Fa’aho’i-fa’ahou-ra’a mai nā Liz Lemon Swindle

26 nō Tiurai–1 nō ’Ātete

Te Parau Ha’api’ira’a ’e te mau Parau Fafau 84

« Te mana nō te huru Atua »

E aha tā ’outou e rave nō te ani manihini i te mau melo o te piha ’ia fa’a’ite mai i te mea tā rātou i ha’api’i mai ’a tuatāpapa ai rātou i Te Parau Ha’api’ira’a ’e te mau Parau Fafau 84 ?

Pāpa’i i te mau mana’o e tae mai

Tītau i te mana’o

E ani i te mau melo o te piha ’ia fa’a’ite mai i te tahi atu melo o te piha i te hō’ē parau mau tā rātou i ’ite mai i roto i te tuha’a 84 tei fa’auru ia rātou ’aore rā tei tauturu ia rātou ’ia māramarama maita’i i te autahu’ara’a a te Atua. I muri iho, e ani i te tahi ’ia fa’a’ite mai i te piha.

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 84:1–5, 17–28, 31–42

E fāri’i pā’āto’a tātou i te mana o te autahu’ara’a a te Atua ’e te mau ha’amaita’ira’a.

• Tē ha’amata nei te Fatu i teie « heheura’a nō ni’a i te autahu’ara’a » (Te Parau Ha’api’ira’a ’e te mau Parau Fafau 84, tuha’a upo’o parau) nā roto i te ha’api’ira’a ē e patuhia te hō’ē hiero i Ziona (hi’o mau ’īrava 1–5). Nāhea ’outou i te tauturu i te mau melo o te piha ’ia māramarama i te aura’a i rotopū i te mau ’ōpuara’a mo’a o te mau hiero ’e te autahu’ara’a ? E nehenehe ’outou e ha’amata ma te pāpa’ira’a i te hō’ē uira’a i ni’a i te tāpura ’ere’ere mai teie E aha te mau ’ōpuara’a o te autahu’ara’a ? ’e te anira’a i muri iho i te mau melo o te piha ’ia ’imi i te mau pāhonora’a i roto i Te Parau Ha’api’ira’a ’e te mau Parau Fafau 84:17–28, 31–42. Nāhea te mau hiero ’e te mau ’ōro’a hiero i te tauturu ’ia fa’atupu i teie mau ’ōpuara’a ?

• Nō te tauturu i te mau pīahi ’ia māramarama i te mana o te autahu’ara’a e roa’a i roto i tō rātou orara’a, e ani ia rātou ’ia tai’o Te Parau Ha’api’ira’a ’e te mau Parau Fafau 84:17–28 ’e ’ia feruri e nāhea tō rātou orara’a i te ta’a ’ē ’aita ana’e te autahu’ara’a a te Atua. E fa’aitoito ia rātou ’ia fa’a’ite mai nō te aha rātou i māuruuru ai nō te autahu’ara’a, ’oia ato’a te mau ’itera’a tā rātou i ora ma te mana o te autahu’ara’a—i roto i tō rātou ’utuāfare, te mau pi’ira’a ’aore rā, tō rātou iho orara’a. Nāhea e ti’a ai ia tātou ’ia fāri’i mai i te mana o te autahu’ara’a ?

• E fa’a’ohipara’a ta’a ’ē te tapura’a ’e te fafaura’a o te autahu’ara’a (hi’o Te Parau Ha’api’ira’a ’e te mau Parau Fafau 84:31–42) nō te feiā tei fa’atōro’ahia i te hō’ē tōro’a o te autahu’ara’a. Terā rā, e rave rahi mau ha’amaita’ira’a tei fafauhia i roto i teie mau ’īrava e roa’a i te tā’āto’ara’a. Nō te tauturu i te mau melo o te piha ’ia ’ite nāhea teie mau fafaura’a e tano ai nō rātou, e ani ia rātou ’ia tai’o te mau ’īrava 33–42 ’e ’ia paraparau mai nō ni’a i te mau rāve’a e nehenehe ai tātou e « fāri’i » i te autahu’ara’a (’īrava 35), te mau tāvini a te Fatu, ’e te Fatu. E nehenehe ato’a rātou e tai’o i te fa’ahitira’a parau i roto « Te tahi atu mau rāve’a tauturu » nō te ’ite mai e aha te ti’a ia tātou e rave nō te fāri’i i te mau ha’amaita’ira’a o te autahu’ara’a. E tauturu i te mau melo o te piha ’ia feruri e aha te mea e tu’u i roto « te mau mea ato’a nā [te] Metua ra » (’īrava 38), mai tōna mau huru ’e te huru orara’a tāna e fāna’o nei. E aha atu ā tā tātou e fa’ahiahia nei nō ni’a i teie mau ’īrava ’e te mau fa’ahitira’a parau ?

