’Ua ’ite au i te Tamaiti a te ta’ata nei tē ti’a ra i te rima ’atau o te Atua, nā Walter Rane

23–29 nō ’Ātete

Te Parau Ha’api’ira’a ’e te mau Parau Fafau 93

« E fāri’i ai ho’i i tōna ’īra’a »,

Te mau ta’ata tā ’oe e ha’api’i nei e mau tamaiti ’e e mau tamāhine vārua faufa’a ïa nā te mau Metua i te ao ra, ’e e fāito pūai hanahana tō rātou. I muri a’e i te tai’ora’a i Te Parau Ha’api’ira’a ’e te mau Parau Fafau 93, e aha tei fa’auruhia ia ’oe ’ia rave nō te tauturu ia rātou ’ia tupu i te rahi i roto i te « māramarama ’e te parau mau » ? (’īrava 36).

Pāpa’i i te mau mana’o e tae mai

Tītau i te mana’o

’A pāpa’i i ni’a i te tāpura ’ere’ere i roto i Te Parau Ha’api’ira’a ’e te mau Parau Fafau 93, ’ua ani manihini mai Iesu Mesia ia tātou ’ia… ’A ani i te mau pīahi ’ia fa’a’ite mai i te mau rāve’a e fa’ahope ai rātou i te pereota.

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 93

E ha’amori tātou i te Atua ’e tāna tamaiti, ’o Iesu Mesia.

• I roto i tā rātou tuatāpapara’a i Te Parau Ha’api’ira’a ’e te mau Parau Fafau 93, ’ua ’itehia paha i te mau pīahi e rave rahi parau mau nō ni’a i te Metua i te ao ra ’e ia Iesu Mesia. ’A ani i te mau pīahi ’ia fa’a’ite mai i tā rātou i ’ite mai. E nehenehe ato’a ’oe e vāhi i te piha ha’api’ira’a ’ei mau pupu ’e e hōro’a i te pupu tāta’itahi e rave rahi ’īrava nō te tuatāpapa ’āmui. I muri iho, e nehenehe te pupu tāta’itahi e fa’a’ite mai i te piha ha’api’ira’a i tā rātou i ’apo mai nō « te rāve’a nō te ha’amori, ’e… tā [tātou] e ha’amori nei » (’īrava 19).

Te Parau Ha’api’ira’a ’e te mau Parau Fafau 93:1–39

E nehenehe tātou « e fāri’i [tō te Atua] ra ’īra’a, ’e e fa’ahanahanahia ho’i »

E fāri’i tātou i te māramarama o te Atua ’ia ha’apa’o tātou i tāna mau fa’auera’a ’e ’ia ha’api’i mai nō ni’a iāna.

• I roto i Te Parau Ha’api’ira’a ’e te mau Parau Fafau 93 tē vai ra e rave rahi parau mau nō ni’a i tō tātou nātura ’e te fāito pūai mure ’ore ’ei tamari’i nā te Atua. ’Ua ’itehia paha i te tahi mau melo nō te piha ha’api’ira’a teie mau parau mau i roto i tā rātou tuatāpapara’a i te tuha’a 93 i te fare (’a hi’o i te arata’ira’a ha’api’ira’a o teie hepetoma i roto i te Mai, pe’e mai—nō te ta’ata hō’ē ’e te ’utuāfare). Te mau pīahi tei ’itehia ia rātou, e nehenehe rātou e fa’a’ite mai i te reira, ’e e nehenehe e ’itehia i roto i te piha ha’api’ira’a te tahi atu ā mau parau mau. E aha tā teie mau parau mau e fa’atupu i ni’a i te huru nō tā tātou aupurura’a i te ta’ata ’ati a’e ia tātou—’e ’aore rā, ia tātou iho ?

• Teie te tahi atu rāve’a nō te ha’api’i mai nō ni’a i tō tātou nātura ’e te fāito pūai mure ’ore : e nehenehe te mau pīahi e tai’o ’āmui i te ’īrava 24 ’e ’a pāpa’i i ni’a i te tāpura ’ere’ere i nā upo’o parau e toru Mai te huru i teienei, Mai te huru i te mātāmua ra, ’e Mai te huru a muri a’e. I muri iho, e nehenehe ’oe e vāhi i te piha ha’api’ira’a i roto e toru pupu ’e e ani i te pupu tāta’itahi ’ia ’imi i Te Parau Ha’api’ira’a ’e te mau Parau Fafau 93:6–39, ’e ’ia ’imi i te mau parau mau nō ni’a i tō tātou ti’ara’a mure ’ore i teienei, i mūta’a ra, ’aore rā, a muri a’e. E nehenehe te pupu tāta’itahi e pāpa’i i raro a’e i te mau upo’o parau i te mau mea tei ’itehia e rātou. Nāhea teie mau parau mau i te fa’auru i te mau mā’itira’a ’o tā tātou e rave ?

