Te Mesia ’e te taure’are’a ha’apa’o ture tao’a rahi, nā Heinrich Hoffman

19–25 nō Tiurai

Te Parau Ha’api’ira’a ’e te mau Parau Fafau 81–83

« ’O tei tu’uhia atu te mea rahi ra, e mea rahi ato’a ïa te tītauhia atu iāna ra »

’Ia tuatāpapa ’outou i Te Parau Ha’api’ira’a ʼe te mau Parau Fafau 81–83, ’a tāpa’o i te mau parau tumu ’o tē nehenehe e tauturu ia ’outou ’ia rave i te maita’i i rotopū i tō ’outou ’utuāfare, tō ’outou mau hoa, ’e ia vetahi ’ē.

E pāpa’i i tō ʼoutou mau mana’o

I te ’āva’e Māti 1832, ’ua pi’i te Fatu ia Jesse Gause ’ia riro ’ei tauturu nō Iosepha Semita i roto i te peresidenira’a o te autahu’ara’a teitei (tei parauhia i teie nei, te Peresidenira’a Mātāmua). ’Ua riro Te Parau Ha’api’ira’a ʼe te mau Parau Fafau 81 ’ei heheura’a nō te taea’e Gause, tē ha’api’i ra iāna i tōna pi’ira’a ’āpī ma te fafau iāna i te mau ha’amaita’ira’a nō te tāvinira’a ma te ha’apa’o maita’i. ’Aita rā ’o Jesse Gause i tāvini ma te ha’apa’o maita’i. Nō reira, ’ua pi’ihia ’o Frederick G. Williams nō te mono iāna, ’e ’ua monohia te i’oa o te taea’e Gause i te i’oa o te taea’e Williams i roto i te heheura’a.

E au ē, e ’ere i te ’ohipa fifi roa, terā rā, tē fa’a’ite ra te reira i te hō’ē parau mau faufa’a : te rahira’a o te mau heheura’a i roto i Te Parau Ha’api’ira’a ’e te mau Parau Fafau, ’ua fa’ataehia ïa i te mau ta’ata pāpū maita’i, terā rā, e nehenehe tātou e ’imi, i te mau taime ato’a, ’ia fa’a’ohipa i te reira i ni’a ia tātou iho (hi’o 1 Nephi 19:23). Te parau a’o a te Fatu ia Frederick G. Williams ’ia « fa’aitoito i te turi ’āvae paruparu ra », e nehenehe te reira e fa’afāriu i tō tātou ferurira’a i ni’a i te mau ta’ata e ti’a ia tātou ’ia ha’apūai (Te Parau Ha’api’ira’a ʼe te mau Parau Fafau 81:5). Te parau a’o a te Fatu nō te mau melo o te United Firm [Tāiete ’Āmui] ’ia « ru’uru’u atu ia ’outou iho i teie nei fafaura’a » nō te pāhono i te mau hina’aro pae tino o te ’Ēkālesia, e nehenehe te reira e fa’afāriu i tō tātou ferurira’a i ni’a i tā tātou iho mau fafaura’a. ’E te fafaura’a a te Fatu ē, « ’ua ru’uru’uhia [’oia] ’ia rave ’outou i te mea tā’u i parau ra », e nehenehe te reira e fa’aha’amana’o ia tātou i tāna mau fafaura’a ia tātou ’ia ha’apa’o ana’e tātou (Te Parau Ha’api’ira’a ʼe te mau Parau Fafau 82:10, 15). Mai te reira te terera’a, inaha, ’ua parau ato’a te Fatu ē, « ’o tā’u e parau atu nei i te hō’ē ra ’o tā’u ato’a ïa e parau atu nei i te tā’āto’ara’a »(’īrava 5).

Hi’o « Newel K. Whitney and the United Firm », « Jesse Gause : Tauturu nō te peropheta », Te mau heheura’a i roto i taua taime ra, 142–47, 155–57.

Mau mana’o nō te tuatāpapara’a pāpa’ira’a mo’a a te ta’ata hō’ē

Te Parau Ha’api’ira’a ’e te mau Parau Fafau 81

E nehenehe au e ha’apa’o maita’i i roto i te ravera’a i te mea tā te Fatu e ani mai iā’u.

Tē uiui ra ānei ’outou i te tahi taime ē, nāhea e ti’a ai ia ’outou ’ia fa’aoti i te mau hōpoi’a faufa’a i roto i tō ’outou orara’a ? ’Ei tauturu nō te peropheta Iosepha Semita, e mea pāpū maita’i ē, e rave rahi mau hōpoi’a faufa’a tā Frederick G. Williams. I roto i te tuha’a 81, ’ua hōro’a te Fatu iāna i te a’ora’a nō ni’a i te fa’aotira’a i te reira. E aha tā ’outou e ’ite nei i roto i teie tuha’a o te nehenehe e tauturu ia ’outou ’ia fa’aoti i te mau hōpoi’a tā te Fatu i hōro’a mai ia ’outou ?

