Fa’aho’i-fa’ahou-ra’a mai, nā Liz Lemon Swindle

26 nō Tiurai–1 nō ’Ātete

Te Parau Ha’api’ira’a ’e te mau Parau Fafau 84

« Te mana nō te huru Atua »

’Ia tai’o ’outou i Te Parau Ha’api’ira’a ʼe te mau Parau Fafau 84, ’a feruri i te a’o « e ora nā roto i te mau parau ato’a nā roto mai i te vaha o te Atua » (’īrava 44). Nāhea ’outou ’ia ora nā roto i te mau parau i roto i teie heheura’a ?

E pāpa’i i tō ʼoutou mau mana’o

Mai te taime ’a fa’aho’ihia mai ai te autahu’ara’a i te matahiti 1829, ’ua ha’amaita’ihia te feiā mo’a nā roto i te reira mana mo’a. ’Ua bāpetizohia rātou, ’ua ha’amauhia, ’e ’ua pi’ihia ’ia tāvini nā roto i te mana autahu’ara’a, mai ia tātou i teie mahana. Terā rā, te fāna’ora’a i te mana autahu’ara’a e ’ere ïa hō’ē ā huru i te hāro’aro’a-hope-ra’a i te reira, ’e tē vai atu ra te mau mea tā te Atua i hina’aro ’ia hāro’aro’a tōna feiā mo’a—nō ni’a iho ā rā i te fa’aho’ira’a mai o te mau ’ōro’a o te hiero. Nā te heheura’a nō te matahiti 1832 nō ni’a i te autahu’ara’a, tei parauhia i teienei, Te Parau Ha’api’ira’a ʼe te mau Parau Fafau 84, i fa’a’ite mai i te feiā mo’a e aha mau te autahu’ara’a. ’E e nehenehe ato’a te reira e tupu i ni’a ia tātou i teie mahana. Inaha ho’i, e rave rahi mau mea tā tātou e ha’api’i mai nō ni’a i te mana hanahana e mau nei « te tāviri nō te ’ite i te Atua », ’o te ha’apāpū mai nei i « te mana nō te huru Atua », ’e ’o te fa’aineine ia tātou « ’ia ’ite i te mata ’o te Atua, ’oia ’o te Metua, e ora ai » (mau ’īrava 19–22).

Mau mana’o nō te tuatāpapara’a pāpa’ira’a mo’a a te ta’ata hō’ē

Te Parau Ha’api’ira’a ’e te mau Parau Fafau 84:1–5, 17–28

E roa’a iā’u te mana o te autahu’ara’a ’e te mau ha’amaita’ira’a a te Atua.

’Ia feruri ana’e ’outou i te ta’o ra autahu’ara’a, e aha te mana’o e puta mai i roto i tō ’outou ferurira’a ? E aha te pinepinera’a ’outou i te feruri i te autahu’ara’a ’e i tāna fa’aurura’a i ni’a i tō ’outou orara’a i te mau mahana ato’a ? I muri mai i te ferurira’a i teie mau uira’a, ’a tuatāpapa i Te Parau Ha’api’ira’a ʼe te mau Parau Fafau 84:1–5, 17–28, ’e ’a feruri i te mea tā te Fatu e hina’aro ’ia ’ite ’outou nō ni’a i tōna mana autahu’ara’a. Nāhea e ti’a ai ia ’outou ’ia fa’a’ohipa i teie mau ’īrava nō te fa’ata’a i te autahu’ara’a i te hō’ē ta’ata ’e ’ia tātara i tāna mau ’ōpuara’a ?

E nehenehe ato’a ’outou e feruri i te mau ’ōro’a o te autahu’ara’a tā ’outou i rave. Nāhea tō ’outou ’itera’a i « te mana nō te huru Atua » (’īrava 20) i tē fa’a’itera’ahia mai i roto ia rātou ? ’A feruri i te mau mea tā te Fatu e hina’aro ’ia rave ’outou nō te fāri’i hau atu i tōna mana i roto i tō ’outou orara’a.

Hi’o ato’a M. Russell Ballard, « Men and Women and Priesthood Power », Ensign, Setepa 2014, 28–33; Gospel Topics, « Priesthood », topics.ChurchofJesusChrist.org.

Te Parau Ha’api’ira’a ’e te mau Parau Fafau 84:31–42

Mai te mea e fāri’i au i te Fatu ’e i tāna mau tāvini, e fāri’i au i te mau mea ato’a nā te Metua ra.

