mai rātou i Te Parau Ha’api’ira’a ’e te mau Parau Fafau 60:2–4; 61:1–2, 20, 36–38; 62:1, 6 nō te ’ite mai i te mea i ha’api’ihia nō ni’a i te Fa’aora. E aha te mau ’ā’amu nō roto mai i te mau pāpa’ira’a mo’a ’aore rā, i tō tātou iho orara’a e fa’ahōho’a nei i te mau ’ohipa ’e te mau huru o te Fa’aora ’o tā tātou i ha’api’i mai ? (’ei hi’ora’a, Ioane 8:1–11; Etera 2:14–15). E nehenehe ’outou e ani i te mau melo o te piha ’ia fa’a’ite mai i tō rātou ’itera’a pāpū nō Iesu Mesia ’aore rā, ’ia feruri ’ōmo’e e aha tōna faufa’a nō rātou.

Te Parau Ha’api’ira’a ’e te mau Parau Fafau 60:5; 61:22; 62:5–8

Tē hinaaro nei te Fatu ’ia rave tātou i te tahi mau fa’aotira’a « ’ia au i tō [tātou] mana’o e maita’i ai ».

• ’A feruri e ani i te mau melo o te piha ’ia tai’o mai i Te Parau Ha’api’ira’a ’e te mau Parau Fafau 60:5; 61:22; 62:5–8 e to’opiti ’aore rā e pupu na’ina’i ’e ’ia fa’a’ite mai e aha tō rātou ferurira’a tei riro ’ei parau poro’i nā te Fatu ia tātou. E aha te taime i ’ite ai rātou e ti’a ia rātou ’ia fa’a’ohipa i tō rātou iho mana’o ha’avā nō te rave i te hō’ē fa’aotira’a ? ’A feruri e fa’a’ite atu i te fa’ahitira’a parau a te peresideni Dallin H. Oaks i roto « Te tahi atu mau rāve’a tauturu » ’ei tuha’a nō tā ’outou ’āparaura’a. Nāhea te mau metua i te tauturu i tā rātou mau tamari’i ’ia ’apo mai i teie parau tumu faufa’a roa ?

Te tahi atu mau rāve’a tauturu

’Ohipa mai te au i tō tātou mau mana’o ha’avā maita’i a’e.

ʼUa haʼapiʼi te peresideni Dallin H. Oaks ē :

« Te hina’aro ’ia arata’ihia e te Fatu, ’ua riro ïa ’ei hō’ē pūai, e ti’a rā ’ia ’āpitihia atu e te ’ite-pāpū-ra’a i te mea ē e vaiiho tō tātou Metua i te Ao ra e rave rahi mau fa’aotira’a nō tō tātou iho mau mā’itira’a. Te ravera’a i te fa’aotira’a nō tātou iho ’o te hō’ē ïa o te mau tumu nō te tupura’a i te rahi ’o te ti’a ia tātou ’ia ’ite i roto i te orara’a tāhuti nei. Te feiā e tāmata nei e fa’a’ite i tā rātou mau fa’aotira’a ato’a i te Fatu ’e ’o tē tāparu nei nō te heheura’a i roto i te mau mā’itira’a ato’a, fātata te mau ’ohipa e tupu ’o tā rātou e pure ’ia arata’ihia rātou ’e e’ita ra e fāri’i i te reira. ’Ei hi’ora’a, teie te mea pāpū e tupu i roto e rave rahi huru fa’anahora’a i reira te mau mā’itira’a faufa’a ’ore ’aore rā te hō’ē ’aore te tahi te fāri’ihia.

« E ti’a ia tātou ’ia tuatāpapa i te mau mea i roto i tō tātou ferurira’a, ma te fa’a’ohipa i te mau mana nō te ferurira’a tā tō tātou Rahu i tu’u i roto ia tātou. I muri iho e ti’a ia tātou ’ia pure nō te fāri’i i te arata’ira’a ’e ’ia rave mai te reira ’ia fāri’i ana’e tātou. Mai te mea ’aita tātou e fāri’i i te arata’ira’a, e ti’a ia tātou ’ia rave mai te au i tō tātou mana’o ha’avā maita’i a’e » (Our Strengths Can Become Our Downfall »,Ensign, ’Ātopa 1994, 13–14).

Ha’amaita’ira’a i tā tātou ha’api’ira’a

’Ia ’ite i te feiā e aro nei. E mea fifi ’ia ’ite i te mau arora’a a te feiā tā ’outou e ha’api’i nei. Nā roto rā i te tauturu a te Vārua ’e a tō ’outou feiā fa’atere, e nehenehe ’outou e ’ite i te rāve’a maita’i a’e nō te toro i te rima i teie feiā. (Hi’o Ha’api’ira’a mai tā te Fa’aora, 8-9.)