tāne ’e te vahine i te ravera’a i te mā’a

16–22 nō ’Ātete

Te Parau Ha’api’ira’a ʼe te mau Parau Fafau 89–92

« ’Ei parau tumu ma te fafaura’a »

’A tuatāpapa nā roto i te pure i te Te Parau Ha’api’ira’a ʼe te mau Parau Fafau 89–92, ma te pāpa’i i te mau fa’a’itera’a pae vārua tā ’outou i fāri’i. ’A ara maita’i nāhea « te Vārua ’ia [fa’a’ite] mai i te parau mau » ia ’outou ’a tuatāpapa ai ’outou i (Te Parau Ha’api’ira’a ʼe te mau Parau Fafau 91:4).

E pāpa’i i tō ʼoutou mau mana’o

I roto i te ha’api’ira’a a te mau peropheta, ’ua ha’api’i te peropheta Iosepha Semita i te mau peresibutero nō ’Īsera’ela nō ni’a i te patura’a i te bāsileia o te Atua i ni’a i te fenua nei. ’Ua ’āparau rātou i te mau parau mau pae vārua, ’ua pure ’āmui, ’ua ha’apae i te mā’a, ’e ’ua fa’aineine nō te poro i te ’evanelia. Terā rā, tē vai ra te tahi mea ’o tē riro ’ei mea huru ’ē ri’i nō tātou i teie mahana, ’e ’aita ato’a i ti’a ia Emma Smith. I roto i te mau putuputura’a, e puhipuhi ’e e ’amu’amu te mau tāne i te ’ava’ava, e ’ohipa mātarohia te reira i te reira tau, terā rā, e fa’a’ere’ere te reira i te mau tahua rā’au ’e e vaiiho ato’a i te hō’ē hau’a pūai i roto i te piha. ’Ua fa’a’ite o Emma i te reira mau mana’o ia Iosepha, ’e ’ua ani o Iosepha i te Fatu. Te hope’ara’a o te hō’ē ïa heheura’a tei hau roa atu i te parau nō te auauahi ’e te mau tāfetafeta ’ava’ava. ’Ua hōro’a te reira i te feiā mo’a, nō te mau u’i i muri iho, « hō’ē parau tumu ma te fafaura’a ho’i »—te mau fafaura’a o te ea o te tino, te « pa’ari » ’e te « mau tao’a rahi nō te ’ite » (Te Parau Ha’api’ira’a ’e te mau Parau Fafau 89:3, 19).

Hi’o ato’a Feiā Mo’a, 1:166–68.

’ītona tuatāpapara’a a te ta’ata hō’ē

Mau mana’o nō te tuatāpapara’a pāpa’ira’a mo’a a te ta’ata hō’ē

Te Parau Ha’api’ira’a ’e te mau Parau Fafau 89

« E parau tumu ma te fafaura’a » te Parau Pa’ari.

’A fa’aro’o ai te mau peresibutero i roto i te Ha’api’ira’a a te mau Peropheta ia Iosepha Semita i te tai’ora’a i te Parau Pa’ari nō te taime mātāmua, ’oi’oi roa rātou i te « tā’ue i tā rātou paipu ’e te mau fāri’i ’ava’ava i roto i te auahi » (Feiā Mo’a, 1:168). I taua taime ra, ’ua fa’arirohia te Parau Pa’ari ’ei fa’aarara’a, hau atu i te hō’ē fa’auera’a, terā rā, ’ua hina’aro rātou e fa’a’ite i tō rātou hina’aro ’ia ha’apa’o. Penei a’e ’ua « tā’ue » a’e nā paha ’outou i rāpae i tō ’outou orara’a i te mau mā’a tā te parau pa’ari e fa’aara nei, terā rā, e aha atu ā te tahi mau mea tā ’outou e nehenehe e ’apo mai i roto i teie heheura’a ? ’A feruri i teie mau mana’o :

• ’A ’imi i te mau fa’ahitira’a parau ’aita paha i ’itehia e ’outou—’aore rā, tā ’outou i feruri maoro—nā mua a’e nei. E aha tā ’outou i ha’api’i mai nā roto mai i te reira ?

• Tē vai ra i roto i Te Parau Ha’api’ira’a ʼe te mau Parau Fafau 89 e rave rahi mau parau fafau (hi’o te mau ’īrava 18–21). I tō ’outou mana’o, e aha te aura’a o teie mau parau fafau ?

• E aha tā teie heheura’a e ha’api’i nei ia ’outou nō ni’a i te Fatu ?

• E aha te mau hi’ora’a tā ’outou i ’ite nō « te mau ’ino ’e te mau uma… i roto i te ’ā’au o te mau ta’ata ’ōpuara’a ’ino » ? (’īrava 4).