Teie te tahi mau uira’a nō te tauturu ia ’outou ’ia feruri hōhonu ’īrava 5 :

• E aha te tahi mau rāve’a e nehenehe ai te hō’e ta’ata e « paruparu » ? E aha te aura’a e « aupuru » i te feiā paruparu ?

• E aha te mea e « fa’atautau » ai i te rima o te hō’ē ta’ata i te hi’ora’a ha’atāpa’ohia ? Nāhea e nehenehe ai ia tātou ’ia « fa’ateitei » i te reira mau rima ?

• E aha te aura’a nō te parau ra « e mau turi ’āvae paruparu » ? Nāhea e ti’a ai ia tātou ’ia « fa’a’eta’eta » i te reira mau turi ’āvae paruparu ?

Penei a’e nā roto i tō ’outou tuatāpapara’a i teie ’īrava, ’ua fa’aha’amana’o te reira ia ’outou i te hō’ē ta’ata tā ’outou e nehenehe « e aupuru », « e fa’ateitei », ’aore rā, « e fa’a’eta’eta. » E aha tā ’outou e rave nō te aupuru i te reira ta’ata ?

Te Peresidenira’a Mātāmua : ’O Sidney Rigdon, Iosepha Semita, Frederick G. Williams

Te Parau Ha’api’ira’a ’e te mau Parau Fafau 82:1–7

Tē ani mai nei te Fatu iā’u ’ia tātarahapa ’e ’ia fa’aru’e i tā’u mau hara.

’A tai’o ai ’outou i Te Parau Ha’api’ira’a ʼe te mau Parau Fafau 82:1–7, a hāmani e piti tāpura nō te mau mea tā ’outou e ha’api’i mai : te mau fa’aarara’a nō ni’a i te hara ’e te mau parau mau nō ni’a i te fa’a’orera’a hara. Nāhea teie mau parau mau i te tauturu ia ’outou ’ia pāto’i i te mau fa’ahemara’a a te ’enemi ?

Te Parau Ha’api’ira’a ’e te mau Parau Fafau 82:8–10

Nō tō’u fa’aorara’a ’e te pārurura’a te mau fa’auera’a.

Mai te mea ē, ’ua uiui a’ena ānei ’outou—’aore rā, hō’ē ta’ata tā ’outou i ’ite ē—nō te aha te Fatu e hōro’a mai ai e rave rahi mau fa’auera’a, e nehenehe Te Parau Ha’api’ira’a ʼe te mau Parau Fafau 82:8–10 e tauturu. E aha te mau mana’o i roto i teie mau ’īrava e nehenehe e tauturu ia ’outou ’ia fa’ata’a i te hō’ē ta’ata ē, nō te aha ’outou i mā’iti ai e pe’e i te mau fa’auera’a a te Fatu ? E nehenehe ato’a ’outou e feruri ē, e mea nāhea tāna mau fa’auera’a i te tauira’a i tō ’outou orara’a. E aha tā ’outou i ha’api’i mai nō ni’a i te Fatu ’a tai’o ai ’outou i te ’īrava 10 ?

Hi’o ato’a Te Parau Ha’api’ira’a ʼe te mau Parau Fafau 130:20–21; Carole M. Stephens, « ’Ua hina’aro ’outou iā’u ra, e ha’apa’o i tā’u mau fa’auera’a », Ensign ’aore rā Liahona, Novema 2015, 118–20.

Te Parau Ha’api’ira’a ’e te mau Parau Fafau 83

« E ha’apa’ohia te mau vahine ’ivi ’e te mau tamari’i ’ōtare ho’i »

I te ’āva’e ’Ēperēra 1832, mai tei fa’auehia mai e te Fatu, ’ua rātere ’o Iosepha Semita fātata e 800 maire te ātea nō te fārerei i te feiā mo’a tei ha’aputuputu i Missouri (hi’o Te Parau Ha’api’ira’a ʼe te mau Parau Fafau 78:9). I roto i te hō’ē ’oire tāna i fārerei, tē vai ra te mau vahine ’ivi nā rātou iho e fa’a’amu i tā rātou mau tamari’i. I rotopū ia rātou, tē vai ra o Phebe Peck ’e o Anna Rogers tā te peropheta i mātau maita’i. I Missouri i te mau matahiti 1830, e mea iti roa te mau mana tā te ture nō te tuha’a fenua e hōro’a ra i te mau vahine ’ivi i ni’a i te faufa’a a tā rātou tāne i pohe. E aha tā ’outou i ha’api’i mai i roto i te tuha’a 83 nō ni’a i te mana’o o te Fatu nō ni’a i te mau vahine ’ivi ’e te mau ’ōtare ? ’Ua ’ite ānei ’outou i te hō’ē ta’ata mai te reira te huru ’o tei fāna’o i tō ’outou here ’e te utuutura’a ?

