Faufa’a i te ’ā’au o te tīa’i mamoe, nā Simon Dewey

28 nō Tiunu–4 nō Tiurai

Te Parau Ha’api’ira’a ʼe te mau Parau Fafau 71–75

« ’Aore e mauha’a e tu’uhia i mua i tō ’outou manuia »

ʼA taiʼo ai ʼoutou i Te Parau Ha’api’ira’a ʼe te mau Parau Fafau 71–75 ’a feruri i te mau ta’ata tā ʼoutou e haʼapiʼi ra. E aha tā ʼoutou i ʼite nō ni’a ia rātou ? E aha tā rātou e hina’aro ?

Pāpa’i i te mau mana’o e tae mai

Tītau i te mana’o

E ani i te mau melo o te piha ’ia fa’a’ite mai i te tahi mau parau mau ’o tā rātou i ’ite mai i roto i tā rātou tuatāpapara’a nō Te Parau Ha’api’ira’a ʼe te mau Parau Fafau 71–75. E aha te mau ’itera’a tā rātou i fāri’i ’e teie mau parau mau ?

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 71

E nehenehe tātou e pe’e i te arata’ira’a a te Vārua Maita’i ’a pāruru ai tātou i tō tātou mau ti’aturira’a.

• ’Ua fāri’i a’ena ānei tātou i te ri’ari’a ’aore rā i te ’iriā i te pārurura’a i tō tātou mau ti’aturira’a ? E nehenehe paha ’outou e ani i te mau melo o te piha ’ia pāpa’i i ni’a i te tāpura ’ere’ere te mau ta’o ’aore rā te mau pereota tā rātou i ’ite mai i roto i Te Parau Ha’api’ira’a ’e te mau Parau Fafau 71 ’o tē fa’ata’a nei nāhea te Fatu i te anira’a ia Iosepha ’e ia Sydney ’ia pāhono i te mau fa’a’inora’a a Ezra Booth ’e a vetahi ’ē. I muri iho, e ’āparau te mau melo o te piha nā roto i te mau pupu na’ina’i e aha te aura’a nō tātou teie mau arata’ira’a i teie mahana. Nō te aha e mea faufa’a ’ia rave tātou « mai te au i te reira tuha’a o te Vārua » tā te Fatu i hōro’a ia tātou ? (’īrava 1).

  E tano atoa ’ei tauturu ’ia māta’ita’i i te video « Everyday Example: When Beliefs Are Questioned » (ChurchofJesusChrist.org). E nehenehe te mau melo o te piha e ’imi mai nō te ’apo mai i te mau parau mau i roto i te tuha’a 71 tei fa’ata’ahia mai i roto te video. Penei a’e e nehenehe ato’a rātou e fa’a’ite mai i te mau hi’ora’a e nāhea te Fa’aora i te pāhonora’a i tōna feiā fa’a’ino (’ei hi’ora’a, hi’o Mataio 22:15–22; 26:59–64; Ioane 10:37–38).

Te Parau Ha’api’ira’a ’e te mau Parau Fafau 72:8–16

’Ua riro te mau ’episekōpo ’ei mau ti’a’au nō te mau ’ohipa pae vāru’a ’e te mau ’ohipa pae tino o te bāsileia ’o te Fatu.

• Nāhea te mau arata’ira’a a te Fatu ia Newel K. Whitney, ’a pi’ihia ai ’oia ’ei ’episekōpo i Kirtland, i te tauturu i te feiā tā ’outou e ha’api’i ra ’ia fa’ahiahia i te ’episekōpo tei pi’ihia nō te tāvini ia rātou ? E ani i te mau pīahi ’ia ’imi i roto i Te Parau Ha’api’ira’a ’e te mau Parau Fafau 72:8–16, te tahi o te mau hōpoi’a a te ’episekōpo Whitney ’e i muri iho ’ia fa’aau i te mau hōpoi’a a te mau ’episekōpo i teie mahana (hi’o te fa’ata’ara’a a peresideni Gordon B. Hinckley nō te mau hōpoi’a a te hō’ē ’episekōpo i roto « Te tahi atu mau rāve’a tauturu » ’aore rā i te video e tano, « The Office of Bishop » [ChurchofJesusChrist.org]). Penei a’e e nehenehe te mau melo o te piha e fa’a’ite mai nāhea rātou i te ha’amaita’ihia e te tāvinira’a a te hō’ē ’episekōpo. E aha tā tātou e ti’a ’ia rave nō te pāturu hope roa i tō tātou ’episekōpo ?

  

  Tē tauturu nei te mau ’episekōpo i te mau melo ’ia pāhono i tō rātou mau hina’aro pae tino.

Te Parau Ha’api’ira’a ’e te mau Parau Fafau 73

E nehenehe tātou e ’imi i te mau rāve’a nō te fa’a’ite i te ’evanelia.