’Ua ha’api’i Elder Paul B. Pieper : « E mea fa’ahiahia i te mea ē, i roto i te tapura’a ’e te fafaura’a o te autahu’ara’a [Te Parau Ha’api’ira’a ʼe te mau Parau Fafau 84:31–42], ’ua fa’a’ohipa te Fatu i te mau ta’o ra noa’a ’e fāri’i. ’Aita ’oia i fa’a’ohipa i te parau ra fa’atōro’a. I roto i te hiero te mau tāne ’e te mau vahine e noa’a ai, ’e e fāri’i—’āmui ai—i te mau ha’amaita’ira’a ’e te mana nō te autahu’ara’a a Aarona ’e a Melehizedeka » (« Revealed Realities of Mortality », Ensign, Tēnuare 2016, 21).

’A tuatāpapa ai ’outou i Te Parau Ha’api’ira’a ʼe te mau Parau Fafau 84:31–42, ’a ’imi i te mau ta’o « noa’a » ’e « fāri’i ». ’A feruri māite e aha tō rātou aura’a i roto i teie tātarara’a. E mea nāhea tō ’outou « fāri’ira’a » i te Fatu ’e i tāna mau tāvini ?

E nehenehe ato’a ’outou e tāpa’o i te mau parau fafau i roto i teie mau ’īrava tei tū’ati i ni’a i te tapura’a ’e te fafaura’a o te autahu’ara’a, « ’o te ’ore e ti’a i [te Atua] ’ia ’ōfati » (’īrava 40). E aha tā ’outou e ’ite nei ’o tē fa’auru nei ia ’outou ’ia ha’apa’o maita’i a’e i roto i te fāri’ira’a i te Metua, tāna mau tāvini, ’e tōna mana autahu’ara’a ?

Hi’o ato’a te Buka arata’i nō te mau pāpa’ira’a mo’a, « fafaura’a », « tapura’a », scriptures.ChurchofJesusChrist.org. »

Te Parau Ha’api’ira’a ’e te mau Parau Fafau 84:43–58

E haere mai au i te Mesia mai te mea e ha’apa’o vau i tāna parau ’e e fa’aro’o i tōna Vārua.

Te tai’o-tāmau-ra’a i te mau pāpa’ira’a mo’a ’e te mau parau a te mau peropheta, ’ua hau atu ïa i te tāpūra’a i te hō’ē tāpura ’ohipa pae vārua. E aha te mau parau mau tā ’outou i ’ite i roto i Te Parau Ha’api’ira’a ʼe te mau Parau Fafau 84:43–58 ’o te tauturu ia ’outou ’ia hāro’aro’a nō te aha i tītauhia ai ia ’outou ’ia tai’o tāmau noa i te parau a te Atua ? ’A hi’o nā i te ta’a-’ē-ra’a i rotopū i te māramarama ’e te pōiri i roto i teie mau ’īrava; nāhea tō ’outou « itoito i te ha’apa’ora’a i te mau parau nō te ora mure ’ore » i te hōpoira’a mai i te māramarama, te parau mau ’e « te Vārua ’o Iesu Mesia » i roto i tō ’outou orara’a (’īrava 43, 45).

Hi’o ato’a 2 Nephi 32:3; « Te Buka a Moromona—’ōfa’i tāpe’a fana nō tā tātou ha’apa’ora’a fa’aro’o », Te mau ha’api’ira’a a te mau peresideni o te ’Ēkālesia : Ezra Taft Benson (2014), 125–35.

’Ua tauturu te tuatāpapara’a i te mau pāpa’ira’a mo’a iā’u ’ia fāri’i i te fa’aurura’a a te Vārua.

Te Parau Ha’api’ira’a ’e te mau Parau Fafau 84:62–91

E vai noa te Fatu i pīha’i iho iā’u ’ia rave ana’e au i tāna ’ohipa.

’Ia tai’o ana’e ’outou i teie mau ’īrava, e nehenehe ’outou e ’ite i te mau rāve’a tā te Fatu i parau ē, e pāturu ’oia i tāna mau ’āpōsetolo ’e mau misiōnare. Nāhea teie mau parau fafau e tano ai nō te ’ohipa tāna i ani mai ia ’outou ’ia rave ? ’Ei hi’ora’a, nāhea te mau parau fafau i roto i te ’īrava 88 i te tupura’a i roto i tō ’outou orara’a ?