  

  E ha’amaita’i te mau ’ōro’a o te autahu’ara’a i te mau tamari’i ato’a a te Atua.

Te Parau Ha’api’ira’a ’e te mau Parau Fafau 84:61–88

E pāturu te Fatu i te feiā e tāvini iāna.

• Noa atu ’ua hōro’ahia teie mau ’īrava nō te feiā « e haere atu ’e ’ia poro i teie ’evanelia nō te bāsileia » (’īrava 80), e rave rahi mau parau tumu e vai ra i roto e tano nō te feiā e tāvini i te Atua. E nehenehe ’outou e hōro’a i te pīahi tāta’itahi hō’ē tuha’a o Te Parau Ha’api’ira’a ’e te mau Parau Fafau 84:61–88 ’ia tai’o ’e ’ia ani ia rātou ’ia fa’a’ite mai ’e te tahi atu pīahi i te mea tā rāua i ’apo mai ’e ’o te tano nō te feiā e tāvini i te Fatu. E nehenehe te mau pīahi e mā’iti i te hō’ē ’īrava ’aore rā hō’ē pupu ’īrava nō te tāmau ’ā’au ’aore rā nō te pia i te hō’ē vāhi e ’ite rātou te reira i te mau mahana ato’a. E aha te mau fafaura’a e mea ’oa’oa roa a’e ? E aha tā tātou e fa’a’ite atu nō roto mai i teie mau ’īrava nō te fa’auru i te mau misiōnare rave tāmau i teienei ’aore rā, i te feiā e fa’aineine nei nō te tāvini ?

Te tahi atu mau rāve’a tauturu

E nehenehe te tā’āto’ara’a e fāri’i i te mau mea ato’a a te Metua.

’Ua ha’api’i te peresideni M. Russell Ballard : « Te feiā ato’a tei fafau i te mau fafaura’a mo’a ’e te Fatu ’e ’o tei fa’atura i te reira, ’ua fa’ati’ahia rātou ’ia fāri’i i te heheura’a o te ta’ata iho, ’ia ha’amaita’ihia e te mau utuutura’a a te mau melahi, ’ia ’āmui atu e te Atua, ’ia fāri’i i te ’īra’a o te ’evanelia ’e te hope’a, ’ia riro ’ei ta’ata ’āi’a i piha’i iho ia Iesu Mesia nō te mau mea ato’a a te Metua » (« Men and Women and Priesthood Power », Ensign, Tetepa 2014, 32).

’Ua pāpa’i te peresidenira’a mātāmua o te Sōtaiete Tauturu nō te titi nō Roto Miti i te matahiti 1878 : « E mana’o māuruuru roa tō mātou i te ’itera’a ē, nā roto i te mau ha’amaita’ira’a a tō mātou Metua i te Ao ra, mātou, tāna mau tāvini, ’ua pi’ihia ’ia ’ohipa ’āmui atu e tō mātou mau taea’e nō te pātura’a i te bāsileia ’o te Atua i te fenua nei, i te tauturura’a ’ia patu i te mau hiero i reira mātou e nehenehe ai e fāri’i i te mau ha’amaita’ira’a nō te tau ’e a muri noa atu. I roto i te mau ’ōro’a ato’a i fāri’ihia i roto i te Fare ’o te Fatu, e ti’a te vahine i te pae o te tāne, nō te feiā ora ānei ’e nō te feiā pohe, ’ei fa’a’itera’a ē ’aita rā te tāne i ta’a ’ē i te vahine, ’aita ato’a te vahine i ta’a ’ē i te tāne i te Fatu nei » (Mary Isabella Horne, Elmina S. Taylor, ’e Serepta M. Heywood, « To the Presidents and Members of the Relief Society of Salt Lake Stake of Zion, Greeting ! » Womans Exponent, 15 nō Tēnuare 1878, 123).

Ha’amaita’ira’a i tā tātou ha’api’ira’a

Fa’atumu i tā ’outou ha’api’ira’a i ni’a i te ha’api’ira’a tumu. ’Ia pāpū maita’i ē tē fa’atumu nei tā ’outou mau tāu’ara’a parau i ni’a i te ha’api’ira’a tumu niu i roto i te mau pāpa’ira’a mo’a. E nehenehe ʼoutou e rave i te reira ma te ani i te mau pīahi ’ia taiʼo i te mau pāpaʼiraʼa moʼa ’e ʼia faʼaʼite mai i muri iho i te mau parau mau tā rātou i ʼite mai, ’oia ato’a tō rātou mau ’itera’a i te oraraʼa i teie mau parau mau. (Hi’o Ha’api’ira’a mai tā te Fa’aora, 20–21.)