• ’A feruri na i te heheura’a ’ei « parau tumu ma te fafaura’a » (’īrava 3)—e mau parau mau vai maoro ’o te arata’i i te fa’aotira’a mana’o—’eiaha rā hō’ē noa tāpura ’ohipa e rave ’e ’eiaha e rave. E aha te mau parau tumu tā ’outou i ’ite mai ’o te nehenehe e arata’i i tā ’outou mau fa’aotira’a ?

’Ua fa’aara ato’a mai te mau peropheta nō teie tau i te mau mā’a ’e te mau peu ’ino i’ō atu i tei fa’ahitihia i roto i te parau pa’ari (hi’o « te ea i te pae tino ’e i te pae ferurira’a », Nō te pūai o te feiā ’āpī, 25–27). E aha te tūra’i nei ia ’outou ’ia rave nō te ha’apa’o maita’i a’e i tō ’outou tino ’e i tō ’outou vārua ?

Hi’o ato’a i te Daniela 1; 1 Korinetia 6:19–20; Parau tumu o te ’evanelia, « parau pa’ari », topics.ChurchofJesusChrist.org; « Te parau pa’ari », Te mau heheura’a i roto i taua taime ra, 183–91; addictionrecovery. ChurchofJesusChrist.org.

e mau tamāroa te horo ra nā te pae miti

Tē ha’api’i nei te parau pa’ari ’ia tātou ’ia ’atu’atu i tō tātou tino.

Te Parau Ha’api’ira’a ’e te mau Parau Fafau 90:1–17

Tē mau nei te Peresidenira’a Mātāmua i te « mau tāviri o te bāsileia ».

I roto i te tuha’a 90, ’ua hōro’a mai te Fatu i te mau arata’ira’a nō ni’a i « te tāvinira’a ’e te peresidenira’a » (’īrava 12) ia Iosepha Semita, Sidney Rigdon, ’e ia Frederick G. Williams—te mau melo o tā tātou e parau nei i teienei te Peresidenira’a Mātāmua. E aha tā ’outou i ha’api’i mai nō ni’a i te Peresidenira’a Mātāmua i roto i te mau ’īrava 1–17 ? ’A hi’ohi’o fa’ahou i te mau parau poro’i ’āpī a te mau melo o te Peresidenira’a Mātāmua. Nāhea tā rātou mau parau i te « tātarara’a i te mau parau ’aro nō te bāsileia nei » ia ’outou ? ( ’īrava 14). Nāhea rātou « ’ia fa’a’āfaro noa i te mau ’ohipa ato’a nō teie nei ’ēkalesia ’e te bāsileia ho’i » ? (’īrava 16).

Hi’o ato’a Henry B. Eyring, « Te mana o te fa’aro’o tāmau », Ensign ’aore rā Liahona, Mē 2019, 58–60

Te Parau Ha’api’ira’a ʼe te mau Parau Fafau 90:24

« E ’ohipa ’āmui mai te mau mea ato’a ’ei maita’i [nō’u] ».

’A feruri i te hō’ē ’itera’a tei fāri’ihia e ’outou ’o tē fa’a’ite pāpū nei i te parau fafau a te Fatu i roto i Te Parau Ha’api’ira’a ʼe te mau Parau Fafau 90:24. ’A feruri e pāpa’i i tō ’outou mau ’itera’a ’e ’ia fa’a’ite i te reira i te hō’ē melo o te ’utuāfare ’aore rā, i te hō’ē ta’ata tei herehia—penei a’e hō’ē ta’ata e tītau ra i te ha’apāpūra’a ’aore rā, i te fa’aitoitora’a. Mai te peu ē, tē vai ra te mau ha’amaita’ira’a tā ’outou e tīa’i noa ra, ’a feruri e aha te ti’a ia ’outou ’ia rave nō te fa’aro’o tāmau noa, ’a tīa’i ai ’outou ’ia ’ite nāhea i te « ’ohipa ’āmui mai te mau mea ato’a ’ei maita’i nō ’outou ».

Te Parau Ha’api’ira’a ’e te mau Parau Fafau 90:28–31

’O vai ’o Vienna Jaques ?

’Ua fānauhia ’o Vienna Jaques i te 10 nō Tiunu 1787, i Massachusetts. E vahine fa’aro’o ’e te faufa’a moni rahi, ’ua fārerei mātāmua ’o Vienna i te mau misiōnare i te matahiti 1831. I muri a’e i te fāri’ira’a ’oia i te hō’ē ’itera’a pae vārua ē, e parau mau tā rātou parau poro’i, ’ua tere ’oia nō te fārerei i te peropheta i Kirtland, Ohio, i reira ’oia i te bāpetizora’ahia.

