16–22 nō ’Ātete

Te Parau Ha’api’ira’a ʼe te mau Parau Fafau 89–92

« Hō’ē parau tumu ma te fafa’ura’a »

’A fa’aineine ai ’outou nō te ha’api’i, ’a feruri i te mau parau tumu tei tāpa’ohia e ’outou ’a tuatapapa ai ’outou i te mau tuha’a 89-92 i teie hepetoma.

Pāpa’i i te mau mana’o e tae mai

Tītau i te mana’o

Teie te mau uira’a tā ’outou e nehenehe e fa’a’ohipa nō te fa’aitoito i te mau melo o te piha ’ia fa’a’ite mai i te tahi ’ohipa nō roto mai i tā rātou tuatāpapara’a i te pāpa’ira’a mo’a : E aha tā ’outou i tai’o i teie hepetoma tei ha’apūai i tō ’outou fa’aro’o ia Iesu Mesia ? i roto i te pi’ira’a peropheta ’o Iosepha Semita ? E aha tā ’outou i tai’o tei tauturu ia ’outou ’ia māramarama maita’i i te fa’anahora’a a te Metua i te Ao ra nō tāna mau tamari’i ?

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 89

Te Parau Pa’ari ’o te « hō’ē parau tumu ma te fafaura’a ».

• E rave rahi ta’ata tē fa’ariro nei i te Parau Pa’ari mai te hō’ē tāpura ’ōhie nō te mau ’ohipa « e rave » ’e « ’aita e rave ». Nō te tauturu i te mau melo o te piha ’ia feruri hōhonu i te mau parau tumu i muri mai i teie ha’api’ira’a, e ani ia rātou ’ia ’imi i Te Parau Ha’api’ira’a ’e te mau Parau Fafau 89 ma te mau uira’a mai teie i muri nei i roto i te ferurira’a : Nō te aha te Fatu i hōro’a mai ai ia tātou te Parau Pa’ari ? E aha tā teie heheura’a e ha’api’i nei ia tātou nō ni’a i te Metua i te Ao ra ’e i tāna fa’anahora’a nō tātou ? E riro te fa’ahitira’a parau i roto i « Te tahi atu mau rāve’a tauturu » i te tauturu. Mai te mea e mana’o ’outou e fāna’o te mau pīahi i te reira, e ani ia rātou ’ia tāpura mai i ni’a i te tāpura ’ere’ere te mau ravera’a mā ’e te mea ’ino ’o tā te Fatu i ’ite mai i roto i Te Parau Ha’api’ira’a ’e te mau Parau Fafau 89:5–17. I muri iho e nehenehe rātou e hi’o fa’ahou « Te ea i te pae tino ’e te pae ’āehuehu » i roto i te Nō te Pūai o te Feiā ’Āpī (25–27) ’e e tu’u atu i roto i tā rātou tāpura te tahi atu mau mea tā rātou i ’ite mai. Nāhea te mau fafaura’a i roto i te mau ’īrava 18–21 i te tupura’a i roto i tō tātou orara’a ?

• Teie te tahi atu ā mau rāve’a nō te tauturu i te mau melo o te piha ’ia ’āparau i te mau parau tumu o te Parau Pa’ari. E vāhi i te piha nā roto e toru pupu ’e e ani i te pupu tāta’itahi ’ia tai’o te tuha’a 89, ma te ’imi i te mau pāhonora’a i te hō’ē o te mau uira’a i muri nei : E aha te mau parau tumu e fa’aitoito i te hō’ē ta’ata e mea fifi nōnā ’ia ha’apa’o i te Parau Pa’ari ? E aha te mau parau tumu e tauturu ia tātou ’eiaha e ha’avā i te feiā e mea fifi nō rātou ’ia ha’apa’o i te reira ? E aha te mau parau tumu e tāmāhanahana ia tātou mai te mea e fifi tō tātou i te pae nō te ea noa atu i te orara’a i te Parau Pa’ari ? ’Ei tuha’a nō teie ’ohipara’a, e nehenehe ’outou e fa’a’ite atu i te ’itera’a o te peresideni Dieter F. Uchtdorf i roto i te ha’api’ipi’ira’a nō te riro mai ’ei pairati manureva tama’i (hi’o « Tāmau noa i te fa’a’oroma’i », Ensign ’aore rā Liahona, Mē 2010, 58). ’A fa’aitoito i te mau melo o te piha ’ia feruri i te hō’ē ’ohipa tā rātou i fāri’i e mea fa’auruhia ’ia rave i roto i te ’āparaura’a ’e e hōro’a ia rātou te taime nō te tāpa’o i tō rātou mau mana’o.

  

  ’Ua heheu mai te Atua i te Parau Pa’ari nō te tauturu i tāna mau tamari’i.

Te Parau Ha’api’ira’a ’e te mau Parau Fafau 90:1–17

Tē mau nei te Peresidenira’a Mātāmua i « te mau tāviri o te bāsileia ».

