Te Mesia ’e te ha’apa’o ture tao’a rahi

Te Mesia ’e te ha’apa’o ture tao’a rahi, nā Heinrich Hofmann

19–25 nō Tiurai

Te Parau Ha’api’ira’a ʼe te mau Parau Fafau 81–83

« ’O tei tu’uhia atu te mea rahi ra, e mea rahi ato’a ïa te tītauhia atu »

’A ha’amana’o ē, e ora te mau melo o tā ’outou piha i te mau ’itera’a rau pae vārua ’ia tuatāpapa ana’e rātou i te mau pāpa’ira’a mo’a i’ō rātou. ’A feruri ma te pure, e nāhea ’outou i te fa’aitoito ’ia rātou ’ia fa’a’ite mai i tō rātou ’itera’a nō te patu te tahi ’e te tahi.

Pāpa’i i te mau mana’o e tae mai

ītona fa’a’itera’a

Tītau i te mana’o

E ani i te mau melo o te piha ’ia mā’iti i roto i te mau tuha’a i muri nei, hō’ē pereota ’o te hōro’a mau i te hō’ē upo’o parau maita’i nō teie tuha’a : Te Parau Ha’api’ira’a ʼe te mau Parau Fafau 81, 82 ’e 83. Nō te aha rātou i mā’iti ai i te reira mau upo’o parau ?

’ītona ha’api’ira’a

Ha’api’i i te ha’api’ira’a tumu

Te Parau Ha’api’ira’a ʼe te mau Parau Fafau 81:5; 82:18–19

E ti’a ia tātou tāta’itahi ’ia ’imi i « te maita’i nō tō [tātou] ra ta’ata tupu ».

• Tē fa’ahiti nei te arata’i nō teie hepetoma i roto te Mai, pe’e mai—nō te ta’ata hō’ē ’e te ’utuāfare i te mau uira’a ’ia ferurihia nō ni’a i Te Parau Ha’api’ira’a ʼe te mau Parau Fafau 81:5. E nehenehe ato’a e riro ’ei mau uira’a maita’i nō te tāu’aparau nō tā ’outou piha. ’A feruri ato’a e fa’a’ite i te hō’ē ’itera’a nō ’outou iho « ’a paruparu ai » ’outou i te hō’ē taime ’e ’ua turuhia ’aore rā ’ua ha’apūaihia ’outou e te tāvinira’a a te hō’ē ta’ata. Penei a’e hō’ē ā ’itera’a nō te fa’a’ite tō te mau melo o te piha. E nehenehe ato’a ’outou e māta’ita’i i te video « Works of God » (ChurchofJesusChrist.org) nō te fa’auru i te mau melo o te piha ’ia tāvini te tahi ’e te tahi. E fa’a’ite ato’a i te fa’ahitira’a parau a te peresideni M. Russell Ballard i roto i « Te tahi atu mau rāve’a tauturu ».

• E ani i te mau melo o te piha ’ia tuatāpapa i Te Parau Ha’api’ira’a ʼe te mau Parau Fafau 82:18–19, ma te ’imi i te mau parau tumu ’o te tauturu ia rātou ’ia ta’a maita’i i te mau ’ōpuara’a ’e te mau ha’amaita’ira’a nō te tāvinira’a ia vetahi ’ē. I muri iho, e vaiiho ia rātou ’ia fa’a’ite mai i te mea tā rātou i ’apo mai. E nehenehe ato’a e māta’ita’i i te video « Teachings of Thomas S. Monson: Rescuing Those in Need » (ChurchofJesusChrist.org). Mea nāhea te mau melo nō te pāroita a te ’episekōpo Monson fa’ahōho’ara’a i te mea tā te mau ’īrava 18–19 e ha’api’i nei ?

Te Parau Ha’api’ira’a ʼe te mau Parau Fafau 82:8–10

« ’Ua ru’uru’uhia vau, ’o te Fatu, ’ia rave ’outou i te mea tā‘u i parau ra ».

• Nō te tauturu i te mau melo o te piha ’ia māramarama i te aura’a i rotopū i tō tātou hina’aro e ha’apa’o ’e te mau ha’amaita’ira’a tā te Atua i fafau, e nehenehe ’outou e tai’o ’āmui ’aore rā nā te mau pupu na’ina’i i Te Parau Ha’api’ira’a ʼe te mau Parau Fafau 1:37–38; 82:10; 130:20–21. E aha tā teie mau pāpa’ira’a mo’a e ha’api’i nei ia tātou nō ni’a i te Fatu ? E nehenehe paha te mau pīahi e tāpura mai i te mau ta’o e fa’ata’a nei i tōna huru, tei fa’atumuhia i ni’a i teie mau ’īrava.

• I muri a’e i te tai’ora’a i te ’īrava 10, e nehenehe te mau melo o te piha e paraparau mai i te mea tā te Fatu i fafau mai ia tātou ’e e nāhea te Fatu i te tāpe’ara’a i tāna mau fafaura’a. E tauturu te ’ā’amu ’o te tuahine Virginia H. Pearce i roto i « Te tahi atu mau rāve’a tauturu » i te mau melo o te piha ’ia māramarama ē e ha’amaita’i te Fatu ia tātou mai te au i tōna iho pa’ari, ’eiaha noa ra mai tā tātou e hina’aro ’aore rā mai tā tātou e tīa’i nei.