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Te Parau Ha’api’ira’a ’e te mau Parau Fafau 84:6–18.I muri a’e i te tai’ora’a nō ni’a i te huru nō tō Mose fāri’ira’a i tōna mana autahu’ara’a, e nehenehe te hō’ē melo autahu’ara’a i roto i te ’utuāfare ’aore rā, hō’ē taea’e aupuru e fa’a’ite i tōna ’itera’a nō ni’a i tōna fa’atōro’ara’ahia i te hō’ē tōro’a o te autahu’ara’a. Mai te mea e nehenehe, e nehenehe ’oia e fa’a’ite mai ’e e ’āparau i tōna rēni mana autahu’ara’a. Nō te aha e mea faufa’a ia tātou ’ia fa’atoro i te rēni mana autahu’ara’a i roto i te ’Ēkālesia i teie mahana e tae roa atu i te mana o Iesu Mesia ? Nō te ani i te hō’ē rēni mana autahu’ara’a, ’a hāpono i te hō’ē rata uira i te [e-mail].

Te Parau Ha’api’ira’a ’e te mau Parau Fafau 84:20–21.E aha te taime ’a ’ite ai tō ’outou ’utuāfare i « te mana nō te huru Atua » i tē fa’a’itera’ahia mai nā roto i te hō’ē ’ōro’a mai te bāpetizora’a ’aore rā, te ’ōro’a mo’a ? E nehenehe paha ’outou e paraparau e mea nāhea teie mau ’ōro’a i tē hōpoi mai i te mana o te Atua i roto i tō tātou orara’a. E nehenehe ato’a ’outou e fa’a’ite i te hō’ē hōho’a nō te hō’ē hiero ’e e ’āparau e mea nāhea te mau ’ōro’a o te hiero i te hōro’a ia tātou i te mana hau atu nō te riro mai te Fa’aora te huru. E hina’aro paha ’outou e hīmene i te hō’ē hīmene nō ni’a i te autahu’ara’a, mai te « La prêtrise est rétablie » (Chants pour les enfants, 89), ’e ’a ’āparau e aha tā teie hīmene e ha’api’i nei nō ni’a i te autahu’ara’a.

Te Parau Ha’api’ira’a ’e te mau Parau Fafau 84:43–44.E nehenehe ’outou e fa’aineine ’āmui i te hō’ē mā’a ’aore rā, i te hō’ē monamona ’e ’ia tāpa’o i te reira i te hō’ē ta’o ’aore rā, hō’ē pereota nō roto mai i te ’īrava 44. Nō te aha e mea faufa’a ’ia pāpa’i tātou i te mau tuha’a ato’a ? Nō te aha e mea faufa’a ’ia ha’apa’o i te mau parau ato’a a te Atua ?

Te Parau Ha’api’ira’a ’e te mau Parau Fafau 84:98–102.E aha tā tātou i ha’api’i mai nō ni’a ia Iesu Mesia i roto i te « hīmene ’āpī » (’īrava 98) i roto i teie mau ’īrava ? E aha tā tātou e nehenehe e rave i tō tātou nei ’anotau nō te tauturu i te fa’atupu i te mau huru tei fa’a’itehia i roto i teie hīmene ?

Te Parau Ha’api’ira’a ’e te mau Parau Fafau 84:106–10.E mea nāhea tō tātou ’utuāfare ’ia « ha’apūai-’āmui-hia » nā roto i te mau hōro’a ’e te mau tauto’ora’a a « te mau melo tāta’itahi » ?(’īrava 110).

Nō te tahi atu mau mana’o nō te ha’api’ira’a i te mau tamari’i, hi’o te arata’i o teie hepetoma i roto Mai, pe’e mai—nō te Paraimere.

Hīmene tei mana’ohia : « La prêtrise est rétablie », Chants pour les enfants, 66 ; hi’o ato’a « Mau mana’o nō te ha’amaita’i i te tuatāpapara’a pāpa’ira’a mo’a a tō ’outou ’utuāfare

Ha’amaita’ira’a i tā tātou ha’api’ira’a

’A fa’atae ’e ’a pe’e i te mau anira’a manihini e rave. ’Ia tītau ana’e ’outou i tō ’outou ’utuāfare ’ia ’ohipa i ni’a i te mau mea tā rātou i ha’api’i mai, e fa’a’ite ’outou ia rātou ē, te ’evanelia, ’o te hō’ē ïa ’ohipa e tītauhia ’ia ora, ’eiaha rā e paraparau noa. E aha tā ’outou e nehenehe e ani ia rātou ’ia rave nā roto mai i tā ’outou tuatāpapara’a i Te Parau Ha’api’ira’a ʼe te mau Parau Fafau 84 ?

Hiero nō Roma (’Ītāria)