Hi’o ato’a Isaia 1:17; Iakobo 1:27.

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Te Parau Ha’api’ira’a ’e te mau Parau Fafau 81:3.E nehenehe ’outou e hōro’a i te mau māfatu papie i te mau melo o te ’utuāfare ’e e ani ia rātou ’ia pāpa’i hōho’a ’aore rā, ’ia pāpa’i i te hō’ē mea tā rātou e hina’aro e pure nō ni’a iho i te reira. ’A paraparau nō ni’a i te aura’a ’ia pure « noa i te mau taime ato’a, nā roto i te parau vaha ’e i roto i te ’ā’au ato’a ».

Te Parau Ha’api’ira’a ’e te mau Parau Fafau 81:5.Nō te ha’api’i mai nō ni’a i te mau parau tumu i roto i teie ’īrava, e nehenehe paha te mau melo o te ’utuāfare e fa’a’ite i te mau hi’ora’a nō te mau taime ’a ’ite ai rātou i te « paruparu » ’e ’ua tauturu mai ’aore rā, ’ua ha’apūai mai te hō’ē ta’ata ia rātou. E nehenehe ato’a ’outou e māta’ita’i i te mau video nō ni’a i te tāvinira’a ia vetahi ’ē, mai « Works of God » ’aore rā, « The Miracle of the Roof » (ChurchofJesusChrist.org). ’A ’āparau nāhea e nehenehe ai i tō ’outou ’utuāfare ’ia tāvini tāmau noa i te tahi ’e te tahi nā roto i te mau ravera’a ’ōhie.

Te Parau Ha’api’ira’a ’e te mau Parau Fafau 82:8–10.E nehenehe paha te hō’ē ha’uti ’ōhie e tauturu i tō ’outou ’utuāfare ’ia ’ite i te māuruuru nō te mau fa’auera’a a te Atua. E nehenehe te hō’ē melo o te ’utuāfare e hōro’a i te mau arata’ira’a nō te tauturu i te hō’ē melo o te ’utuāfare tei tā’amuhia te mata ’ia hāmani i te hō’ē mā’a ’amu’amu ’aore rā, ’ia haere nā te hō’ē vāhi fifi. ’A feruri i te hō’ē ’ohipa ’ārearea ’e te māramarama ! I muri iho ’a ’āparau e mea nāhea te mau fa’auera’a a te Atua e riro ai mai te mau arata’ira’a i roto i teie ha’uti.

Te Parau Ha’api’ira’a ’e te mau Parau Fafau 82:18–19E aha te nehenehe i te melo tāta’itahi o te ’utuāfare ’ia rave nō te « fa’arahi i tōna tāreni » ’e « ’ia noa’a te tahi atu ā mau tāreni » ? E mea ’ārearea paha ’ia fa’atupu i te hō’ē ha’utira’a fa’a’ite’itera’a tāreni. ’A feruri i te mau rāve’a nō te fa’a’ite i te mau tāreni e ’ere i te mea ’ōhie ’ia fa’a’ite (mai te mau hōro’a pae vārua; ’a hi’o Te Parau Ha’api’ira’a ʼe te mau Parau Fafau 46:11–26). Nāhea tātou e nehenehe ai e fa’a’ohipa i tō tātou mau tāreni ’e e fa’a’ite i te mau mea e vai ra ia tātou nō te ha’amaita’i i tō tātou ’utuāfare ’e te mau ta’ata tupu ? E aha te aura’a e fa’a’ohipa i tō tātou tāreni « ma te mata rōtahi i ni’a i te hanahana o te Atua » ?

Nō te tahi atu mau mana’o nō te ha’api’ira’a i te mau tamari’i, hi’o te arata’i o teie hepetoma i roto Mai, pe’e mai—nō te Paraimere.

Hīmene tei mana’ohia : Hi’o « Have I Done Any Good ? » Hymns no. 223; hi’o ato’a « Te mau mana’o nō te ha’amaita’i i te tuatāpapara’a pāpa’ira’a mo’a a tō ’outou ’utuāfare »

Ha’amaita’ira’a i tā tātou ha’api’ira’a

’A ani i te mau uira’a e arata’i i te ’ohipa. ’A feruri i te mau uira’a e ’ume i te mau melo o te ’utuāfare ’ia feruri i ni’a i te huru e nehenehe tā rātou e ora hope atu ā i te ’evanelia. « E ’ere teie i te mau uira’a nō te ’āparaura’a; nō te ha’aferurira’a te reira i te ta’ata hō’ē » (Te ha’api’ira’a mai tā te Fa’aora,31

Fa’ahōho’ara’a ’o Iesu e fa’aora ra i te hō’ē ta’ata nā Dan Burr