21–27 nō Tiunu

Te Parau Ha’api’ira’a ʼe te mau Parau Fafau 67–70

« Mea faufa’a… te mau tao’a nō te ao ato’a nei »

Te aura’a te fa’aineinera’a nō te ha’api’i ’ua hau ïa i te ferurira’a i te mea tā ’outou e parau ’e e rave ’ei ’orometua ha’api’i. E ti’a ’ia tu’u ato’a i te tuatāpapara’a i te mea tā te mau pīahi e nehenehe e rave nō te ha’api’i te tahi ’e te tahi. Nāhea ’outou i te ani i te mau melo o te piha ’ia fa’a’ite mai i te mau ’itera’a ’aore rā i te mau mana’o tā rātou i fāri’i i te tai’ora’a i teie mau pāpa’ira’a mo’a ?

Pāpa’i i te mau mana’o e tae mai

Tītau i te mana’o

E pāpa’i i ni’a i te tāpura ’ere’ere Teie hepetoma ’ua ha’api’i te Fatu iā’u … ’e e ani i te mau melo o te piha ’ia fa’aoti mai i te pereota i te mea tā rātou i ha’api’i mai.

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 67:1–9

Te mau heheura’a tei hōro’ahia nā roto mai ia Iosepha Semita e parau mau ïa ’e nō ’ō mai i te Atua ra.

• Te māramaramara’a i te terera’a o te ’ā’amu o Te Parau Ha’api’ira’a ’e te mau Parau Fafau 67 e riro ’ei mea faufa’a nō te hō’ē ’āparaura’a nō ni’a i teie tuha’a. Penei a’e e nehenehe te hō’ē pīahi e pū’ohu poto mai i te mau ’ohipa i tupu tei arata’i atu i teie heheura’a (hi’o Te Parau Ha’api’ira’a ’e te mau Parau Fafau 67, tuha’a upo’o parau; Te feiā mo’a, 1:140–43). ’Āhani pai tei reira tātou i roto i te putuputura’a i te vauvaura’ahia mai te mau heheura’a i ’āparauhia, e ’aha te mau tumu tā tātou e hōro’a nō te fa’ati’a i teie mana’o ? E aha tā tātou e parau i te mau ta’ata i roto i te hepohepo nō ni’a i te mau hapehape o te reo ’o Iosepha Semita ? E aha tā te tuha’a 67 e ha’api’i nei ia tātou nō ni’a i te mau peropheta ’e te heheura’a ? E nehenehe ato’a te mau melo o te piha e fa’a’ite mai nāhea rātou i te ha’api’ira’a mai nā roto ia rātou iho ē e parau mau teie mau heheura’a.

Te Parau Ha’api’ira’a ’e te mau Parau Fafau 68:1–6

Te mau parau fa’auru a te mau tāvini ’o te Fatu e mau parau ïa a te Fatu.

• Nō te tauturu i te mau melo o te piha ’ia tāu’aparau Te Parau Ha’api’ira’a ’e te mau Parau Fafau 68:1–6, e ani atu ia rātou ’ia tai’o mai nā roto i te mau pupu na’ina’i i teie mau ’īrava ’e ’ia fa’a’ite mai i te tahi ’e te tahi te mau parau mai tā rātou i ’apo mai nō ni’a i te mau ha’api’ira’a a te mau tāvini ’o te Fatu. E ani i te mau pupu ’ia fa’a’ite mai i te tahi ’e te tahi nāhea rātou i te ’itera’a e parau mau te mau parau tumu tei ha’api’ihia i roto i te ’īrava 4. E nehenehe te mau melo o te piha e fa’a’ite mai i te mau ’itera’a rau ’a paraparau ai ’aore rā ’a ha’api’i ai rātou mai te mea ra « i uruhia ra e te Vārua Maita’i » (’īrava 3) e mea nāhea te Fatu i te vaira’a ’e i te ti’ara’a i pīha’i iho ia rātou (hi’o ’īrava 6).

• Mai te mea e hina’aro ’outou e ’āparau i te huru e tū’ati ai teie mau ’īrava i te mau ha’api’ira’a a te mau tāvini ’o te Fatu i roto i te mau ’āmuira’a rahi, e tauturu te fa’ahitira’a parau a Elder Jeffrey R. Holland i roto i « Te tahi atu mau rāve’a tauturu ». E nehenehe ato’a te mau pīahi e fa’a’ite mai i te mau parau poro’i nō te ’āmuira’a i tupu iho nei tei ha’apūai i tō rātou fa’aro’o i roto i te ha’api’ira’a tumu i roto i teie mau ’īrava.