• ’Ua parau te Fatu ia Iosepha Semita ’e ia Sidney Rigdon ’ia poro i te ’evanelia « mai te mea e oti ’ia nā reira » (Te Parau Ha’api’ira’a ’e te mau Parau Fafau 73:4) mā te ’ohipa ato’a i ni’a i te ’īritira’a i te Bibilia. Penei a’e e nehenehe te mau pīahi e fa’ata’a mai i te tahi mau rāve’a tā rātou i « nā reira »—’aore rā i fa’atupu—nō te fa’a’ite i te ’evanelia nā roto i te tahi atu mau hōpoi’a tā rātou. E nehenehe rātou e ’īriti mai i te parau a’o i roto i te parau poro’i a Elder Dieter F. Uchtdorf « ’Ohipa misiōnare : Fa’a’itera’a i te mea i roto i tō ’outou ’ā’au » (Ensign ’aore rā Liahona, Mē 2019, 15–18).

Te Parau Ha’api’ira’a ’e te mau Parau Fafau 75:2–16

Tē hina’aro nei te Atua ia tātou ’ia « rave i te ’ohipa mai tō [tātou] pūai ».

• E nehenehe te mau arata’ira’a a te Fatu i te mau peresibutero e rave rahi nō ni’a i te fa’a’itera’a i te ’evanelia, e fa’auru i te mau melo o te piha ’ia fa’a’ite itoito atu ā i te ’evanelia. E pāpa’i i ni’a i te tāpura ’ere’ere ’ohipa ma tō ’outou pūai ’e e ani i te mau pīahi ’ia tāpura mai i te mau ta’o ’e te mau pereota ’o te tae mai i tō rātou ferurira’a ’ia mana’o ana’e rātou i te hō’ē ta’ata e ’ohipa ra ma te pūai nō te fa’a’ite i te ’evanelia. E nehenehe ato’a rātou e ’āparau e aha te aura’a « e ha’amarirau » ’aore rā « e fa’aea noa » i roto i te fa’a’itera’a i te ’evanelia. E aha tā Te Parau Ha’api’ira’a ’e te mau Parau Fafau 75:2–16 e ha’api’i nei ia tātou nō ni’a e nāhea te Fa’aora i te pāturu i te feiā e tāvini nei iāna ma te ha’apa’o maita’i ?

Te tahi atu mau rāve’a tauturu

Te mau hōpoi’a a te hō’ē ’episekōpo.

’Ua ha’api’i te peresideni Gordon B. Hinckley :

« Tē amo nei au i roto i tō’u ’ā’au i te hō’ē māuruuru rahi nō tō tātou mau ’episekōpo. ’Ua māuruuru rahi au nō te heheura’a a te Mana Hope i raro a’e i te reira ’ua fa’atupuhia teie tōro’a ’e tē tere nei…

« … Tē tīa’i nei mātou ia ’outou ’ia riro ’ei tahu’a rahi peresideni nō te pāroita, ’ei hō’ē ta’ata a’o nō te mau ta’ata, ’ei hō’ē pāruru ’ei hō’ē tauturu nō te feiā i roto i te fifi, ’ei hō’ē tāmahanahana nō te feiā e māuiui ra, ’ei hō’ē ta’ata hōro’a nō te feiā i roto i te nava’i ’ore. Tē tīa’i nei mātou ia ’outou ’ia ti’a ’ei tīa’i ’e ’ei pāruru nō te ha’api’ira’a tumu e ha’api’ihia ra i roto i tā ’outou pāroita, nō te maita’i o te ha’api’ira’a, nō te fa’atupu e rave rahi mau tōro’a e hina’arohia…

« … E ti’a ia ’outou ’ia hi’o ē ’aore roa e ta’ata e po’ia ra, ’aore rā ’aita e ’ahu ’aore rā e vāhi nohora’a. E ti’a ia ’outou ’ia ’ite i te huru orara’a o te feiā ato’a ’o tā ’outou e peresideni nei.

« E ti’a ia ’outou ’ia riro ’ei fa’aa’o ’e ’ei hō’ē arata’i nō tō ’outou mau ta’ata. ’Ia vai matara noa tō ’outou ’ūputa nō te mau tūoro o te ’ati. E ti’a i tō ’outou tua ’ia vai pūai i roto i te tātuha’ara’a i tā rātou mau hōpoi’a. E ti’a ia ’outou ’ia toro i te rima nō te here e tae noa atu i te feiā ’ī’ino » (« The Shepherds of the Flock », Ensign, Mē 1999, 52–53).

Ha’amaita’ira’a i tā tātou ha’api’ira’a

Riro mai ’ei hō’ē ’orometua ha’api’i Huru Mesia a’e. ’A feruri ma te fa’a’ohipa i te mau uira’a hi’opo’ara’a iāna iho i te ’api 37 nō te Ha’api’ira’a mai tā te Fa’aora nō te tauturu ’ia ’outou ’ia ’apo mai nāhea ’outou i te ha’api’i rahi atu mai tā te Fa’aora.