’Ua ha’apa’o ’o Vienna i te a’ora’a a te Fatu iāna i roto i Te Parau Ha’api’ira’a ʼe te mau Parau Fafau 90:28–31. Tāna ha’amo’ara’a i te Fatu, tae roa atu i te mau hōro’ara’a tāna i rave nā mua a’e i Kirtland, ’ua tae mai te reira i te hō’ē tau maita’i mau nō te ’Ēkālesia, ’a tāmata ai te feiā fa’atere i te ho’o mai i te fenua i reira e patu ai te hiero nō Kirtland. ’Ua « ha’apa’o maita’i noa o [Vienna], ’e ’ia ’ore ho’i ’ia fa’aea noa ma te ’ohipa ’ore » i te roara’a o tōna orara’a, ’e ’ua ti’a iāna « ’ia fa’aea atu ma te hau » (’īrava 31) i roto i te ’Afa’a nō Roto Miti, vāhi i pohe ai ’oia i te fāito matahiti e 96.

’ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Te Parau Ha’api’ira’a ’e te mau Parau Fafau 89.E au te mau melo o tō ’outou ’ūtuāfare ’ia pāpa’i ’e ’aore rā ’ia ’imi i te mau hōho’a nō te mā’a ’e te tahi atu mau ra’au i fa’ahitihia i roto i te Te Parau Ha’api’ira’a ʼe te mau Parau Fafau 89. I muri iho e nehenehe ’outou e ha’uti i te hō’ē ha’uti—e nehenehe te mau melo o te ’utuāfare, te tahi i muri mai i te tahi, e mā’iti i te mau hōho’a tā rātou e hina’aro, ma te tu’u i roto i te vaira’a pehu te mau mea ’eiaha tātou e fa’a’ohipa, ’e i roto i te merēti te mau mea e fa’a’ohipa tātou. Nāhea te mau mea i fafauhia mai i roto i te mau ’īrava 18–21 i te fa’atupura’ahia i roto i tō tātou orara’a ?

E nehenehe te tai’ora’a i « Te ea pae tino ’e pae ferurira’a  » i roto i te Nō te Pūai o te Feiā ’Āpī (25–27) e fa’atupu i te tau’ara’a parau nō ni’a i te tahi atu mau rāve’a nō te ha’apa’o maita’i i tō tātou ea ’e nō ni’a i te mau ha’amaita’ira’a tā te Atua i fafau mai.

Te Parau Ha’api’ira’a ’e te mau Parau Fafau 90:5.’A paraparau e mea nāhea tō ’outou « fāri’ira’a i te mau [heheura’a ’aore rā, te mau peropheta] a te Atua. » Nāhea e ti’a ai ia tātou ’ia fa’a’ite ē, e ’ere te reira « ’ei mea faufa’a ’ore » nō tātou ?

Te Parau Ha’api’ira’a ’e te mau Parau Fafau 91.E nehenehe ’outou e tau’aparau e mea nāhea te a’o a te Fatu nō ni’a i te Apokaripha (hi’o te mau ’īrava 1–2) e tano ai i te rāve’a ha’apararera’a tā tō ’outou ’utuāfare e fa’aruru nei i teie mahana (hi’o ato’a Buka arata’i nō te mau pāpa’ira’a mo’a, « Apokaripha », scriptures.ChurchofJesusChrist.org). E nehenehe ato’a ’outou e fa’a’ite i tō ’outou iho mau ’itera’a nō te taime « o te ha’amāramaramahia ra e te Vārua » (’īrava 5) ’o tei tauturu ia ’outou ’ia ’ite i te parau mau e te hape.

Te Parau Ha’api’ira’a ’e te mau Parau Fafau 92:2.E aha te aura’a ’ia riro « ’ei melo itoito roa » nō te ’Ēkālesia ?

Nō te tahi atu mau mana’o nō te ha’api’ira’a i te mau tamari’i, hi’o te arata’i o teie hepetoma i roto Mai, pe’e mai—nō te Paraimere.

Hīmene tei mana’ohia : « Je demeure dans un temple », Chants pour les enfants, 73

Ha’amaita’ira’a i tā tātou ha’api’ira’a

Fa’a’ohipa i te mau rāve’a huru rau. ’A ’imi i te mau rāve’a rau nō te fa’aō i tō ’outou ’utuāfare i roto i te tuatāpapara’a pāpa’ira’a mo’a nā te ’utuāfare. ’Ei hi’ora’a, e nehenehe te mau melo o te ’utuāfare e hīmene i te mau hīmene ’aore rā, i te mau hīmene a te mau tamari’i e tū’ati i ni’a i te hō’ē ’īrava, e pāpa’i i te mau hōho’a nō te mau mea tā rātou i tai’o, ’aore rā, e ha’apoto i te hō’ē ’īrava nā roto i tā rātou iho mau parau.

mā’a hotu ’e te mau pota

« E te feiā mo’a ato’a ’o tē … ha’apa’o ’e i te rave i teie mau parau nei, ma te ta’ahira’a i roto i te ha’apa’o maita’i i te mau fa’auera’a, e maita’i te noa’a i tō rātou pito ’e e puohia tō rātou mau ivi » (Te Parau Ha’api’ira’a ’e te mau Parau Fafau 89:18).