Te Parau Ha’api’ira’a ’e te mau Parau Fafau 68:25–31

E hōpoi’a nā te mau metua ’ia ha’api’i i tā rātou mau tamari’i.

• Tē vai ra ānei te mau metua i roto i tā ’outou piha—’aore rā, e mau metua nō ananahi ? Penei a’e e fana’o rātou nā roto i te ’āparaura’a nō ni’a i te mau a’o a te Fatu i te mau metua i roto i te tuha’a 68. ’Ei hi’ora’a, e nehenehe paha vetahi mau metua e mā’iti mai hō’ē parau tumu nō roto mai i te mau ’īrava 25–28 ’e ’ia fa’ata’a mai nāhea rātou i te tāmata i te ha’api’i i teie mau mea i tā rātou mau tamari’i (mau ’īrava 29–31 tē vai ato’a ra te mau parau tumu faufa’a roa). ’Aore rā, e fa’a’ite mai te mau melo o te piha nāhea tō rātou mau metua i te ha’api’ira’a ia rātou te mau parau tumu o te ’evanelia.

  Nō te aha ’o te ’utuāfare te vāhi maita’i a’e nō te mau tamari’i ’ia ha’api’i mai i te ’evanelia ? E aha tā tātou e parau i te mau metua ’o tē mana’o nei ’aita e mara’a ’aore rā ’ua tuauruhia i te hōpoi’a nō te ha’api’i i tā rātou mau tamari’i ?

  

  ’Ua hōro’a te Atua i te mau metua te hōpoi’a nō te ha’api’ira’a i tā rātou mau tamari’i.

Te Parau Ha’api’ira’a ’e te mau Parau Fafau 70:1–4

E hōpoi’a nā tātou te mau heheura’a ’o tā te Fatu i hōro’a mai ia tātou.

• ’Ua hōro’a te Fatu i te tahi mau taea’e i te ti’a’aura’a i te mau heheura’a nō te ’āfa’i i te reira i Missouri ’e ’ia hi’opo’a i tō rātou nene’ira’a. Mai te hea huru tātou e nehenehe ai e fa’ata’a ia tātou iho ’ei mau ti’a’au nō te mau heheura’a ? E aha te tahi atu mau ha’api’ira’a i roto i teie tuha’a nō ni’a i te ti’a’aura’a e tano nō tātou ?

Te tahi atu mau rāve’a tauturu

Tē paraparau nei te Atua ia tātou i teie mahana.

’Ua fa’a’ite mai Elder Jeffrey R. Holland nāhea te parau tumu i ha’api’ihia i roto i Te Parau Ha’api’ira’a ’e te mau Parau Fafau 68:4 e tano ai i te ’āmuira’a rahi : « Tē ani nei au ē i te mau mahana i mua nei ’ia feruri ’outou, ’eiaha noa i ni’a i te mau poro’i tā ’outou i fa’aro’o, i te ’ohipa ta’a ’ē ato’a rā o te ’āmuira’a rahi iho—te mea tā tātou te feiā mo’a i te mau mahana hope’a nei e ti’aturi e aha mau ra te mau ’āmuira’a ’e te mea tā tātou e ani i tō te ao ’ia fa’aro’o ’e ’ia ha’apa’o. Tē fa’a’ite pāpū nei mātou i tō te mau fenua ato’a, te mau ’ōpū ato’a, te mau reo ato’a ’e te mau nuna’a ato’a ē, ’aita te Atua e ora noa ra, e paraparau ato’a ’oia, te a’ora’a tā tātou i fāri’i nō tō tātou tau ’e i tō tātou mahana, i raro a’e i te arata’ira’a a te Vārua Mo’a o « te hina’aro ïa ’o te Fatu … te parau a te Fatu … te reo ’o te Fatu, ’e e mana ho’i ’o te Atua e tae noa atu i te ora’ [Te Parau Ha’api’ira’a ’e te mau Parau Fafau 68:4] » (« E reva nō te mau fenua », Ensign ’aore rā Liahona, Mē 2011, 111).

Ha’amaita’ira’a i tā tātou ha’api’ira’a

Tauturu i te mau pīahi ’ia turu i te tahi ’e te tahi. « ’Ua riro te pīahi tāta’itahi i roto i tā ’outou piha ’ei puna rahi nō te ’itera’a pāpū, te mau hi’ora’a ātea ’e te mau ’itera’a rau nō te orara’a i te ’evanelia. ’A ani ia rātou ’ia fa’a’ite mai ’e ’ia turu i te tahi ’e te tahi » (Ha’api’ira’a mai tā te Fa’aora, 5).