Te Parau Ha’api’ira’a ’e te mau Parau Fafau 93:40–50

’Ua fa’auehia tātou ’ia « fa’a’āfaro… i tō [tātou] iho ’utuāfare e ti’a ai. »

• Te fa’auera’a ’ia « fa’a’āfaro… i tō ’oe iho ’utuāfare e ti’a ai » (’īrava 43), e ’ere ïa nō ni’a i te fa’anahora’a i te mau ’āfata ’e te mau pa’epa’e, nō ni’a rā i te ha’api’ira’a atu—’e te ha’api’ira’a mai—« i te māramarama ’e te parau mau » (’īrava 42). E nehenehe paha te mau pīahi e fa’a’ite mai e mea nāhea rātou i te tāmata nei i te pe’e i teie parau a’o. E aha te mau tāmatara’a tā rātou e fa’aruru nei ? E aha te mau parau mau ’e te mau parau tumu i roto i Te Parau Ha’api’ira’a ’e te mau Parau Fafau 93 ’o tē nehenehe e tauturu ?

• I roto i tā ’outou ’āparaura’a i ni’a i teie mau ’īrava, e nehenehe te mau melo nō te piha ha’api’ira’a e tai’o i te tahi mau tuha’a o te parau poro’i a te peresideni Henry B. Eyring « E ’utuāfare i reira te Vārua o te Fatu e pārahi ai » (Ensign ’e ’aore rā Liahona, Mē 2019, 22–25) ’e ’ia fa’a’ite mai i te mau mana’o nō ni’a i te mau parau mau i roto i Te Parau Ha’api’ira’a ’e te mau Parau Fafau 93: 40–50. (’A hi’o ato’a i te fa’ahitira’a parau i roto i « Te tahi atu mau rāve’a tauturu »).

Te tahi atu mau rāve’a tauturu

« ’A ara ’ia rahi atu tō rātou itoito ’e te ha’apa’o i te fare ».

’Ua ha’api’i Elder David A. Bednar :

« I roto i tā’u piha tōro’a tē vai ra hō’ē hōho’a pēni nehenehe nō te hō’ē fa’a’apu tītona. Te pēnira’a o teie hōho’a, e mea parai-noa-hia ïa te pēni nā te mau vāhi ato’a—’e ’ia hi’ohia hō’ē pōta’a pēni, ’aita roa atu ïa tōna e fa’aaura’a, e ’ere atoa te mea nehenehe. Mai te mea e tāpiri ri’i ’outou i pīha’i iho i te hōho’a, tā ’outou noa e ’ite ’o te mau pōta’a pēni ïa, te mea re’are’a, te ’auro ’e te ravarava, ’aita e tū’atira’a te tahi ’e te tahi. Terā rā, mai te mea e fa’aātea ri’i marū noa mai ’outou i te hōho’a, e ’ite ’outou i te hō’ēra’a te mau pōta’a pēni nō te hōro’a mai i te hō’ē hōho’a nehenehe o te fa’a’apu tītona. E ’ohipa ’āmui te mau pōta’a pēni tāta’ihō’ē nō te hōro’a mai i te hō’ē hōho’a pēni nehenehe ’e te au ’ia hi’ohia e te mata.

« ’Ua riro te pure ’utuāfare tāta’itahi, te tai’ora’a pāpa’ira’a mo’a tāta’itahi a te ’utuāfare, ’e te pō ’utuāfare tāta’itahi mai te hō’ē pōta’a pēni i ni’a i te hōho’a o tō tātou vārua. ’Aita hō’ē o te reira mau ’ohipa i roto ’ei ’ohipa nehenehe roa ’e te ha’amana’o-maoro-hia. Terā rā, mai te mau pōta’a pēni re’are’a, te ’auro ’e te ravarava ’ia ’āmuihia e hōro’a mai i te hō’ē hōho’a nehenehe roa, ’oia ato’a tō tātou vai-’āueue-’ore-noa-ra’a i te mau mea ha’iha’i, e arata’i te reira ia tātou i ni’a i te mau mea pae vārua faufa’a rahi. ‘Nō reira, ’eiaha e rohirohi i roto i te ’ohipa maita’i, nō te mea tē ha’amau atu nei ’outou i te niu nō te hō’ē ’ohipa rahi roa. ’E nā roto i te mau mea iti nei e tupu mai ai tei rahi roa ra’ (PH&PF 64:33). ’Ua riro te vai-’āueue-’ore-noa-ra’a ’ei parau tumu faufa’a nō te ha’amau i te niu o te hō’ē ’ohipa rahi i roto i tō rātou orara’a tāta’itahi ’e i te fa’aitoitora’a i te ha’apa’o maita’i i roto i te ’utuāfare » (« Fa’aitoito ia rātou ’ia ha’apa’o maita’i i roto i te ’utuāfare », Ensign ’aore rā Liahona, Novema 2009, 19–20).

Ha’amaita’ira’a i tā tātou ha’api’ira’a

Fa’a’ite i te here. « Tei te huru te taime, te fa’a’itera’a ’outou i te here i te feiā tā ’outou e ha’api’i nei, ’o te hōro’ara’a ïa ia rātou i te mau ha’apōpoura’a ma te ’ā’au tae, te fa’a’itera’a i te ’ana’anatae i tō rātou orara’a, te fa’aro’o-māite-ra’a ia rātou, te ’āmuira’a mai ia rātou i roto i te ha’api’ira’a, te ravera’a i te mau ’ohipa tāvinira’a ia rātou, ’aore rā, te arohara’a ma te here mau ’ia ’ite ana’e ’outou ia rātou » (Ha’api’ira’a mai tā te Fa’aora, 6).