• E aha tā tātou i ha’api’i mai nā roto mai i Te Parau Ha’api’ira’a ’e te mau Parau Fafau 82:8–10 nō ni’a e nō te aha te Metua i te Ao ra e hōro’a mai ai te mau fa’auera’a ia tātou ? Penei a’e e ’ite mai te mau melo o te piha i roto i teie mau ’īrava te mau fa’a’itera’a maita’i nō te tauturu i te hō’ē hoa ’aore rā i te hō’ē tamari’i ’o tē mana’o nei ē ’ua tā’ōti’a te mau fa’auera’a (hi’o ato’a te video « Blessed and Happy Are Those Who Keep the Commandments of God », ChurchofJesusChrist.org). ’Aore rā, e nehenehe rātou e fa’a’ite mai i te mau ’itera’a tei ha’api’i ia rātou ’ia hi’o i te mau fa’auera’a mai te mau ha’amaita’ira’a.

’ītona te tahi atu mau rāve’a tauturu

Te tahi atu mau rāve’a tauturu

Te ha’apa’ora’a fa’aro’o mau

’Ua ha’api’i te peresideni M. Russell Ballard :

« I roto i tō tātou ti’ara’a pipi, ’ua rau tā tātou mau anira’a, mau mana’ona’ora’a, ’e te mau tītaura’a. Terā rā, e mea ti’a i te tahi mau ’ohipara’a ’ia riro ’ei mau mea tumu nō tō tātou ti’ara’a melo nō te ’Ēkālesia. ‘Nō reira’, ’ua fa’aue mai te Fatu ē, ‘’a ha’apa’o maita’i ; ’a ti’a noa mai i roto i te tōro’a tā’u i fa’ata’a nō ’oe na ; ’a aupuru i te feiā paruparu, ’a fa’ateitei mai i te rima tautau ra i ni’a, ’e ’a fa’a’eta’eta i te mau turi ’āvae paruparu ra’ [Te Parau Ha’api’ira’a ’e te mau Parau Fafau 81:5; tu’uhia te pāpa’i ’opa].

« Teie te ’Ēkālesia e ’ohipa nei ! Teie te ha’apa’ora’a fa’aro’o mau ! Teie te ’evanelia i roto i tōna aura’a mau, ’a tauturu ai tātou, ’a fa’ateitei ai ’e ’a ha’apūai ai i te feiā tē hepohepo nei i te pae vārua ’e i te pae tino ! Nō te rave i te reira, tītauhia ia tātou ’ia fārerei ia rātou ’e ’ia tauturu ia rātou [hi’o Iakobo 1:27], ’ia ti’a i tō rātou ’itera’a pāpū nō ni’a i te fa’aro’o i te Metua i te Ao ra ’e ia Iesu Mesia ’e i tōna tāra’ehara ’ia mau pāpū i roto i tō rātou māfatu » (« Te mau hōro’a faufa’a rahi nō ’ō mai i te Atua ra », Ensign ’aore rā Liahona, Mē 2018, 11).

E ha’amaita’i te Fatu ia tātou nā roto i tāna iho mau rāve’a fa’ahiahia.

’Ua parau te tuahine Virginia H. Pearce, melo tahito nō te peresidenira’a rahi o te Feiā ’Āpī Tamāhine, nō ni’a i te hō’ē vahine tei ha’ape’ape’a nō tāna mau tamari’i tei ha’apa’o ’ore. ’Ua tu’u ’oia i te hō’ē ’ōpuara’a hahavai ’ia haere rahi i te hiero ’e ’ia ’ite pāpū ē e fa’atura te Fatu i teie fa’atusiara’a rahi ma te tauira’a i te ’ā’au o tāna mau tamari’i. ’Ua fa’a’ite mai te vahine :

« I muri a’e e ’ahuru matahiti i te haere-rahi-ra’a i te hiero ’e te pure tāmau, ’ua pe’ape’a vau i te parau ē ’aita te mau mā’itira’a a tā’u mau tamari’i i taui…

« ’Ua taui rā vau. ’Ua riro vau ’ei vahine ta’a ’ē… ’Ua fa’a’ore au i te tā’ōti’a i tō’u taime ’e ’ua nehenehe au e tīa’i i te Fatu… ’Ua taui tā’u mau tīa’ira’a. Maoti i te tīa’ira’a ’ia taui tā’u mau tamari’i, ’ua tīa’i au i teie mau hāmani maita’i pinepine mārū ’e ’ua ’ī au i te ’ā’au mehara nō rātou… Tē ha’a nei te Fatu ma te mau rāve’a fa’ahiahia mau, ’e ’ua ’ī au i te hau tei nā ni’a a’e i te mau ’itera’a ato’a » (i roto « Pure : hō’ē ’ohipa na’ina’i ’e te ’ōhie », I te terono [2017], 288–89).

Ha’amaita’ira’a i tā tātou ha’api’ira’a

Ani i te feiā ’āpī ’ia riro ’ei tufa’a nō tā ’outou ha’api’ira’a. Hōro’a i te feiā ’āpī te mau rāve’a nō te ha’api’i te tahi ’e te tahi E riro te fa’aro’ora’a i te mau ’itera’a pāpū ’aore rā i te mau ’itera’a o te tahi ’e te tahi i te tauturu maita’i. Mai te mea e tītauhia, ’a tauturu i te feiā ’āpī ’ia fa’aineine nō te ha’api’i, ’e ’ia fa’a’ite ia rātou e aha te aura’a ’ia ha’api’i mai tā te Fa’aora (hi’o Ha’api’ira’a mai tā te Fa’aora, 27–28).