• Tē parau nei te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare i te mau melo ’ia ’imi Te Parau Ha’api’ira’a ’e te mau Parau Fafau 90:1–17 nō tē ha’api’i mai nō ni’a i te Peresidenira’a Mātāmua. E ani i te mau melo o te piha ’ia fa’a’ite mai e aha tā rātou i ha’api’i mai i te fare nā roto mai i teie ’ohipara’a, ’aore rā, e ’imi ’outou i teie mau ’īrava ’ei piha ha’api’ira’a. E nehenehe ato’a te mau pīahi e ’ite mai i te mau pereota i roto « Mai fa’aro’o i te reo o te peropheta » (Te mau Hīmene, no. 11) ’aore rā te tahi atu hīmene nō ni’a i te peropheta e tū’ati i te mau ha’api’ira’a i roto i teie mau ’īrava. Nāhea te tāvinira’a a te Peresidenira’a Mātāmua i te tauturura’a ia ’outou ’ia ’ite maita’i i te Metua i te ao ra ’e ia Iesu Mesia ?

Te Parau Ha’api’ira’a ’e te mau Parau Fafau 91

« Nā te Vārua e fa’a’ite mai i te parau mau »

• I roto i te ao nei i teie mahana, tē fa’aro’o nei tātou i te mau parau poro’i, tē vai nei « te mau parau mau e rave rahi » ’e « e rave rahi te mau parau ’ino » (mau ’īrava 1–2). E ani i te mau pīahi e hi’o i roto i te tuha’a 91 te mau a’o nō ni’a i te Apokaripha ’o te nehenehe e tauturu ia rātou ’ia ’ite i te parau mau i roto i te mau parau poro’i tā rātou e fārerei. E aha te mau hi’ora’a tā rātou e nehenehe e fa’a’ite mai e nāhea te Vārua i te tauturura’a ia rātou ’ia ’ite i te parau mau ?

Te tahi atu mau rāve’a tauturu

Te Parau Pa’ari

’Ua ha’api’i mai te peresideni Boyd K.Packer ē :

« Te Parau Pa’ari ’ua ‘hōro’ahia mai ’ei parau tumu ma te fafaura’a’ [Te Parau Ha’api’ira’a ’e te mau Parau Fafau 89:3]. Teie ta’o parau tumu i roto i te heheura’a ’o te hō’ē ïa mea faufa’a roa. Hō’ē parau tumu ’o te hō’ē ïa parau mau e vai maoro, hō’ē ture, hō’ē fa’anahora’a ’o tā ’outou e ti’a e fa’a’ohipa nō te arata’i ia ’outou i roto i te ravera’a i te mau fa’aotira’a. Te rahira’a taime, ’aita te mau parau tumu e tātarahia i roto i te fa’ata’ara’a. E vaiiho te reira ’ia ti’amā ’outou ’ia ’ite mai i tō ’outou ’ē’a ma te hō’ē parau mau e vai maoro, hō’ē parau tumu, ’ei tutau nō ’outou.

« Tē pāpa’i mai nei te mau melo nō tē ani mai e pāto’i ’ānei teie ’ohipa i te Parau Pa’ari. E mea pāpū ē te tī, te taofe, te ’ava ’e te ’ava’ava e pāto’i te reira. ’Aita te reira i tātarahia i roto i te mau fa’ata’ara’a hau atu. Teie rā, tē ha’api’i nei tātou i te parau tumu ma te mau ha’amaita’ira’a tei fafauhia. E rave rahi mau mea ’o te fa’atupu i te fa’atītīra’a, te mau mea e inu, e ’au’au, e hau’ā ’aore rā e pātia ’o te ha’amāuiui i te tino ’e i te vārua ’e tei ’ore i fa’ahitihia i roto i te heheura’a…

« ’A fa’atura i te parau tumu nō te Parau Pa’ari ’e e fāri’i ’outou i te mau ha’amaita’ira’a tei fafauhia mai » (« The Word of Wisdom: The Principle and the Promises », Ensign, Mē 1996, 17–18).

Ha’amaita’ira’a i tā tātou ha’api’ira’a

’A fa’a’ite pinepine i te ’itera’a pāpū. E nehenehe tō ’outou ’itera’a pāpū ’ōhie ’e te hōhonu nō te parau mau pae vārua e riro ’ei fa’aurura’a pūai i ni’a i te feiā tā ’outou e ha’api’i ra. ’Aita tō ’outou ’itera’a e tītauhia ’ia pūai ’aore rā ’ia roa roa. E nehenehe, ’ei hi’ora’a, e riro ’ei hō’ē ’itera’a pāpū ’ōhie nō te mau ha’amaita’ira’a tā ’outou i fāri’i i te ha’apa’ora’a i te Parau Pa’ari. (Hi’o Ha’api’ira’a mai tā te Fa’aora35.)